Báðar Eyjarnar með fullfermi

Bergey VE að veiðum.  Ljósm. Egill Guðni GuðnasonBergey VE að veiðum. Ljósm. Egill Guðni GuðnasonÍsfisktogararnir Bergey VE og Vestmannaey VE lönduðu báðir fullfermi eða um 75 tonnum í Vestmannaeyjum í gær. Heimasíðan sló á þráðinn til Jóns Valgeirssonar, skipstjóra á Bergey, og spurði fyrst hvar aflinn hefði fengist. „ Við fengum þennan afla í Lónsbugtinni og þar var Vestmannaey líka. Þarna var fínasta veiði og samanstóð aflinn af ýsu, ufsa og þorski. Stærstur hluti hans var ýsa. Aflinn fór víða. Hluti hans fór í útflutning en síðan til vinnslu í Eyjum, Dalvík, Akureyri, Seyðisfirði og Neskaupstað. Við fórum út strax að löndun lokinni og erum núna í karfa djúpt út af Surtsey í bongóblíðu. Vestmannaey ætlaði hins vegar að veiða lýsu. Nú er lögð áhersla á að veiða annað en þorsk og segja má að vertíðin hafi tekið enda. Það er hins vegar ennþá þorskur við Surtsey og bullandi þorskur út af Reykjanesi,“ segir Jón.

Heldur rólegt yfir kolmunnaveiðinni

Börkur NK er að landa fullfermi af kolmunna í Neskaupstað. Ljósm. Smári GeirssonBörkur NK er að landa fullfermi af kolmunna í Neskaupstað. Ljósm. Smári GeirssonKolmunnaveiði íslensku skipanna hefur gengið heldur rólega að undanförnu. Bjarni Ólafsson AK landaði  1.800 tonnum í Neskaupstað um helgina og nú er Börkur NK að landa þar 2.200 tonnum. Hjörvar Hjálmarsson skipstjóri á Berki segir að veiðiferðin hafi tekið átta daga höfn í höfn. „Aflinn fékkst í sjö löngum holum. Við drógum yfirleitt í eina 18 tíma og aflinn var yfirleitt 300-400 tonn í holi. Sannleikurinn er sá að það er afskaplega rólegt yfir þessu. Við byrjuðum túrinn austarlega á gráa svæðinu en  enduðum uppi á Munkagrunni í færeysku lögsögunni. Fiskurinn gengur austarlega og það er okkur óhagstætt því þá er hætta á að hann gangi inn í norska lögsögu en ekki í færeyskan sjó eins og verið hefur. Þetta er þó enn töluvert óljóst og margt getur breyst í þessum efnum á skömmum tíma. Það er enn ágæt veiði sunnan línunnar í skosku lögsögunni og þar eru hollensk skip til dæmis að gera það gott, en fiskurinn þar virðist ganga afar hægt norður eftir. Staðreyndin er sú að við höfum ekki séð eins mikið af fiski og síðustu ár og það mætti vera meiri kraftur í veiðunum. En það verður vonandi hægt að juða á þessu áfram eða allt fram undir makrílvertíð,“ segir Hjörvar.

Sú gamla og sú nýja

Gamla Vestmannaey í slippnum og sú nýja siglir hjá. Ljósm. Arnar RichardssonGamla Vestmannaey í slippnum og sú nýja siglir hjá.
Ljósm. Arnar Richardsson
Í gær sigldi nýja Vestmannaey VE inn í Vestmannaeyjahöfn með fullfermi af fiski að aflokinni 48 stunda veiðiferð. Á meðfylgjandi mynd sést þegar skipið siglir fram hjá slippnum en í honum er einmitt gamla Vestmannaey, sem bar reyndar nafnið Smáey síðustu mánuðina. Þorbjörn hf. í Grindavík hefur fest kaup á gömlu Vestmannaey og í slippnum er verið að mála skipið með litum hins nýja eiganda. Þorbjörn hf. fær skipið afhent í næstu viku og mun það fá nafnið  Sturla.
 
Gamla Vestmannaey var smíðuð í Póllandi árið 2007 en nýja Vestmannaey kom til landsins í júlímánuði sl. Nýja skipið var smíðað í skipasmíðastöð Vard í Aukra í Noregi ásamt systurskipinu Bergey.
 
 
 
 

Á hálfum afköstum

Landað úr Gullver NS í gær.  Ljósm. Ómar BogasonLandað úr Gullver NS í gær. Ljósm. Ómar BogasonÁ Seyðisfirði var landað fullfermi úr ísfisktogaranum Gullver NS í gær. Aflinn var mjög blandaður; þorskur, ufsi, karfi og ýsa. Þórhallur Jónsson, skipstjóri, segir að vel hafi fiskast í veiðiferðinni. „Við fórum allt vestur á Öræfagrunn, en þar fékkst ufsi. Karfa fengum við í Hornafjarðardýpinu. Þorskur fékkst í Hvalbakshallinu og loks enduðum við í Lónsbugtinni.  Í túrnum var fínasta veður þar til um hádegisbil á mánudag, en þá kom suðvestan bræla. Við gerum ráð fyrir að fara út í kvöld en það er allt í hægagangi hjá okkur eins og öðrum togurum vegna kórónuveirunnar. Nú förum við bara fjóra túra í mánuði í stað sjö eða átta þannig að segja má að skipið sé á hálfum afköstum um þessar mundir. Vonandi fer þetta að lagast, en það er ekkert annað að gera en að sýna þolinmæði,“ segir Þórhallur.

Tveir nýir doktorar

Í síðustu viku vörðu þau Stefán Þór Eysteinsson og Hildur Inga Sveinsdóttir doktorsritgerðir sínar í matvælafræði við Háskóla Íslands. Hafa þau bæði unnið að doktorsverkefnunum í samvinnu við Síldarvinnsluna.
 

Stefan Thor EysteinssonStefan Þór EysteinssonVerkefni Stefáns fólst í rannsóknum á rauðátu, en rauðáta er meginfæða uppsjávarfiska í Norður-Atlantshafi. Tilgangurinn með rannsókninni var margþættur. Í fyrsta lagi var skaðsemi rauðátu við vinnslu uppsjávarfiska könnuð og skoðað hvernig best er að meðhöndla afla, stýra vinnslu og geyma afurðir þegar áta er í fiskinum. Í öðru lagi var kannað hvaða áhrif rauðáta hefur á vinnslu á mjöli og lýsi og loks voru eiginleikar átunnar skoðaðir með tilliti til þess hvort megi nýta hana sjálfa með einhverjum hætti.
 
 
 
 
 
 
 
 
Hildur Inga SveinsdóttirHildur Inga SveinsdóttirVerkefni Hildar Ingu fjallaði um virðisaukningu í vinnslu Atlantshafsmakríls og var rannsakað geymsluþol og efna- og vinnslueiginleikar makríls sem veiddur er við Ísland, en hann er mjög fitumikill og erfiður meðhöndlunar. Sérstaklega var kannað hvort unnt sé að roðskera makrílinn án þess að það hafi áhrif á gæði flaka, en með því er hægt að auka geymsluþol. Einnig tók verkefnið á nýtingu roðs og dökks vöðva sem skorinn er frá við roðskurðinn. Þá var kannað hvort unnt væri að nýta myndgreiningartæki við eftirlit og bestun vinnslu roðlausra flaka.
 
Vill Síldarvinnslan færa hinum nýju doktorum innilegar hamingjuóskir um leið og þakkað er fyrir ánægjulegt og farsælt samstarf.
 
 
 

Síldarvinnsluverksmiðjurnar hafa tekið á móti tæplega 43.000 tonnum af kolmunna

Börkur NK að landa í Neskaupstað. Ljósm. Smári GeirssonBörkur NK að landa í Neskaupstað. Ljósm. Smári GeirssonHákon EA kemur til löndunar. Ljósm. Guðlaugur Björn Birgisson
Hákon EA kemur til löndunar.
Ljósm. Guðlaugur Björn Birgisson
 
Það sem af er árinu hafa fiskimjölsverksmiðjur Síldarvinnslunnar í Neskaupstað og á Seyðisfirði tekið á móti um 42.600 tonnum af kolmunna. Verksmiðjan í Neskaupstað hefur tekið á móti rúmlega 27.000 tonnum og verksmiðjan á Seyðisfirði tæplega 15.600 tonnum. Síðustu daga hafa kolmunnaskipin komið til löndunar af miðunum suður af Færeyjum en þar hefur aflast þokkalega. Hákon EA landaði 1.640 tonnum í verksmiðjuna í Neskaupstað 29. apríl, Börkur NK landaði 2.200 tonnum sl. laugardag og nú er Margrét EA að landa 2.100 tonnum. Bjarni Ólafsson AK kom til Seyðisfjarðar á laugardag með tæplega 1.700 tonn og í kjölfarið landaði Beitir NK rúmlega 3.000 tonnum.
 
Að sögn verksmiðjustjóranna, Hafþórs Eiríkssonar í Neskaupstað og Gunnars Sverrissonar á Seyðisfirði, gengur bæði löndun og vinnsla á kolmunnanum vel. Segja verksmiðjustjórarnir að um sé að ræða fínustu kolmunnavertíð það sem af er.

Komið að lokum vertíðar

Komið að lokum vertíðar Komið að lokum vertíðar

Landað úr Vestmannaey VE og Bergey VE í gær. Ljósm. Guðmundur Alfreðsson

Ísfisktogarar Bergs-Hugins, Vestmannaey VE og Bergey VE, lönduðu báðir fullfermi í Eyjum í gærmorgun. Skipin héldu til veiða síðdegis á laugardag þannig að það fiskaðist vel. Heimasíðan ræddi stuttlega við Birgi Þór Sverrisson skipstjóra á Vestmannaey og spurði hvar skipin hefðu verið að veiðum.  „Við byrjuðum upp við Surtsey í þorski og síðan var haldið vestast á Selvogsbankann í ýsu. Það fiskaðist afar vel allan túrinn og fiskurinn sem fékkst var góður. Nú er komið að vertíðarlokum og markaðsaðstæður ráða því að hægt er á sókninni. Við förum líklega ekki út aftur fyrr en á laugardag. Vertíðin hefur einkennst af tvennu; brælum og þessu covidástandi. Bæði brælurnar og ástandið hafa orsakað það að skipin hafa ekki verið rekin á fullum afköstum. Það hefur aftur á móti gengið vel að veiða helstu tegundirnar. Ég held að lengsti túrinn okkar hafi verið þrír dagar. Tíðarfarið hefur verið heldur leiðinlegt en maður hefur séð það verra,“ segir Birgir Þór.

Samherji skilar Smáey úr leigu

Áhöfnin sem skilaði Smáey VE úr leigu í morgun. Ljósm. Guðmundur AlfreðssonÁhöfnin sem skilaði Smáey VE úr leigu í morgun.
Ljósm. Guðmundur Alfreðsson
Í morgun skilaði Samherji Smáey VE úr leigu en fyrirtækið hefur leigt skipið af Bergi-Hugin í Vestmannaeyjum sl. tvo mánuði. Smáey bar áður nafnið Vestmannaey VE. Ástæða þess að Samherji leigði skipið til veiða var seinkun á afhendingu nýs Harðbaks.
 
Smáey hefur verið seld Þorbirni hf. í Grindavík og mun skipið verða afhent nýjum eiganda í byrjun maímánaðar. Smáey er ísfisktogari, smíðaður í Gdynia í Póllandi fyrir Berg-Hugin árið 2007. Skipið er 485 brúttótonn að stærð, 28.9 m langt og 10.39 m breitt. Í skipinu er 699 hestafla Yanmar vél.
 
Smáey mun nú fara í slipp í Vestmannaeyjum þar sem skipið verður meðal annars málað í litum Þorbjarnar.

Frú Vigdís um borð í Gullver

Myndin af frú Vígdísi Finnbogadóttur sem prýðir borðsal Gullvers NS. Ljósm. Rúnar L. GunnarssonMyndin af frú Vígdísi Finnbogadóttur sem prýðir borðsal Gullvers NS. Ljósm. Rúnar L. GunnarssonFyrr í þessum mánuði fagnaði frú Vigdís Finnbogadóttir, fyrrverandi forseti lýðveldisins, níræðisafmæli sínu. Margir samfögnuðu henni innilega og þar á meðal áhöfnin á ísfisktogaranum Gullver NS frá Seyðisfirði. Áhöfnin á Gullver hefur ávallt tengst frú Vigdísi með sérstökum hætti og í borðsal skipsins hangir á vegg mynd af henni og í einu horni myndarinnar stendur eftirfarandi: Með kveðjum og þakklæti til Jóns Pálssonar skipstjóra og áhafnar á b/v Gullbergi. Undir þennan texta ritaði frú Vigdís nafn sitt með eigin hendi en því miður hefur blekið máðst og er undirskriftin því vart greinanleg.
 
Upphaflega prýddi myndin vegg í borðsal Gullbergs NS en þegar Gullver leysti Gullberg af hólmi árið 1983 fékk myndin sinn heiðurssess í borðsal nýja skipsins þar sem hún hefur síðan verið.
 
Sagan á bak við myndina er sú að Jón Pálsson, skipstjóri á Gullbergi og síðar Gullver og jafnframt annar útgerðarmaður skipanna, var eindreginn stuðningsmaður Vigdísar í forsetakosningunum 1980. Þegar Vigdís heimsótti Austurland í kosningabaráttunni sótti Jón frambjóðandann upp á Hérað á rauða Bensinum sínum og studdi við bakið á henni með ráðum og dáð.
 
Gullver NS. Ljósm. Ómar BogasonGullver NS. Ljósm. Ómar BogasonÍ viðtali sem tekið var við frú Vigdísi á dögunum í tilefni níræðisafmælisins lagði hún áherslu á að hún elskaði sjómenn, enda studdu sjómenn hana dyggilega til embættis á sínum tíma. Þegar einhverjir lýstu efasemdum um að skynsamlegt væri að kjósa konu sem forseta mun Jón Pálsson hafa sagt að full ástæða væri til að treysta konu fyrir embættinu enda hefðu sjómenn löngum þurft að treysta konum sínum fyrir börnum og búi á meðan þeir sæktu gull í greipar Ægis og það hefði svo sannarlega reynst vel.
 
Myndin í borðsalnum á Gullver hefur nú fylgt áhöfn skipsins í hartnær fjörutíu ár og er álitin happagripur, enda hefur þetta 37 ára gamla skip ávallt reynst happafleyta.
 
 

Blængur með fullfermi

Landað úr Blængi NK í Neskaupstað í dag. Ljósm. Smári GeirssonLandað úr Blængi NK í Neskaupstað í dag.
Ljósm. Smári Geirsson
Í dag er verið að landa fulfermi úr frystitogaranum Blængi NK í Neskaupstað. Afli skipsins er 730 tonn upp úr sjó og verðmæti hans 225 milljónir króna. Ef ekki væri vegna neikvæðra covidáhrifa væri verðmæti aflans enn meira. Heimasíðan ræddi við Theodór Haraldsson skipstjóra og spurði hvar aflinn hefði fengist. „Við byrjuðum fyrir austan land og leituðum þar að ufsa og karfa en þar var mjög rólegt. Þá var farið suður á Selvogsbanka og veitt þar í eina fimm daga. Þar fékkst þorskur, ýsa og ufsi. Fyrstu tvær vikurnar í túrnum var hreint út sagt brjálað veður eins og hefur verið alltof oft á nýliðnum vetri, en þegar tók að lægja  fórum við út í Skerjadýpi og þar aflaðist afar vel af djúpkarfa, gullkarfa og gulllaxi. Þarna var sannkölluð kraftaveiði og þarna vorum við í tíu daga. Að loknum veiðunum í Skerjadýpinu var haldið vestur á Hampiðjutorg í grálúðu en þar reyndist vera rólegt. Þá var farið norður fyrir á Tunguna og þar var hörkuufsaveiði í sólarhring og þar fylltum við skipið. Í restina á túrnum fengum við æðislegt veður. Alls tók þessi veiðiferð 26 daga en aflinn fékkst að mestu á 20 dögum. Það er ekki ástæða til að kvarta yfir neinu að afloknum svona túr,“ segir Theodór.
 
Gert er ráð fyrir að Blængur haldi á ný til veiða á þriðjudagskvöld. Til stóð að skipið færi í Barentshafið en því hefur verið frestað. 

Beitir með 3.000 tonn af kolmunna

Beitir NK kemur til hafnar í Neskaupstað í norgun. Ljósm. Guðlaugur Björn BirgissonBeitir NK kemur til hafnar í Neskaupstað í morgun.
Ljósm. Guðlaugur Björn Birgisson
Snemma í morgun kom Beitir NK með um 3.000 tonn af kolmunna til Neskaupstaðar. Aflinn fékkst suður af Færeyjum í sjö holum. Í stærsta holinu fengust 550 tonn. Tómas Kárason skipstjóri segir að veiðiútlit þarna sé nokkuð gott. „Þarna er töluvert af fiski að sjá. Hann virðist koma í gusum. Stundum dettur þetta niður en gýs svo upp á ný í miklu magni. Menn hafa verið á sama blettinum frá því að veiðarnar hófust og þarna hafa verið um 50 skip af ýmsu þjóðerni. Það er semsagt um verulega traffík að ræða. Norðmenn eru enn að veiða fyrir sunnan línuna í skosku lögsögunni þannig að það  virðist töluvert af fiski eiga eftir að ganga þarna norðureftir. Það eru góðar líkur á áframhaldandi veiði og menn eru bara bjartsýnir. Við munum halda til veiða í kvöld strax að löndun lokinni. Það er farið mjög varlega á meðan staldrað er við í landi vegna kórónuveirunnar. Umferð um skipið er í algeru lágmarki og áhöfnin þarf að fara varlega og virða allar ströngustu reglur í samskiptum við fólk,“ segir Tómas.

Úrvalsmjöl fæst úr kolmunnanum

Fiskimjölsverksmiðja Síldarvinnslunnar á Seyðisfirði. Ljósm. Ómar BogasonFiskimjölsverksmiðja Síldarvinnslunnar á Seyðisfirði.
Ljósm. Ómar Bogason
Fyrstu kolmunnaförmunum, eftir að veiðar hófust suður af Færeyjum, var landað í fiskimjölsverksmiðjur Síldarvinnslunnar í Neskaupstað og á Seyðisfirði í fyrrakvöld. Margrét EA kom með um 2.000 tonn til Neskaupstaðar og Bjarni Ólafsson AK með um 1.800 tonn til Seyðisfjarðar. Nú er verið að ljúka við að vinna þessa fyrstu farma í verksmiðjunum og í tilefni af því ræddi heimasíðan við Hafþór Eiríksson verksmiðjustjóra í Neskaupstað og Gunnar Sverrisson verksmiðjustjóra á Seyðisfirði. Fram kom hjá þeim báðum að kolmunninn væri úrvalshráefni til mjölframleiðslu en hins vegar fengist lítið lýsi úr honum á þessum árstíma. „Þegar kolmunninn er veiddur vestur af Írlandi er hann mun feitari, en eftir hrygningu leitar hann norður eftir í ætisleit og er þá heldur horaður, en vissulega er hann mishoraður á milli ára,“ segir Gunnar. Gunnar segir einnig að mjög vel gangi að vinna kolmunnann á Seyðisfirði og muni vinnslu á þessum fyrsta farmi sem þangað barst ljúka í kvöld.
 
Hafþór upplýsir að vinnsla á kolmunnanum gangi mjög vel í Neskaupstað „Við erum að ljúka við að vinna kolmunnann úr Margréti en það er von á Hákoni EA með ein 1.600 tonn síðar í dag þannig að vinnslan verður samfelld áfram. Þá virðast veiðar ganga vel og vonandi er hörkukolmunnavertíð framundan,“ segir Hafþór. 

Fullfermi eftir fjóra daga á veiðum

: Gullver NS landaði fullfermi á Seyðisfirði í gær. Ljósm. Ómar BogasonGullver NS landaði fullfermi á Seyðisfirði í gær.
Ljósm. Ómar Bogason
Ísfisktogarinn Gullver NS landaði fullfermi eða 111 tonnum á Seyðisfirði í gær. Uppistaða aflans var þorskur og ufsi. Rúnar L. Gunnarsson skipstjóri segir að veitt hafi verið á hefðbundnum miðum skipsins. „Við fengum aflann í Berufjarðarál, Hvalbakshalli og enduðum í Litladýpinu. Þetta voru fjórir dagar að veiðum. Á þessum tímum er allt í hægagangi hjá okkur eins og annars staðar í samfélaginu. Við förum einungis eina veiðiferð í viku og það verður haldið til veiða á ný klukkan átta annað kvöld,“ segir Rúnar.

 

 

 

Fyrstu kolmunnafarmarnir á leiðinni og góð veiði

Beitir NK að veiðum. Ljósm. Helgi Freyr ÓlasonBeitir NK að veiðum. Ljósm. Helgi Freyr ÓlasonGert er ráð fyrir að Margrét EA komi með liðlega 2.000 tonn af kolmunna til Neskaupstaðar seint í dag eða í kvöld og litlu síðar mun Bjarni Ólafsson AK koma með um 1.850 tonn til Seyðisfjarðar. Heimasíðan ræddi við Tómas Kárason, skipstjóra á Beiti NK, en skipið var að toga á kolmunnamiðunum á gráa svæðinu suður af Færeyjum. „Við erum komnir með rúm 1.500 tonn og erum að fara að hífa. Ég held að það sé mjög gott í, allavega 400 tonn, en aflinn er ekki kominn um borð fyrr en hann er kominn um borð eins og einhver góður maður sagði. Þetta lítur vel út hérna; gott veður og meira að sjá í dag en í gær. Það eru mörg skip að veiðum hérna, ég held að þau séu um 50 talsins. Hér eru grænlensk, færeysk, og rússnesk skip og svo er hér einn Norðmaður auk íslensku skipanna. Þessi floti dreifðist í gær á um 20 mílna breitt svæði,“ segir Tómas.

 

 

Eyjarnar lönduðu á laugardagsmorgun

Vestmannaey VE og Bergey VE að landa sl. laugardagsmorgun. Ljósm. Guðmundur AlfreðssonVestmannaey VE og Bergey VE að landa sl. laugardagsmorgun. Ljósm. Guðmundur AlfreðssonÍsfisktogararnir Bergey VE og Vestmannaey VE lönduðu báðir í Vestmannaeyjum á laugardagsmorgun að aflokinni stuttri veiðiferð. Aflinn var mestmegnis ýsa sem fékkst á Síðugrunni og Öræfagrunni. Jón Valgeirsson, skipstjóri á Bergey, segir að aflinn hafi farið til vinnslu í Vestmannaeyjum, á Dalvík og á Seyðisfirði. „Við förum út í fyrramálið en þá verður opnað vestan við Port eftir hrygningarlokun en aftur á móti lokað austurfrá. Við förum út í fyrramálið og þá verður líklega byrjað í Háfadýpinu og á Landsuðurhrauni. Þessum svæðum var lokað 12. apríl en opna í fyrramálið klukkan 10. Vertíðin hefur bara verið góð til þessa, en veiran hefur hægt á öllu og yfirleitt bara farnir tveir túrar í viku,“ segir Jón.

 

 

 

Hörku kolmunnaveiði hafin á gráa svæðinu

Bjarni Ólafsson AK að veiðum. Ljósm. Helgi Freyr ÓlasonBjarni Ólafsson AK að veiðum. Ljósm. Helgi Freyr ÓlasonKolmunnaveiði á gráa svæðinu suður af Færeyjum er hafin af góðum krafti. Kolmunnaskipin köstuðu í gærkvöldi og fengu mörg hver góðan afla í fyrsta holi. Heimasíðan ræddi stuttlega við Gísla Runólfsson skipstjóra á Bjarna Ólafssyni AK og spurði hann hvort væri ekki bros á hverju andliti um borð. „Jú, það má alveg segja það. Við köstuðum klukkan 10 í gærkvöldi austarlega á gráa svæðinu, drógum í 10 tíma og aflinn var 550 tonn. Það má því alveg segja að þetta byrji vel. Við köstuðum strax aftur, erum búnir að toga í tvo tíma og þetta hol lítur líka afar vel út. Hér um borð eru allir glaðir enda búið að bíða eftir því að veiðar hæfust. Við fórum frá Neskaupstað fyrir 10 dögum og höfum síðan beðið eftir að fiskurinn gengi úr skosku lögsögunni og inn á gráa svæðið. Annars er veiðin að hefjast um líkt leyti og í fyrra. Mér sýnist að veiðin hafi byrjað 14. apríl í fyrra þannig að það munar ekki miklu. Við lítum bara á biðina eftir kolmunnanum sem góða sóttkví. Það hafa fleiri skip verið að fá mjög góð hol. Polar Amaroq hífði 620 tonn áðan og ég held að Víkingur hafi verið með 580 tonn. Beitir NK hífði í nótt tæplega 200 tonn eftir að hafa dregið stutt og Margrét EA var líka kominn með afla. Mér líst afar vel á þetta. Útlitið er býsna bjart og ég held að þetta verði bara vaxandi“,segir Gísli.

Ágætis vertíð en sérkennileg

Stjáni Nínon (Kristján Hilmarsson), starfsmaður Vestmannaeyjahafnar að vigta upp úr Vestmannaey VE í gærmorgun. Ljósm. Guðmundur AlfreðssonStjáni Nínon (Kristján Hilmarsson), starfsmaður Vestmannaeyjahafnar að vigta upp úr Vestmannaey VE í gærmorgun. Ljósm. Guðmundur AlfreðssonÍsfisktogarinn Vestmannaey VE landaði fullfermi í heimahöfn í gærmorgun og í kjölfarið var góðum afla landað úr systurskipinu Bergey VE. Heimasíðan ræddi við Birgi Þór Sverrisson, skipstjóra á Vestmannaey, og spurði hann hvernig veiðiferðin hefði gengið og einnig hvað hann vildi segja um vertíðina hingað til. „Það verður að segjast að þessi veiðiferð gekk vel. Við vorum um tvo sólarhringa á veiðum. Við hófum veiðar suður af Vík og síðan var haldið austur á Síðugrunn og í Skaftárdýpið. Aflinn var ágætur, fallegur þorskur og ýsa. Það er verið að loka ýmsum svæðum og páskalokanirnar hafa eðlilega áhrif á hvar veitt er. Við reiknum með að landa á ný á laugardag og síðan er gert ráð fyrir að fara á Selvogsbankann sem verður opnaður eftir helgina. Það verður að segjast að þetta er búin að vera ágætis vertíð þó tíðin hafi lengi verið leiðinleg. Brælurnar hafa gert það að verkum að túrarnir hafa oft verið heldur snaggaralegir. Skipin hafa ekki veitt á fullum afköstum að undanförnu vegna markaðsaðstæðna, en kórónafaraldurinn hefur haft mikil áhrif í þessu sambandi. Svo hefur öll áhersla verið lögð á að veiða þann fisk sem unnt er að losna við. Ýmsir markaðir fyrir ferskan fisk eru hreinlega lokaðir og aðrir taka við miklu minna magni en áður þannig að veiðarnar eru háðar afkastagetu vinnsluhúsa í landinu. Markaðsaðstæðurnar gera vertíðina sérkennilega að því leyti að það hefur ekki verið eins mikil sókn í svonefndar aukategundir og áður, segir Birgir Þór.

Gullver með fullfermi

Mikill hluti afla Gullvers NS fór til vinnslu í frystihúsi Síldarvinnslunnar á Seyðisfirði. Ljósm. Sigurður ÞorsteinssonMikill hluti afla Gullvers NS fór til vinnslu í frystihúsi Síldarvinnslunnar á Seyðisfirði.
Ljósm. Sigurður Þorsteinsson
Ísfisktogarinn Gullver NS landaði fullfermi eða 108 tonnum á Seyðisfirði í gærmorgun. Uppistaða aflans var þorskur og ýsa en einnig var nokkuð af ufsa og gullkarfa. Frystihús Síldarvinnslunnar á Seyðisfirði tók drjúgan hluta aflans til vinnslu en hluti hans fór til vinnslu á Akureyri og í Neskaupstað. Þórhallur Jónsson skipstjóri segir að nú á tímum kórónaveirunnar fari Gullver í eina veiðiferð á viku og í þessari veiðiferð hafi verið farið suður fyrir land. „Við byrjuðum í Breiðamerkurdýpi og á Öræfagrunni og tókum þar þrjú hol. Síðan var keyrt á Selvogsbankann og þar fengust 85-90 tonn á einum og hálfum sólarhring. Þá var komið hrygningarstopp og Selvogsbankanum lokað. Það verður að segjast að þetta var fínasti túr“, segir Þórhallur.
 
Gullver NS heldur á ný til veiða í kvöld.
 
 

Kolmunnaflotinn á reki á gráa svæðinu

Íslensku kolmunnaskipin láta reka á gráa svæðinu suður af Færeyjum. Ljósm. Helgi Freyr ÓlasonÍslensku kolmunnaskipin láta reka á gráa svæðinu suður af Færeyjum. Ljósm. Helgi Freyr ÓlasonHeimasíðan ræddi við Tómas Kárason, skipstjóra á Beiti NK, í dag og spurðist frétta af kolmunnaveiðum. Tómas sagði að heldur lítið væri að frétta en beðið væri eftir því að kolmunninn gengi úr skoskri lögsögu inn á hið svonefnda gráa svæði suður af Færeyjum. „Hér eru öll skip á reki. Ég held að hér á hinu svonefnda gráa svæði séu 14 íslensk skip og hér er einnig grænlenska skipið Polar Amaroq og allmargir Rússar. Færeysku skipin voru hér en ég held að þau séu farin í land. Skipin eru alldreifð, en það er ekkert að gerast. Það gætu verið einhverjir dagar í að kolmunninn gangi inn á svæðið en það hafa borist fréttir af fínustu veiði innan skoskrar lögsögu. Menn bíða semsagt eftir því að fiskurinn gangi norðureftir en hér hefur gjarnan verið byrjuð veiði um þetta leyti. Staðreyndin er sú að þetta kemur mönnum ekkert rosalega á óvart. Það getur verið breytilegt frá ári til árs hvenær fiskurinn kemur á þessar slóðir. Menn eru bara rólegir, fylgjast með og bíða. Það er bara ekkert annað að gera í stöðunni,“ segir Tómas.

Skipin ýmist að veiðum eða í landi yfir páskana

Bergey londun mars 2020 GA
Kolmunnaskipin sem lágu í Norðfjarðarhöfn  héldu til veiða í gær þegar niðurstöður skimunar áhafna þeirra fyrir Covid 19 lágu fyrir. Niðurstöðurnar voru neikvæðar í öllum tilvikum og því ekkert því til fyrirstöðu að láta úr höfn. Skipin munu hefja veiðar á gráa svæðinu suður af Færeyjum en þangað eru um 350 mílur frá Neskaupstað. Í dag höfðu engar fréttir borist um kolmunnaveiði á gráa svæðinu.
 
Gullver NS landaði 104 tonnum af blönduðum afla á Seyðisfirði í gærmorgun. Gert er ráð fyrir að hann haldi á ný til veiða klukkan átta í kvöld og verði á miðunum yfir páskahátíðina.
 
Skip Bergs-Hugins í Vestmannaeyjum, Bergey VE og Vestmannaey VE, munu verða í landi yfir páskana. Bergey landaði í Eyjum í gærkvöldi og Vestmannaey er að landa í dag. Ráðgert er að bæði skipin haldi til veiða á annan í páskum. 

Undirflokkar