Síldarvinnslan hf. er í dag eitt af stærstu og öflugustu sjávarútvegsfyrirtækjum landsins og byggir starfsemin á yfir 40 ára reynslu í fiskvinnslu og útgerð. Fyrirtækið er það stærsta á Íslandi í veiðum og vinnslu á uppsjávarfiski og stærsti framleiðandi á fiskimjöli og lýsi á Íslandi.

Starfsemi Síldarvinnslunnar og hlutdeildarfélaga er á 13 stöðum á landinu, auk Bandaríkjanna og Grænlands. Veiðiheimildir fyrirtækisins, ásamt hlutdeildarfélögum, nema alls um 30 þúsund þorskígildis tonnum. Hjá Síldarvinnslunni og hlutdeildarfélögum starfa um 370 manns og ársvelta samstæðunnar árið 2003 var um 9 milljarðar króna.

Síldarvinnslan starfrækir fullkomið fiskiðjuver, þar sem fram fer frysting á bolfiski og uppsjávarfiski ásamt síldarsöltun. Fyrirtækið starfrækir þrjá vel útbúnar fiskmjöls- og lýsisverksmiðjur og gerir út tvö skip til veiða á uppsjávarfiski, eitt frystiskip og eitt ísfiskiskip. Hlutdeildarfélög Síldarvinnslunanr gera út sex uppsjávar- og frystiskip.

Síldarvinnslan veitir sérhæfða hafnarþjónustu í Neskaupstað, sér um löndun og starfrækir rúmgóða frysti- og kæligeymslu og afkastamikla ísverksmiðju.