Myndband af sjósetningu nýja Barkar

Nýi Börkur var sjósettur hjá skipasmíðastöð Karstensens Skibsværft AS í Gdynia í Póllandi hinn 7. september sl. Sjósetningin gekk vel í alla staði og sýnir meðfylgjandi myndband hvernig hún fór fram. Frá því skipið var sjósett hafa framkvæmdir haldið áfram og nú er til dæmis yfirbyggingin komin á sinn stað. Gert er ráð fyrir að Börkur verði dreginn til Skagen í Danmörku í næsta mánuði og þar mun skipið verða fullklárað.

 

1150 tonn af síld í tveimur 100 mínútna holum

Langt var komið með að landa úr Margréti EA í morgun. Ljósm. Smári GeirssonLangt var komið með að landa úr Margréti EA í morgun. Ljósm. Smári GeirssonMargrét EA kom til Neskaupstaðar á laugardagskvöld með 1150 tonn af síld . Heimasíðan ræddi stuttlega við Birki Hreinsson skipstjóra og spurði hvernig gengið hefði að ná í aflann. „Það gekk eins og í sögu. Við stoppuðum í átta og hálfan klukkutíma á miðunum og fengum þessi 1150 tonn í tveimur 100 mínútna holum. Fyrra holið var 105 mínútur og hið seinna 110. Aflinn fékkst norðarlega og ofarlega á Glettinganesgrunni. Þarna var gríðarmikið af síld að sjá og engin vandræði að fá góðan afla. Síldin er líka eins og best verður á kosið. Hún er 420 grömm að meðaltali og algerlega átulaus. Þetta er eins gott hráefni til vinnslu og hugsast getur enda vorum við bara þrjá tíma á leiðinni í land og hráefnið getur vart verið mikið ferskara. Það verður búið að vinna aflann upp úr hádegi í dag,“ segir Birkir.
 
Farmur Margrétar er annar síldarfarmurinn sem berst til vinnslu í Neskaupstað á þessari nýbyrjuðu síldarvertíð. Börkur NK kom með fyrsta farminn sl. föstudag. Að lokinni vinnslu á síldinni úr Margréti verður fiskiðjuverið þrifið hátt og lágt og síðan mun Beitir NK væntanlega koma til löndunar að því loknu. Beitir er þegar kominn á síldarmiðin og mun haga veiðum  þannig að hráefnið verði sem ferskast þegar það kemur til vinnslu.

Börkur að koma með fyrsta síldarfarminn

Börkur NK er að koma með fyrsta síldarfarm vertíðarinnar til Neskaupstaðar í dag. Ljósm. Hákon ErnusonBörkur NK er að koma með fyrsta síldarfarm vertíðarinnar til Neskaupstaðar í dag. Ljósm. Hákon ErnusonRétt fyrir hádegi í dag er Börkur NK væntanlegur með fyrsta síldarfarm haustsins til Neskaupstaðar. Afli skipsins er 890 tonn og mun hann allur fara til vinnslu í fiskiðjuveri Síldarvinnslunnar. Heimasíðan ræddi við Hálfdan Hálfdanarson skipstjóra og spurði hvernig veiðiferðin hefði gengið fyrir sig. „Við byrjuðum á að fara norður fyrir land. Þar höfðu Færeyingar verið að fá stórsíld og við vildum kanna möguleikana þar. Áður en við komum þarna norður hafði brælt og kólnað og síldin virðist hafa forðað sér þaðan. Þá héldum við austur fyrir land þar sem íslensk skip hafa verið að fá afla. Við fengum þennan afla á 20 tímum í Seyðisfjarðardýpinu og hann fékkst í fjórum holum. Þegar við lukum veiðum í morgun áttum við 32 mílur í land. Þetta er ágætis síld eða svipuð þeirri sem við höfum verið að veiða hér síðustu ár. Meðalvigtin er um 350 grömm. Þetta er án efa norsk-íslensk síld en það sést líka íslensk sumargotssíld í aflanum. Það virðist vera talsvert af síld þarna og vonandi á vertíðin eftir að ganga vel,“ segir Hálfdan.

Beitir NK er á makrílveiðum í Smugunni en þar hafa íslensku skipin verið að leita og veður hefur verið óhagstætt.

Sneisafullar Eyjar

Bergey VE að toga á Víkinni. Ljósm. Egill Guðni GuðnasonBergey VE að toga á Víkinni. Ljósm. Egill Guðni GuðnasonBáðar Eyjarnar, Bergey VE og Vestmannaey VE, komu sneisafullar til löndunar í heimahöfn í gærmorgun. Aflinn var mest ýsa. Heimasíðan sló á þráðinn til Birgis Þórs Sverrissonar skipstjóra á Vestmannaey og spurði hvar skipin hefðu verið að fiska. „Við og Bergey fylgdumst að að mestu leyti í þessum túr eins og reyndar oft áður. Við byrjuðum á Víkinni og tókum þar eitt hol en þar var lítið að hafa. Síðan tókum við hol út af Ingólfshöfða og þar var sama sagan. Þá var haldið alla leið austur á Breiðdalsgrunn. Bergey fór beint þangað en við tókum eitt ufsahol á Lúlla og Lovísu á leiðinni. Það var rólegt fiskiríið á Breiðdalsgrunni og þá var haldið til baka. Við reyndum fyrir okkur í Sláturhúsinu út af Mýrum og lentum þar í hörku ýsuveiði og fylltum skipin. Aflinn í túrnum var því mest ýsa og smotterí af þorski og ufsa,“ segir Birgir Þór.
 
Bæði Bergey og Vestmannaey munu halda til veiða á ný í dag og þá verður stefnan tekin austur fyrir land. Að sögn Birgis Þórs er gert ráð fyrir að fiskað verði fyrir austan á næstunni og þá verði væntanlega landað í Neskaupstað eða á Seyðisfirði.