Nýtt tæki á endurhæfingardeild Fjórðungssjúkrahússins

Nýja göngu- og hlaupabrettið komið á endurhæfingadeildina.  Ljósm. Anna Þóra ÁrnadóttirNýja göngu- og hlaupabrettið komið á endurhæfingadeildina.
Ljósm. Anna Þóra Árnadóttir
Nýverið var nýtt tæki tekið í notkun á endurhæfingardeild Fjórðungssjúkrahússins í Neskaupstað. Tækið er göngu- og hlaupabretti ekki ósvipað brettunum á líkamsræktarstöðvum en það er með mjög nákvæmum hraðastillingum og hentar vel við endurhæfingu margra sjúklinga. Það var Síldarvinnslan sem færði endurhæfingardeildinni brettið að gjöf.
 
Anna Þóra Árnadóttir, yfirsjúkraþjálfari á endurhæfingardeildinni, segir að tækið hafi þegar sannað sig. „Við notum tækið sérstaklega fyrir sjúklinga sem ekki geta staðið í fæturna af sjálfsdáðum og það hefur sýnt sig að það kemur að afar góðum notum. Við getum notað tækið fyrir alla aldurshópa. Elsti sjúklingurinn sem hefur haft not af tækinu er yfir sjötugt en sá yngsti einungis þriggja ára. Við festum sjúklingana í svonefnt upphengi, svonefnt Light Gait, en það var Samvinnufélag útgerðarmanna sem færði endurhæfingardeildinni það að gjöf. Það er ómetanlegt fyrir okkur að eiga góða að og Síldarvinnslan og Samvinnufélagið hafa reynst okkur afar vel.  Það skiptir miklu máli að við getum boðið sjúklingum á Austurlandi góða þjónustu og ekki þurfi að stefna þeim suður í jafn ríkum mæli og áður. Aðstaðan hjá okkur til að veita þjónustu verður sífellt betri og það er afar mikilvægt fyrir samfélagið hér eystra,“ segir Anna Þóra.
 
Sjúklingur í upphengi á nýja brettinu.  Ljósm. Anna Þóra ÁrnadóttirSjúklingur í upphengi á nýja brettinu.
Ljósm. Anna Þóra Árnadóttir

Góð veiði hjá togurunum

Gullver NS að landa á Seyðisfirði í dag. Ljósm. Ómar BogasonGullver NS að landa á Seyðisfirði í dag.
Ljósm. Ómar Bogason
Ísfisktogararnir Gullver NS, Vestmannaey VE og Bergey VE eru allir að landa fullfermi í dag. Gullver landar á Seyðisfirði, Vestmannaey í Neskaupstað og Bergey í Vestmannaeyjum. Samtals er afli skipanna 257 tonn, mest þorskur og ýsa.
 
Þórhallur Jónsson var skipstjóri á Gullver í veiðiferðinni og segir hann að hún hafi gengið vel. „Það var í reynd jöfn og góð veiði allan túrinn. Við byrjuðum í þorski á Fætinum. Síðan var farið í Litladýpi og tekin þar tvö hol. Þar reyndist mest vera ýsa og það var ekki ætlunin að fá hana í ríkum mæli. Við færðum okkur út á Þórsbanka og fengum þar góðan þorsk í sólarhring eða svo. Í gærmorgun færðum við okkur upp á Herðablað og lentum þar í fínni þorskveiði. Við komum síðan til löndunar klukkan átta í morgun með 111 tonn. Þetta er betri afli en verið hefur að undanförnu. Líklega er fiskurinn kominn í loðnuna hérna fyrir austan,“ segir Þórhallur. 
 
Gullver mun halda á ný til veiða eftir hádegi á morgun.
 
Þegar rætt var við Jón Valgeirsson skipstjóra á Bergey í morgun var skipið á leið til Vestmannaeyja. „Við verðum komnir seinni partinn til Eyja. Við erum hérna í skíta helvítis austan brælu. Bæði við og Vestmannaey vorum mest á Breiðdalsgrunni í túrnum og við vorum helst við Bæli karlsins. Einnig var farið út á Þórsbanka en þar var heldur tregt. Við erum með fullfermi þannig að vart er hægt að kvarta og Vestmannaey fór með fullfermi til Neskaupstaðar. Aflinn hjá okkur skiptist til helminga, þorskur og ýsa. Það verður stoppað í landi í sólarhring eða svo og síðan verður haldið á ný til veiða,“ segir Jón.

Fyrsta loðnulöndunin í tæplega þrjú ár

Fyrsta loðnulöndun á Íslandi í tæplega þrjú ár. Ljósm. Sigurður Grétar GuðmundssonFyrsta loðnulöndun á Íslandi í tæplega þrjú ár.
Ljósm. Sigurður Grétar Guðmundsson
Sl. laugardag landaði grænlenska skipið Polar Amaroq tæplega 700 tonnum af frystri loðnu á Eskifirði. Starfsmenn Tandrabergs ehf. hófu löndunina snemma um morguninn og lauk henni um kvöldið. Þessi loðnulöndun markar tímamót því hún er sú fyrsta hér á landi í tæplega þrjú ár.
 
Polar Amaroq fékk aflann í hinu svonefnda trollhólfi austur af landinu. Aflinn fékkst að mestu í þremur holum en fyrsta holið var tekið í mjög slæmu veðri og gaf einungis 20-30 tonn. Loðnan sem veiddist var hin fallegasta og voru um það bil 40 stk. í kílóinu. Nokkur áta var í loðnunni.
 
Skipstjóri á Polar Amaroq í veiðiferðinni var Sigurður Grétar Guðmundsson og segir hann það afar góða tilfinningu að vera farinn að veiða loðnu á ný. 
 
Polar Amaroq hélt á ný til veiða strax að löndun lokinni. Þegar haft var samband við skipið í morgun var það búið að taka eitt 300 tonna hol og var unnið að frystingu um borð af fullum krafti.

Nýr aðalbókari

Rakel KristinsdottirRakel KristinsdóttirAuður Hauksdóttir aðalbókari Síldarvinnslunnar mun láta af störfum á næstu mánuðum. Auður hefur starfað hjá fyrirtækinu frá árinu 1991, gegnt starfi aðalbókara frá árinu 2000 og skilað afar góðu dagsverki. Það er mikil eftirsjá að Auði en það á við hér eins og víðast hvar annars staðar að maður kemur í manns stað.
 
Nýr aðalbókari var ráðinn úr hópi 16 umsækjenda seint á síðasta ári og hóf hann störf í ársbyrjun. Nýi starfsmaðurinn er Rakel Kristinsdóttir. Rakel er fædd og alin upp í Reykjavík en á ættir meðal annars að rekja til Mjóafjarðar. Eftir að hún lauk námi í Verslunarskólanum dvaldi hún erlendis við nám og störf í átta ár. Dvalarstaðirnir voru París og London og það var listnám sem hún lagði stund á. Þegar heim til Íslands var komið hóf hún störf meðal annars á listasviðinu og annaðist uppsetningu á söngleiknum Annie í Austurbæ í Reykjavík. Í framhaldinu hóf Rakel að starfa við bókhald og lagði stund á nám í viðskiptafræðum við Háskólann á Akureyri. Að því námi loknu lá leiðin í Háskóla íslands þar sem hún lauk námi í reikningsskilum og endurskoðun. Síðastliðin sjö ár starfaði Rakel hjá endurskoðunarfyrirtækinu KPMG.
 
Rakel var spurð að því hvers vegna hún hefði sótt um aðalbókarastarfið hjá Síldarvinnslunni. „Mér fannst það spennandi og það hentar vel minni menntun og starfsreynslu. Það er áskorun fyrir mig og 12 ára son minn að flytja út á land og upplifa eitthvað nýtt og svo finnst mér mikilvægt að kynnast íslenskum sjávarútvegi. Ég hef áhuga á útivist og það er freistandi að búa á stað þar sem nálægðin við náttúruna er mikil. Austurland hefur upp á margt að bjóða og ég ætla að njóta þess. Nú erum við flutt til Neskaupstaðar og okkur líst báðum afar vel á það sem mætir okkur þó vetrarveðrið hafi verið óblítt á köflum að undanförnu. Sonur minn, Kristófer Jökull Jóhannsson, byrjaði að sjálfsögðu strax í Nesskóla þar sem hann lætur vel af sér og að auki er hann byrjaður að æfa fótbolta af kappi og lærir á gítar. Það er alveg víst að hér á nýjum heimaslóðum verður hægt að fást við margt skemmtilegt auk þess sem starfið er spennandi í alla staði,“ segir Rakel.
 
Hér skal upplýst að Rakel hefur mikinn áhuga á umhverfismálum og á hún hugmyndina að verkefninu Skjótum rótum sem Landsbjörg og Skógræktarfélag Íslands hafa unnið að. Verkefnið felst í því að draga úr notkun flugelda um áramót án þess að það bitni á tekjum björgunarsveita.

Gott að hafa tvær vélar og tvær skrúfur

Bergey VE kemur til hafnar á annarri skrúfunni laust fyrir hádegi. Ljósm. Guðmundur AlfreðssonBergey VE kemur til hafnar á annarri skrúfunni laust fyrir hádegi. Ljósm. Guðmundur AlfreðssonÍsfisktogarinn Bergey VE kom til heimahafnar í Vestmannaeyjum nú skömmu fyrir hádegi með fullfermi að aflokinni sex daga veiðiferð. Skipstjóri var Ragnar Waage Pálmason og ræddi tíðindamaður heimasíðunnar við hann í morgun. „Jú, við erum á landleið með góðan afla en því miður fengum við í aðra skrúfuna í lokaholinu. Það er fúlt að fá í skrúfuna en nú er svo sannarlega gott að hafa tvær vélar og tvær skrúfur. Við siglum á sjö til átta mílna ferð á annarri skrúfunni og nálgumst Eyjarnar hratt og örugglega. Í þessum túr vorum við mest að fiska í Skaftárdýpi og Skeiðarárdýpi og fengum þar blandaðan afla. Aflinn er mest ýsa en einnig dálítið af þorski, ufsa, lýsu og karfa. Veðrið í þessari veiðiferð var hundleiðinlegt allan tímann, samfelld norðaustan bræla. Yfirleitt voru þetta 20-25 metrar en í fyrradag dúraði svolítið, þá voru bara 15. Þegar veðrið lét sem verst þurftum við að flýja upp að landinu,“ segir Ragnar.
 
Systurskipið Vestmannaey VE kom til löndunar í Vestmannaeyjum sl. nótt með fullfermi. Aflinn er blandaður og fékkst í Breiðamerkurdýpinu. Að sögn Egils Guðna Guðnasonar skipstjóra var það veðrið sem réði algerlega för í túrnum. „Þetta var erfitt. Við þurftum sífellt að vera að sæta lagi og urðum jafnvel að flýja upp í fjöru. Þetta var leiðindaveður allan túrinn og það getur verið þreytandi,“ segir Egill Guðni.
 
Trollið fast í annarri skrúfu skipsins. Ljósm. Guðmundur AlfreðssonTrollið fast í annarri skrúfu skipsins.
Ljósm. Guðmundur Alfreðsson
  Bergey VE að leggjast að bryggju. Verið að landa úr Vestmannaey VE. Ljósm. Guðmundur AlfreðssonBergey VE að leggjast að bryggju. Verið að landa úr Vestmannaey VE. Ljósm. Guðmundur Alfreðsson  

Eftir flóðið

Eftir flóðið

Ólafur Gunnarsson, fyrrverandi framkvæmdastjóri Síldarvinnslunnar, hefur sent frá sér ritið Eftir flóðið en í því fjallar hann um uppbyggingu Síldarvinnslunnar eftir snjóflóðin sem féllu í Neskaupstað 20. desember 1974. Hér er um að ræða fróðlega samantekt sem varpar skýru ljósi á þá baráttu sem háð var fyrir enduruppbyggingu atvinnufyrirtækjanna sem skemmdust eða eyðilögðust í hamförunum, en fiskimjölsverksmiðja Síldarvinnslunnar gjöreyðilagðist og frystihús fyrirtækisins stórskemmdist.
 
Ólafur Gunnarsson var ráðinn framkvæmdastjóri fiskimjölsverksmiðju Síldarvinnslunnar árið 1968 og síðar sama ár tók hann einnig við starfi framkvæmdastjóra frystihúss fyrirtækisins. Þegar Ólafur settist í stól framkvæmdastjóra var hinum svonefndu síldarárum í raun lokið og sífellt meiri áhersla lögð á bolfiskveiðar og vinnslu. Síldarvinnslan festi kaup á fyrsta skuttogara landsmanna árið 1970, árið 1973 var stórt nótaskip keypt til loðnuveiða og sama ár bættist annar skuttogari í flota fyrirtækisins. Síldarbátarnir sem fyrirtækið hafði keypt á síldarárunum voru hins vegar seldir.
 
Segja má að ágætlega hafi tekist að laga starfsemi Síldarvinnslunnar að nýjum aðstæðum og síðla árs 1974 var staða fyrirtækisins nokkuð góð og var það rekið með hagnaði. En þá dundi ógæfan yfir og snjóflóðin áttu eftir að hafa gífurleg áhrif á allt samfélagið í Neskaupstað. Helstu atvinnufyrirtæki bæjarbúa voru rústir einar eða óstarfhæf eftir flóðin og það sem verra var þá fórust 12 manns í flóðunum, þar á meðal starfsmenn Síldarvinnslunnar. 
 
Ólafur Gunnarsson fyrrverandi framkvæmdastjóri Síldarvinnslunnar. Myndin er tekin árið 1982. Ljósm. Vilberg GuðnasonÓlafur Gunnarsson fyrrverandi framkvæmdastjóri Síldarvinnslunnar. Myndin er tekin árið 1982.
Ljósm. Vilberg Guðnason
Eftir hamfarirnar var oft fundað í stjórn Síldarvinnslunnar og gefa fundargerðir stjórnarinnar góða mynd af því hvernig brugðist var við áfallinu að hálfu fyrirtækisins. Í ritinu birtir Ólafur fundargerðir þeirra funda sem fjölluðu um viðbrögðin auk þess sem hann bætir við ýmsum upplýsingum. Þarna birtist saga baráttunnar fyrir endurreisn atvinnulífsins í bænum eftir flóðin og þau átök sem áttu sér stað um bótagreiðslur vegna skaðans. Mikill ágreiningur um upphæð bótagreiðslanna ríkti á milli Viðlagasjóðs og heimamanna og lauk samskiptunum við sjóðinn ekki fyrr en á árinu 1980 með sáttargerð. Þótti mat sjóðsins á bótagreiðslum og aðrar kröfur sem sjóðurinn setti fram afar ósanngjarnar. Til dæmis kemur fram í riti Ólafs að Viðlagasjóður hafi jafnvel talið eðlilegt að afkastamikil fiskimjölsverksmiðja yrði ekki reist á ný í Neskaupstað heldur einungis lítil beinaverksmiðja í tengslum við starfsemi frystihússins.
 
Eins og fyrr greinir var Síldarvinnslan tiltölulega öflugt fyrirtæki áður en flóðin féllu en í hönd fóru mikil erfiðleikaár sem reyndu mjög á stjórnendur þess. Uppbyggingin var kostnaðarsöm, bætur Viðlagasjóðs vanreiknaðar og sjávarútvegurinn almennt átti í rekstrarerfiðleikum. Þess skal getið að verðbólgan var mikil á umræddum tíma eða á bilinu 30 til 80% á árunum 1974-1983 og auðveldaði það ekki verkefni stjórnenda Síldarvinnslunnar.
 
Ólafur Gunnarsson gegndi starfi framkvæmdastjóra Síldarvinnslunnar til ársins 1984 en þá voru liðin 10 ár frá því að snjóflóðin félllu.
 
Nokkur eintök af riti Ólafs Gunnarssonar fást á skrifstofu Síldarvinnslunnar auk þess sem Bókasafnið í Neskaupstað og Skjala- og myndasafn Norðfjarðar hafa fengið eintök. Hægt er að verða sér úti um eintak með því að hringja á skrifstofu Síldarvinnslunnar og sækja síðan ritið þangað.
 
 

Fyrsta samfélagsskýrsla Síldarvinnslunnar

 

Fyrsta samfélagsskýrsla SíldarvinnslunnarSeint á síðasta ári gaf Síldarvinnslan út samfélagsskýrslu fyrirtækisins fyrir árið 2019. Skýrslan er aðgengileg á heimasíðu fyrirtækisins (svn.is). Um er að ræða fyrstu samfélagsskýrsluna sem Síldarvinnslan gefur út en hún er liður í að auka gegnsæi og greina frá ýmsum þáttum starfseminnar sem ekki eru endilega metnir í magni eða fjármunum. Skýrslan er gerð samkvæmt alþjóðlega staðlinum Global Reporting Initiative (GRI).
 
Samfélagsskýrslunni er ætlað að bæta vinnubrögð og auka umhverfisvitund. Í skýrslunni er gerð grein fyrir starfsemi fyrirtækisins og eins eru birtar upplýsingar er varða umhverfis- og samfélagsmál. Í skýrslunni segir eftirfarandi um starfsemi Síldarvinnslunnar:
 
„Síldarvinnslan einsetur sér að vera fyrirmynd um ábyrga og arðbæra viðskiptahætti og vinna í sátt við umhverfi og samfélag. Síldarvinnslan kappkostar að umgangast lífríki hafsins af virðingu og nýta sjávarauðlindina með sjálfbærum hætti. Lögð er áhersla á að fylgja ráðgjöf vísindanna, þar sem stuðst er við bestu vitneskju hverju sinni, til að sjálfbærni fiskistofna sé tryggð til framtíðar og komandi kynslóðir fái notið góðs af. Við veiðar og vinnslu er lögð áhersla á að lögum og reglum sé fylgt í hvívetna.
 
Síldarvinnslan framleiðir afurðir sínar eftir viðurkenndum stöðlum sem tryggja eiga sjálfbærni, rekjanleika og heilnæmi afurðanna. Allar starfsstöðvar félagsins eru undir eftirliti Matvælastofnunar (MAST). Félagið er með vottuð gæðastjórnunarkerfi sem styðja við þessi markmið.“
 
Í skýrslunni er ítarlega farið yfir þau umhverfisáhrif sem starfsemi Síldarvinnslunnar veldur og þá einkum losun gróðurhúsalofttegunda. Jafnframt er farið yfir hvað áunnist hefur á sviði umhverfismálanna á undanförnum árum. Þar er meðal annars getið um ný og umhverfisvænni fiskiskip og raforkuvæðingu fiskimjölsverksmiðja.
 
Ítarlega er fjallað um starfsmannamál og kemur þar til dæmis fram að fyrsta jafnlaunaúttektin hjá fyrirtækinu var framkvæmd árið 2018 og fannst þá enginn óútskýrður launamunur. Viðhaldsúttekt var síðan framkvæmd árið 2019 og varð niðurstaðan hin sama.
 
Í skýrslunni er einnig fjallað um þætti eins og öryggi og heilsu starfsfólksins, fræðslu og uppbyggingu mannauðs, mannréttindi og kjarasamninga. Þá kemur skýrt fram að vilji fyrirtækisins er að hafa jákvæð áhrif á samfélagið og nærumhverfi sitt. Fyrirtækið veitir margvíslega styrki til góðra málefna og styður við bakið á ýmsum samtökum og stofnunum. Þá hefur verið lögð áhersla á samstarf við menntastofnanir og stuðlað að fræðslu um sjávarútveginn á meðal ungs fólks.
 
Er fólk eindregið hvatt til að kynna sér efni samfélagsskýrslu Síldarvinnslunnar á heimasíðu fyrirtækisins.

Sjávarútvegsskóli unga fólksins blómstrar

Nemendur sem útskrifuðust úr Sjávarútvegsskóla Síldarvinnslunnar árið 2013. Ljósm. Margrét ÞórðardóttirNemendur sem útskrifuðust úr Sjávarútvegsskóla Síldarvinnslunnar árið 2013. Ljósm. Margrét ÞórðardóttirÁrið 2013 hóf Sjávarútvegsskóli Síldarvinnslunnar starfsemi í Neskaupstað. Mikill áhugi reyndist vera fyrir skólastarfinu og voru nemendur 27 að tölu, 17 stúlkur og 10 piltar. Nemendurnir voru 14-15 ára að aldri og voru þeir á launum á meðan skólinn starfaði. Launin voru sambærileg laununum sem greidd voru í Vinnuskóla Fjarðabyggðar.
 
Sjávarútvegsskóli Síldarvinnslunnar var tilraunaverkefni en forsvarsmenn fyrirtækisins töldu mikilvægt að gefa ungmennum kost á að fræðast um sjávarútveg. Í skólanum var fjallað um gæða- og markaðsmál, starfsmannamál, menntun starfsfólks í atvinnugreininni og sögu sjávarútvegsins. Mikil áhersla var lögð á heimsóknir í sjávarútvegsfyrirtæki og fyrirtæki sem tengjast sjávarútveginum. Til dæmis var fiskiðjuver heimsótt og fiskimjölsverksmiðja og einnig netagerð, vélaverkstæði, rannsóknastofur o.fl. Þá var farið um borð í fiskiskip og allur búnaður um borð í þeim skoðaður ásamt því að fjallað var um starfsemina um borð.
 
Þórhallur Jónasson heldur fyrirlestur í Sjávarútvegsskólanum árið 2013. Ljósm. Margrét ÞórðardóttirÞórhallur Jónasson heldur fyrirlestur í Sjávarútvegs-skólanum árið 2013. Ljósm. Margrét ÞórðardóttirSjávarútvegsskólinn vakti strax mikla athygli og var mörgum ljóst að þörf væri fyrir slíkan skóla. Staðreyndin er sú að íslenska skólakerfið veitir litla innsýn í þessa grunnatvinnugrein þjóðarinnar og unnt er að alast upp í sjávarplássi án þess að öðlast þekkingu á veiðum og vinnslu. Því er nauðsynlegt að fræða unga fólkið um atvinnugreinina með öðrum hætti.
 
Víða kviknaði áhugi fyrir starfsemi Sjávarútvegsskóla Síldarvinnslunnar og strax árið 2014 var boðið upp á fræðsluna í allri Fjarðabyggð. Þá var skólinn nefndur Sjávarútvegsskóli Fjarðabyggðar. Árið 2015 var fræðslan síðan skipulögð um allt Austurland og var þá nafni skólans breytt og hann nefndur Sjávarútvegsskóli Austurlands. Árið 2016 hóf Háskólinn á Akureyri að annast skólahaldið og teygði skólinn þá anga sína til Norðurlands og reyndar víðar. Eftir að Háskólinn tók við skólanum hefur hann verið nefndur Sjávarútvegsskóli unga fólksins. Tekið skal fram að fljótlega varð Sjávarútvegsskólinn samvinnuverkefni með viðkomandi sveitarfélögum í gegnum vinnuskóla þeirra, en skólahaldið er að öllu leyti fjármagnað af fyrirtækjum í sjávarútvegi.
 
Nemendur Sjávarútvegsskóla Síldarvinnslunnar í heimsókn í fiskiðjuveri fyrirtækisins árið 2013. Ljósm. Margrét ÞórðardóttirNemendur Sjávarútvegsskóla Síldarvinnslunnar í heimsókn í fiskiðjuveri fyrirtækisins árið 2013.
Ljósm. Margrét Þórðardóttir
Umsjónarmaður skólans eftir að Háskólinn á Akureyri tók við starfseminni er Guðrún Arndís Jónsdóttir forstöðumaður Sjávarútvegsmiðstöðvar Háskólans á Akureyri. Guðrún upplýsir að Sjávarútvegsskólinn hafi stækkað mikið og einkum á síðasta ári. Á árinu 2018 voru 157 nemendur í skólanum en í fyrra voru þeir um fjögur hundruð. Þá hefur starfsstöðvum skólans fjölgað og á síðasta ári hófst starfsemi í Reykjavík, Vesturbyggð og á Sauðárkróki. Þá greinir Guðrún frá því að Sjávarútvegsskólinn hafi vakið athygli erlendis og nú sé ráðgert að koma á fót Fiskeldisskóla unga fólksins sem myndi byggja á sömu hugmyndafræði og sambærilegu skipulagi.
 
Það verður vart annað sagt en Sjávarútvegsskóli Síldarvinnslunnar, sem varð til árið 2013, hafi svo sannarlega skotið föstum rótum og haft áhrif víða til hagsbóta fyrir mikilvægustu atvinnugrein þjóðarinnar.
 
 
 
 
 

Fyrstu loðnutonnin frá 2018 – bullandi bræla á miðunum

Grænlenska uppsjávarskipið Polar Amaroq. Ljósm. Hákon ErnusonGrænlenska uppsjávarskipið Polar Amaroq.
Ljósm. Hákon Ernuson
Grænlenska skipið Polar Amaroq fékk 20-30 tonn af loðnu í gærkvöldi í trollhólfinu austur af landinu en það er fyrsta loðnan sem veiðist hér við land frá árinu 2018. Tekið var eitt hol í leiðindaveðri. Heimasíðan ræddi við Sigurð Grétar Guðmundsson skipstjóra. „Við prufuðum að kasta í gær rétt áður en dimmdi en veðrið var afskaplega leiðinlegt. Við leituðum síðan í nótt en það er bara ekkert veiðiveður. Við fengum um 20-30 tonn af stórri loðnu en það er töluverð áta í henni. Við munum frysta aflann um borð. Það er bullandi bræla og ég held að sé ekkert annað að gera en að leita vars,“ segir Sigurður.
 
Útgefinn loðnukvóti Polar Amaroq er 1155 tonn.
 
 
 
 

Gullver landar á Seyðisfirði

Gullver NS að landa. Ljósm. Ómar BogasonGullver NS að landa. Ljósm. Ómar BogasonÍsfisktogarinn Gullver NS kom til heimahafnar á Seyðisfirði í morgun með tæplega 96 tonn. Aflinn er mestmegnis þorskur og ufsi. Landað verður úr skipinu í dag og það mun síðan halda til veiða á ný í kvöld. Heimasíðan ræddi stuttlega við Rúnar L. Gunnarsson skipstjóra og spurði fyrst hvernig túrinn hefði gengið. „Hann gekk svona þokkalega en við vorum fimm daga að veiðum. Við hófum veiðar á Öræfagrunni og enduðum á Glettinganesflakinu. Mér finnst vanta dálítinn kraft í þorskinn, það hefði mátt ganga betur að eiga við hann. Það liggur fyrir að loðna er komin hér fyrir austan land því það er talsvert af henni í fiskinum,“ segir Rúnar.
 
Að sögn Ómars Bogasonar hjá frystihúsinu á Seyðisfirði fer vinnslan þar vel af stað og enginn skortur á hráefni. Segir hann mjög mikilvægt að fyrirtækin á Seyðisfirði séu farin að starfa eftir skriðuföllin og lífið á staðnum sé óðum að nálgast eðlilegt horf.
 
 

Eyjarnar báðar með fullfermi

Bergey VE. Ljósm. Egill Guðni GuðnasonBergey VE. Ljósm. Egill Guðni GuðnasonÍsfisktogararnir Bergey VE og Vestmannaey VE komu báðir til heimahafnar í gær með fullfermi eða á milli 70 og 80 tonn. Bæði skip munu síðan halda til veiða á ný á morgun. Heimasíðan ræddi við þá Birgi Þór Sverrisson skipstjóra á Vestmannaey og Jón Valgeirsson skipstjóra á Bergey. Birgir sagði að veður hefði verið þokkalegt í veiðiferðinni miðað við árstíma. „Það var engin blíða en varla hægt að kvarta. Lengst af var austan kaldi og dálítill fræsingur. Aflinn hjá okkur var mest ýsa og ufsi. Við byrjuðum að veiða á Gerpisflaki og sigum síðan suður á Breiðdalsgrunn. Þarna var ágætis nudd. Við enduðum síðan á Öræfagrunni,“ sagði Birgir Þór.
 
Jón tók undir með Birgi og sagði vart unnt að kvarta undan veðri. „Við lentum í brælu í upphafi túrsins en þá vorum við að veiða á Brettingsstöðum, en síðan var veðrið þokkalegt. Við byrjuðum í þorski en héldum síðan suður með Austfjörðum og fengum mest ýsu. Það var sérstaklega staldrað við á Gerpisflakinu. Við kláruðum síðan túrinn í Skeiðarárdýpinu,“ sagði Jón.

Vinnsla hafin enn á ný í frystihúsinu á Seyðisfirði

Starfsfólk frystihússins er ánægt með að hefja störf að nýju. Ljósm. Ómar BogasonStarfsfólk frystihússins er ánægt með að hefja störf að nýju. Ljósm. Ómar BogasonFrá því var greint að sl. fimmtudagsmorgun hafi vinnsla hafist í frystihúsi Síldarvinnslunnar á Seyðisfirði eftir skriðuföllin. Það stóð ekki lengi því húsið var rýmt eftir hádegi sama dag. Í gær var haldinn fundur með starfsfólkinu þar sem rætt var um stöðu mála í kjölfar hamfaranna. Á fundinum voru fulltrúar frá lögreglunni, sveitarfélaginu Múlaþingi, almannavörnum og veðurstofunni auk fulltrúa frá Síldarvinnslunni. Farið var yfir stöðu mála með starfsfólkinu bæði á íslensku og ensku og fólk meðal annars frætt um öll öryggismál. Ómar Bogason hjá frystihúsinu segir að fundurinn hafi tekist vel og nú sé allt ljósara í hugum starfsfólksins en áður. „Í málum sem þessum skiptir öllu máli að fólk fái haldgóðar og réttar upplýsingar,“ segir Ómar.
 
Vinnsla hófst enn á ný í frystihúsinu í morgun og að sögn Ómars er fólk miklu rólegra eftir upplýsingafundinn.
 
Gert er ráð fyrir að fljótlega verði birt nýtt ofanflóðahættumat fyrir Seyðisfjörð og munu þá umræður hefjast um ráðstafanir til lengri tíma á staðnum.

Þokkalegasta kolmunnaveiði

Bjarni Ólafsson AK er á landleið með fullfermi af kolmunna. Ljósm. Smári Geirsson Bjarni Ólafsson AK er á landleið með fullfermi af kolmunna. Ljósm. Smári Geirsson Bjarni Ólafsson AK, Beitir NK og Börkur NK hafa verið að kolmunnaveiðum suður af Færeyjum að undanförnu. Bjarni Ólafsson er á landleið með fullfermi og Beitir og Börkur eru langt komnir með að fylla. Heimasíðan ræddi í morgun við skipstjórana á Bjarna Ólafssyni og Beiti um veiðarnar.
 
Runólfur Runólfsson, skipstjóri á Bjarna Ólafssyni, sagði að skipið kæmi til löndunar í Neskaupstað í kvöld. „Við erum með fullfermi eða 1810 tonn en veiðin hófst 5. janúar sl. Aflinn fékkst í sjö holum en það er mjög lengi dregið eða frá 18 tímum og upp í 32. Stærsta holið okkar var 505 tonn en það minnsta 130. Veiðin fer fram í færeysku lögsögunni alveg við skosku línuna. Það hefur verið töluverður straumur en veiðin hefur engu að síður gengið þokkalega. Það er spurning hve lengi er unnt að veiða þarna því fiskurinn er að ganga suðureftir og hann spáir ekki vel. Það fer brátt að bræla og síðan verður vart veiðiveður fyrr en um miðja næstu viku,“ segir Runólfur.
 
Tómas Kárason, skipstjóri á Beiti, sagði að veiðiferðin hefði gengið vel. „Við erum komnir með tæp 3000 tonn og erum væntanlega á okkar síðasta holi. Það hefur verið hörkugangur í þessu. Við erum með nýtt troll frá Hampiðjunni og það virðist svínvirka. Aflinn hjá okkur hefur gjarnan verið töluvert meiri en hjá öðrum þrátt fyrir að við höfum dregið í styttri tíma. Við höfum verið að draga frá 6 tímum og upp í 24 og fengum til dæmis mjög gott hol eftir 12 tíma. Við erum nú á okkar ellefta holi og síðan verður lagt af stað í land síðar í dag eða í kvöld með fullfermi,“ segir Tómas.
 
Börkur var að toga í morgun og vantar um 400 tonn til að fylla. 
 
Gert er ráð fyrir að Beitir og Börkur muni landa í Neskaupstað og á Seyðisfirði.
 

Eyjarnar gera það gott

Vestmannaey VE að landa í Neskaupstað í gær. Ljósm. Smári GeirssonVestmannaey VE að landa í Neskaupstað í gær.
Ljósm. Smári Geirsson
Ísfisktogarar Bergs-Hugins, Vestmannaey VE og Bergey VE, lönduðu báðir í gær auk þess sem Bergey dró Bylgju VE að landi eftir að hún hafði fengið veiðarfæri í skrúfuna. Vestmannaey landaði í Neskaupstað en Bergey dró Bylgju til Akureyrar og landaði þar. Heimasíðan ræddi stuttlega við skipstjórana.
 
Birgir Þór Sverrisson, skipstjóri á Vestmannaey, sagði að afli skipsins hefði verið 73 tonn eða fullfermi. “Þetta var mest ufsi og ýsa og dálítið af karfa. Þetta var í reyndinni fínn túr og loksins kom dálítið ufsaskot sem lengi hefur verið beðið eftir. Aflann fengum við frá Skaftárdýpi og austur á Mýragrunn. Við fórum út eftir löndun og erum nú í Berufjarðarálnum. Hérna er sjórinn býsna kaldur og heldur lítið um fisk en hérna verðum við varir við loðnu,” segir Birgir Þór.
 
Jón Valgeirsson, skipstjóri á Bergey, sagðist ekki hafa verið með skipið í síðasta túr. “Það var Ragnar Waage Pálmason sem var með skipið. Þeir voru að fiska á Vestfjarðamiðum, fengu ýsu í Þverálsbotninum og þorsk á Strandagrunni. Þarna var ágætis veiði. Bylgja VE fékk í skrúfuna á Strandagrunni og þá tók Bergey hana í tog. Bylgja var síðan dregin í góðu veðri  í 150 mílur til Akureyrar þar sem mínir menn lönduðu rétt tæpum 60 tonnum. Ég kom um borð á Akureyri og haldið var til veiða í gærkvöldi að löndun lokinni. Nú erum við að keyra austur og ætlum að reyna fyrir okkur út af Langanesi til að byrja með,” segir Jón. 
 
Bergey VE tekur Bylgju VE í tog. Ljósm. Hákon SeljanBergey VE tekur Bylgju VE í tog. Ljósm. Hákon Seljan

Vinnsla hafin í frystihúsinu á Seyðisfirði

rystihúsið á Seyðisfirði. Gullver NS við bryggjuna. Ljósm. Ómar BogasonFrystihúsið á Seyðisfirði. Gullver NS við bryggjuna.
Ljósm. Ómar Bogason
Í morgun hófst vinnsla í frystihúsi Síldarvinnslunnar á Seyðisfirði en hún féll niður þegar stóra skriðan féll þar 18. desember sl. Heimasíðan ræddi við Ómar Bogason hjá frystihúsinu og spurði fyrst hvort fólk væri ekki ánægt með að geta hafið störf að nýju. „Jú, það má með sanni segja. Fólk er afskaplega ánægt með að lífið sé aftur að færast í fyrra horf. Við fengum heitt vatn frá fjarvarmaveitunni í húsið í gær og þá var hafist handa við að þrífa og allt var gert spikk og span. Gullver NS kom síðan í morgun með tæp 100 tonn af blönduðum afla þannig að ekki skortir hráefnið. Nú landar Gullver við fiskvinnslubryggjuna en síðast þurfti hann að landa við Strandarbakka vegna þess að ekki var fært í gegnum skriðuna. Fyrstu dagana verður starfsfólkið flutt með rútu í gegnum skriðusvæðið að frystihúsinu, en reynt er að takmarka umferðina þar sem mest vegna þess að unnið er að því að breikka veginn í gegn og hreinsa svæðið,“ segir Ómar.

Stækkun fiskimjölsverksmiðjunnar í Neskaupstað úr 1400 tonnum í 2380 tonn – aukin áhersla á framleiðslu verðmætra próteinríkra afurða

Braedsla ny 1Verksmiðjan eftir fyrirhugaða stækkun séð frá norðri. Nýbyggingar eru gular að lit með dekkri þökum.Verksmiðjan eftir fyrirhugaða stækkun séð frá norðri. Nýbyggingar eru gular að lit með dekkri þökumÁkvörðun hefur verið tekin um að stækka fiskimjölsverksmiðju Síldarvinnslunnar í Neskaupstað og auka afköst við hrognavinnslu um helming. Eftir stækkunina verður í verksmiðjunni eining eða lítil verksmiðja sem hentar sérstaklega til að vinna afskurð frá fiskiðjuveri fyrirtækisins.
 
Fyrir liggur að fiskimjölsverksmiðjur á Íslandi eru of margar og mikilvægt að auka hagræðingu í fiskimjölsiðnaðinum. Síldarvinnslan lokaði verksmiðju sinni í Helguvík á síðasta ári og var það liður í hagræðingaraðgerðum. Á Íslandi er búið við þær aðstæður að verksmiðjurnar þurfa að geta unnið mikinn afla á skömmum tíma og er því nauðsynlegt að þær séu afkastamiklar. Einnig eru aðstæður oft þannig að einungis þarf að vinna afskurð frá manneldisvinnslu og til þess þarf ekki afkastamikla verksmiðju heldur er mikilvægt að geta unnið hráefnið jafnóðum. Ákvörðun um stækkun verksmiðjunnar í Neskaupstað og uppsetningu litlu verksmiðjueiningarinnar tekur mið af þessum aðstæðum. Þegar hefur fengist starfsleyfi fyrir verksmiðju í Neskaupstað sem á að geta afkastað 2380 tonnum á sólarhring en gert er ráð fyrir að litla verksmiðjan afkasti 100-380 tonnum. Nú afkastar verksmiðjan í Neskaupstað að hámarki 1400 tonnum á sólarhring.
 
Hin auknu afköst munu gera kleift að vinna stóra farma á ásættanlegum tíma og litla verksmiðjan verður með sveigjanlegum afköstum þannig að unnt verður að vinna allt hráefni sem ferskast. Með þessu fyrirkomulagi ætti orkunýting að vera eins og best þekkist. Með tilkomu litlu verksmiðjunnar verður lögð áhersla á að auka gæði framleiðslunnar og þróa áfram aðferðir til að framleiða verðmætar próteinríkar afurðir.
 
Verksmiðjan eftir fyrirhugaða stækkun séð frá vestri. Nýbyggingar gular að lit með dekkri þökumVerksmiðjan eftir fyrirhugaða stækkun séð frá vestri. Nýbyggingar gular að lit með dekkri þökumGert er ráð fyrir að framkvæmdum við verksmiðjuna verði skipt í tvo áfanga. Í fyrri áfanganum verður reist 2000 fermetra hús með öllu tiheyrandi, þar á meðal öflugri loftræstingu og lykteyðingarbúnaði. Þá verður allur búnaður í litlu verksmiðjuna keyptur og hún sett upp. Gert er ráð fyrir að kostnaður við fyrri áfangann verði um 2,3 milljarðar króna. Í síðari áfanganum verður komið upp búnaði í verksmiðjunni sem eykur afkastagetu hennar í 2380 tonn. Unnt verður að koma búnaðinum fyrir í skrefum þannig að framkvæmdir munu ekki trufla starfsemi verksmiðjunnar. Áætlaður kostnaður við þennan síðari áfanga er um 2 milljarðar króna.
 
Einnig er ákveðið að ráðast í verulegar framkvæmdir við stækkun á hrognavinnslunni. Til dæmis þarf að stækka löndunarhús um 300 fermetra og fjárfesta í nýjum búnaði. Gert er ráð fyrir að kostnaður við þær framkvæmdir verði hátt í 500 milljónir króna.

Fyrstu togaralandanir ársins

Nú er landað úr Gullver NS við Strandarbakka á Seyðisfirði. Ljósm. Ómar BogasonNú er landað úr Gullver NS við Strandarbakka á Seyðisfirði. Ljósm. Ómar BogasonÍsfisktogarar Síldarvinnslunnar og Bergs-Hugins komu úr fyrstu veiðiferð ársins í gær og í nótt. Bergey VE kom til hafnar í Vestmannaeyjum í gær með um 60 tonn. Uppistaða aflans var ýsa. Vestmannaey VE kom síðan til löndunar sl. nótt með 55 tonn og var aflinn þar einnig að mestu ýsa. Að sögn Arnars Richardssonar rekstrarstjóra byrjar árið snemma að þessu sinni en í fyrra komust skip Bergs-Hugins ekki á sjó fyrr en 13. janúar vegna veðurs.
 
Gullver NS er að landa á Seyðisfirði í dag. Afli skipsins er 65 tonn og er uppistaðan þorskur og ýsa. Vegna hamfaranna í desember er ekki landað úr skipinu við frystihúsið heldur við Strandarbakka. Er þetta í fyrsta sinn sem fiski er landað þar en ferjan Norræna er afgreidd við Strandarbakka. Að sögn Ómars Bogasonar er gert ráð fyrir að vinnsla í frystihúsinu geti hafist í fyrri hluta næstu viku en unnið er að hreinsunarstarfi á Seyðisfirði af eins miklum krafti og unnt er.

Minni afli hjá ísfisktogurunum en svipaður hjá Blængi

Ísfisktogararnir fiskuðu minna á nýliðnu ári en á árinu 2019. Ljósm. Guðmundur AlfreðssonÍsfisktogararnir fiskuðu minna á nýliðnu ári en á árinu 2019. Ljósm. Guðmundur AlfreðssonÍsfisktogarar Síldarvinnslunnar og Bergs-Hugins öfluðu minna á nýliðnu ári en á árinu 2019. Er helsta skýringin minni sókn vegna aðstæðna sem mynduðust á mörkuðum í kjölfar heimsfaraldurs. Hinsvegar er verðmæti aflans stöðugt milli ára. Afli ísfisktogarnna á árinu 2020 og verðmæti afla þeirra var sem hér segir:
 
               Afli                    Verðmæti  
Vestmannaey VE 3.900 tonn 1.170 mkr
Bergey VE 4.450 tonn 1.330 mkr
Gullver NS 5.100 tonn 1.260 mkr
 
Aðra sögu er að segja af frystitogaranum Blængi NK. Afli hans var svipaður á árunum 2019 og 2020 en verðmæti aflans jókst töluvert á milli áranna. Á árinu 2020 fiskaði Blængur 7.050 tonn og nam verðmæti aflans 2.413 milljónum króna.

Gott ár í uppsjávarveiðum

Norðfjarðarhöfn á makrílvertíð sl. sumar. Ljósm. Smári GeirssonNorðfjarðarhöfn á makrílvertíð sl. sumar.
Ljósm. Smári Geirsson
Þrátt fyrir loðnuleysi telst árið 2020 hafa verið gott ár hvað varðar veiðar á uppsjávartegundum. Skip Síldarvinnslunnar, Beitir NK og Börkur NK, öfluðu vel af síld, makríl og kolmunna og sama á við um um Bjarna Ólafsson AK sem er í eigu dótturfélagsins Runólfs Hallfreðssonar ehf. Þá var verð á uppsjávarafurðum gott þannig að afkoman af veiðunum var ágæt. Afli skipanna og aflaverðmæti var sem hér segir:

      Heildarafli              Verðmæti      
 Beitir NK    44.894 tonn 1.929 mkr
Börkur NK 46.918 tonn

1.982 mkr

Bjarni Ólafsson AK 32.034 tonn 1.379 mkr

 

Fiskiðjuver Síldarvinnslunnar í Neskaupstað tók á móti 46.882 tonnum af makríl og síld til vinnslu á nýliðnu ári. Móttekinn makríll nam 23.098 tonnum og móttekin síld 23.784 tonnum. 

Fiskimjölsverksmiðjur Síldarvinnslunnar tóku samtals á móti 123 þúsundum tonnum af uppsjávarfiski. Verksmiðjan í Neskaupstað tók á móti 106 þúsund tonnum og verksmiðjan á Seyðisfirði tók á móti 17 þúsund tonnum af kolmunna.

Skipin á sjó eftir hátíðar

Polar Amaroq í Norðfjarðarhöfn. Skipið heldur væntanlega til loðnuleitar í kvöld. Ljósm. Hákon ErnusonPolar Amaroq í Norðfjarðarhöfn. Skipið heldur væntanlega til loðnuleitar í kvöld. Ljósm. Hákon ErnusonSkip Síldarvinnslunnar og tengdra fyrirtækja hafa nú öll haldið til veiða nema frystitogarinn Blængur NK sem er í slipp á Akureyri og Polar Amaroq sem taka mun þátt í loðnuleit. Kolmunnaskipin Beitir NK og Börkur NK létu úr höfn aðfaranótt sunnudags og Bjarni Ólafsson AK hélt fljótlega í kjölfar þeirra. Börkur og Beitir höfðu kastað í morgun á kolmunnamiðunum suðaustur af Færeyjum en færeysk skip hafa verið þar að veiðum að undanförnu. 
 
Ísfisktogararnir héldu til veiða um helgina. Bergey VE sigldi út úr Vestmannaeyjahöfn á laugardagsmorgun og Vestmannaey VE í gær. Gullver NS hélt frá Seyðisfirði á laugardag.
 
Grænlenska uppsjávarskipið Polar Amaroq heldur væntanlega til loðnuleitar í kvöld. Mun Polar Amaroq leita að loðnu ásamt hafrannsóknaskipunum Bjarna Sæmundssyni og Árna Friðrikssyni og veiðiskipunum Ásgrími Halldórssyni SF og Aðalsteini Jónssyni SU.

Undirflokkar