Kolmunni til Seyðisfjarðar

Sey2018

Fiskimjölsverkmiðja Síldarvinnslunnar á Seyðisfirði. Ljósm: Ómar Bogason

                Margrét EA kemur til Seyðisfjarðar í dag með 1.300 tonn af kolmunna sem fékkst vestur af Írlandi. Þetta er fyrsta hráefnið sem berst til fiskimjölsverksmiðju Síldarvinnslunnar á Seyðisfirði síðan í desember sl. Gunnar Sverrisson verksmiðjustjóri segir að það sé ávallt fagnaðarefni þegar hráefni fæst eftir vinnsluhlé. „Það er ágætt að fá ekki alltof stóran skammt í upphafi. Við munum gangsetja verksmiðjuna í kvöld og það þarf að ná úr henni hrollinum eftir hlé eins og þetta. Við þurfum að finna menn til starfa vegna þess að fimm menn frá okkur eru nú í verksmiðjunni í Helguvík. Við gerum okkur vonir um að þessi kolmunni sé ágætt hráefni en annars er að minnka í honum fitan á þessum árstíma,“ sagði Gunnar.

                Nú þegar íslensk skip hafa lokið loðnuveiðum mun þeim fjölga hratt á kolmunnamiðunum vestur af Írlandi. Bjarni Ólafsson AK hélt til kolmunnaveiða í fyrradag og Börkur NK í gær.

 

Veiðum á loðnuvertíð lauk á Skjálfanda og út af Patreksfirði

29101462 10211289113199253 4997680046488420352 o

Beitir NK á loðnumiðunum úti fyrir Patreksfirði í gær. Ljósm: Helgi Freyr Ólason

Loðnuvertíðin sem nú er að ljúka hefur um margt verið heldur óvenjuleg og fyrir nokkrum árum hefði þurft að segja mönnum það tvisvar að síðustu farmar vertíðarinnar fengjust samtímis annars vegar á Skjálfanda og hins vegar út af Patreksfirði. Beitir NK lauk veiðum í gær en hann fékk 1.400 tonn út af Patreksfirði. Vilhelm Þorsteinsson EA var á sömu slóðum og Beitir. Hann fékk 300 tonn í fyrsta kasti en sprengdi síðan og er á leið til Neskaupstaðar rétt eins og Beitir.

                Polar Amaroq kastaði tvisvar á Skjálfanda í gær og fyllti, en áður höfðu Polarmenn fyllt frystilestar skipsins. Hrognafylling loðnunnar sem veiðist fyrir norðan er 21% en loðnan er heldur smá. Gert er ráð fyrir að Polar Amaroq landi á morgun.

                Heimasíðan hafði samband við Sturlu Þórðarson, skipstjóra á Beiti í morgun, en þá var skipið statt út af Skagafirði. „Það fengust mjög góð köst þarna út af Patreksfirði. Sumir fengu of mikið og sprengdu. Þetta er fínasta loðna sem þarna er á ferðinni og hún ætti að henta vel til hrognatöku. Þarna er um vestangöngu að ræða og menn kláruðu líka vertíðina í fyrra á þessum slóðum. Við förum hringinn í kringum landið í þessum túr, en við lönduðum að vísu í Helguvík um helgina,“ sagði Sturla.

                Gert er ráð fyrir að skipin haldi til kolmunnaveiða vestur af Írlandi nú þegar veiðum á  loðnuvertíð er lokið. Bjarni Ólafsson AK hélt reyndar til kolmunnaveiða í gær.

 

Loðnan brellin ekki síður en síldin

29136135 10211278773820775 4981228178556059648 o

Á loðnumiðunum austan við Vestmannaeyjar í gær. Ljósm: Helgi Freyr Ólason

Loðnan hagar sér heldur skringilega nú undir lok vertíðar. Fyrir helgi voru skipin að fá afla á Faxaflóa, við Vestmannaeyjar og fyrir norðan land. Loðnan sem veiddist nyrðra þótti henta til Japansfrystingar en syðra var lögð áhersla á að fá hrognaloðnu. Í gær brá svo við að lítið aflaðist við Eyjar en þá hófust veiðar á Breiðafirði.

Beitir NK landaði 1.800 tonnum í Helguvík á laugardag og voru unnin hrogn úr hluta aflans. Beitir er nú á Breiðafirði og freistar þess að veiða 1.500 tonn en þá hafa Síldarvinnsluskipin lokið loðnuveiðum á vertíðinni.

Bjarni Ólafsson AK er að landa 1.600 tonnum í Neskaupstað og fékkst sú loðna að mestu í Faxaflóa. Unnin eru hrogn úr aflanum.

Börkur NK fékk 1.200 tonn við Eyjar á laugardag og bíður nú löndunar í Neskaupstað. Gert er ráð fyrir hrognavinnslu úr aflanum.

Vilhelm Þorsteinsson EA landaði 1.700 tonnum í Helguvík í gær og var stór hluti aflans kreistur. Vilhelm er nú á Breiðafirði.

Polar Amaroq er fyrir norðan land. Skipið fékk 500-600 tonn á Skagagrunni aðfaranótt föstudags og hefur síðan fengið 800 tonn í tveimur köstum á Skjálfanda. Loðnan fyrir norðan hentar vel til frystingar eins og fyrr greinir og var aflinn frystur um borð. Þegar þetta er ritað hafa Polarmenn lokið frystingu og eru um 500 tonn í frystilestum skipsins. Munu þeir síðan  freista þess að halda áfram veiðum og klára kvóta sinn áður en haldið verður til hafnar. Fleiri skip voru fyrir norðan og fengu afla meðal annars út af Gjögri og inni á Eyjafirði.

Á framansögðu sést að loðnuvertíðin er á síðustu metrunum og eru flest skipin að ljúka veiðum þessa dagana.

Loðnuveiði úti fyrir Norðurlandi

Polar Amaroq að loðnuveiðum úti fyrir Norðurlandi. Ljósm. Sigmund av TeigumPolar Amaroq að loðnuveiðum úti fyrir Norðurlandi.
Ljósm. Sigmund av Teigum
Loðnuveiðar hafa gengið heldur erfiðlega á Faxaflóa að undanförnu og því hafa nokkur skipanna farið norður fyrir land í von um að finna þar veiðanlega loðnu sem hentar vel til vinnslu. Polar Amaroq kom á Skagagrunn um miðnætti og kastaði þar þrisvar í nótt. Skipstjóri er Sigurður Grétar Guðmundsson en hann er í sinni fyrstu veiðiferð sem skipstjóri á skipi sem veiðir með nót. Vart verður annað sagt en byrjunin á nótaveiðinni sé glæsileg hjá Sigurði því Polar Amaroq fékk á milli 500 og 600 tonn af fínustu loðnu í köstunum þremur. „Hér eru ágætis lóðningar en loðnan stendur djúpt og er alveg niðri á botni yfir daginn. Við erum með tvær nætur um borð og fengum besta kastið með djúpnót sem er 330 faðma löng og 85 faðma djúp. Þessi loðna er með 18% hrognafyllingu og hentar vel til frystingar en við erum að frysta um borð af fullum krafti. Það eru fleiri skip komin hingað norðurfyrir eins og Aðalsteinn Jónsson, Hoffell, Álfsey og Ásgrímur Halldórsson. Þessi skip keyrðu áfram og fundu loðnu út af Eyjafirði. Það virðist vera töluverð loðna hér nyrðra,“ sagði Sigurður.