Fyrsta loðnan á vertíðinni til Helguvíkur

Fiskimjölsverksmiðja Síldarvinnslunnar í Helguvík. Ljósm. Sigurður K. KolbeinssonFiskimjölsverksmiðja Síldarvinnslunnar í Helguvík.
Ljósm. Sigurður K. Kolbeinsson
Fyrsta loðnan barst til fiskimjölsverksmiðju Síldarvinnslunnar í Helguvík þriðjudagskvöldið 20. febrúar. Það var vinnsluskipið Hákon EA sem landaði þá 330 tonnum af fráflokkaðri loðnu. Eggert Ólafur Einarsson verksmiðjustjóri sagði í samtali við heimasíðuna að þó svo að þarna hefði ekki verið um mikið magn að ræða væru það ávallt tímamót þegar fyrsta loðnan á hverri vertíð bærist til verksmiðjunnar. Þá segir Eggert að mikilvægt hafi verið að fá þessi tonn til að gangsetja verksmiðjuna og prufa búnaðinn að loknu hléi, en afar vel hafi gengið að vinna hráefnið.
 
Verksmiðjan í Helguvík tekur fyrst og fremst á móti loðnu undir lok vertíða þegar hrognataka stendur yfir. Á síðustu loðnuvertíð tók verksmiðjan á móti um 16.000 tonnum. 

900 sjómílur á kolmunnamiðin – Beitir á landleið með rúmlega 3.000 tonn

Beitir NK á kolmunamiðunum suðvestur af Írlandi. Ljósm. Helgi Freyr ÓlasonBeitir NK á kolmunamiðunum suðvestur af Írlandi.
Ljósm. Helgi Freyr Ólason
Beitir NK hélt til kolmunnaveiða frá Neskaupstað 13. febrúar sl. Hann kom við í Færeyjum en hóf veiðar á kolmunnamiðunum suðvestur af Írlandi sl. sunnudag. Veiðarnar hafa gengið vel og hafði heimasíðan samband við Tómas Kárason skipstjóra í dag. „Við höfum verið að veiða um 200 sjómílur suðvestur af Írlandi eða um 100 mílur vestur af hafsvæði sem nefnist Porcupine. Frá Norðfirði á þessi mið eru um 900 sjómílur eða rúmlega þriggja sólarhringa sigling. Hér er svakalega mikið að sjá, lóðningarnar eru alveg rosalegar. Þetta er aðgæsluveiði, hættan er sú að fá of mikið. Stundum vorum við að hífa 300-400 tonn á tveggja tíma fresti. Við erum komnir með rúmlega 3.000 tonn og vorum að leggja af stað heim til löndunar. Við verðum komnir til Neskaupstaðar seinni partinn á sunnudag. Beitir hefur verið eina íslenska skipið á miðunum að undanförnu en Guðrún Þorkelsdóttir SU var komin á undan okkur og lagði af stað í land með 1.500 tonn í fyrrinótt. Hér er talsverður fjöldi af skipum annarra þjóða; Rússar, Norðmenn og Færeyingar, “ sagði Tómas.

Japansfrysting hafin af fullum krafti

Japaninn Kusayanagi og Líneik Haraldsdóttir fylgjast með gæðum loðnunnar. Ljósm. Hákon ErnusonJapaninn Kusayanagi og Líneik Haraldsdóttir fylgjast með
gæðum loðnunnar. Ljósm. Hákon Ernuson
Seinni partinn í gær lauk vinnslu á loðnu úr Bjarna Ólafssyni AK í fiskiðjuveri Síldarvinnslunnar en hluti af afla hans fór í frystingu á Japansmarkað. Í gær dúraði á loðnumiðunum fyrir sunnan land og fengu mörg skipanna góðan afla. Vilhelm Þorsteinsson EA kom til Neskaupstaðar í morgun með 1.480 tonn og verður hluti aflans frystur á Japan. Börkur NK kemur síðan í kjölfar Vilhelms með 1.430 tonn og er einnig ætlunin að afli hans fari í Japansfrystingu. Hjörvar Hjálmarsson skipstjóri á Berki segir að þeir hafi fengið aflann í Skarðsfjörunni í fimm köstum. Hrognafylling loðnunnar sé 16-17% og hún ætti því að henta vel til Japansfrystingar. Telur Hjörvar að einhver möguleiki verði til veiða á morgun en annars sé veðurútlit slæmt við suðurströndina allavega fram á sunnudag.
 
Polar Amaroq skipaði frystri loðnu um borð í flutningaskip í Norðfjarðarhöfn í gær en hélt síðan til veiða norður fyrir land þar sem norski loðnuflotinn hefur haldið sig. Heimasíðan ræddi við Geir Zoëga skipstjóra á Polar Amaroq í morgun en þá voru þeir Polarmenn með fyrsta kast á Skjálfanda. „ Við fundum loðnu strax og við komum hér og erum að draga núna. Það er eitthvað í þessu hjá okkur. Loðnan stendur djúpt en Norðmennirnir segja að hún komi upp á kvöldin. Mér líst bara vel á þetta en það var veðurútlitið sem gerði það að verkum að við fórum hingað norður fyrir land. Hér verður blíða á morgun og eftir morgundaginn hverfa norsku skipin á braut. Þá verðum við einir hér. Hrognafyllingin í loðnunni hérna er um 15% og það hentar okkur vel,“ sagði Geir.
 
Eins og fram kemur hjá Geir er einungis einn dagur eftir af þeim tíma sem Norðmenn mega stunda loðnuveiðar við landið. Eru allar líkur á því að þeir muni nánast ljúka við að veiða þann kvóta sem þeir hafa til ráðstöfunar á þeim tíma.

Veður truflar loðnuveiðar

Polar Amaroq í Norðfjarðarhöfn. Ljósm. Hákon ErnusonPolar Amaroq í Norðfjarðarhöfn. Ljósm. Hákon ErnusonÍslensku loðnuskipin voru að fá ágæt köst á föstudag og laugardag en í gær var erfitt að kasta vegna leiðindaveðurs. Flotinn var kominn að Vík í Mýrdal en eins hefur fengist afli austar með suðurströndinni. Norsku loðnuskipin hafa verið að veiðum úti fyrir Norðurlandi og fengu þar ágætis afla fyrir helgi. Nú eiga Norðmennirnir einungis eftir að veiða rúmlega 11.000 tonn en þeir mega veiða við landið til 23. febrúar.
 
Lokið var við að landa úr Berki NK í Neskaupstað sl. nótt en alls voru fryst tæplega 1.400 tonn úr honum fyrir Asíumarkað. Vinnslan á afla Barkar gekk vel og þegar henni lauk kom röðin að Bjarna Ólafssyni AK en hann kom til hafnar í gær með 1.300 tonn sem fengust í fjórum köstum. Auk þessara skipa lönduðu Vilhelm Þorsteinsson EA og norsku skipin Østerbris og Hardhaus í Neskaupstað um helgina.
 
Í morgun var grænlenska loðnuskipið Polar Amaroq inni á Norðfjarðarflóa. Það mun landa í kvöld og á morgun en undir lok veiðiferðarinnar skoðuðu Polarmenn fjörurnar syðra í samstarfi við Hafrannsóknastofnun. Heimasíðan sló á þráðinn til Geirs Zoëga skipstjóra og spurði hann frétta. „Þessi veiðiferð gekk vel hjá okkur. Við fengum góð köst og settum meðal annars met í afköstum við frystinguna um borð. Fórum yfir 200 tonn á sólarhring í fyrsta sinn. Síðan krussuðum við fjörurnar í samstarfi við Hafró og mældum loðnuna. Það er ljóst að þarna er mikið af loðnu á ferðinni og hún gengur mjög grunnt með ströndinni. Hún er alveg upp í broti. Það var mest að sjá í kringum Ingólfshöfðann en við fórum alveg vestur að Alviðru þar sem skipin hafa verið að veiða núna. Þetta voru aðallega tvær lengjur sem hvor um sig var um 20 mílur og alls staðar var mikið líf, fuglar og hvalir. Austast sáum við lóðningar innan við Hrollaugseyjar. Fyrir utan þetta hafa skip séð loðnu dýpra og bæði Börkur og Bjarni Ólafsson urðu varir við loðnu á siglingu austur af miðunum. Hafrannsóknaskipið Árni Friðriksson hefur verið fyrir norðan þar sem norski flotinn hefur verið að veiðum og vonandi hjálpa mælingar okkar við suðurströndina fiskifræðingunum að fá sæmilega heildarmynd af loðnugöngunum. Hann spáir illa næstu daga ekki síst fyrir sunnan landið þannig að ég er alvarlega að velta fyrir mér að halda til veiða norður fyrir land að löndun lokinni,“ sagði Geir.