Loðnunnar er sárt saknað

Tvö síðustu ár hafa verið loðnuleysisár og loðnunnar er sárt saknað. Ný aflaregla í loðnu hefur verið í gildi í fimm ár og eru menn fjarri því að vera sáttir við hana. Reglan hefur meðal annars skilað tveimur tvö hundruð þúsund tonna vertíðum sem teljast smáar í sniðum og tveimur loðnuleysisárum eins og fyrr greinir. Nú er vinna í gangi við endurskoðun aflareglunnar og bíða menn spenntir eftir niðurstöðu þeirrar vinnu. En hver er saga loðnunnar og hvenær hóf hún að skipta máli í íslenskum sjávarútvegi ?
 
Sagan segir að fyrsti maðurinn til að hagnýta loðnuna hafi verið Jakob Jakobsson skipstjóri og útgerðarmaður frá Strönd á Norðfirði. Jakob var einn þeirra Austfirðinga sem sóttu vetrarvertíðir til Hornafjarðar og mun hann hafa verið þar með bát sinn, Auðbjörgu, á 37 vertíðum á árunum 1917 til 1954. Mun Jakob hafa byrjað að nota loðnu til beitu fyrir árið 1920. Fyrst mun loðnan hafa verið tínd af fjörum en þegar útgerðarmenn gerðu sér orðið grein fyrir gildi hennar komu þeir sér upp litlum fyrirdráttarnótum sem hún var veidd í við háflæðið. Þegar Austfirðingar hófu að stunda veiðar á vetrarvertíðum frá Sandgerði hófu þeir einnig þar að nýta loðnu sem beitu. Mun Ölver Guðmundsson, útgerðarmaður í Neskaupstað, fyrstur hafa veitt þar loðnu um 1937. Til að byrja með var loðnan veidd í nokkurs konar háf sem dreginn var í sjónum. Á vertíðinni 1938 tók Ölver vélbátinn Frey NK á leigu á meðan loðnan gekk fyrir Reykjanes í þeim tilgangi að láta bátinn veiða loðnuna í litla herpinót. Gengu veiðarnar vel og var loðnan meðal annars seld ýmsum útgerðarmönnum sem nýttu hana sem beitu. Næstu árin voru þessar veiðar við Reykjanes endurteknar af Norðfjarðarbátum. 
 
Loðnuveiðar eins og við þekkjum þær, það eru hringnótaveiðar í stórum stíl, eiga sér ekki langa sögu á Íslandi. Ef undan eru skildar tilraunaveiðar, sem efnt var til seint á fimmta áratug tuttugustu aldarinnar, má segja að loðnuveiðar með þessum hætti hafi fyrst hafist veturinn 1963. Veiðarnar fóru hægt af stað og fyrstu árin var einungis veitt úti fyrir suður- og vesturströnd landsins fyrir og um hrygningartímann.
 
Fyrsti Norðfjarðarbáturinn hóf loðnuveiðar með hringnót árið 1964. Það var Gullfaxi, 180 tonna bátur. Nótin sem notuð var við veiðarnar var 117 faðma löng og 20 faðma djúp. Gengu veiðarnar vel en helsta vandamálið var að fá einhverja fiskimjölsverksmiðju til að taka við aflanum.
 
Árið 1966 hófu Síldarvinnsluskipin, Barði og Bjartur, loðnuveiðar og næstu árin fjölgaði Norðfjarðarskipum sem lögðu stund á veiðarnar. Veturinn 1969 héldu til dæmis fimm skip frá Neskaupstað til loðnuveiða.
 
Stóri-Börkur kemur til hafnar í Neskaupstað með fullfermi af loðnu veturinn 1989. Ljósm. Haraldur BjarnasonStóri-Börkur kemur til hafnar í Neskaupstað með fullfermi af loðnu veturinn 1989. Ljósm. Haraldur BjarnasonLoðna barst ekki til vinnslu í Neskaupstað fyrr en veturinn 1968. Hinn 21. febrúar það ár kom Börkur með fullfermi til heimahafnar og þóttu það tímamót. Á þessari loðnuvertíð bárust átta þúsund lestir af loðnu til verksmiðju Síldarvinnslunnar og kom öll loðnan af miðunum sunnan við landið.
 
Eftir að móttaka loðnu hófst á Austfjörðum hófu Austfirðingar að velta því fyrir sér hvort ekki væri unnt að auka hlutdeild austfirsku fiskimjölsverksmiðjanna í landaðri loðnu. Töldu menn mögulegt að hefja loðnuveiðar fyrr og veiða hana á meðan hún gengi suður með Austfjörðum. Þá vaknaði sú spurning hvort loðnan gæti, allavega að hluta til, komið í stað síldarinnar sem Austfirðingar höfðu treyst á en hafði nú brugðist þeim.
 
Fyrst var reynt að stunda loðnuveiðar úti fyrir Austfjörðum í ársbyrjun 1970 en vegna óhagstæðs veðurs og þess hve loðnan stóð djúpt varð árangur slakur. Segja má að fyrst hafi náðst góður árangur í loðnuveiðum austan og norðaustan af landinu árið 1972 og við það jókst loðnuafli mikið og Austfirðir urðu miðstöð veiðanna fyrri hluta vertíðarinnar. Til þess að tryggja vinnslustöðvum Síldarvinnslunnar hráefni þegar loðnuveiðar fóru fram á fjarlægum miðum festi fyrirtækið kaup á stóru og burðarmiklu skipi sem hentaði til að sigla með stóra farma langan veg. Þetta skip var Börkur, sem Norðfirðingar nefndu gjarnan Stóra-Börk. Fyrir utan loðnuveiðarnar var Stóra-Berki ætlað að veiða kolmunna. 
 
Vinnsla á loðnuhrognum í fiskiðjuveri Síldarvinnslunnar veturinn 2016. Ljósm. Hákon ErnusonVinnsla á loðnuhrognum í fiskiðjuveri Síldarvinnslunnar veturinn 2016. Ljósm. Hákon ErnusonSegja má að framan af hafi öll loðnan sem veiddist farið til vinnslu á mjöli og lýsi en það breyttist með tímanum. Framleiðsla á frystri loðnu til útflutnings hófst til dæmis hjá Síldarvinnslunni árið 1971 og framleiðsla á frystum loðnuhrognum hófst árið 1978. Með árunum jókst sífellt áhersla á menneldisvinnsluna og jafnframt var fjárfest í skipum sem gátu komið með gæðahráefni að landi.
 
Í upphafi voru loðnuveiðarnar frjálsar en kvóti var fyrst settur á þær árið 1980. Veiðarnar hafa verið mjög breytilegar frá ári til árs og reyndar hafa veiðarnar verið stöðvaðar oftar en einu sinni vegna ótta um að loðnustofninn væri í hættu. Í mörg ár hefur verið heimilað að veiða um og yfir eina milljón tonna en síðan hafa komið ár þar sem veiðar hafa verið sáralitlar eða nánast engar. Loðnuveiðarnar hafa skipt mörg sjávarútvegsfyrirtæki miklu máli og má nefna að á seinni árum var litið svo á að um fjórðungur af veltu Síldarvinnslunnar tengdist loðnuveiði og –vinnslu. Til að sjá hinar miklu sveiflur í loðnuveiðunum hin síðari ár fylgir hér mynd sem sýnir móttöku á loðnu hjá Síldarvinnslunni frá árinu 2003.
 
Eftir tvö loðnuleysisár í röð er eðlilegt að spurningar vakni. Er loðnustofninn orðinn svona veikur? Hefur loðnan breytt göngumynstri sínu ? Mun endurskoðun nýju aflareglunnar breyta einhverju ?  Hefðbundinn haustleiðangur til mælinga á stærð loðnustofnsins er framundan og eru bundnar vonir við að hann skili jákvæðri niðurstöðu. Menn halda fast í vonina.
Á línuritinu sést hve vinnsla loðnu hefur verið breytileg hjá Síldarvinnslunni frá ári til árs. Engin loðna hefur verið veidd tvö síðustu árÁ línuritinu sést hve vinnsla loðnu hefur verið breytileg hjá Síldarvinnslunni frá ári til árs. Engin loðna hefur verið veidd tvö síðustu ár

Gæðahráefni á landleið

Beitir NK er á leið til Neskaupstaðr með 1700 tonn af gæðamakríl. Ljósm. Hákon ErnusonBeitir NK er á leið til Neskaupstaðr með 1700 tonn af gæðamakríl. Ljósm. Hákon ErnusonMjög góð makrílveiði var í Smugunni í gær og eru þrjú skipanna sem tengjast Síldarvinnslunni á landleið en Bjarni Ólafsson AK lýkur við að landa rúmlega 1000 tonnum í Neskaupstað í dag. Beitir NK er á leið til Neskaupstaðar með 1700 tonn og er væntanlegur síðdegis. Margrét EA er á leið til Færeyja með 1260 tonn og Börkur NK er á leið til Florö í Noregi með 930 tonn. Ástæðan fyrir löndunum erlendis er sú að veiðin er umfram afkastagetu fiskiðjuversins í Neskaupstað. Heimasíðan ræddi við Tómas Kárason skipstjóra á Beiti og spurði frétta. „Þessi 1700 tonn sem við erum með er gæðahráefni. Þetta er átulaus fiskur og meðalþyngdin er yfir 500 grömm. Þetta gerist vart betra. Það var mjög góð veiði í gær og þá tókum við síðasta holið. Þetta var 400 tonna hol. Við höfðum dregið í töluverðan tíma þegar fiskurinn birtist allt í einu og þessi 400 tonn komu í trollið á einum og hálfum tíma.  Aflinn sem við erum með fékkst í fimm holum;  við tókum þrjú hol og Börkur tvö. Samvinna skipanna sem veiða á vegum Síldarvinnslunnar hefur gengið afar vel alla vertíðina og þetta er mjög skynsamlegt fyrirkomulag ekki síst þegar langt er að sækja. Þegar við komum til Neskaupstaðar í dag er verið að klára að vinna úr Bjarna Ólafssyni þannig að þetta smellpassar allt saman,“ segir Tómas.

Eins og fyrr greinir er Börkur á leiðinni til Noregs þar sem hann mun landa afla sínum. Hjörvar Hjálmarsson skipstjóri segir að aflinn hafi fengist á skömmum tíma. „Aflinn fékkst í tveimur holum, annað tókum við og hitt tók Margrét. Við toguðum í 55 mínútur og þegar við vorum búnir að dæla aflanum um borð beið Margrétin eftir að við dældum úr trollinu hjá þeim. Við munum koma til Florö klukkan níu í kvöld og þar vinna þeir 50 til 70 tonn á tímann þannig að við verðum búnir þar á morgun. Þegar svona gengur á miðunum er þetta bara draumur í dós,“ segir Hjörvar.

Blængur úr síðasta túr kvótaársins – mikið hringt og spurt um pláss

Frá Norðfjarðarhöfn í morgun. Frystitogarinn Blængur NK liggur fjærst, þá Hákon EA sem er að landa frystum makríl og næst liggur Bjarni Ólafsson AK sem er að landa makríl til vinnslu. Ljósm. Smári GeirssonFrá Norðfjarðarhöfn í morgun. Frystitogarinn Blængur NK liggur fjærst, þá Hákon EA sem er að landa frystum makríl og næst liggur Bjarni Ólafsson AK sem er að landa makríl til vinnslu. Ljósm. Smári GeirssonFrystitogarinn Blængur NK kom til Neskaupstaðar í gær og hefur þar með lokið veiðum á yfirstandandi kvótaári. Afli skipsins í veiðiferðinni var 725 tonn upp úr sjó að verðmæti um 265 milljónir króna. Um helmingur aflans er ufsi en einnig þorskur, gullkarfi og grálúða. Bjarni Ólafur Hjálmarsson skipstjóri segir að túrinn hafi einkennst af því að vera síðasti túr kvótaársins. „Í túrnum þurftum við að veiða það sem eftir var að veiða á kvótaárinu. Við vorum mest fyrir vestan frá Hala og vestur á Hampiðjutorg og síðan vorum við í grálúðu fyrir austan land. Það var gott veður allan tímann og þá er ekki hægt að kvarta. Auk þess má segja að túrinn hafi einkennst af ágætis kroppi þannig að menn eru sáttir. Upp á síðkastið hefur mikið verið hringt og spurt um pláss á skipinu þannig að það virðist vera að þrengja að víða. Ég hef ekki upplifað svona margar hringingar áður. Það koma engin símtöl frá Austfirðingum, þau koma flest frá höfuðborgarsvæðinu og Akureyri og það eru bæði vanir og óvanir menn sem hafa samband,“ segir Bjarni Ólafur.
 
Landað verður úr Blængi á morgun og gert er ráð fyrir að hann haldi í fyrstu veiðiferð nýs kvótaárs síðdegis á mánudag.
 

21.300 tonn af makríl

21.300 tonn af makrílJón Gunnar Sigurjónsson yfirverkstjóri í fiskiðjuveri Síldarvinnslunnar í Neskaupstað segir að vinnsla á makríl hafi gengið vel það sem af er vertíð, en búið er að taka á móti 21.300 tonnum. Makríllinn hefur ýmist verið hausaður, flakaður eða heilfrystur. Þá segir Jón að það hafi nokkur áhrif á vinnsluna hve langt þurfi að fara til að sækja makrílinn. „Það veldur nokkrum erfiðleikum að makríllinn skuli ekki veiðast hér við bæjardyrnar. Skipin þurfa að sækja hann í Smuguna og þangað er 30 tíma sigling eða meira. Þá hefur veiðin þar verið dyntótt. Allt þetta hefur gert það að verkum að það hefur verið erfitt að halda uppi samfelldri vinnslu. Við kláruðum til dæmis 1400 tonn úr Beiti í gærkvöldi og síðan var þrifið í nótt. Við vonumst síðan til að fá hráefni á morgun, en í nótt var einhver kaldi á miðunum þannig að það er óvíst,“ segir Jón Gunnar.

Í fiskiðjuverinu starfa um 100 manns á makrílvertíðinni. Unnið er á þrískiptum 12 tíma vöktum og á hverri vakt starfa 27 beint við framleiðsluna.

Vestmannaey að landa og Bergey til hafnar í kvöld

Löndun í Vestmannaeyjum. Ljósm. Guðmundur AlfreðssonLöndun í Vestmannaeyjum. Ljósm. Guðmundur AlfreðssonÍsfisktogarinn Vestmannaey VE kom til heimahafnar í morgun með fullfermi og væntanlega mun systurskipið Bergey VE landa þar fullfermi í kvöld. Veiðar hafa gengið vel hjá báðum skipum en þessi veiðiferð hjá þeim ber þess merki að komið er að lokum kvótaárs. Birgir Þór Sverrisson, skipstjóri á Vestmannaey, segir að túrinn hafi verið í styttra lagi. „Við fórum út um hádegi sl. föstudag og lögðumst að bryggju um kl. 10 í morgun. Þannig að þetta var stuttur og snaggaralegur túr í blíðviðri. Það er verið að hreinsa upp restina af kvótanum á kvótaárinu sem lýkur um mánaðamótin. Við byrjuðum veiðiferðina á Pétursey og Vík og þar var fínasta kropp. Svo keyrðum við austur á Mýragrunn og fengum þar 25 tonn af ýsu á stuttum tíma og þá var farið upp á Höfða og þar fékkst einnig góður afli. Nú eigum við bara smávegis eftir af kvótanum og þá einkum þorsk og ufsa. Reynt verður að sækja það þessa daga sem eftir eru af kvótaárinu,“ segir Birgir Þór. 

Jón Valgeirsson, skipstjóri á Bergey, segir að þeir muni væntanlega koma til löndunar í kvöld en þegar rætt var við hann vantaði lítið upp á fullfermi. „Við byrjum túrinn á Víkinni og fengum þar gott af þorski, en síðan var haldið á Reynisdýpi og reynt við ufsa. Þá lá leiðin austur á Mýragrunn í ýsu, vestur á Höfða í þorsk og við stefnum að því að fylla á Víkinni. Það er endalaus blíða og vonandi endist það sem lengst,“ segir Jón.

Poppar upp og hverfur

Bjarni Ólafsson AK. Ljósm. Hákon ErnusonBjarni Ólafsson AK. Ljósm. Hákon ErnusonBjarni Ólafsson AK er á landleið til Neskaupstaðar með 940 tonn af makríl sem fékkst í Smugunni. Skipið mun væntanlega koma til hafnar klukkan sjö í kvöld og þá mun vinnsla hefjast í fiskiðjuverinu en nú hefur ekkert verið framleitt þar í um tvo sólarhringa. Heimasíðan ræddi við Runólf Runólfsson skipstjóra og spurði fyrst hvort veiði skipanna væri jafn misjöfn og áður. “Já, það er óhætt að segja það. Makríllinn poppar upp og hverfur fyrirvaralaust og er býsna erfiður viðureignar. Fiskurinn sést illa á tækjunum og birtist jafnvel ekki fyrr en hann er svona 50-100 metra frá bátnum. Það sést ekkert fyrr en menn eru bara komnir ofan í þetta. Veiðin er ótrúlega misjöfn hjá bátunum þó þeir séu að toga hlið við hlið. Sumir hitta í torfur en aðrir ekki, þannig að það er einskær heppni sem ræður niðurstöðunni. Makríllinn sem við erum með núna er betri fiskur en hefur verið. Hann er stinnari og ætti að vera betri fyrir vinnsluna. Fiskurinn er blandaður en meðalvigtin er 430-460 grömm. Eins og kunnugt er hafa skipin sem veiða fyrir Síldarvinnsluna samstarf og á hverjum tíma tekur eitt skip afla fjögurra skipa. Í þessari veiðiferð erum við að mestu með eigin afla en þó tókum við smáslatta frá Berki og Margréti. Ég held að þetta samstarf skipanna sé mjög skynsamlegt. Það tryggir að afli komi ferskari til vinnslu og það kemur einnig í veg fyrir að skip sé að sigla langan veg með lítinn afla. Þetta samstarf hefur að mínu mati ótvíræða kosti,“ segir Runólfur.

Gullver með fínan túr – vantar fólk til starfa

Gullver NS við frystihúsbryggjuna á Seyðisfirði. Ljósm. Ómar BogasonGullver NS við frystihúsbryggjuna á Seyðisfirði. Ljósm. Ómar BogasonÍsfisktogarinn Gullver NS kom til löndunar á Seyðisfirði sl. sunnudag. Aflinn var rúm 108 tonn og uppistaða hans þorskur, ufsi og karfi. Skipstjóri í veiðiferðinni var Rúnar L. Gunnarsson og segir hann að þetta hafi verið fínasti túr. „ Við byrjuðum í karfa í Lónsdýpinu og í Berufjarðarálnum en síðan vorum við mest í Litladýpinu. Við skruppum að vísu einnig út á Þórsbanka en þar var lítið að hafa,“ segir Rúnar.

Vinnsla í frystihúsinu á Seyðisfirði gengur vel en að sögn Ómars Bogasonar, skrifstofustjóra, er vöntun á fólki til starfa. „Okkur vantar nokkra starfsmenn, en það hefur gengið erfiðlega að ráða fólk. Það virðast ekki margir Íslendingar tilbúnir að koma og vinna í fiski, en nú er um 60% starfsmannanna hjá okkur af erlendu bergi brotnir. Sumir þessara erlendu starfsmanna hafa að vísu unnið hjá okkur lengi og eru orðnir rótgrónir. Ég vil hvetja fólk til að sækja um störf hjá okkur. Við bjóðum upp á gott starfsöryggi og það er eitthvað sem menn hljóta að meta nú á tímum,“ segir Ómar.

Gott veiðiskot í makrílnum

Beitir NK að læðast inn fjörðinn í blíðunni í morgun. Ljósm. Gunnþór B. IngvasonBeitir NK að læðast inn fjörðinn í blíðunni í morgun.
Ljósm. Gunnþór B. Ingvason
Að undanförnu hafa makrílveiðarnar í Smugunni gengið misjafnlega. Stundum hefur lítið veiðst en svo koma góð veiðiskot. Eitt slíkt veiðiskot kom sl. laugardac en þá voru skipin að fá góðan afla eftir stutt hol. Beitir NK kom síðan til Neskaupstaðar í morgun með 1730 tonn og hófst strax vinnsla á aflanum. Börkur NK og Margrét EA fengu einnig góðan afla en Bjarni Ólafsson AK er nýlega kominn á miðin að lokinni löndun í Neskaupstað. Auk Beitis er Hákon EA að landa frystum makríl í Neskaupstað í dag. Heimasíðan ræddi við Tómas Kárason, skipstjóra á Beiti og spurði út í gang veiðanna í Smugunni að undanförnu. „Við vorum í ágætis veiði nálægt færeysku lögsögunni í byrjun veiðiferðarinnar en það stóð frekar stutt. Síðan fannst fiskur norðar og þar var fínasta veiði á laugardag. Við tókum tvö hol þann daginn og fengum 620 tonn í því fyrra og 320 í því síðara. Þennan dag var veiði á tiltölulega stóru svæði. Eftir þetta veiðiskot fannst blettur vestar sem veitt var úr. Svona gengur þetta fyrir sig þarna – það koma fínustu skot annað veifið en svo er lítið að hafa þess á milli,“ segir Tómas.

Í skrapi á Gula teppinu og í Sláturhúsinu

Bergey VE. Ljósm. Egill Guðni GuðnasonBergey VE. Ljósm. Egill Guðni GuðnasonÍsfisktogarinn Vestmannaey VE landaði í Vestmannaeyjum í gær og Bergey VE landaði þar í dag. Vestmannaey var með fullfermi af ýsu, þorski og karfa en afli Bergeyjar var um 60 tonn af ýmsum tegundum. Heimasíðan ræddi við Ragnar Waage Pálmason, skipstjóra á Bergey og spurði út í veiðiferðina. „Þetta var sannkallaður skraptúr hjá okkur en við vorum að reyna við tegundir sem eftir er að veiða á kvótaárinu. Þetta þarf gjarnan að gera þegar sér fyrir endann á kvótaárinu. Við byrjuðum á Pétursey í leit að sólkola en þar var lítið að hafa. Þá var farið á Ingólfshöfðann og þar fékkst ýsa. Síðan var haldið á Gula teppið sunnan við Tangaflakið og þar var verið í skrapi. Í lokin komum við svo við í Sláturhúsinu í von um að fá skarkola en árangurinn varð lítill. Í restina voru tekin þrjú hol við Ingólfshöfðann og þar fékkst blandaður afli; þorskur, koli og steinbítur. Það gengur á ýmsu í skraptúrum sem þessum,“ segir Ragnar Waage.
 
 

Gullver með góðan afla

Gullver NS heldur til veiða sl. miðvikudag. Ljósm. Ómar BogasonGullver NS heldur til veiða sl. miðvikudag.
Ljósm. Ómar Bogason
Ísfisktogarinn Gullver NS kom til Seyðisfjarðar í gær að lokinni vel heppnaðri veiðiferð. Afli skipsins var rúmlega 112 tonn eða fullfermi, uppistaðan þorskur en einnig nokkuð af ýsu, karfa og ufsa. Heimasíðan ræddi við Steinþór Hálfdanarson stýrimann og spurði fyrst hvar skipið hefði verið að veiðum. „Við byrjuðum í Berufjarðarál og á Papagrunni að leita að ufsa. Það gekk ekkert sérstaklega vel og það er bara spurning hvar ufsinn heldur sig. Síðan vorum við innan við Litladýpi í þorski og enduðum á Herðablaði. Þorskaflinn var góður en það þarf að hafa fyrir því að ná í hann. Við enduðum með fullt skip og túrinn tók einungis rétt rúma fjóra sólarhringa. Aflinn var um 30 tonn á dag og það er ekki hægt að kvarta undan því. Þá ber að nefna að það var einstök blíða allan túrinn. Við urðum ekkert varir við makríl í túrnum en trollið var hins vegar loðið af kolmunna allan tímann,“ segir Steinþór.

Í viðtali við Ómar Bogason, skrifstofustjóra í frystihúsinu á Seyðisfirði, kom fram að vinnsla hefði byrjað á fullu í húsinu sl. föstudag að lokinni sumarlokun. Gat hann þess að í frystihúsinu er áfram fylgt ströngum covid-reglum og er starfsfólkinu meðal annars skipt upp í fimm hópa sem ekki umgangast hver annan.

Mjög góð makrílveiði í Smugunni um helgina

Börkur NK á makrílmiðunum. Ljósm. Helgi Freyr ÓlasonBörkur NK á makrílmiðunum. Ljósm. Helgi Freyr ÓlasonMakrílskipin voru að fá góð hol í Smugunni um helgina en nú hefur hægt á veiðinni því fiskurinn á svæðinu sem veitt var á hefur verið að ganga inn í norska og færeyska lögsögu. Fá íslensk skip eru nú á miðunum því flest héldu til hafnar með góðan afla. Bjarni Ólafsson AK er að landa 1.100 tonnum í Neskaupstað og Börkur NK er á leið þangað með 1.660 tonn. Beitir NK yfirgaf miðin með 1.800 tonn og Margrét EA með 1.200.

Makríllinn, sem skipin eru að fá, er ágætt hráefni til vinnslu. Hann er ýmist heilfrystur, hausaður eða flakaður.

Heimasíðan ræddi við Hjörvar Hjálmarsson, skipstjóra á Berki, í morgun og spurði fyrst hvað skipið hefði fiskað í veiðiferðinni. „Við fiskuðum í þessari veiðiferð 2.130 tonn á 28 tímum. Það er býsna gott. Aflinn fékkst í fimm holum en við settum aflann úr fyrsta holinu um borð í Beiti. Þetta er fínasti makríll, en hann er heldur smærri en verið hefur. Þarna er mest um að ræða 380-400 gramma fisk. Það var þokkalegt veiðiveður á miðunum en vissulega er dálítið leiðinlega langt að fara. Makríllinn á svæðinu, sem við vorum á, var að síga inn í norska og færeyska lögsögu en það var líka að fást ágætur afli nokkru norðar. Auðvitað vonast menn til að það gangi makríll inn í íslenska lögsögu en menn gefa sér ekki mikinn tíma til að leita á meðan hann gefur sig í Smugunni,“ segir Hjörvar.

Bæði Vestmannaey og Bergey landa í dag

Vestmannaey VE.  Ljósm. Þorgeir BaldurssonVestmannaey VE. Ljósm. Þorgeir BaldurssonÍsfisktogararnir Vestmannaey VE og Bergey VE komu báðir til heimahafnar í Vestmannaeyjum í morgun til löndunar. Túrinn hjá skipunum var stuttur og var afli Bergeyjar rúm 50 tonn og Vestmannaeyjar góð 40 tonn. Heimasíðan ræddi stuttlega við Egil Guðna Guðnason skipstjóra á Vestmannaey og spurði fyrst hvort ekki væri um óvenju stuttan túr að ræða hjá skipunum. „Jú, þetta var heldur stuttur túr.  Skipin fóru út á mánudag eftir hádegi að aflokinni þjóðhátíðarhelgi og farið var austur að Ingólfshöfða. Nú er komið að lokum kvótaárs og þá þarf gjarnan að leggja áherslu á að veiða ýmsar tegundir en forðast aðrar. Hjá okkur var allt of mikil ýsa þar sem veiði hófst, en ýsukvótinn er uppurinn. Við þurftum því að færa okkur og reyna að eltast við aðrar tegundir sem gekk misjafnlega. Annars er ekkert hægt að kvarta því við vorum bara einn og hálfan sólarhring að veiðum, en megnið af aflanum kom þó á örfáum klukkutímum. Þetta er ekkert nýtt því síðustu dagar kvótaárs eru oft skrýtnir. Þá er verið að veiða þær tegundir sem eftir standa og gjarnan langt siglt til að leita þær uppi. Það hefur gengið afar vel hjá okkur að veiða ýsu á kvótaárinu og ýsa virðist vera út um allan sjó, en nú er ýsukvótinn búinn og þá verða menn að leita að öðrum tegundum og vonandi á það eftir að ganga vel,“ segir Egill Guðni.

Bæði Vestmannaey og Bergey halda til veiða á ný í fyrramálið.

Gullver hefur veiðar á ný

Gullver hefur hafið veiðar á ný að loknu sumarfríi. Ljósm. Ómar BogasonGullver hefur hafið veiðar á ný að loknu sumarfríi.
Ljósm. Ómar Bogason
Ísfisktogarinn Gullver NS kom til Seyðisfjarðar í morgun að lokinni fyrstu veiðiferð eftir mánaðarlangt sumarfrí. Afli skipsins er rúm 97 tonn og er hann blandaður. Frystihúsið á Seyðisfirði mun hefja vinnslu á föstudagsmorgun en það hefur verið lokað vegna sumarleyfa allan júlímánuð. Heimasíðan ræddi stuttlega við Þórhall Jónsson skipstjóra og spurði fyrst hvort ekki væri gott að komast á sjóinn á ný. „Jú, það er alveg ágætt. Það var töluvert unnið í skipinu á meðan á fríinu stóð og mikið málað og snyrt. Þá var sett krapavél í skipið og var hún notuð í fyrsta sinn í þessum túr. Margir halda því fram að krapinn henti betur en venjulegur skelís og víst er að tilkoma krapavélarinnar gerir vinnuna miklu auðveldari. Menn losna við ísmoksturinn. Í þessum túr veiddum við á Stokksnesgrunni og í Hornafjarðardýpinu og enduðum svo túrinn úti á Fæti. Það gekk bara vel að fiska,“ segir Þórhallur. 
 
Gullver mun halda á ný til veiða klukkan átta í kvöld.
 
 

Aðalfundur Síldarvinnslunnar hf.

logo

 

Aðalfundur Síldarvinnslunnar hf.

 Verður haldinn þriðjudaginn 18. ágúst 2020 í Safnahúsinu, Neskaupstað kl. 14:00.

 Dagskrá:

  1. Skýrsla stjórnar
  2. Endurskoðaðir reikningar lagðir fram til staðfestingar
  3. Tekin ákvörðun um greiðslu arðs
  4. Tillaga stjórnar um starfskjarastefnu
  5. Ákveðin þóknun til stjórnar félagsins
  6. Kosin stjórn félagsins
  7. Kosnir endurskoðendur
  8. Önnur mál, löglega fram borin

Stjórn Síldarvinnslunnar hf.

Samfelld makrílvinnsla

Makrílskip í Norðfjarðarhöfn. Ljósm. Smári GeirssonMakrílskip í Norðfjarðarhöfn. Ljósm. Smári GeirssonMakrílvinnslan í fiskiðjuveri Síldarvinnslunnar í Neskaupstað hefur verið samfelld síðustu dagana og unnið var alla verslunarmannahelgina. Skipin sem landa hjá Síldarvinnslunni hafa samstarf um veiðarnar og skiptast þau á um að koma með aflann að landi. Bjarni Ólafsson AK kom með rúm 1000 tonn á föstudag, Beitir NK kom með rúm 1600 tonn á laugardag og í gær kom Margrét EA með rúm 1300 tonn. Nú er verið að vinna aflann úr Margréti.
 
Veiðarnar höfðu gengið þokkalega um tíma en það dró úr þeim í gær. Skipin eru að veiðum í Smugunni og mun gangan sem helst var veitt úr hafa horfið inn í færeyska lögsögu. Heimasíðan ræddi við Hálfdan Hálfdanarson, skipstjóra á Berki og spurði frétta. „Við vorum að leggja af stað í land, nýbúnir að dæla 150 tonnum frá Bjarna Ólafssyni. Aflinn um borð er 1377 tonn og við verðum komnir til Neskaupstaðar í fyrramálið. Förum undir strax og löndun lýkur úr Margréti. Það er bara búin að vera þokkalegasta veiði undanfarna daga þar til í gær. Fiskurinn sem við vorum í gekk þá inn fyrir færeysku línuna – því miður tekur hann ekkert tillit til lína, hann hikar ekki einu sinni þegar hann fer yfir þær. Skipin leituðu eftir að þessi fiskur hvarf og nú eru allir búnir að kasta. Áður en við misstum fiskinn sem við vorum í yfir línuna vorum við að fá þokkaleg hol. Stærsta holið hjá okkur var 460 tonn en oft voru þau 200-300 tonn,“ segir Hálfdan.
 

Makrílvertíð í fullum gangi

Makríll unninn í fiskiðjuverinu. Ljósm. Hákon ErnusonMakríll unninn í fiskiðjuverinu. Ljósm. Hákon ErnusonSíðustu dagana hefur makrílveiðin glæðst og umsvifin í fiskiðjuveri Síldarvinnslunnar í Neskaupstað eru mikil. Á makrílvertíð er öll áhersla lögð á manneldisvinnslu. Það sem af er hefur stór makríll borist að landi og í honum hefur verið töluverð áta. Síðustu sólarhringa hafa skipin þó verið að fá makríl sem vigtar minna en 500 grömm. Makríllinn hefur verið unninn með ýmsum hætti; mest hefur fiskurinn verið hausaður og frystur, en einnig hefur verið heilfryst og flakað.   
 
Í fiskiðjuverinu er unnið á vöktum og eru vaktirnar þrjár. Um 25 starfsmenn eru á hverri vakt auk verkstjóra og iðnaðarmanna. Gengnar eru 12 tíma vaktir og í fullum vaktamánuði þegar hráefnisöflun er stöðug vinnur hver starfsmaður á um 20 vöktum. Hér er um að ræða mikla vinnu en tekjurnar eru góðar. Reiknað er með að makrílvertíð standi fram undir miðjan septembermánuð en þá er gert ráð fyrir að veiðar og vinnsla hefjist á norsk- íslenskri síld þannig að vaktavinnu í fiskiðjuverinu ætti ekki að ljúka fyrr en í októberlok. 
 
Hákon Ernuson, starfsmannastjóri Síldarvinnslunnar, segir að ágætlega hafi gengið að ráða starfsfólk fyrir vertíðina sem hófst í byrjun júlí. Nú þurfi hins vegar að ráða fólk til starfa frá miðjum ágúst, þegar skólafólk hverfur af vettvangi, en þá bregði svo við að fólk sýni störfunum lítinn áhuga. Sárafáar umsóknir hafi borist og hafi hann verulegar áhyggjur af stöðu mála. „Ég hélt að það yrði ekki erfitt að manna þessi störf í því atvinnuástandi sem ríkir á landinu, en einhverra hluta vegna virðast þau ekki vera áhugaverð,“ segir Hákon.

Ekkert mok en nuddast ágætlega

Börkur NK að taka á móti afla frá Beiti NK á makarílmiðunum. Ljósm. Helgi Freyr ÓlasonBörkur NK að taka á móti afla frá Beiti NK á makarílmiðunum. Ljósm. Helgi Freyr ÓlasonMakríllinn hefur verið erfiður viðureignar að undanförnu og hefur íslenski makrílflotinn verið að veiðum í Smugunni. Lítið hefur veiðst og hafa skipin sem landa hjá Síldarvinnslunni haft samvinnu um veiðarnar – hverju sinni er afla þeirra dælt um borð í eitt skip sem flytur hann að landi. Börkur NK kom síðast til löndunar í Neskaupstað með rúm 1100 tonn og lauk vinnslu úr honum í gær. Jón Gunnar Sigurjónsson yfirverkstjóri í fiskiðjuverinu segir að makríllinn sé stór og í honum töluverð áta en vinnslan gangi vel.
 
Í gær glæddist veiðin í Smugunni og voru skipin að fá 150-250 tonna hol. Aflinn var settur í Bjarna Ólafsson AK og er hann á landleið með um 960 tonn. Skipið mun koma að landi um hádegisbil á morgun, en 310 mílur eru frá veiðisvæðinu til Neskaupstaðar. Heimasíðan ræddi við Þorkel Pétursson stýrimann og spurði hvort ekki hefði hýrnað yfir mönnum þegar veiðin batnaði. „Jú, vissulega eru menn hressari. Menn voru búnir að leita töluvert og loksins fannst blettur sem gaf dálítið og fengum við 240 tonna hol í gær. Það er að koma þarna makríll, en þetta er ekkert mok en nuddast ágætlega. Makríllinn sem við höfum verið að fá núna er heldur minni en sá sem áður fékkst. Hann er að meðaltali í kringum 450 grömm, en áður fékkst makríll vel yfir 500 grömmum. Þegar byrjað var að trolla á þessum bletti þyrptust skipin að og brátt var kominn mikill fjöldi skipa. Þarna eru mest Rússar en einnig grænlensk skip,“ segir Þorkell.
 
Heimasíðan heyrði einnig í Sigurði Valgeir Jóhannessyni, skipstjóra á Beiti NK og sagði hann að veiði hefði hafist í gær eftir að skipin hefðu leitað að mestu í eina tvo sólarhringa. „Við settum afla um borð í Bjarna Ólafsson í gær en dældum síðan 150 tonnum um borð í morgun. Við erum næsta skip sem tekur á móti afla skipa sem landa hjá Síldarvinnslunni. Það fundust blettir í gærmorgun og veiðin hófst þá. Makríllinn er oft erfiður viðureignar, hann birtist og hverfur og það getur verið pirrandi að eiga við hann. Þetta virðist vera eina svæðið í Smugunni sem er að gefa einhvern afla því skipin hafa flykkst hér að og það er orðin bullandi traffík hérna,“ segir Sigurður.
 

Brátt fer allt að snúast á ný á Seyðisfirði

Gullver NS, nýmálaður og fínn, mun halda til veiða nk. föstudag. Ljósm. Ómar BogasonGullver NS, nýmálaður og fínn, mun halda til veiða nk. föstudag. Ljósm. Ómar BogasonÞað sem af er júlímánuði hefur verið sumarstopp hjá frystihúsi Síldarvinnslunnar á Seyðisfirði og stoppið hefur verið nýtt til að sinna viðhaldi á húsinu og á togaranum Gullver NS. Nú er ráðgert að Gullver haldi til veiða nk. föstudag og að vinnsla hefjist í frystihúsinu seint í næstu viku. Róbert Ingi Tómasson, framleiðslustjóri í frystihúsinu, segir að allt sé tilbúið til að hefja vinnslu á ný. „Við höfum notað þetta hlé til að sinna viðhaldi og lagfæringum á húsinu. Hér hefur til dæmis allt verið þrifið, pússað og málað og lítur húsið virkilega vel út. Það verður allt spikk og span þegar við byrjum á ný. Hjá okkur starfar mikið af erlendu starfsfólki sem fór heim í stoppinu. Þetta fólk er nú að koma til landsins og við viljum fara afar varlega vegna kórónuveirunnar. Fólkið þarf að vera í fimm daga einangrun eftir komuna til landsins og þeirri reglu verður að sjálfsögðu fylgt. Þá munum við halda áfram því vinnufyrirkomulagi sem komið var á vegna veirunnar. Það er mjög brýnt að fara að öllu með mikilli gát í stríðinu við þessa veiru og við viljum ekki láta okkar eftir liggja í þeim efnum,“ segir Róbert.
 

Eyjarnar lönduðu tvisvar fullfermi í síðustu viku

Eyjarnar lönduðu tvisvar fullfermi í Vestmannaeyjum í síðustu viku. Ljósm. Guðmundur AlfreðssonEyjarnar lönduðu tvisvar fullfermi í Vestmannaeyjum í síðustu viku. Ljósm. Guðmundur Alfreðsson

Ísfisktogararnir Vestmannaey VE og Bergey VE lönduðu tvisvar fullfermi í Vestmannaeyjum í síðustu viku. Bæði skipin komu til löndunar á mánudag og síðan aftur á fimmtudag. Þau héldu síðan á ný til veiða á föstudagskvöld. Heimasíðan heyrði hljóðið í Ragnari Waage Pálmasyni skipstjóra á Bergey. „ Það var hörkuveiði hjá báðum skipum í síðustu viku. Ég var þá að vísu í fríi en Snorri þór Guðmundsson var með skipið. Bæði skip voru að veiðum á Pétursey og aflinn var blandaður. Í fyrri túrnum var þetta ýsa, ufsi og þorskur en í seinni túrnum mest ýsa og ufsi. Í þessum túr fórum við austur að Ingólfshöfða en Vestmannaey hefur verið á Péturseynni áfram. Við lentum í bölvaðri brælu en höfum fengið góðan afla og erum á landleið. Hugsanlega munum við kasta á Péturseynni á landleiðinni til að fylla, við sjáum til,“ segir Ragnar Waage.

 

 

Team Rynkeby hjólaði til styrktar krabbameinssjúkum börnum

Team Rynkeby hjólaði til styrktar krabbameinssjúkum börnum   Team Rynkeby hjólaði til styrktar krabbameinssjúkum börnum

Fyrr í þessum mánuði hjóluðu 29 hjólreiðamenn um landið undir merki Team Rynkeby og fylgdu þeim 11 aðstoðarmenn. Team Rynkeby er alþjóðlegur hópur hjólreiðafólks sem hjólar árlega til styrktar langveikum börnum. Hópurinn skiptist upp í mörg lið og var Team Rynkeby lið stofnað á Íslandi árið 2017. Hefð er fyrir því að Team Rynkeby liðin hjóli árlega frá Danmörku til Parísar en vegna kórónufaraldursins var það ekki gert í ár. Í stað Parísarferðarinnar hjólaði íslenska liðið um Ísland og var alls hjólað um 850 km í öllum landshlutum. Alls staðar þar sem hópurinn fór vakti hann mikla athygli en að meðaltali voru hjólaðir um 100 km á degi hverjum.

Unnt er að heita á Team Rynkeby með því að hringja í eftirfarandi styrktarnúmer: 907-1601 kr. 1.500 – 907-1602 kr. 3.000 og 907-1603 kr. 5.000. Munu öll áheitin renna til Styrktarfélags krabbameinssjúkra barna. Síldarvinnslan styrkti þetta góða málefni myndarlega og í þakklætisskyni voru meðfylgjandi myndir sendar, en þær voru teknar í Neskaupstað 9. júlí sl.

Undirflokkar