Fyrsti kolmunnafarmurinn

Bó

Bjarni Ólafsson AK siglir inn Norðfjörð með fyrsta kolmunnafarm vetrarins. Ljósm: Smári Geirsson

                Fyrsti kolmunnafarmurinn á þessum vetri barst til Neskaupstaðar í morgun en þá kom Bjarni Ólafsson AK með 1.800 tonn. Gísli Runólfsson segir að þeir á Bjarna Ólafssyni hafi komið með fyrsta vetrarfarminn í fyrra um sama leyti. „Við héldum til veiða 16. nóvember og til að byrja með fór mikill tími í að leita. Í fyrstu var aflinn tregur. Við vorum að draga í 20 tíma og fengum gjarnan innan við 200 tonn í holi og allt niður í 60 tonn. Síðan fór þetta að ganga betur og í lokaholinu fengum við 300 tonn eftir að hafa dregið í sjö og hálfan tíma. Þarna var veiðin að byrja af einhverju viti. Við fengum aflann norðaustur af Færeyjum og það var samfelld blíða allan túrinn. Þetta var eins og á besta sumardegi, „ segir Gísli.

                Auk kolmunnans hefur íslensk sumargotssíld borist til Neskaupstaðar að undanförnu. Margrét EA landaði um 1.000 tonnum í gær og Börkur NK er að landa 1.300 tonnum.

Rólegt á Austfjarðamiðum

Vestmannaey VE í Norðfjarðarhöfn í  morgun.  Ljósm. Sigurður Steinn EinarssonVestmannaey VE í Norðfjarðarhöfn í morgun.
Ljósm. Sigurður Steinn Einarsson
Ísfisktogarinn Vestmannaey VE kom til Neskaupstaðar í morgun með um 80 tonn og er þorskur uppistaða aflans. Að sögn Birgis Þórs Sverrissonar hefur verið heldur rólegt á Austfjarðamiðum að undanförnu. „Við byrjuðum túrinn á Glettinganesflaki og Seyðisfjarðadýpi og aflinn var heldur lítill. Síðan færðum við okkur yfir í Norðfjarðardýpið og þar kom skammvinnt skot. Almennt má segja að afli á Austfjarðamiðum hafi verið tregur allan þennan mánuð en við höfum takmarkað verið að veiðum vegna þess að það þurfti að sinna smávægilegum lagfæringum á skipinu. Reglan er sú að það þarf að laga ýmislegt til á nýjum skipum,“ segir Birgir Þór.
 
Vestmannaey mun halda til veiða á ný strax að löndun lokinni.

Bjartur kom í heimahöfn

Bjartur NK kom nýr í fyrsta sinn til heimahafnar 13.maí 1965. Ljósm. Guðmundur SveinssonBjartur NK kom nýr í fyrsta sinn til heimahafnar 13.maí 1965. Ljósm. Guðmundur SveinssonÁ árum áður þótti tilhlýðilegt að skáld og hagyrðingar settust á bak skáldafáknum þegar nýtt skip kom í fyrsta sinn til heimahafnar. Einn þessara hagyrðinga var Valdimar Eyjólfsson í Neskaupstað. Fyrsta skipið sem Síldarvinnslan eignaðist var Barði sem kom nýr  til heimahafnar 5. mars árið 1965. Einungis rúmum tveimur mánuðum síðar kom næsta skip sem Síldarvinnslan hafði látið smíða; Bjartur. Fljótlega eftir komu Bjarts birtist eftirfarandi pistill frá Valdimar Eyjólfssyni í vikublaðinu Austurlandi:
 
Hinn 13. þ.m. kom skipið Bjartur NK 121, hið síðara skip, sem Síldarvinnslan hf. keypti frá Austur-Þýskalandi, til Neskaupstaðar.
 
Þegar Barði, fyrra skipið kom, var ég veikur og gat ekki skoðað hann, en var hressari þegar hið síðara skip kom og brá ég mér þá um borð. Ég fór fyrst inn í stjórnklefann (stýrishúsið). Þar stóð Jóhann Sigurðsson, tollþjónn, vakt og ruddi hann mér strax braut inn í skipstjóraklefann. Þar voru fyrir fjórir menn og var mér þar vel tekið. Skipstjóri, Filip Höskuldsson, bauð mér strax sæti. Hinir aðrir, er þar voru, Guðgeir Jónsson, bílstjóri, Kristinn Sigurðsson, forstjóri, og Högni Jónasson, bílstjóri, báðu mig um að gera vísu í tilefni af komu skipsins, en það kom enginn andi yfir mig þá og því varð engin vísa. En til þess að gera þeim einhverja úrlausn bið ég Austurland fyrir vísur, sem komu í hug mér þegar heim kom og sendi ég þeim þær hér með:
 
Bjartur kom í heimahöfn
hlaðinn bestu kostum,
allvel fær í úfna dröfn,
illviðrum og frostum.
 
Sem sagt fær í flestan sjó
farkostur hinn besti.
Honum gifta gefist nóg
og gæfa í veganesti.
 
Líkt er það með Barða og Bjart,
báðir í nýjum flíkum,
útlitið er ekki svart
með útgerðina á slíkum.

Veiðar á íslenskri sumargotssíld

Beitir NK landaði 1600 tonnum af íslenskri sumargotssíld sl. mánudag. Ljósm. Helgi Freyr ÓlasonBeitir NK landaði 1600 tonnum af íslenskri sumargotssíld sl. mánudag. Ljósm. Helgi Freyr ÓlasonÍslenskri sumargotssíld hefur verið landað í Neskaupstað að undanförnu. Beitir NK landaði um 1.600 tonnum sl. mánudag og í kjölfar hans kom Margrét EA og landaði um 1.900 tonnum. Tómas Kárason, skipstjóri á Beiti segir að aflinn hafi verið breytilegur í veiðiferðinni. „Það var misjöfn veiði en aflinn fékkst í sjö holum og það var lengi dregið eða í átta til tólf tíma. Við vorum allan tímann að veiðum í Faxadýpinu. Besta holið gaf 500 tonn en síðan voru þetta gjarnan um 200 tonna hol,“ segir Tómas.
 
Börkur NK hélt til síldveiða í mánudagskvöld en gert er ráð fyrir að Beitir haldi fljótlega til kolmunnaveiða.