Góð makrílveiði í Smugunni

Börkur NK siglir inn Norðfjörð. Ljósm. Helgi Freyr ÓlasonBörkur NK siglir inn Norðfjörð.
Ljósm. Helgi Freyr Ólason
Síðustu daga hefur verið góð makrílveiði í Smugunni. Um helgina tóku skipin stutt hol og fengu gjarnan góðan afla. Börkur NK er á landleið með 1.200 tonn sem fengust í þremur stuttum holum. Hann er væntanlegur til Neskaupstaðar um hádegisbil í dag. Í kjölfar hans kemur Bjarni Ólafsson AK. Afli hans er 600 tonn sem fengust í tveimur holum. Beitir NK er á leiðinni á miðin eftir að hafa landað 1.500 tonnum. Allur afli skipanna fer til manneldisvinnslu.
 
Frystiskipin Vilhelm Þorsteinsson EA og Hákon EA hafa með reglulegu millibili landað frystum makríl í frystigeymslur Síldarvinnslunnar. Bæði skip lönduðu til dæmis sl. laugardag, Vilhelm 480 tonnum og Hákon 645 tonnum. Þá er frystum makríl einnig skipað út með reglulegu millibili. Nú er skip í höfninni sem er að lesta 1.000 tonn og í þarsíðustu viku var skip sem lestaði 4.500 tonn af makríl, loðnu og síld. Þá er makríll sífellt settur í frystigáma sem fluttir eru út með skipum frá Reyðarfirði. Það fara nokkur hundruð tonn með gámum í hverri viku.

Fiskvinnslustöðin á Seyðisfirði er orðin bæjarprýði

Fiskvinnslustöð Síldarvinnslunnar á Seyðisfirði. Ljósm. Ómar BogasonFiskvinnslustöð Síldarvinnslunnar á Seyðisfirði.
Ljósm. Ómar Bogason

Vinna við endurbætur á fiskvinnslustöð Síldarvinnslunnar á Seyðisfirði hafa staðið yfir í á þriðja ár. Framkvæmdirnar hafa að miklu leyti verið við húsið utanvert en eins hafa verið gerðar verulegar umbætur á því að innan. Nú eru framkvæmdir við húsið að utan á lokastigi og það hefur svo sannarlega tekið miklum breytingum. Adolf Guðmundsson rekstrarstjóri á Seyðisfirði segir að nú sé fiskvinnslustöðin orðin bæjarprýði. „Þetta er eins og nýtt hús. Húsið er einfaldlega orðið til fyrirmyndar. Nú er framkvæmdum að utan að ljúka en eins hefur verið unnið að umbótum á húsinu að innan. Ég held að allir séu sammála um að hér hefur tekist afar vel til. Við ætlum að fylgja þessum umbótum eftir með skýrum hætti og það hafa verið settar ákveðnar reglur um umgengni á lóðinni. Við viljum ekki bara hafa húsið til fyrirmyndar, við viljum líka að allt umhverfið sé þannig,“ segir Adolf.
 
Það er reyðfirska fyrirtækið Og synir – ofurtólið ehf. sem hefur séð um framkvæmdir við fiskvinnslustöðina, en rafverktaki hefur verið Ólafur Birgisson. Mannvit hefur haft eftirlit með framkvæmdunum. 

„Erfitt, en skemmtilegt og lærdómsríkt“

Lísa Margrét Rúnarsdóttir háseti á frystitogaranum Blængi NK. Ljósm. Hákon ErnusonLísa Margrét Rúnarsdóttir háseti á frystitogaranum Blængi NK.
Ljósm. Hákon Ernuson
Hún heitir Lísa Margrét Rúnarsdóttir og er háseti á frystitogaranum Blængi NK. Hún er tvítug að aldri og segist vera Vestmannaeyingur en hefur dvalið víða. Til dæmis var hún í framhaldsskóla í Brussel þar sem faðir hennar hefur starfað. Þaðan útskrifaðist hún árið 2016. Lísa Margrét hefur lokið tveggja ára námi í hjúkrunarfræðum við Háskólann á Akureyri en nú hefur hún ákveðið að stefna að námi í læknisfræði. Að aflokinni núverandi veiðiferð ætlar hún að byrja að læra fyrir inntökupróf í læknisfræðina.
 
Heimasíðan tók Lísu tali áður en Blængur hélt til veiða sl. þriðjudag, en það er önnur veiðiferðin sem hún er í áhöfn skipsins. Óvissa ríkir um framhald veru Lísu um borð í Blængi enda er ráðgert að skipið fari í slipp að lokinni yfirstandandi veiðiferð. Hafa skal í huga að Lísa er fyrsta konan sem er í áhöfn Blængs eftir að Síldarvinnslan eignaðist skipið.
 
Þegar Lísa er spurð um hlutverk hennar í síðasta túr Blængs stendur ekki á svari. „Ég er bara venjulegur háseti hér um borð. Ég sinnti öllum störfum í vinnslunni og síðan var ég einnig fjórði maður uppi á dekki og var hægri hönd netamannsins. Þetta var erfitt, en skemmtilegt og lærdómsríkt. Fyrsta nóttin um borð var mjög erfið. Þá var hörkubræla og ég kastaðist til í kojunni en svo byrjaði vaktin klukkan fjögur. Þegar vaktin var að byrja spurði ég sjálfan mig: Hvað ertu eiginlega búin að koma þér útí, Lísa ? Síðan vandist þetta og mér þótti gaman að vinnunni“.
 
Hvernig skyldi hafa verið tekið á móti henni um borð? „Strákarnir tóku mjög vel á móti mér og ég myndi segja að nýliðafræðslan um borð sé til fyrirmyndar. Í túrnum var haldin æfing þar sem maður átti að hafa slasast niðri í frystilestinni og þyrla átti að koma til að sækja hann eftir 45 mínútur. Við þurftum að hlúa að manninum, koma honum upp og gera hann tilbúinn um borð í þyrluna. Þetta var gagnlegt og menn ráku augun í sitthvað sem betur mátti fara í þessu ferli“.
 
Var vinnan um borð í fyrsta túrnum ekki líkamlega erfið? „Jú, hún var það. Síðan fannst mér líka svona langur túr vera andlega erfiður. Það skiptir hins vegar öllu máli að það ríki góður andi um borð í svona skipi og það er gott andrúmsloft um borð í Blængi. Í vinnslunni var fyrst og fremst unnin grálúða og reyndar líka þorskur í þessum fyrsta túr mínum. Lúðan er hausuð, sporðskorin, skafin innan, pökkuð, fryst og sett í kassa áður en hún fer í frystilestina. Þorskurinn er flakaður, snyrtur og pakkaður með hefðbundum hætti áður en hann er frystur.  Ég var frá upphafi staðráðin í að standa mig vel og ég held ég hafi gert það. Mér var til dæmis sagt að ég hefði aldrei fengið að fara og starfa uppi á dekki ef ég hefði ekki staðið mig í vinnslunni. Og ég hefði reyndar heldur ekki fengið að fara annan túr. En nú er ég komin um borð og túr númer tvö er framundan og ég hlakka bara til,“ sagði Lísa Margrét að lokum. 

Mjög góð makrílveiði

Beitir NK er á landleið úr Smugunni með 1.310 tonn af makríl. Ljósm. Helgi Freyr ÓlafssonBeitir NK er á landleið úr Smugunni með 1.310 tonn af makríl.
Ljósm. Helgi Freyr Ólason
Nú er mjög góð makrílveiði í Smugunni. Skipin eru gjarnan að hífa 300 tonn eftir að hafa dregið skamman tíma. Það heyrir einnig til tíðinda að norskur bátur fékk þar 900 tonn af makríl í nót í gær.
 
Börkur NK kom til Neskaupstaðar í gærkvöldi með 640 tonn og hófst strax vinnsla í fiskiðjuveri Síldarvinnslunnar. Aflinn er heilfrystur að miklu leyti. Í kjölfar Barkar verður unninn afli úr Bjarna Ólafssyni AK sem er á landleið með tæplega 700 tonn. Beitir NK hefur verið að fá mjög góðan afla að undanförnu og er lagður af stað til Neskaupstaðar með 1.310 tonn sem fengust í aðeins fjórum holum. Aflinn úr Beiti verður unninn strax og vinnslu afla úr Bjarna Ólafssyni lýkur.