Enginn kraftur í kolmunnaveiðum ennþá

Börkur NK heldur til kolmunnaveiða.  Ljósm. Þórhildur Eir Sigurgeirsdóttir

Sigurbergur Hauksson skipstjóri á Berki NK segir að enginn kraftur sé enn kominn í kolmunnaveiðarnar.  „Það var mun betri veiði á sama tíma í fyrra“, segir Sigurbergur „og það er engu líkara en kolmunninn sé seinna á ferðinni nú.  Í gær kom smá neisti í þetta en fljótlega datt veiðin niður á ný.“

Sigurbergur upplýsir að skipin séu að toga 12-14 tíma og aflinn í hverju holi sé gjarnan á bilinu 200-400 tonn.  Börkur hélt til veiða s.l. föstudag og var aflinn orðinn 1.100 tonn þegar rætt var við skipstjórann.  Skipið hefur ekki getað verið samfellt að veiðum eftir að það kom á miðin vegna brælu sem skall á aðfaranótt mánudags.

„Við erum að toga núna“, segir Sigurbergur, „en árangurinn mætti vera betri.  Þetta hlýtur að fara að batna bráðlega og við erum bjartsýnir eins og alltaf.“

 




Rafvæðing fiskimjölsverksmiðjunnar var stórt framfaraskref

Fiskimjölsverksmiðjan í Neskaupstað.

Hinn 12. janúar s.l. var framkvæmdum við rafvæðingu fiskimjölsverksmiðju Síldarvinnslunnar í Neskaupstað lokið en þær höfðu þá staðið yfir í rúmt ár.  Greint var frá lokum framkvæmda við rafvæðinguna hér á heimasíðunni á sínum tíma og þá voru tíundaðir þeir almennu kostir sem felast í því að nota rafmagn í stað olíu við framleiðslu á fiskimjöli og lýsi.  Í fyrsta lagi stuðlar rafvæðingin að betri nýtingu á þeirri orku sem framleidd er í landinu.  Í öðru lagi er rafvæðingin umhverfisvæn framkvæmd þar sem hin græna endurnýjanlega raforka leysir olíuna af hólmi.  Í þriðja lagi er rafvæðingin gjaldeyrissparandi þar sem innlend orka kemur í stað innfluttrar og í fjórða lagi mun útblástur frá verksmiðjunni minnka.

Allir þessir kostir rafvæðingarinnar liggja fyrir en hvaða áhrif skyldi hún hafa haft á störf og starfsaðstæður í verksmiðjunni?  Tíðindamaður heimasíðunnar settist niður með þeim Guðjóni B. Magnússyni verksmiðjustjóra, Eiríki Sören Guðnasyni vaktformanni og Róbert Guðmundssyni þurrkaramanni og spurði þá um áhrif rafvæðingarinnar á störf þeirra. 

 

Fyrstu kolmunnafarmarnir á vertíðinni til Neskaupstaðar

Hákon EA að landa í Neskaupstað.  Ljósm. Ágúst Blöndal

Hákon EA kom til löndunar í Neskaupstað s.l. laugardag.  Aflinn var um 750 tonn af frystum kolmunna sem landað var í frystigeymslur Síldarvinnslunnar og 230 tonn sem fóru í mjöl- og lýsisvinnslu.

Í kvöld er síðan Beitir NK væntanlegur með fullfermi, 2.100 tonn af kolmunna til mjöl- og lýsisvinnslu. 

Börkur NK hélt til kolmunnaveiða s.l. föstudag.

 

Börkur er orðinn blár

Börkur NK kominn með einkennislit Síldarvinnslunnar.  Ljósm. Þórhildur Eir Sigurgeirsdóttir

Börkur NK hefur verið í slipp á Akureyri að undanförnu þar sem sinnt hefur verið venjubundnu viðhaldi á skipinu.  Skipið hefur meðal annars verið málað hátt og lágt og nú hefur það loksins fengið hinn bláa einkennislit Síldarvinnslunnar.  Börkur var keyptur frá Noregi í febrúar 2012 og var þá svartur eða svarblár á litinn og hefur hann haldið þeim lit til þessa.  Ekki hefur gefist tími til að mála hann fyrr en nú þar sem hann hélt beint til veiða þegar hann kom.

 

"Það er auðvelt að ná í þorskinn"

Trollið tekið á Bjarti NK.  Ljósm. Þorgeir Baldursson

Bjartur NK kom til hafnar í Neskaupstað í fyrradag með um 90 tonn af fiski, þar af voru um 70 tonn þorskur.

Steinþór Hálfdanarson skipstjóri segir að nú að undanförnu hafi þeir á Bjarti lagt aukna áherslu á þorskveiðar en dregið úr veiðum á ufsa sem áður var verulegur hluti aflans.  Þá er ýsa einungis meðafli.

Að sögn Steinþórs eru túrarnir hjá Bjarti yfirleitt 3-4 dagar, haldið til veiða á fimmtudegi og komið að landi á þriðjudegi.  Helst má þorskurinn þó ekki vera eldri en þriggja daga gamall þegar að landi er komið.

Steinþór segir að það sé auðvelt að ná í þorskinn og að undanförnu hafi verið bingur af þorski á Hvalbakshalli og upp á Breiðdalsgrunn.  Þarna er svo mikill fiskur að nauðsynlegt er að sýna aðgæslu svo ekki komi allt of mikið í veiðarfærið.  Fiskurinn á þessum slóðum er góður millifiskur sem hentar ágætlega til vinnslu.  Algeng þyngd á fiskinum er 2-2,5 kg.

 




Kolmunnaveiðar að hefjast

Beitir NK heldur til kolmunnaveiða í dag.  Ljósm. Þorgeir Baldursson

Beitir NK mun halda til kolmunnaveiða í dag en um þessar mundir fer veiðin fram í færeysku lögsögunni.  Börkur NK er í slipp á Akureyri og mun væntanlega halda til kolmunnaveiða síðar í þessari viku.

Á vertíðinni koma liðlega eitt hundrað þúsund tonn af kolmunna í hlut íslenskra skipa og þar af nemur kvóti skipa Síldarvinnslunnar liðlega 25 þúsund tonnum.

Að undanförnu hefur kolmunnaveiðin við Færeyjar verið treg en síðustu fregnir herma að hún sé að glæðast verulega.

 




"Skreiðarskemman" fær andlitslyftingu

"Skreiðarskemman" að aflokinni andlitslyftingu.  Ljósm. Guðlaugur Birgisson

Árið 1965 var reist mjölgeymsluhús á vegum Síldarvinnslunnar.  Um var að ræða álklætt stálgrindarhús, um það bil 60 metrar að lengd.

Þegar hlutverki hússins sem mjölgeymsluhúss lauk var farið að nýta það með öðrum hætti.  Saltfiskverkun hófst á vegum Síldarvinnslunnar árið 1968 og fór hún í fyrstu fram í umræddu húsi.  Síðan var farið að nýta húsið til skreiðarverkunar og um það leyti var byrjað að nefna það „skreiðarskemmuna“ og hefur það nafn verið merkilega lífseigt.  Árið 1976 hófst síðan síldarsöltun í „skreiðarskemmunni“ og var húsið nýtt með þeim hætti um skeið ásamt því að í því var geymd og pökkuð þurrkuð skreið vel fram yfir 1980.

Lesa meira...

Síldarvinnslan styður Þrótt

Stefán Már Guðmundsson formaður Þróttar og Gunnþór Ingvason framkvæmdastjóri Síldarvinnslunnar við undirritun samningsins.

Íþróttafélagið Þróttur og Síldarvinnslan hf. gerðu nýverið með sér nýjan styrktar- og auglýsingasamning en Síldarvinnslan hefur lengi verið í hópi þeirra félaga sem stutt hafa dyggilega við bakið á öflugu íþróttastarfi Þróttar.

Það voru þeir Gunnþór Ingvason framkvæmdastjóri Síldarvinnslunnar og Stefán Már Guðmundsson formaður Þróttar sem undirrituðu samninginn.  Stefán Már segir að samningurinn við Síldarvinnsluna hafi mikla þýðingu fyrir Þrótt.  Hann feli í sér mánaðarlegar greiðslur sem renni beint til deilda íþróttafélagsins og skapi þannig ákveðið öryggi í hinni reglubundnu starfsemi.

Síldarvinnslan tók á móti rúmlega 160 þúsund tonnum á loðnuvertíðinni

Loðnulistaverk skipverja á Berki NK.  Ljósm. Þorgeir Baldursson

Skömmu fyrir páska lauk ágætri loðnuvertíð.  Heildarkvóti á vertíðinni var um 570 þúsund tonn og komu liðlega 463 þúsund tonn í hlut íslenskra skipa.

Öll þrjú loðnuveiðiskip Síldarvinnslunnar öfluðu vel á vertíðinni.  Afli þeirra var sem hér segir:

Börkur NK 28.746 tonn

Beitir NK 27.914 tonn

Birtingur NK 15.134 tonn

Tekið skal fram að Birtingur hóf ekki veiðar fyrr en í byrjun febrúar þegar ákveðið hafði verið að bæta við þann kvóta sem áður hafði verið gefinn út.

Alls tók Síldarvinnslan á móti rúmlega 160 þúsund tonnum af loðnu á vertíðinni ef með eru talin 13.377 tonn af sjófrystri loðnu sem landað var í frystigeymslur fyrirtækisins í Neskaupstað.

 

Loðnuvertíðarslútt

Í kvöld fer fram loðnuvertíðarslútt í Egilsbúð hjá starfsfólki Síldarvinnslunnar.  Þar verður fagnað lokum góðrar vertíðar.

Áður en hið sameiginlega slútt hefst munu sjómennirnir af skipunum koma saman á Hótel Capitano, starfsfólk fiskiðjuvers og fiskimjölsverksmiðju í Egilsbúð og starfsfólk skrifstofu á skrifstofunni.

Kl. 23:00 munu síðan allir hóparnir sameinast á Papaballi í Egilsbúð og skemmta sér saman.  Síldarvinnslan býður starfsfólki og mökum á slúttið en aðrir geta borgað sig kr. 2.000.- inn á ballið.  Aðgangseyririnn mun renna óskiptur til Hollvinasamtaka Fjórðungssjúkrahússins í Neskaupstað.

Beint úr messa

Bubbi Morthens stjórnar upptöku í messanum.  Ljósm. Þórhildur Eir Sigurgeirsdóttir

Þegar tekur að hausta verða á dagskrá Stöðvar 2 þættir sem munu bera yfirskriftina Beint úr messa.  Það er Bubbi Morthens sem stýrir þáttunum og verða þeir byggðir á svipaðri hugmynd og þættirnir Beint frá býli sem voru á dagskrá á síðasta ári.

Einn þáttanna úr væntanlegri þáttaröð verður með skip Síldarvinnslunnar og fólkið sem tengist þeim í aðalhlutverki, en annars verða þættirnir teknir upp víða um land.

Lesa meira...

Barði NK með góðan túr

Barði NK kemur að landi.  Ljósm. Guðlaugur Birgisson

Frystitogarinn Barði NK kom til heimahafnar 20. mars eftir stutta veiðiferð.  Það fiskaðist vel í ferðinni og var aflinn um 360 tonn upp úr sjó, að verðmæti 93,5 milljónir króna.  Uppistaða aflans var karfi.

Bjarni Ólafur Hjálmarsson skipstjóri á Barða segir að veiðin hafi gengið vel frá áramótum og í þessari síðustu veiðiferð hafi fullfermi náðst á 11 dögum.  Kvótinn leyfir ekki meira en einn fullfermistúr í mánuði og eftir því sem betur fiskast lengjast fríin á milli túra.

Frá áramótum hefur Barði helst veitt grálúðu og karfa og næsti túr verður „blandaður“ þar sem áfram verður lögð áhersla á grálúðu- og karfaveiði ásamt ufsaveiði.  Að þessum túr loknum kemur röðin að úthafskarfaveiði og síðan verður væntanlega makríllinn á dagskrá í júlí og ágúst.

 

Polar Amaroq kemur til Neskaupstaðar

Erika og Polar Amaroq sigla inn Norðfjörð.  Ljósm. Þórhildur Eir Sigurgeirsdóttir

Í blíðviðrinu í gær, um kl. 16, sigldi hið nýja skip East Greenland Codfish AS inn Norðfjörð og lagðist síðan að bryggju.  Eins og fram hefur komið hefur skipið  fengið nafnið Polar Amaroq (Heimskauta-Úlfur).  Eldra skip hins grænlenska félags, Erika, hafði siglt til móts við nýja skipið og fylgdi því síðan inn Norðfjörðinn.

Geir Zoëga skipstjóri á Polar Amaroq segir að siglingin frá Noregi til Norðfjarðar hafi gengið vel og honum og áhöfninni lítist svo sannarlega vel á skipið.  „Við hlökkum til að takast á við krefjandi verkefni á þessu nýja og glæsilega skipi.  Um leið kveðjum við Eriku með hlýjum hug en hún mun nú halda á vit nýrra ævintýra við strendur Afríku“.

Lesa meira...

Nýtt skip í stað Eriku

Polar Amaroq áður Eros.

Grænlenska útgerðarfélagið East Greenland Codfish A/S hefur fest kaup á norska uppsjávarveiðiskipinu Eros og er því ætlað að leysa skip félagsins, Eriku af hólmi. 

Samstarf Síldarvinnslunnar og grænlenska félagsins hefur staðið í fjölda ára.  Síldarvinnslan á þriðjung í East Greenland Codfish A/S og segir Gunnþór Ingvason framkvæmdastjóri hennar eftirfarandi um kaupin:

„Þetta er ákveðin endurnýjun á flota félagsins um leið og félagið er að fá mun öflugra skip sem býður uppá aukin tækifæri.  Eigendur East Greenland sjá aukna möguleika í uppsjávarveiðum meðal annars við Grænland.  Nýja skipið er mjög vel tækjum búið og hefur meðal annars verið nýtt til hafrannsókna við Noreg.  Um borð í skipinu er til dæmis rannsóknastofa og þar er aðstaða til að vera með fellikjöl sambærilegan og rannsóknaskip eru með“.

 




 




Loðnuhrognin eru ljúffeng en auka lítt kyngetuna

Nohmi, Kawa og Kono bragða á ljúffengum loðnuhrognum.  Ljósm. Þorgeir Baldursson

Vinnsla á loðnuhrognum gengur vel í fiskiðjuveri Síldarvinnslunnar í Neskaupstað.  Í morgun var verið að kreista úr Beiti NK en Börkur NK og Birtingur NK eru væntanlegir til Neskaupstaðar með loðnu til kreistingar í kvöld og nótt.  Í Helguvík er verið að kreista úr Vilhelm Þorsteinssyni EA.

 

Ánægjan leynir sér ekki.  Ljósm. Þorgeir Baldursson

Síldarvinnslan á Tæknidegi fjölskyldunnar

Fylgst með kynningarmyndböndum um veiðar og vinnslu.  Ljósm. Þorgeir Baldursson

Tæknidagur fjölskyldunnar var haldinn í Verkmenntaskóla Austurlands í Neskaupstað s.l. laugardag en auk Verkmenntaskólans stóðu Austurbrú og Háskólinn í Reykjavík fyrir deginum.

Síldarvinnslan tók þátt í deginum ásamt fjölda fyrirtækja og stofnana og þar mátti kynnast tækninýjungum, meðtaka ýmiss konar fróðleik og hlýða á fyrirlestra.  Áhersla var lögð á að allir aldurshópar finndu eitthvað við sitt hæfi og eins gátu gestir kynnt sér fjölbreytt námsframboð Verkmenntaskólans.

Tæknidagurinn var svo sannarlega vel sóttur og virtust gestir afar ánægðir með framtakið.  Síldarvinnslan og ALCOA – Fjarðaál deildu kennslustofu á deginum og heimsóttu hana fjöldi manns til að kynna sér starfsemi fyrirtækjanna.  Síldarvinnslan lét útbúa myndbönd og veggspjöld með upplýsingum um starfsemi sína og þótti gestum augljóslega áhugavert að fræðast um þær framfarir sem átt hafa sér stað bæði á sviði veiða og vinnslu á starfstíma fyrirtækisins.

Hrognavinnsla hafin í Neskaupstað

Hrognavinnsla í Neskaupstað.  Ljósm. Birgir Ísleifur


Vinnsla á loðnuhrognum í Neskaupstað hófst miðvikudagskvöldið 13. mars en þá var hluti af loðnufarmi Beitis NK kreistur.






Í dag er verið að kútta loðnu úr Hákoni EA og eru fulltrúar japanskra kaupenda afar ánægðir með framleiðsluna.






Í nótt er Börkur NK væntanlegur með fullfermi og er áformað að vinna hrogn úr farminum.






Í Helguvík eru einnig unnin hrogn á vegum Síldarvinnslunnar í samvinnu við Saltver ehf. Þar hefur vinnslan gengið vel.

Sterkustu torfur vertíðarinnar

Beitir NK á landleið út af Papey fyrr í dag.  Ljósm. Þorgeir Baldursson

Hálfdán Hálfdánarson skipstjóri á Beiti segir að torfurnar sem loðnuflotinn veiðir nú úr út af Breiðafirði séu „sterkustu torfur vertíðarinnar“.  Fram til þessa hefur loðnan verið tiltölulega dreifð en þegar Beitir var á miðunum í fyrradag voru torfurnar úr vesturgöngunni bæði stórar og þéttar.

Þegar rætt var við Hálfdán var Beitir á siglingu til heimahafnar í Neskaupstað með fullfermi, 2.100 tonn.

Hálfdán segist reikna með að Beitir eigi einungis einn túr eftir að lokinni yfirstandandi veiðiferð og það sé sérkennilegt að ljúka vertíðinni í mokveiði en svona gerist gjarnan þegar vesturgöngurnar koma undir vertíðarlok.

Loksins mokveiði á loðnumiðunum

Löndunarbið í Helguvík.  Ljósm. Eggert Einarsson

Í gær var mokveiði á loðnumiðunum út af Breiðafirði. Þarna er án efa um vestangöngu að ræða og verða skipin vör við töluvert magn af loðnu á miðunum.

Hrognaþroski loðnunnar sem nú veiðist er nokkuð misjafn og hjá Síldarvinnslunni verður kannað með hrognatöku þegar afli berst að landi.

Öll skip Síldarvinnslunnar fylltu sig í gær og í morgun og eru á landleið með fullfermi.

Bergur-Huginn setur upp botnvörpu fyrir Barða NK

Barði NK í Vestmannaeyjum.  Ljósm. Guðmundur AlfreðssonBarði NK kom til Vestmannaeyja um síðustu helgi og tók þar nýja botnvörpu.  Það voru starfsmenn netaverkstæðis Bergs-Hugins sem önnuðust uppsetningu veiðarfærisins og er þetta í fyrsta sinn sem Síldarvinnslan sækir slíka þjónustu til Eyja.

Undirflokkar