Barði NK kemur með fullfermi af frystum makríl og Bjartur NK heldur til makrílveiða

Landað úr Barða NK.  Ljósm. Þorgeir BaldurssonFrystitogarinn Barði NK kom með fullfermi eða um 170 tonn af frystum makríl til Neskaupstaðar síðastliðinn laugardag og hófst löndun úr skipinu í dag.  Bjarni Ólafur Hjálmarsson skipstjóri sagði að veitt hefði verið fyrir vestan land í túrnum og hefði aflast vel eða eins og frystitækin önnuðu. Upplýsti Bjarni að Barði myndi halda til veiða á ný í kvöld og gerðu menn sér vonir um að unnt yrði að finna góðan fisk fyrir austan land, allt of langt væri að sigla á miðin fyrir vestan. Helsti munurinn á vertíðinni nú og síðustu vertíðum er sá að mati Bjarna að makríllinn er mun smærri. Sagði Bjarni að gert væri ráð fyrir að Barði færi 5-6 makríltúra og yrði við þær veiðar út ágústmánuð. Barði mun halda til veiða á ný í kvöld.

Ísfisktogarinn Bjartur NK mun væntanlega halda til makrílveiða í dag. Mun hann fara 2-3 makríltúra og koma með 50-60 tonn að landi úr hverri veiðiferð.  


Umhverfisframkvæmdum við fiskiðjuverið að ljúka

Umhverfisframkvæmdum við fiskiðjuverið að ljúka.  Ljósm. Þórhildur Eir SigurgeirsdóttirUmhverfisframkvæmdir við fiskiðjuver Síldarvinnslunnar í Neskaupstað hófust um 10. júní og mun þeim ljúka í þessari viku. Framkvæmdirnar eru allumfangsmiklar og felast meðal annars í mótun lands og vegkanta, hellulögn, smíði mikils timburpalls, gerð beða og gróðursetningu trjáa og runna. Umrætt svæði er áberandi og blasir við þegar ekið er eftir þjóðveginum inn í Neskaupstað.

Það er Tandraberg ehf. sem annast framkvæmdirnar en lóðin var hönnuð af Landmótun. Einar B. Kristjánsson framkvæmdastjóri Tandrabergs segir að lóðarframkvæmdin hafi gengið vel í alla staði og hún sé fullkomlega á áætlun. 


Vinnsluskip hafa landað rúmlega 4000 tonnum af makríl og síld í Neskaupstað

Útskipun á frystum afurðum í Neskaupstað.  Ljósm. Þórhildur Eir SigurgeirsdóttirÞað sem af er yfirstandandi makríl- og síldarvertíð hafa vinnsluskip landað rúmlega 4000 tonnum af frystum makríl og síld í frystigeymslur Síldarvinnslunnar í Neskaupstað. Skipin sem um ræðir eru Vilhelm Þorsteinsson EA, Hákon EA og Kristina EA. Að auki taka frystigeymslurnar á móti framleiðslu fiskiðjuversins í Neskaupstað.

Að sögn Heimis Ásgeirssonar yfirverkstjóra hefur litlu verið skipað út af frystum afurðum frá yfirstandandi vertíð. Fyrr í vikunni tók þó skip 500 tonn til Sankti Pétursborgar og nú er verið að skipa út 2800 tonnum af frystum afurðum í skip sem fer til Svartahafsins en þar er að mestu um að ræða loðnu frá síðustu loðnuvertíð. Fyrsta alvöru útskipunin með afurðum yfirstandandi vertíðar verður í skip sem kemur eftir helgi. Það mun taka 4500 tonn og sigla með það til Nígeríu.


Engin kraftveiði en þokkalegt nudd

Beitir NK.  Ljósm. Þorgeir BaldurssonBeitir NK kom til löndunar í Neskaupstað í morgun með 480 tonn af makríl og síld en verið er að ljúka við að landa úr Berki NK sem kom til hafnar aðfaranótt þriðjudags með 550 tonn. Í viðtali við heimasíðuna sagði Hálfdan Hálfdanarson skipstjóri á Beiti að í túrnum hefði ekki verið nein kraftveiði, þetta hefði verið þokkalegt nudd. „Við vorum að veiðum í Hvalbakshalli, á Þórsbanka og í Rósagarðinum eins og við höfum verið alla vertíðina“, sagði Hálfdan. „Aflinn er býsna misjafn, stundum lítið að hafa en inn á milli koma ágæt hol. Þetta er svo sem svipað og oft áður en makríllinn er blandaðri en síðustu ár hvað stærð varðar. Líklega á það eftir að breytast þegar líður á vertíðina en reynslan sýnir að þá aukast líkur á stærri og betri fiski. Síld er um það bil þriðjungur af aflanum í þessum túr og þannig hefur það verið að undanförnu. Norsk-íslensku síldarinnar verður víða vart í köntunum hérna fyrir austan og má segja að hún sé komin á sínar hefðbundnu sumarslóðir“.


Sjávarútvegsskóli Síldarvinnslunnar fullsetinn

Sjávarútvegsskóli Síldarvinnslunnar fullsetinnSjávarútvegsskóli Síldarvinnslunnar verður settur mánudaginn 29. júlí næstkomandi. Umsóknarfrestur um skólavist rann út 15. júlí og er ljóst að skólinn verður fullsetinn. Ráðgert var að nemendur yrðu 20 talsins en vegna mikils fjölda umsókna hefur verið ákveðið að taka inn 27 nemendur.

Margir hafa sýnt fyrirhuguðu skólastarfi áhuga og hafa Síldarvinnslunni borist fyrirspurnir um hvernig ráðgert sé að standa að skólahaldinu. Almennt virðast menn sammála því að full þörf sé á að gefa ungmennum kost á fræðslu um þessa undirstöðuatvinnugrein þjóðarinnar, sögu hennar og eðli.

Skólinn mun starfa í tvær vikur, 3-4 klukkustundir á dag og munu starfsmenn Síldarvinnslunnar annast kennslu. Litið er á skólahaldið sem tilraunaverkefni og að þessu sinni höfðu 8. bekkingar Nesskóla forgang þegar unnið var úr umsóknum. Nemendur fá greidd námslaun og verða launin sambærileg þeim launum sem greidd eru í Vinnuskóla Fjarðabyggðar.

Væntanlegir nemendur munu  fá tölvupóst á næstu dögum þar sem upplýsingar verða veittar um starfsemi skólans. 


Makríll hér og makríll þar

Úr fiskiðjuveri Síldarvinnslunnar í Neskaupstað.  Ljósm. Margrét ÞórðardóttirÍ fiskiðjuveri Síldarvinnslunnar í Neskaupstað hefur  verið samfelld vinnsla á makríl og síld undanfarna daga. Beitir NK kom til löndunar með 435 tonn á laugardag og Bjarni Ólafsson AK með 405 tonn á sunnudag. Um það bil þrír fjórðu hlutar afla skipanna var makríll en um fjórðungur síld. Nú bregður svo við að heldur dauft er yfir veiðunum eystra en þar var þokkaleg veiði í síðustu viku.

Frystitogarinn Barði NK hefur verið á makrílveiðum fyrir vestan land og er nú um 34 mílur suðvestur af Snæfellsnesi. Veiðin hefur verið nægjanleg til að halda uppi fullri vinnslu og hafa verið fryst um 60 tonn þar um borð.

Lesa meira...

Sjávarútvegsskóli Síldarvinnslunnar - Umfjöllun Útvegsblaðsins

Grein í Útvegsblaðinu í júlí 2013Smelltu hér til að lesa umfjöllun Útvegsblaðsins um Sjávarútvegsskóla Síldarvinnslunnar 

Makríl- og síldveiði að glæðast fyrir austan

Beitir NK kemur með makríl- og síldarfarm til Neskaupstaðar. Ljósm. Margrét ÞórðardóttirBörkur NK kom til löndunar í Neskaupstað í gær með 680 tonn af makríl og síld. Veiði hafði verið heldur treg frá því að skipin sem landa í fiskiðjuver Síldarvinnslunnar hófu vertíðina en hún hefur verið að glæðast síðustu daga. Nú hefur rúmlega 3000 tonnum af makríl og síld verið landað til vinnslu í fiskiðjuverinu og hefur framleiðslustarfsemin gengið vel. Þá hefur um 3000 tonnum af sjófrystum makríl og síld verið landað í frystigeymslur Síldarvinnslunnar í Neskaupstað. Það eru Vilhelm Þorsteinsson EA og Kristina EA sem komið hafa með sjófrysta aflann að landi; Vilhelm með um 1400 tonn í þremur veiðiferðum og Kristina 1600 tonn í einni veiðiferð.

Beitir NK er á miðunum og hafði fengið 250 tonn í tveimur holum þegar rætt var við Hjörvar Hjálmarsson skipstjóra. „Veiðin er að aukast og þetta er ágætis nudd“,sagði Hjörvar. „ Við erum í okkar þriðja túr á vertíðinni og þetta er allt á uppleið. Fiskurinn er fínn, stór og góð síld og meðalþyngd makrílsins er yfir 400 grömm. Hinsvegar er töluverð áta í fiskinum. Nú ber á því að síldin er að skilja sig frá makrílnum og það virðist vera að gerast á sama tíma og á vertíðinni í fyrra. Nú er bara að vona að veðrið haldist gott og þá er ég viss um að veiðin verður í góðu lagi. Nú er hér svolítill kaldi, 12-14 metrar og það er ekki gott fyrir yfirborðsveiðar eins og þessar“.

Vinnsla á makríl og síld gengur vel

Makríll í fiskiðjuveri Síldarvinnslunnar.  Ljósm. MÞVinnsla á makríl og síld er hafin af fullum krafti í fiskiðjuveri Síldarvinnslunnar í Neskaupstað og gengur vel.  Beitir NK kom með 450 tonn af blönduðum afla til vinnslu í gær en áður hafði álíka farmur úr Berki NK verið unninn.  Makríllinn er hausskorinn, slógdreginn og frystur en síldin er flökuð og fryst.

Að sögn Jóns Gunnars Sigurjónssonar verksmiðjustjóra er hér um gott hráefni að ræða og ljóst að stærri makríll en sá sem veiddist í upphafi vertíðar er að ganga á miðin við landið.

Jóni Gunnari líst vel á vertíðina og er þess fullviss að hún sé hafin fyrir alvöru og samfelld vinnsla sé framundan.


Börkur NK kemur með fyrsta farminn af síld og makríl til vinnslu í fiskiðjuverinu

Börkur NK í Neskaupstað í morgun.Í morgun kom Börkur NK með fyrsta farminn af síld og makríl til vinnslu í fiskiðjuveri Síldarvinnslunnar í Neskaupstað á yfirstandandi vertíð. Aflinn er samtals um 420 tonn, um 270 tonn af makríl og um 150 tonn af síld. Vaktir hafa verið settar á í fiskiðjuverinu og gera menn ráð fyrir nær samfelldri vinnslu næstu vikurnar. Beitir NK hélt til veiða í nótt og Bjarni Ólafsson AK mun halda til veiða í dag en ásamt Berki munu þessi skip landa afla til vinnslu í fiskiðjuverinu.

Sigurbergur Hauksson skipstjóri á Berki segir að aflinn á þessu sinni hafi fengist á Hvalbakshalli og austur af Þórsbanka.  Þarna hafi Börkur verið að veiðum ásamt Vilhelm Þorsteinssyni EA og Kristinu EA. Önnur skip voru miklu vestar að veiðum. Að sögn Sigurbergs var ekki mikið að sjá á þessum slóðum miðað við sama tíma í fyrra en það á eftir að leita betur og ástand á miðunum getur verið býsna fljótt að breytast. Það var fínn fiskur sem Börkur kom með að landi; meðalvigt makrílsins er á milli 380 og 390 grömm og meðalvigt síldarinnar 310 grömm.

Hvað borgar sjávarútvegurinn í Fjarðabyggð?

Hvað borgar sjávarútvegurinn í Fjarðabyggð?

Þessa dagana fer fram á Alþingi umræða um veiðigjöld. Í tilefni af því var eftirfarandi samantekt unnin um opinber gjöld þriggja stærstu sjávarútvegsfyrirtækjanna í Fjarðabyggð. Gjöldin eru reiknuð miðað við að núverandi frumvarp um veiðigjöld verði að lögum. 
Til að lesa fréttina þarf að smella á myndina hér til hliðar.Hvað borgar sjávarútvegurinn í Fjarðabyggð?

 

Mettúr hjá Barða NK

Barði NK.  Ljósm. Þorgeir BaldurssonFrystitogarinn Barði NK kemur væntanlega inn til löndunar á fimmtudagsmorgun. Skipið hefur lagt stund á grálúðuveiðar í yfirstandandi veiðiferð og kom reyndar inn til millilöndunar hinn 22. júní. Ljóst er að lokið verður við að veiða grálúðukvóta skipsins í veiðiferðinni.

Aflinn hefur verið jafn og góður allan túrinn og veðurblíða hefur leikið við skipverja. Fyrir liggur að hér er um mettúr að ræða hjá skipinu hvað varðar aflaverðmæti og er áhöfnin ánægð með árangurinn.

Næsta verkefni Barða felst í makrílveiðum. Gert er ráð fyrir að skipið haldi til veiða á makríl hinn 10. júlí og leggi stund á þær veiðar í júlí- og ágústmánuði.


Fyrsti makríllinn til Neskaupstaðar

Vilhelm Þorsteinsson EA landar makríl.  Ljósm. Þorgeir BaldurssonVilhelm Þorsteinsson EA kom til Neskaupstaðar með fyrsta makrílfarminn á yfirstandandi vertíð á laugardagskvöld. Landaði skipið tæplega 500 tonnum af frystum makríl og um 200 tonnum af afskurði sem fer til mjöl- og lýsisvinnslu.

Gert er ráð fyrir að vinnsla hefjist í fiskiðjuveri Síldarvinnslunnar í fyrramálið.

Börkur og Beitir halda til síld- og makrílveiða

Beitir NK og Börkur NK.  Ljósm. Þorgeir BaldurssonUppsjávarveiðiskipin Börkur NK og Beitir NK eru að hefja veiðar á síld og makríl. Börkur mun halda til veiða á morgun og mun sennilega byrja á að leita á Rauða torginu og á Þórsbanka en skipin sem þegar hafa hafið veiðar eru sunnar, einna helst á Papagrunni og Stokksnesgrunni. Beitir NK hefur verið í slipp á Akureyri að undanförnu en mun koma til Neskaupstaðar um helgina og gæti haldið til veiða snemma í næstu viku.

Í fyrra hófust þessar veiðar um það bil tveimur vikum fyrr hjá skipum Síldarvinnslunnar  en ljóst er að síldin og makríllinn eru seinna á ferðinni í ár.


Sumarfrí hjá Bjarti en fer síðan á makríl

Aðgerð um borð í Bjarti NK.  Ljósm. Þorgeir BaldurssonÍsfisktogarinn Bjartur NK kom til löndunar í gær. Aflinn var 97 tonn og þar af voru um 60 tonn þorskur og 20 tonn ýsa. Að sögn Jóhanns Arnar Jóhannssonar, sem var skipstjóri í þessum túr, fóru veiðarnar fram á hefðbundnum slóðum á Breiðdalsgrunni. Framan af veiðiferðinni var afli tiltölulega tregur enda talsverður straumur og erfiðar aðstæður. En undir lokin glæddist aflinn og fiskaðist þá vel á Tólf tonna tittinum.

Nú er hafið sumarfrí hjá áhöfninni á Bjarti en að öllu óbreyttu er gert ráð fyrir að hann haldi til makrílveiða í síðari hluta júlímánaðar. Reikna Bjartsmenn með að þeir fari í 2-3 makríltúra og komi með 50-60 tonn að landi úr hverri veiðiferð.


Markaðshorfur ágætar fyrir frystan makríl en lakari fyrir síld

Síldarvinnsla í NeskaupstaðNú þegar síldar- og makrílvertíð er væntanlega að hefjast fyrir alvöru er eðlilegt að spurt sé um markaðshorfur. Samkvæmt heimildum sem heimasíðan hefur aflað eru horfur á helstu mörkuðum fyrir frystan makríl tiltölulega góðar. Mikilvægustu markaðirnir fyrir frystan makríl hafa verið Austur-Evrópa og Afríku. Í Austur-Evrópu eru litlar birgðir til staðar og töluverð eftirspurn og útlitið þar því býsna gott. Í Afríku er útlitið svipað og í fyrra og því góðar horfur á sölu þangað.

Staðreyndin er sú að orðspor íslensks makríls hefur farið mjög batnandi. Meðhöndlun á hráefninu hefur breyst mikið til batnaðar og markaðsþekking að verða betri þannig að Íslendingar geta í síauknum mæli boðið góða vöru á hverjum markaði fyrir sig. Segja má að frystur íslenskur makríll sé að verða gjaldgengur á öllum mörkuðum og reyndar eru nýir markaðir í sjónmáli um þessar mundir.

Nokkuð öðru máli gegnir um síldina. Verð á frystri síld hefur verið hátt á mörkuðum upp á síðkastið en flest bendir til að það muni nú lækka verulega. Miklar síldarbirgðir eru fyrirliggjandi í Noregi og hefur það eðlilega áhrif á markaðsverðið. Annars er ekki mikill sölutími síldarafurða um þetta leyti árs og því eiga málin hvað síldina varðar eftir að skýrast á næstunni.


Polar Pelagic A/S

Uppsjávarveiðiskipið Polar Amaroq.  Ljósm. Þórhildur Eir SigurgeirsdóttirEins og margoft hefur komið fram á heimasíðu Síldarvinnslunnar á fyrirtækið þriðjung í grænlensku útgerðarfyrirtæki sem hingað til hefur borið heitið East Greenland Codfish A/S. Nú hefur nafni þessa grænlenska félags verið breytt í Polar Pelagic A/S.

Grænlenska félagið á og gerir út uppsjávarveiðiskipið Polar Amaroq.


Afurðirnar streyma úr landi

Útskipun á mjöli.  Ljósm. Ágúst BlöndalÍ maímánuði og það sem af er júní hefur mikið verið um útskipanir á afurðum úr birgðageymslum Síldarvinnslunnar. Alls eru útskipanirnar 26 á þessu tímabili og er um frystar afurðir að ræða ásamt mjöli og lýsi. Frystu afurðirnar eru loðna, loðnuhrogn og síldarflök auk þess afla sem frystitogarinn Barði hefur borið að landi. Á tímabilinu hafa verið 5 útskipanir á mjöli og hafa verið flutt út á vegum Síldarvinnslunnar rúmlega 8.600 tonn. Mjölið kemur frá verksmiðjum fyrirtækisins í Neskaupstað og á Seyðisfirði en einnig frá verksmiðju Skinneyjar-Þinganess á Hornafirði en Síldarvinnslan annast sölu á afurðum hennar. Útskipanirnar á lýsi eru 4 talsins, samtals rúmlega 5.600 tonn. Langmest af mjölinu og lýsinu fer til framleiðslu á fóðri fyrir norskan eldisfisk en nú fer í hönd sá tími sem fóðurþörfin er hvað mest.


Grálúðan veidd Utanfótar

Landað úr Barða NK.  Ljósm. Þorgeir BaldurssonFrystitogarinn Barði NK hélt í grálúðu- og ufsatúr eftir sjómannadag. Allan túrinn hefur hann verið við grálúðuveiðar og aflað vel. Til stóð að skipið héldi til ufsaveiða vestur á Hala um tíma en sú veiði reyndist einungis vera þriggja daga skot og því var hætt við að fara þangað. Theodór Elvar Haraldsson skipstjóri lætur vel af túrnum og segir að skipið sé að fyllast og því sé ráðgert að millilanda næstkomandi föstudag. „ Við munum væntanlega koma inn á föstudagsmorgun og halda aftur til veiða á föstudagskvöld að löndun lokinni“, segir Theodór. „Við vorum einmitt núna að taka gott hol, en aflinn hefur gjarnan verið um 500 kg. á togtíma að undanförnu og það þykir gott. Við erum að veiðum Utanfótar eins og sagt er, en þar er góð grálúðuslóð. Utanfótar er utan við Fótinn sem er norðaustur af Breiðdalsgrunni. Ég geri ráð fyrir að haldið verði áfram í grálúðunni að aflokinni millilöndun eða þá að við förum í ufsa ef hann gefur sig einhvers staðar“, segir skipstjórinn á Barða að lokum.


Aðalfundur Síldarvinnslunnar hf.

Aðalfundur Síldarvinnslunnar hf.Aðalfundur Síldarvinnslunnar hf. verður haldinn miðvikudaginn 26. júní  2013 á hótel Eddu Neskaupstað kl. 13:00.

Dagskrá:

   1.  Skýrsla stjórnar
   2.  Endurskoðaðir reikningar lagðir fram til staðfestingar
   3.  Tekin ákvörðun um greiðslu arðs
   4.  Ákveðin þóknun til stjórnar félagsins
   5.  Breytingar á samþykktum félagsins
          a.  Tillaga um að fjölga stjórnarmönnum úr þremur í fimm
   6.  Kosin stjórn félagsins
   7.  Kosnir endurskoðendur
   8.  Önnur mál, löglega fram borin

Stjórn Síldarvinnslunnar hf.


Undirflokkar