Ágæt kolmunnaveiði í færeysku lögsögunni

Beitir NK að kolmunnaveiðum. Ljósm. Tómas KárasonBeitir NK hélt til kolmunnaveiða í færeysku lögsögunni  á laugardagsmorgun og er búinn að taka tvo hol þegar þetta er skrifað. Alls er aflinn orðinn 760 tonn, en um 180 tonn fengust í fyrsta holinu og 580 tonn í því síðara en dælt var úr því um miðnætti. Þegar haft var samband við Tómas Kárason skipstjóra sagði hann að verið væri að toga og ágætis útlit. „Við erum að toga á Wyvillie Thomson – hryggnum sunnan við Færeyjar og það er þokkalegt veður eins og er en spáð er kolvitlausu veðri. Við reiknum með að taka trollið áður en það skellur á“, sgaði Tómas.

Brunaæfingar um borð í skipum Síldarvinnslunnar

Frá brunaæfingunum 2. janúar. Ljósm. Guðmundur SigfússonFöstudaginn 2. janúar fóru fram brunaæfingar um borð í uppsjávarskipunum Beiti og Berki. Æfingarnar voru framkvæmdar í samvinnu við Slökkvilið Fjarðabyggðar og er það annað árið í röð sem það er gert en um líkt leyti á síðasta ári fóru fram æfingar um borð í togurunum Barða og Bjarti. Sjómenn fá fræðslu og þjálfun í brunavörnum í Slysavarnaskóla sjómanna en einnig er mikilvægt að slík þjálfun fari fram um borð í eigin skipi. Forsvarsmenn Síldarvinnslunnar hafa lagt aukna áherslu á öryggismál og eru brunaæfingarnar um borð í skipum félagsins liður í því. Hafa þeir leitað eftir samstarfi við Slökkvilið Fjarðabyggðar sem er vel búið og skipað bæði hlutastarfandi og atvinnumönnum og hefur Slökkviliðið sýnt brunaæfingunum um borð í skipunum mikinn áhuga.

Guðmundur Sigfússon slökkviliðsstjóri er afar ánægður með áðurnefndar æfingar og segir að það skipti slökkviliðið miklu máli að fá tækifæri til að æfa slökkvistörf um borð í skipum í samvinnu við áhafnir þeirra. Með slíkum æfingum kynnist slökkviliðsmenn aðstæðum um borð í hverju skipi og þjálfist í að vinna með viðkomandi áhöfn. Farið sé yfir svonefnt neyðarplan skipsins, brunahólfun þess skoðuð og eldvarnarbúnaður og allur búnaður til slökkvistarfa yfirfarinn og prófaður. Guðmundur segir að brunar um borð í skipum séu með erfiðari verkefnum sem áhöfn og slökkvilið geti þurft að takast á við og því sé mikilvægt að æfingar fari fram svo öll viðbrögð verði skjót og fumlaus. Markmiðið með þessum æfingum er að auka þekkingu og öryggi áhafnanna og um leið að undirbúa slökkviliðið sem best ef til eldsvoða kemur um borð. Æfingar af þessu tagi eru til fyrirmyndar að mati Guðmundar og þyrftu helst að fara fram með reglubundnum hætti um borð í öllum skipum.

Heimasíðan sló á þráðinn til Tómasar Kárasonar skipstjóra á Beiti en Beitir er að kolmunnaveiðum í færeysku lögsögunni. Tómas var spurður út í brunaæfingarnar og gildi þeirra: „Brunaæfing með Slökkviliðinu er afar góð og gagnleg fyrir alla, bæði fyrir Slökkviliðið og áhöfnina. Það er afskaplega gott fyrir okkur að fá leiðbeiningar frá fagmönnum og ýmsar ábendingar þeirra eru ómetanlegar. Slökkviliðið kom líka með búnað eins og reykvél til að gera aðstæður raunverulegar. Það er almenn ánægja á meðal áhafnarinnar með þessa æfingu“. Tómas hafði orð á því að áhöfnin á Beiti hefði verið minnt á mikilvægi brunavarna í gærkvöldi þegar kviknaði í rússnesku kolmunnaskipi á miðunum skammt frá Beiti. „Það var verulegur eldur þarna um borð og hætta á ferðum en með aðstoð var unnt að slökkva eldinn í morgun og nú er verið að toga skipið til hafnar. Það er alltaf grafalvarlegt mál þegar eldur kemur upp um borð í skipi,“ sagði Tómas að lokum.


Fyrsta löndunin í Neskaupstað á árinu

Löndun í Bjarti NK. Ljósm. Sigurður Steinn EinarssonÍsfisktogarinn Bjartur kom til hafnar í Neskaupstað í morgun og er að landa fyrsta afla nýhafins árs. Aflinn er 85 tonn, að uppistöðu þorskur. Steinþór Hálfdanarson skipstjóri sagði að skipið hefði verið að veiðum í eina þrjá sólarhringa og veður hefði verið fínt. „Við fengum aflann á Fætinum, Herðablaðinu og á Gerpisflaki og það má segja að fyrsta veiðiferð ársins hafi gengið hreint ágætlega,“ sagði Steinþór.


Skipin til veiða eftir hátíðar

Beitir NK. Ljósm. Hákon ErnusonÖll skip Síldarvinnslunnar hafa hafið veiðar á nýju ári að Berki og Birtingi undanskildum. Börkur liggur í höfn í Neskaupstað þar sem unnið er að því að koma fyrir búnaði til að dæla afla um borð frá skut en Birtingur bíður þess  að taka þátt í kolmunna- eða loðnuveiðum ef þörf krefur. Ísfisktogarinn Bjartur hélt til veiða á föstudag og mun væntanlega koma til löndunar á morgun. Beitir hélt til kolmunnaveiða í færeysku lögsögunni  á laugardagsmorgun og hefur þegar tekið sitt fyrsta hol. Frystitogarinn Barði lagði úr höfn á laugardag og hefur aflað vel í upphafi veiðiferðar.