Fiskflutningabílar fóru um 360 sinnum yfir Oddsskarð í september

Ísaður bolfiskur settur í flutningabíl á höfninni í Neskaupstað.  Ljósm. Guðlaugur BirgissonÍ nýliðnum septembermánuði var skipað út rúmum 10.000 tonnum af frystum afurðum úr frystigeymslum Síldarvinnslunnar í Neskaupstað. Hér er fyrst og fremst um að ræða makríl og síld. Alls fóru 7.500 tonn beint í skip en um 2.500 tonn fóru í gáma sem ekið var með yfir Oddsskarð til útskipunar á Reyðarfirði. Þetta þýðir að rúmlega 100 gámar af frystum afurðum hafa verið fluttir yfir Oddsskarð í mánuðinum og ferðir flutningabílanna yfir Skarðið fram og til baka vegna þessara flutninga hafa verið á þriðja hundrað.

Fyrir utan þetta hefur mikið af ísuðum bolfiski verið flutt með flutningabílum yfir Skarðið í mánuðinum og hefur sá fiskur bæði komið frá Bjarti NK og eins smærri bátum, ekki síst línubátum sem róið hafa frá Neskaupstað að undanförnu og oft aflað vel. Ferðirnar með ferskan fisk voru um 70 talsins og fóru flutningabílarnir vegna þeirra um 140 sinnum  yfir Skarð og í gegnum Oddsskarðsgöng . Loks voru farnar 10 ferðir með fiskimjöl yfir Skarðið í mánuðinum og það gera 20 ferðir þeirra bíla sem sinntu þeim flutningum.

Niðurstaðan er skýr: Alls fóru flutningabílar frá Eimskip-Flytjanda og Samkipum-Landflutningum um 360 ferðir yfir Oddsskarð og í gegnum Oddsskarðsgöng vegna flutninga á fiski og fiskafurðum frá Neskaupstað í septembermánuði síðastliðnum. Vegna þessara flutninga eingöngu fóru því slíkir bílar 12 ferðir á dag yfir Skarðið  hvern einasta dag mánaðarins.

Fyrir utan flutninga á ferskum fiski og fiskafurðum eru aðrir vöruflutningar yfir Skarðið verulegir en um þá verður ekki fjallað hér. Eins verður ekkert fjallað hér um mikla mannflutninga sem hafa farið mjög vaxandi með tilkomu álvers Alcoa-Fjarðaáls á Reyðarfirði og aukinnar starfsemi Verkmenntaskóla Austurlands í Neskaupstað.

Haft var samband við Rúnar Gunnarsson þjónustustjóra hjá Eimskip á Austurlandi til að fá staðfestingu á framangreindum upplýsingum. Rúnar staðfesti þær tölur sem hér hafa komið fram og sagði síðan eftirfarandi um flutninga yfir Oddsskarð og í gegnum Oddsskarðsgöng: „ Flutningar yfir Skarðið eru gífurlega miklir og í því sambandi vega flutningar með fisk og sjávarafurðir þungt. Ekið er upp í rúmlega 600 metra hæð og síðan í gegnum Oddsskarðsgöng sem henta afar illa fyrir umferð sem þessa. Þessi akstur reynir mikið á bílana og gerir það að verkum að þeir gefa sig fljótt; mótorar og gírkassar bila gjarnan. Til að mæta þessu hafa verið keyptir dýrari bílar sem henta betur í flutninga af þessu tagi en það dugar vart til. Þá þurfa bílarnir sem flytja gáma að vera með sérbyggða vagna undir gámana svo þeir komist í gegnum göngin, en þau eru þröng, dimm og einbreið með útskotum auk þess sem blindhæð er í þeim. Þá er mikilvægt að allir geri sér ljóst að hin mikla umferð flutningabíla veldur truflun á annarri umferð og mörgum finnst vægast sagt óþægilegt að mæta þessum þungu stóru bílum á fjallveginum eða þá í göngunum. Tíðarfar skiptir afar miklu máli hvað varðar þessa flutninga; flutningar um svona fjallveg og göng er ávallt hættulegir en hættan margfaldast þegar veður er slæmt og hálka mikil.

Við sem sinnum þessum flutningum fögnum gríðarlega þeim tímamótum að nú skuli hafnar framkvæmdir við ný Norðfjarðargöng. Ég held að sé varla unnt að finna þarfara verkefni á sviði samgöngumála á landinu“.


Yfir 21.000 tonn af frystum makríl og síld á land í Neskaupstað

Vinnsluskipin Kristina EA og Vilhelm Þorsteinsson EA mætast á Norðfirði.  Ljósm. Guðlaugur BirgissonÁ yfirstandandi makríl- og síldarvertíð hafa vinnsluskip landað rúmlega 21 þúsund tonnum í frystigeymslur Síldarvinnslunnar í Neskaupstað. Skipin sem komið hafa með mest af þessum afla eru Kristina EA með samtals 7.940 tonn, Vilhelm Þorsteinsson EA með 7.850 tonn og Hákon EA með 4.570 tonn. Að auki hefur Barði NK landað um 770 tonnum.  Í dag er Hákon síðan að landa um 700 tonnum til viðbótar.

Í septembermánuði síðastliðnum var skipað út rúmlega 10.000 tonnum af afurðum úr frystigeymslunum og nú er skip í höfninni sem tekur 2000 tonn af síld til Póllands. Útskipanir munu halda áfram á næstunni og á mánudag er væntanlegt skip sem mun taka 4000 tonn af síld og makríl til Úkraínu.

Góð síld og góð veiði

Börkur NK að landa í sumar.  Ljósm. Margrét ÞórðardóttirSíðustu viku hafa öll skipin þrjú sem landa afla til vinnslu í fiskiðjuver  Síldarvinnslunnar í Neskaupstað komið með síldarfarma að  landi. Bjarni Ólafsson AK landaði tæpum 600 tonnum sl. mánudag og þar með hafði hann lokið veiðum á vertíðinni. Síðan hefur Börkur NK landað um 800 tonnum og Beitir NK tæplega 900 tonnum. Börkur kom síðan á ný til löndunar í gær með 600 tonn sem fengust í færeysku lögsögunni. Síldin sem borist hefur er bæði stór og góð og er hún bæði heilfryst og flökuð.

Um helgina verður frí hjá starfsfólki fiskiðjuversins en Beitir NK hélt til veiða í dag og er væntanlegur til löndunar á mánudag.


Allt í góðu hjá togurunum

Trollið tekið á Bjarti NK fyrr í þessum mánuði.  Ljósm. Þorgeir BaldurssonFrystitogarinn Barði NK kom til hafnar í Neskaupstað í gær. Veiðiferðin gekk afar vel og var aflinn rúmlega 362 tonn upp úr sjó, stærsti hlutinn ufsi. Bjarni Ólafur Hjálmarsson skipstjóri var býsna ánægður þegar í land var komið: „Þetta var lúxustúr og mokfiskirí. Við vorum yfirleitt hálfan sólarhring á veiðum og létum síðan reka hinn helminginn á meðan aflinn var unninn. Veitt var á Halanum og tók túrinn einungis 13 daga höfn í höfn. Þetta getur vart verið betra“.

Sömu sögu er að segja af ísfisktogaranum Bjarti NK. Hann kom til hafnar í gær og mun landa í dag. Afli hans er tæp 90 tonn, þar af 56 tonn þorskur og 22 tonn ufsi. Steinþór Hálfdanarson skipstjóri var kátur þegar haft var samband við hann:“Það fiskaðist í reynd vel allan túrinn. Við byrjuðum suður í Berufjarðarál, tókum síðan eitt hol á Fætinum og ein þrjú á Herðablaðinu. Þá voru tekin þrjú-fjögur hol á Gerpistotunni og sömuleiðis þrjú-fjögur á Hryggnum í Seyðisfjarðardýpinu. Það var einmuna blíðuveður allan túrinn og segja má að allt hafi verið í lukkunnar velstandi“.