Ennþá berst norsk-íslensk síld til Neskaupstaðar

Börkur NK og Beitir NK að landa í Neskaupstað.Makríl- og síldarvertíðinni er ekki lokið í Neskaupstað. Þrjú skip hafa veitt til löndunar í fiskiðjuver Síldarvinnslunnar og hafa tvö þeirra, Bjarni Ólafsson AK og Beitir NK lokið veiðum, en Börkur NK er í sinni síðustu veiðiferð. Vinnsluskipin Hákon EA og Vilhelm Þorsteinsson EA hafa ekki lokið veiðum en þau landa frystum aflanum í frystigeymslur Síldarvinnslunnar. Bæði Hákon og Vilhelm Þorsteinsson eru að landa í dag, Hákon um 750 tonnum og Vilhelm um 600 tonnum.     

Nú er farið að hyggja að veiðum á íslenskri sumargotssíld og leitar hugurinn þá í ríkum mæli vestur í Breiðafjörð.

„Samstarfið gengur mjög vel“, segir Gísli Runólfsson skipstjóri á Bjarna Ólafssyni AK

Bjarni Ólafsson AK að landa í fiskiðjuver Síldarvinnslunnar.Þegar Síldarvinnslan og SR-mjöl runnu saman í eitt fyrirtæki, sem hefur starfað undir merkjum Síldarvinnslunnar, árið 2003 fylgdu ýmis hlutdeildarfyrirtæki SR-mjöls með. Eitt þessara fyrirtækja var Runólfur Hallfreðsson ehf. á Akranesi sem gerir út uppsjávarveiðiskipið Bjarna Ólafsson AK. Við samrunann eignaðist Síldarvinnslan 38% hlut í Runólfi Hallfreðssyni ehf. og síðan má segja að Bjarni Ólafsson hafi átt sína aðra heimahöfn í Neskaupstað. Norðfirðingar líta gjarnan á Bjarna Ólafsson sem eitt af heimaskipunum og ekki er óalgengt að krakkarnir á staðnum tali um „gula bátinn“ sem sker sig með skýrum hætti frá blámáluðum heimaskipum Síldarvinnslunnar og rauðmáluðum skipum Samherja sem koma mikið til löndunar í Neskaupstað.

Upphaflega var Runólfur Hallfreðsson ehf. fjölskyldufyrirtæki í eigu Runólfs heitins Hallfreðssonar skipstjóra og Ragnheiðar Gísladóttur konu hans. Fjölskyldan á enn  meirihlutann í fyrirtækinu og er Ragnheiður framkvæmdastjóri þess og Gísli Runólfsson, sonur þeirra hjóna, skipstjóri á Bjarna Ólafssyni. Til gamans skal þess getið að fyrsta skipið í eigu fyrirtækisins, elsti Bjarni Ólafsson, var einmitt keypt frá Neskaupstað og hafði borið nafnið Börkur. Þarna var um að ræða þriðja skipið sem Síldarvinnslan eignaðist og fyrsta skipið sem bar Barkarnafnið.

Fyrir nokkru birtist fróðlegt viðtal við Gísla Runólfsson í blaðinu Skessuhorni. Þar segir Gísli frá sögu útgerðarinnar sem hann þekkir í smáatriðum enda verið skipstjóri á skipum hennar í 33 ár. Þá víkur Gísli að samstarfinu við Síldarvinnsluna í viðtalinu og segir eftirfarandi orðrétt um það efni: „Þetta er mjög gott samstarf og báðir njóta góðs af þessum viðskiptum. Við leggjum allan afla okkar upp á Norðfirði er þar er mjög vel útbúið uppsjávarfisksfrystihús, tækjavætt frá Skaganum, sem vinnur hráefnið í afurðir í hæsta gæðaflokki og afkastar miklu. Það þýðir aftur hærra verð til okkar og síðan er SVN að útvega okkur viðbótarkvóta ef þarf. Norðfjörður hefur nánast verið okkar önnur heimahöfn og það er langt síðan við höfum landað hér á Skaganum. Áhöfnin er mest öll frá Akranesi en þó er einn úr Keflavík og annar úr Reykjavík. Þetta getur því verið talsverð útivist þegar vertíðirnar standa yfir, þótt menn skreppi öðru hvoru heim með flugi í frí. Norðfjörður liggur mjög vel við kolmunnamiðunum og norsk-íslensku síldinni. Á hefðbundinni loðnuvertíð liggur hann líka lengst af vel við en síðustu árin hefur verið tveggja sólarhringa sigling þangað af síldarmiðunum í Breiðafirði“.


Fiskflutningabílar fóru um 360 sinnum yfir Oddsskarð í september

Ísaður bolfiskur settur í flutningabíl á höfninni í Neskaupstað.  Ljósm. Guðlaugur BirgissonÍ nýliðnum septembermánuði var skipað út rúmum 10.000 tonnum af frystum afurðum úr frystigeymslum Síldarvinnslunnar í Neskaupstað. Hér er fyrst og fremst um að ræða makríl og síld. Alls fóru 7.500 tonn beint í skip en um 2.500 tonn fóru í gáma sem ekið var með yfir Oddsskarð til útskipunar á Reyðarfirði. Þetta þýðir að rúmlega 100 gámar af frystum afurðum hafa verið fluttir yfir Oddsskarð í mánuðinum og ferðir flutningabílanna yfir Skarðið fram og til baka vegna þessara flutninga hafa verið á þriðja hundrað.

Fyrir utan þetta hefur mikið af ísuðum bolfiski verið flutt með flutningabílum yfir Skarðið í mánuðinum og hefur sá fiskur bæði komið frá Bjarti NK og eins smærri bátum, ekki síst línubátum sem róið hafa frá Neskaupstað að undanförnu og oft aflað vel. Ferðirnar með ferskan fisk voru um 70 talsins og fóru flutningabílarnir vegna þeirra um 140 sinnum  yfir Skarð og í gegnum Oddsskarðsgöng . Loks voru farnar 10 ferðir með fiskimjöl yfir Skarðið í mánuðinum og það gera 20 ferðir þeirra bíla sem sinntu þeim flutningum.

Niðurstaðan er skýr: Alls fóru flutningabílar frá Eimskip-Flytjanda og Samkipum-Landflutningum um 360 ferðir yfir Oddsskarð og í gegnum Oddsskarðsgöng vegna flutninga á fiski og fiskafurðum frá Neskaupstað í septembermánuði síðastliðnum. Vegna þessara flutninga eingöngu fóru því slíkir bílar 12 ferðir á dag yfir Skarðið  hvern einasta dag mánaðarins.

Fyrir utan flutninga á ferskum fiski og fiskafurðum eru aðrir vöruflutningar yfir Skarðið verulegir en um þá verður ekki fjallað hér. Eins verður ekkert fjallað hér um mikla mannflutninga sem hafa farið mjög vaxandi með tilkomu álvers Alcoa-Fjarðaáls á Reyðarfirði og aukinnar starfsemi Verkmenntaskóla Austurlands í Neskaupstað.

Haft var samband við Rúnar Gunnarsson þjónustustjóra hjá Eimskip á Austurlandi til að fá staðfestingu á framangreindum upplýsingum. Rúnar staðfesti þær tölur sem hér hafa komið fram og sagði síðan eftirfarandi um flutninga yfir Oddsskarð og í gegnum Oddsskarðsgöng: „ Flutningar yfir Skarðið eru gífurlega miklir og í því sambandi vega flutningar með fisk og sjávarafurðir þungt. Ekið er upp í rúmlega 600 metra hæð og síðan í gegnum Oddsskarðsgöng sem henta afar illa fyrir umferð sem þessa. Þessi akstur reynir mikið á bílana og gerir það að verkum að þeir gefa sig fljótt; mótorar og gírkassar bila gjarnan. Til að mæta þessu hafa verið keyptir dýrari bílar sem henta betur í flutninga af þessu tagi en það dugar vart til. Þá þurfa bílarnir sem flytja gáma að vera með sérbyggða vagna undir gámana svo þeir komist í gegnum göngin, en þau eru þröng, dimm og einbreið með útskotum auk þess sem blindhæð er í þeim. Þá er mikilvægt að allir geri sér ljóst að hin mikla umferð flutningabíla veldur truflun á annarri umferð og mörgum finnst vægast sagt óþægilegt að mæta þessum þungu stóru bílum á fjallveginum eða þá í göngunum. Tíðarfar skiptir afar miklu máli hvað varðar þessa flutninga; flutningar um svona fjallveg og göng er ávallt hættulegir en hættan margfaldast þegar veður er slæmt og hálka mikil.

Við sem sinnum þessum flutningum fögnum gríðarlega þeim tímamótum að nú skuli hafnar framkvæmdir við ný Norðfjarðargöng. Ég held að sé varla unnt að finna þarfara verkefni á sviði samgöngumála á landinu“.


Yfir 21.000 tonn af frystum makríl og síld á land í Neskaupstað

Vinnsluskipin Kristina EA og Vilhelm Þorsteinsson EA mætast á Norðfirði.  Ljósm. Guðlaugur BirgissonÁ yfirstandandi makríl- og síldarvertíð hafa vinnsluskip landað rúmlega 21 þúsund tonnum í frystigeymslur Síldarvinnslunnar í Neskaupstað. Skipin sem komið hafa með mest af þessum afla eru Kristina EA með samtals 7.940 tonn, Vilhelm Þorsteinsson EA með 7.850 tonn og Hákon EA með 4.570 tonn. Að auki hefur Barði NK landað um 770 tonnum.  Í dag er Hákon síðan að landa um 700 tonnum til viðbótar.

Í septembermánuði síðastliðnum var skipað út rúmlega 10.000 tonnum af afurðum úr frystigeymslunum og nú er skip í höfninni sem tekur 2000 tonn af síld til Póllands. Útskipanir munu halda áfram á næstunni og á mánudag er væntanlegt skip sem mun taka 4000 tonn af síld og makríl til Úkraínu.