Vertíðarstemning á Seyðisfirði

Löndun úr Berki NKFyrsta loðnan á vertíðinni barst til Seyðisfjarðar 15. janúar þegar Börkur NK landaði þar fullfermi.  Síðan þá hefur hver báturinn af öðrum komið inn með fullfermi til löndunar.

Vinnsla í verksmiðjunni gengur mjög vel og er hráefnið sérlega gott til mjöl- og lýsisvinnslu.  Gleðisvipur á starfsmönnum sem og bæjarbúum segir allt um hvað þetta er kærkomið og hvað þetta er mikilvægt fyrir okkar litla samfélag.

Lesa meira...

Opinn fundur um sjávarútvegsmál

Í sal Nesskóla Neskaupstað
29.desember, kl. 13:00 til 14:45

Hagkvæmur sjávarútvegur er mikilvæg undirstaða velferðar.

Íbúar Fjarðabyggðar og Austfirðingar allir, tökum þátt í umræðum um sjávarútvegsmál.  

Lesa meira...

Jólakveðja

Jólakveðja

Sendum starfsfólki okkar og fjölskyldum þeirra okkar bestu jólakveðjur sem og öðrum landsmönnum. 

Gunnþór Ingvason
Framkvæmdastjóri 

Börkur NK með met ár

Börkur NK með met árÁrið sem nú er senn á enda hefur verið einstaklega gjöfult fyrir skipverja Barkar NK og hafa þeir enn og aftur bætt aflaverðmæti sitt.  Þegar löndun úr Berki NK verður lokið í nótt þá verður aflaverðmæti skipsins á árinu komið yfir 1.900 milljónir króna sem er 570 milljónum betra en á árinu 2009 sem einnig var met ár.  Skipið hefur veitt um 55 þúsund tonn og skiptist aflinn þannig að norsk-íslensk síld er ríflega 14.200 tonn, kolmunni 12.500 tonn, loðna 12.200 tonn, Íslandssíld 9.900 tonn og makríll 6.000 tonn.  Langstærsti hluti aflans hefur farið til manneldisvinnslu í fiskiðjuveri Síldarvinnslunnar hf.

Fyrsta loðna vertíðarinnar

LoðnaBörkur NK-122 landaði í gær fyrsta loðnufarmi vertíðarinnar í fiskiðjuver Síldarvinnslunnar, alls rúmum 400 tonnum.  Loðnan er átulaus og um 16% feit og hentar vel hvort heldur til frystingar á A-Evrópu eða til mjöl- og lýsisframleiðslu.  Eins og staðan er núna er eftirspurn eftir frosinni loðnu með minnsta móti og eingöngu hægt að nýta allra stærstu loðnuna til frystingar.  Rúmlega þriðjungur aflans fór í frystingu en rest til mjöl- og lýsisvinnslu.  Börkur NK hélt aftur til loðnuveiða seinni partinn í gær.

Beitir NK-123 kom með síldarfarm úr Breiðafirði til frystingar í gærkvöldi og er hún öll unnin á hefðbundna markaði.  Reiknað er með að skipið fari einn síldartúr enn í Breiðafjörðinn og skipti síðan yfir á loðnu.

Líflegt við Norðfjarðarhöfn

Mikið hefur verið umleikis í Norðfjarðarhöfn undanfarið.  Nú er verið að lesta lýsi ásamt frystum afurðum ýmist á Afríku eða Evrópu.  Þá er mjölskip væntanlegt á morgun og í dag landar Börkur NK-122 fullfermi af síld sem skipið fékk á síldarmiðunum í Breiðafirði.  Síldin er flökuð og fryst á hefðbundna markaði.

Líflegt við Norðfjarðarhöfn

Vísindaferð Samherja á Norðfjörð

Um 50 starfsmenn Samherja hf. heimsóttu Síldarvinnsluna hf. um síðustu helgi.

Hópurinn skoðaði meðal annars fiskiðjuverið ásamt því sem farið var yfir starfsemi félagsins í máli og myndum.  Mjög léttar veitingar voru í boði, meðal annars hinir ýmsu síldar- og loðnuréttir.  Farið var um bæinn í rútu þar sem Freysteinn Bjarnason sagði frá mannlífi bæjarins, kryddaðar skemmtisögum.
Um kvöldið var haldið í búð Egils rauða og tekið þátt í mannfagnaði sem lukkaðist í alla staði mjög vel.

Færum við Samherjum bestu þakkir fyrir innlitið og skemmtilegar samverustundir.
Vísindaferð Samherja á Norðfjörð

Súlan EA-300 kveður

Súlan EA-300Hið velþekkta aflaskip Súlan EA-300 hefur lokið sinni þjónustu við land og þjóð.  Kl. 22:00 þann 7. september 2010, lét skipið úr höfn frá Neskaupstað áleiðis til Belgíu þar sem skipið verður skorið í bræðslupottana og stálið endurunnið til nytsamlegra nota á ný. 

Lesa meira...

Þátttökumet á Neistaflugsmóti GN og SVN

Þátttökumet á Neistaflugsmóti GN og SVNNeistaflugsgolfmót GN og Síldarvinnslunnar hf. fór fram á Grænanesvelli s.l. laugardag í ágætu veðri þótt ekki væri sól og dálítið kulaði fyrripartinn.
Það voru 111 keppendur sem luku leik í mótinu og hafa ekki áður jafn margir keppendur verið í golfmóti á Austurlandi.  Síldarvinnslan hf. styrkti mótið veglega eins og undanfarin ár og voru helstu úrslit þessi:

Lesa meira...

Síldar- og makrílvinnsla

SíldarflökMikið er umleikis í makríl og síld þessa dagana og kom Beitir NK í morgun með um 400 tonn af makríl og síld.  Börkur NK, Beitir NK og Bjarni Ólafsson AK landa með reglulegu millibili til að skammta vinnslunni hæfilega svo hægt sé að gera sem mest úr þeim afla sem berst að landi.  Megninu af aflanum er landað til manneldis.  Síldin er flökuð en makríllinn er hausaður og slógdreginn, afskurður og það sem flokkast frá fer síðan í bræðslu.  Það eru rúmlega 80 manns sem koma að vinnslunni í fiskiðjuverinu og bræðslunni.

Lesa meira...

Fögnum komu Beitis NK-123 til heimahafnar

Beitir NK123 - Mynd: Þorgeir BaldurssonÍ tilefni af komu nýs Beitis NK til Neskaupstaðar verður bæjarbúum og nærsveitungum boðið að koma og skoða skipið og þiggja léttar veitingar. Móttökudagskrá hefst kl. 13:00, skipið verður opið til skoðunar til 15:00. 

Lesa meira...

Fréttatilkynning 11.05.2010.

Fréttatilkynning 11.05.2010.Síldarvinnslan hf. hefur fest kaup á Margréti EA-710 af Samherja hf.  Margrét EA er eitt öflugasta uppsjávarskip íslenska flotans.  Skipið var smíðað í Noregi 1998 og er 2.188 brúttótonn, 1.270 brúttórúmlestir og 71,1 metri að lengd og 13 metrar að breidd.  Aðalvél skipsins er Wartsila 11.000 hestöfl.  Tankarými er 2.100 m2 í tólf tönkum, tvö kælikerfi eru í skipinu samtals 1,5 millj. kcal.

Skipið mun hljóta nafnið Beitir NK-123 og skipstjóri verður Sturla Þórðarson, skipstjóri á móti Sturlu verðu Hálfdán Hálfdánarson.  Sturla hefur verið skipstjóri á Berki NK.  Skipstjóri á Berki NK verður Sigurbergur Hauksson og á móti Sigurbergi verður Hjörvar Hjálmarsson en þeir hafa báðir verið skipstjórar á skipum félagsins.

Lesa meira...

Fréttatilkynning 30.3.2010

Rekstur Síldarvinnslunnar hf. á árinu 2009:

Hagnaður fyrir skatta 21,7 milljónir dollara

SVNSíldarvinnslan skilar nú fyrsta uppgjöri sínu eftir að hafa tekið upp bandaríkjadollar (usd) sem uppgjörsmynt. Hagnaður fyrir skatta nam 21,7 milljón usd á árinu 2009. Hagnaður fyrir afskriftir og fjármagnsliði, EBITDA, er 35,4 milljónir usd eða 39% af rekstrartekjum. Veltufé frá rekstri nam 30,7 milljónum usd og handbært fé frá rekstri 34,9 milljónum usd.

Rekstrartekjur samstæðunnar á árinu 2009 voru alls 90,3 milljónir usd og rekstrargjöld námu 54,9 milljónum usd. EBITDA var 35,4 milljónir usd. Fjármunatekjur voru 394 þúsund usd og fjármagnsgjöld 4,0 milljónir usd á árinu 2009. Gengistap var 3,1 milljónir usd. Hagnaður samstæðunnar fyrir reiknaða skatta nam 21,7 milljónum usd. Reiknaðir skattar námu 4,8 milljónum usd og var hagnaður ársins því 16,9 milljónir usd.
 
Samkeppnishæfari vinnsla
Þrátt fyrir aflabrest í loðnu, áframhaldandi samdrátt í kolmunnakvóta og bolfiskkvótum ásamt sýkingu í íslenska síldarstofninum skilaði fyrirtækið viðunandi rekstrarniðurstöðu á síðasta ári. Má aðallega þakka það auknum makrílafla og góðum afla í norsk-íslenskri síld. Unnin voru 40 þúsund tonn af hráefni í uppsjávarfrystingu félagsins á síðasta ári. Markaðir fyrir mjöl og lýsi voru sterkir á árinu. 
Þær fjárfestingar og hagræðingaraðgerðir sem átt hafa sér stað í uppsjávarvinnslu félagsins hafa skilað félaginu samkeppnishæfari vinnslu. Virðisaukinn sem uppsjávarfrystingin skilaði á síðasta ári er um 1,2 milljarður króna umfram það sem mjöl- og lýsisvinnsla hefði skilað. Þar af fóru 250 milljónir króna í launagreiðslur. Félagið er vel í stakk búið til að hámarka virði þess uppsjávarafla sem berst að landi út frá markaðsaðstæðum hverju sinni.


Efnahagur
Heildareignir samstæðunnar í árslok 2009 voru bókfærðar á 202,6 milljónir usd. Veltufjármunir voru bókfærðir á 62,6. milljónir usd og skuldir og skuldbindingar samstæðunnar námu 131,3 milljónum usd. Eigið fé samstæðunnar í árslok var 71,3 milljónir usd. Í árslok var eiginfjárhlutfall samstæðunnar ríflega 35% og veltufjárhlutfallið var 2,7.

Horfur
Markaðsverð á mjöli og lýsi er hagstætt um þessar mundir og eru vísbendingar um að mjölverð muni styrkjast frekar þegar líður á árið. Góðar horfur eru með markaði fyrir frystar afurðir fyrirtækisins. Vel gekk með vinnslu á nýlokinni loðnuvertíð þrátt fyrir að kvótinn væri lítill. Gott útlit er með loðnukvóta fyrir vertíðina 2011 en áframhaldandi samdráttur er í kolmunnanum.
Lítilsháttar niðurskurður er í norsk-íslensku síldinni, hún hefur verið að skila sér betur inn í íslenska lögsögu og í lengri tíma en áður. Miklar vonir eru bundnar við makrílveiðar og -vinnslu. Þar er mesta óvissan hvernig staðið verður að skipulagi veiðanna. Það er með öllu óásættanlegt að ekki sé komin niðurstaða í það mál nú, einungis tveimur mánuðum áður en vertíðin hefst. Mikil óvissa ríkir um íslensku síldina sökum sýkingar í stofninum. Þá kemur niðurskurður í bolfiski illa við rekstur bolfiskskipa félagsins. 
Umræðan og átökin um fiskveiðistjórnunarkerfið eru orðin óþolandi. Hagsmunaaðilar og stjórnvöld eiga að setjast niður og koma umræðu um sjávarútvegsmál í vitrænan farveg. Sú umræða sem átt hefur sér stað er búin að valda öllum sem í greininni starfa nægum skaða. Þar á að meta styrkleika og veikleika kerfisins – byggja á styrkleikunum og lagfæra veikleikana.

Starfsmenn
Síldarvinnslan hóf heilsu- og öryggisátak um síðustu áramót. Markmiðið er að koma upp öryggisstjórnunarkerfum á öllum starfstöðvum félagsins. Við ætlum okkur að útrýma vinnuslysum og bæta allt vinnuumhverfi okkar og byggir þessi vinna á virkri þátttöku allra starfsmanna.
Við höfum gert samkomulag við Heilbrigðisstofnun Austurlands í Neskaupstað um framkvæmd heilsufarsskoðana á öllum okkar starfsmönnum. Starfsfólk okkar mun fá ráðgjöf frá starfsmönnum heilbrigðisstofnunarinnar auk þess sem eftirfylgni og meðferð á veikindum verður markvissari en áður. Með þessu samkomulagi viljum við stuðla að bættri heilsu og vellíðan starfsfólks.
Ákveðið hefur verið að greiða fastráðnu landvinnslufólki launabónus sem kemur til greiðslu í maí. Um er að ræða þriðju launauppbót til starfsmanna félagsins á síðustu 12 mánuðum.

Aðalfundur
Aðalfundur Síldarvinnslunnar hf. var haldinn þriðjudaginn 30. mars. Stjórn Síldarvinnslunnar hf. lagði til að greiddur yrði arður til hluthafa að upphæð 5.600.000 USD fyrir árið 2009 miðað við kaupgengi Seðlabanka Íslands á aðalfundardegi. Greiðsla arðsins fer fram 9. apríl 2010.

 

Fréttatilkynning frá Síldarvinnslunni hf. þriðjudaginn 30. mars 2010.
Nánari upplýsingar veitir Gunnþór Ingvason, framkvæmdastjóri, í síma 896 4760.

 

Síldarvinnslan hf. færir Breiðabliki gjöf

Gunnþór Ingvason og Sigurlaug BjarnadóttirSíldarvinnslan hf. færði í dag íbúum Breiðabliks sem eru íbúðir aldraðra í Neskaupstað, 47" flatskjá að gjöf.  Verið var að lagfæra matsal Breiðabliks og vantaði sárlega sjónvarp þar inn.  Margir af íbúum Breiðabliks hafa tengdst Síldarvinnslunni í gegnum árin og því þótti okkur við hæfi að færa þeim þessa gjöf.

Einnig var Björgunarsveinni Gerpi í Neskaupstað færður fjárstyrkur að upphæð 1.000.000.- til kaupa á nýjum harðbotna gúmmíbát.  Mikið öryggi er í því fyrir Síldarvinnsluna sem og alla bæjarbúa að sveitin sé vel tækjum búin.

Landanir í Neskaupstað

LöndunBarði NK landar á Norðfirði í dag frystum afurðum að verðmæti um 105 milljónir.  Barði NK heldur aftur til veiða föstudaginn 26. febrúar kl. 19:00
Bjartur NK landar einnig í dag um 65 tonnum af fiski og er uppistaða aflans þorskur.

Börkur NK landaði í gær um 1.300 tonnum af loðnu og var aflinn skorinn til hrognavinnslu.  Börkur NK hélt aftur til veiða í morgun.
Bjarni Ólafsson AK er væntanlegur síðar í dag með fullfermi af loðnu sem væntanlega fer einnig til hrognavinnslu.

Einnig er verið að skipa út frystum afurðum úr frystigeymslu Síldarvinnslunnar.

Lesa meira...

Bjartur NK landar í dag

Strand SeniorBjartur NK landar á Norðfirði í dag um 85 tonnum af fiski og er uppistaða aflans þorskur og ýsa.  Bjartur NK heldur aftur til veiða á morgun.
Barði Nk er að veiðum og er væntanlegur til löndunar mánudaginn 22. febrúar.

Börkur NK kom til Norðfjarðar í morgun með um 1.200 tonn af loðnu sem fer til vinnslu í Fiskiðjuveri Síldarvinnslunnar hf.  Bjarni Ólafsson AK og grænlenska skiptið Erika GR lönduðu um 1.500 tonnum af loðnu um helgina og fór sá afli einnig til vinnslu.
Norska uppsjávarskipið Strand Senior landar í dag um 1.700 tonnum af kolmunna hjá fiskimjölsverksmiðju Síldarvinnslunnar á Norðfirði.

Loðnuvertíðin er hafin

Loðnuvertíðin er hafinBörkur NK kom í nótt með fyrstu loðnu þessarar loðnuvertíðar.  Var hann með um 1.300 tonn af stórri og fallegri loðnu til frystingar í Fiskiðjuveri Síldarvinnslunnar hf.  Reiknað er með að frystingin taki á annan sólarhring en þess má geta að frystiafköst á sólarhring er um 450 tonn. 

Súlan EA hélt til loðnuveiða í morgun og Börkur NK heldur til veiða um leið og búið er að vinna aflann. 

Fyrsti afli ársins í fiskimjölsverksmiðjuna

Ljósmynd: Árni S. ÞorgeirssonFæreyska skipið Fagraberg landaði um 3.000 tonnum af kolmunna til bræðslu í fiskimjöls verksmiðju Síldarvinnslunnar hf. í gær.  Kolmunnann fékk Fagrabergið suður af Færeyjum og er þetta fyrsti aflinn sem berst til bræðslu á Norðfirði á nýju ári.

Góðborgara heimsókn í Fiskiðjuverið

Góðborgara heimsókn í FiskiðjuveriðÍ desember komu í heimsókn til okkar félagar úr Félagi eldriborgara í Neskaupstað og var þá einmitt verið að vinna síld til frystingar úr Berki NK-122.  Vel var tekið á móti gestunum og þeim boðið upp á kaffi, síldarrétti o.fl.  Eftir kaffisopann var farið í litlum hópum í gegnum vinnsluna með stjórnendum fyrirtækisins og vinnsluferillinn útskýrður og skoðaður nákvæmlega.  Þeir sem ekki treystu sér í langa skoðunarferð fengu að horfa yfir síldarvinnslusalinn og virða fyrir vinnsluna.  Það kom flestum gestum okkar á óvart öll sú tækni og sjálfvirkni sem fylgir þessari vinnslu og spunnust líflegar og skemmtilegar umræður um síldarvinnslu fyrr og nú og þær miklu breytingar sem hafa orðið síðan á síldarplönunum í gamla daga.

Við hjá Síldarvinnslunni hf. þökkum kærlega fyrir heimsóknina og vonum að þetta geti orðið að reglulegum viðburði.

Hákon Viðarsson
Starfsmannastjóri

Lesa meira...

Jólakveðja

Jólakveðja

Undirflokkar