Vilhelm Þorsteinsson EA landar í síðasta sinn á Íslandi

Síðasta löndunin á Íslandi úr Vilhelm Þorsteinssyni EA. Ljósm. Hákon ErnusonSíðasta löndunin á Íslandi úr Vilhelm Þorsteinssyni EA.
Ljósm. Hákon Ernuson
Vilhelm Þorsteinsson EA kom til Neskaupstaðar í gærmorgun með 570 tonn af frosinni norsk-íslenskri síld. Þetta er síðasta veiðiferð skipsins á síldarvertíðinni en það hefur fiskað tæplega 9.000 tonn af norsk-íslenskri síld frá því að veiðar á henni hófust 22. september sl. Löndun Vilhelms Þorsteinssonar í Neskaupstað í gær var lokalöndun skipsins á Íslandi en það hefur verið selt til Rússlands. Vilhelm kom nýr til landsins árið 2000 þannig að Samherji hefur gert skipið út í 18 ár.
 
Það fer ekkert á milli mála að menn munu sakna Vilhelms Þorsteinssonar og í tilefni af  tímamótunum var Guðmundur Jónsson skipstjóri tekinn tali. „Það er erfitt að kveðja skip eins og Vilhelm. Þetta er í einu orði sagt frábært skip sem hefur reynst bæði útgerð og áhöfn afar vel. En það kemur nýr Vilhelm árið 2020 og það verður glæsilegt skip. Það verður hins vegar ekki vinnsluskip þannig að breytingin verður mikil,“ segir Guðmundur.
 
Samkvæmt upplýsingum frá Guðmundi er búið að fiska um 968 þúsund tonn á Vilhelm frá því að byrjað var að gera skipið út og landanir þess eru um 820 talsins. Meðalafli skipsins á  ári er 53 þúsund tonn og verðmæti heildaraflans á núvirði gæti verið um 60 milljarðar króna. Alls hefur skipið fiskað 110 þúsund tonn af íslenskri sumargotssíld, 220 þúsund tonn af norsk-íslenskri síld, 100 þúsund tonn af makríl, 323 þúsund tonn af loðnu, 210 þúsund tonn af kolmunna og um fjögur þúsund tonn af öðrum tegundum, þar á meðal karfa og grálúðu.
 
Guðmundur Jónsson skipstjóri. Ljósm. Hákon ErnusonGuðmundur Jónsson skipstjóri.
Ljósm. Hákon Ernuson
Um þessar staðreyndir segir Guðmundur eftirfarandi: „Það hefur aflast ótrúlega vel á skipið frá upphafi. Útgerðin hefur svo sannarlega staðið sig hvað varðar útvegun á kvóta og áhöfnin hefur alla tíð verið frábær. Ég held að fimm eða sex úr áhöfninni hafi verið á skipinu frá upphafi.“
 
Það er alveg ljóst að Norðfirðingar eiga eftir að sakna Vilhelms Þorsteinssonar mjög. Skipið hefur landað mestu af afla sínum í Neskaupstað og þar er nánast litið á Vilhelm sem eitt af heimaskipunum. Fyrir utan landanir í Neskaupstað hefur Vilhelm landað töluverðum afla í verksmiðjur Síldarvinnslunnar á Seyðisfirði og í Helguvík.
 
Guðmundur Jónsson segir að samstarfið við Síldarvinnsluna hafi alla tíð gengið vel. „Síldarvinnslan er traust fyrirtæki sem gott er að hafa samskipi við að öllu leyti. Það hefur líka verið afar hagstætt fyrir okkur að eiga Neskaupstað sem nokkurs konar heimahöfn enda liggur staðurinn vel við þeim miðum sem uppsjávartegundir eru sóttar á,“ segir Guðmundur.
 
Fyrstu skipstjórar á Vilhelm Þorsteinssyni voru Arngrímur Brynjólfsson og Sturla Einarsson. Guðmundur tók síðan við af Sturlu árið 2001 og hefur verið á skipinu síðan að undanskildum tæplega tveimur árum þegar hann var á Baldvin Þorsteinssyni EA. Birkir Hreinsson tók síðan við af Arngrími árið 2006.
 
 
 

Skipin landa íslenskri sumargotssíld hvert af öðru

Beitir NK landaði síld sl. Sunnudag. Ljósm. Hákon ErnusonBeitir NK landaði síld sl. sunnudag.
Ljósm. Hákon Ernuson
Sl. sunnudag landaði Beitir NK 1.450 tonnum af íslenskri sumargotssíld í Neskaupstað. Í morgun kom síðan Börkur NK með 2.060 tonn og í kjölfar hans sigldi Bjarni Ólafsson AK inn Norðfjörð með 1.220 tonn. Heimasíðan ræddi við Hálfdan Hálfdanarson skipstjóra á Berki og spurði hvernig veiðarnar gengju. „Þetta er hálfgert nudd, en það er dagamunur á veiðinni. Síðan var hálfgerð bræla hjá okkur allan túrinn og ekki góðar aðstæður til veiða. Það er víst kominn vetur. Við vorum eina fimm daga að veiðum og fengum aflann í átta holum. Veiðarnar fóru fram 80-100 mílur vestur af Reykjanesi,“ segir Hálfdan.
 
Runólfur Runólfsson skipstjóri á Bjarna Ólafssyni segir að afli skipsins hafi fengist í fjórum holum í Faxadýpinu. Þetta er önnur veiðiferð Bjarna Ólafssonar á íslensku sumargotssíldinni en áður hafði skipið landað 960 tonnum.

Blængur í slipp – framkvæmdir ganga vel

Blængur NK í flotkvínni.  Ljósm. Karl Jóhann BirgissonBlængur NK í flotkvínni.
Ljósm. Karl Jóhann Birgisson
Frystitogarinn Blængur NK kom til Akureyrar hinn 17. október sl. og þar hafa starfsmenn Slippsins síðan unnið í skipinu. Í fyrstu lá skipið við bryggju á meðan unnið var í því en sl. þriðjudag fór það í flotkví. Verkefnin eru af ýmsum toga, t.d. er skipt um togvindur og hluti vinnslubúnaðar endurnýjaður. Þá er sinnt hefðbundnum slippverkum og má þar nefna botnhreinsun, botnmálun og endurnýjun fórnarskauta ásamt því að botn- og síðulokar eru yfirfarnir. Gert er ráð fyrir að Blængur sigli heim að framkvæmdum loknum nk. laugardag.
 
Karl Jóhann Birgisson, rekstrarstjóri útgerðar Síldarvinnslunnar, segir að framkvæmdirnar við Blæng hafi gengið afar vel. „Verkið var mjög vel skipulagt hjá starfsmönnum Slippsins og allt hefur gengið eins og í sögu. Það hefur verið til fyrirmyndar hvernig að þessu hefur verið staðið,“ segir Karl Jóhann. 
 
Nýju togvindurnar tilbúnar að fara um borð í Blæng NK. Ljósm. Þorgeir BaldurssonNýju togvindurnar tilbúnar að fara um borð í Blæng NK.
Ljósm. Þorgeir Baldursson
 
 
 
 
 
 
 
 
 
 
 
 
 
 
 
 

Austfirsk togaramið gjöful í haust

Bergey VE að toga á Austfjarðamiðum. Ljósm. Þorgeir BaldurssonBergey VE að toga á Austfjarðamiðum.
Ljósm. Þorgeir Baldursson
Togarar hafa fiskað með góðum árangri á Austfjarðamiðum í haust. Gullver NS hefur að sjálfsögðu veitt á sínum hefðbundnu heimamiðum og Vestmannaey VE og Bergey VE hafa haldið sig fyrir austan en landað ýmist eystra eða í Vestmannaeyjum. Þá hafa togarar víðs vegar að stundað veiðar út af Austfjörðum og Suðausturlandi og hafa þeir landað afla sínum á Austfjarðahöfnum í ríkari mæli en oftast áður.
 
Gullver fór í fimm veiðiferðir í septembermánuði og var afli skipsins í þeim samtals 494 tonn. Í októbermánuði fór Gullver í sjö veiðiferðir og þá var aflinn 752 tonn af slægðum fiski. Þessi októbermánuður er besti aflamánuður í sögu skipsins en Gullver hefur verið gerður út frá Seyðisfirði frá því að hann kom þangað nýr árið 1983.
             
Bergey  fiskaði 410 tonn af slægðum fiski í septembermánuði og 450 tonn í október en afli Vestmannaeyjar var 360 tonn í september og 395 tonn í október. Í septembermánuði fóru bæði skipin í sex veiðiferðir en í október fór Bergey í átta og Vestmannaey í sjö.
 
Þórhallur Jónsson skipstjóri á Gullver segir að haustið hafi verið afar gott. „Aflinn hefur verið með albesta móti að undanförnu og hver veiðiferð hjá okkur hefur ekki tekið nema 2 ½ - 3 ½ sólarhring. Við höfum verið á okkar hefðbundnu miðum og veitt í Berufjarðarál, Hvalbakshalli, Litladýpi og á Fætinum. Síðan höfum við einnig farið norður á Glettinganesflak. Aflinn hefur verið blandaður en uppistaðan er þorskur og ufsi. Það sem er nýtt fyrir okkur er þessi togarafjöldi á miðunum hér eystra. Við höfum oft verið nánast einir á okkar hefðbundnu miðum en nú er fullt af togurum. Það hefur verið eitthvað tregara vesturfrá og þá koma þeir hingað. Við á Gullver erum afar sáttir við fiskiríið og vonandi helst það eitthvað áfram, en mér finnst heldur hafa dregið úr því upp á síðkastið,“ segir Þórhallur.
 
Jón Valgeirsson skipstjóri á Bergey tekur undir með Þórhalli og segir að aflinn hafi verið afar góður fyrir austan í haust. „Við erum vanir því að vera mikið fyrir austan á haustin og aflinn hefur verið með mesta móti í haust. Við erum mikið að veiða á Breiðdalsgrunni og Litladýpi en svo höfum við farið norður á Tangaflak og Glettinganesflak í þeim tilgangi að reyna við ýsu. Við leggjum mikla áherslu á ýsuveiði en staðreyndin er sú að það hefur oft gengið betur að ná henni en nú í haust. Hinsvegar er nóg af þorski og ufsa og fiskurinn hefur verið mjög góður. Við löndum ýmist fyrir austan eða í Eyjum. Þegar við löndum í Eyjum hefjum við nýja veiðiferð við Eyjarnar en á þessum árstíma fæst ekkert þar nema ufsi og karfi. Síðan er haldið austur og þá glæðist aflinn í öðrum tegundum. Það hefur verið óvenjumikil togaratraffík á Austfjarðamiðum í haust og athyglin hefur verið á þeim miðum,“ segir Jón. 

Tillögur að minningareit metnar

Nefndin sem metur tillögurnar um minningareitinn. Talið frá vinstri: Anna Berg Samúelsdóttir, Guðný Bjarkadóttir og Björk Þórarinsdóttir. Ljósm. Hákon ErnusonNefndin sem metur tillögurnar um minningareitinn.
Talið frá vinstri: Anna Berg Samúelsdóttir,
Guðný Bjarkadóttir og Björk Þórarinsdóttir.
Ljósm. Hákon Ernuson
Sl. mánudag kom saman dómnefnd sem metur þær tillögur sem bárust um gerð minningareits á austasta hluta grunns gömlu fiskimjölsverksmiðjunnar í Neskaupstað, en reiturinn verður helgaður þeim sem farist hafa í störfum hjá Síldarvinnslunni. Alls bárust átta tillögur en skilafrestur á þeim var til 1. október sl. 
 
Í dómnefndinni eiga sæti þær Guðný Bjarkadóttir skrifstofustjóri Síldarvinnslunnar, Björk Þórarinsdóttir stjórnarmaður í Síldarvinnslunni og Anna Berg Samúelsdóttir umhverfisstjóri Fjarðabyggðar. Að sögn Guðnýjar gengu störf dómnefndarinnar vel en nefndin gerir ráð fyrir að skila niðurstöðum sínum um 20. nóvember nk. 
 
Eins og áður hefur komið fram hér á heimasíðunni verða veitt verðlaun að upphæð 600.000 kr. fyrir vinningstillöguna. Þá hefur einnig komið fram að Síldarvinnslan áskilur sér rétt til að hafna öllum tillögum. Gert er ráð fyrir að arkitekta- eða verkfræðistofa fullvinni þá tillögu sem fyrir valinu verður og frá upphafi hefur legið fyrir að heimilt væri að nýta fleiri en eina tillögu til útfærslu og myndi þá verðlaunaféð skiptast á milli viðkomandi þátttakenda. 

Fiskimjölsverksmiðjur Síldarvinnslunnar hafa tekið á móti 200.000 tonnum

Fiskimjölsverksmiðjan í Neskaupstað tók meðal annars á móti loðnu frá norskum skipum á síðustu loðnuvertíð. Ljósm. Hákon ErnusonFiskimjölsverksmiðjan í Neskaupstað tók meðal annars
á móti loðnu frá norskum skipum á síðustu loðnuvertíð.
Ljósm. Hákon Ernuson
 
Nú hafa fiskimjölsverksmiðjur Síldarvinnslunnar tekið á móti 200.000 tonnum af hráefni það sem af er árinu eða nákvæmlega 201.674 tonnum. Allt árið í fyrra tóku verksmiðjurnar á móti 196.000 tonnum. Í fyrra tók verksmiðjan í Neskaupstað á móti 118.000 tonnum, verksmiðjan á Seyðisfirði 59.400 tonnum og verksmiðjan í Helguvík 18.700 tonnum.
 
Það sem af er þessu ári hefur verksmiðjan í Neskaupstað tekið á móti 145.460 tonnum. Þar af er kolmunni 72.975 tonn, loðna 46.838 tonn, fráflokkaður makríll og makrílafskurður 7.443 tonn og fráflokkuð síld og síldarafskurður 15.993 tonn.
 
Verksmiðjan á Seyðisfirði hefur tekið á móti 46.157 tonnum í ár og er þar nær eingöngu um kolmunna að ræða.
 
Í ár hefur Helguvíkurverksmiðjan tekið á móti 10.057 tonnum, þar af er loðna 6.941 tonn og makríll 2.812 tonn.
 
Gunnar Sverrisson, rekstrarstjóri fiskimjölsverksmiðjanna, segir að vinnslan í verksmiðjunum hafi gengið mjög vel í ár. „Verksmiðjan í Neskaupstað fær mest hráefni ekki síst vegna þess að hún tekur við afskurði og því sem flokkast frá í fiskiðjuverinu þar og eins frá vinnsluskipum. Þá berst þangað að sjálfsögðu mikill kolmunni. Fyrir Seyðisfjörð er þetta ár tiltölulega gott miðað við það að þangað barst engin loðna, en kolmunninn sem þangað kom var unninn frá miðjum mars og til maíloka. Hvað Helguvíkurverksmiðjuna varðar þá barst þangað loðna undir lok vertíðar og tengist það hrognavinnslu. Þá barst þangað einnig makrílafskurður frá vinnsluskipum og þá helst frá grænlenska skipinu Polar Amaroq,“ segir Gunnar.