Rólegt yfir síldveiðunum fyrir austan en háhyrningar áberandi á miðunum

Forvitinn háhyrningur kíkir á Beitismenn. Ljósm. Tómas KárasonHeldur rólegt er yfir síldveiðunum úti fyrir Austfjörðum þessa stundina. Beitir NK er búinn að taka tvö hol í yfirstandandi veiðiferð og fékk 100 tonn í fyrra holinu en 80 í því síðara. Aflinn fékkst í Reyðarfjarðardýpinu. Þeir Beitismenn eru að færa sig sunnar og kanna hvort meira af síld sé sjáanleg þar.

Þegar þeir á Beiti voru að hefja dælingu í morgun varð vart við allmarga háhyrninga við trollið og einn þeirra sýndi athöfnum skipverja einstakan áhuga. Tómas Kárason skipstjóri smellti mynd af þessum forvitna háhyrningi og fylgir hún hér með. Að sögn Tómasar er talsvert um háhyrninga á veiðislóðinni og eru þeir oft fljótir að koma þegar byrjað er að hífa trollið. Þeir vita að gjarnan fellur til æti þegar dælt er og þess vegna borgar sig að fylgjast grannt með og grípa síldina þegar hún gefst.  


Góð síldveiði þegar viðrar

Síld landað úr Berki NK. Ljósm. Hákon ViðarssonAð undanaförnu hafa lægðir gengið yfir landið og haft sín neikvæðu áhrif á veiðar. Síldveiðiskip Síldarvinnslunnar, Beitir og Börkur, lágu við festar í eina þrjá daga  í síðustu viku en héldu til veiða á  föstudagskvöld. Í stuttu máli sagt gengu veiðar skipanna vel . Beitir kom til löndunar með um 850 tonn aðfaranótt sunnudags og Börkur kom síðan í gær með um 1250 tonn. Fengu skipin aflann á Gerpisflaki um 20-30 mílur frá Norðfjarðarhorni. Mun aflinn vera hrein síld; norsk-íslensk síld í meirihluta en verulegur hluti aflans íslensk sumargotssíld. Að sögn Hjörvars Hjálmarssonar skipstjóra á Berki virðist síldin alls ekki vera á förum og fáist því stundum býsna góð hol. Norsk-íslenska  síldin sem nú veiðist  er einstaklega myndarleg eða „algjörar bollur“ eins og Hjörvar orðar það.

Afar góðri makríl- og síldarvertíð að ljúka

Jón Gunnar Sigurjónsson verksmiðjustjóri í fiskiðjuveri Síldarvinnslunnar. Ljósm: Hákon ViðarssonNú fer að líða að lokum yfirstandandi makríl- og síldarvertíðar. Í tilefni af því hafði heimasíðan samband við Jón Gunnar Sigurjónsson verksmiðjustjóra í fiskiðjuveri Síldarvinnslunnar í Neskaupstað og spurðist fyrir um hvernig vertíðin hefði verið. „Vertíðin hefur verið einstaklega góð“, sagði Jón Gunnar,“ veiðin hefur verið samfelld og vinnslan gengið vel. Frá því að vertíðin hófst um miðjan júlí hefur enginn dagur fallið niður í fiskiðjuverinu vegna hráefnisskorts. Veður hefur verið gott má segja í allt sumar og september var einstaklega góður þannig að skipin hafa getað stundað veiðar við góðar aðstæður nánast hvern einasta dag.“

Að sögn Jóns Gunnars hófst vertíðin í sumar hálfum mánuði seinna en í fyrra og vertíðin í fyrra hálfum mánuði seinna en árið 2012. „Þetta er gert til þess að fá betra hráefni, því lengur sem líður á sumarið því betra verður hráefnið, bæði makríllinn og síldin. Framan af vertíð er öll áhersla lögð á að fiska makríl og þegar líður á sumarið fæst hreinni makríll; þá er hann ekki eins síldarblandaður. Um miðjan september var makrílkvótinn að mestu búinn og þá sneru menn sér að síldinni af krafti. Síldin sem við höfum fengið er stór og fín og á þessum tíma er hún miklu betra hráefni en hún hefði verið fyrr í sumar. Við erum um þessar mundir að vinna úr 700-800 tonnum af síld á sólarhring og vinnslan hefur gengið eins og í sögu.“

Jón Gunnar segir að ekki sé unnt að vera annað en sallaánægður með vertíðina, hún hafi vart geta gengið betur. Gera má ráð fyrir að vinnslu á norsk-íslenskri síld muni ljúka í næstu viku og þá verði farið að undirbúa vinnslu á íslenskri sumargotssíld.

Síldarvinnslan kaupir Gullberg á Seyðisfirði

Síldarvinnslan kaupir Gullberg á SeyðisfirðiSíldarvinnslan hf. hefur keypt öll hlutabréf í Gullbergi ehf. á Seyðisfirði sem gerir út togarann Gullver NS 12. Samhliða kaupum á togaranum keypti Síldarvinnslan húsnæði og búnað Brimbergs til fiskvinnslu á Seyðisfirði.

Áfram verður gert út frá Seyðisfirði og lögð áhersla á að tryggja áframhaldandi framleiðslustörf tengd sjávarútvegi í byggðarlaginu. Fyrir rekur Síldarvinnslan fiskimjölsverksmiðju á Seyðisfirði. 

Kaupin eru liður í að styðja við starfsemi Síldarvinnslunnar á Austurlandi. Með því að hafa útgerð og vinnslu á sömu hendi er traustari stoðum skotið undir heilsársstörf og atvinnulíf í byggðarlaginu.

Það hefur verið stefna Síldarvinnslunnar að auka við sig bolfiskheimildir og breikka rekstrargrundvöll félagsins. Megin áhersla síðustu áratugi hefur verið á veiðar og vinnslu uppsjávartegunda. Kaupin á Gullbergi eru í takt við áherslu stjórnenda Síldarvinnslunnar að fjölga grunnstoðum í rekstri félagsins. 

Gullver NS 12 er 674 tonna skuttogari, tæplega 50 metra langur og smíðaður í Noregi árið 1983. Aflamark togarans á yfirstandandi fiskveiðiári, 2014-2015, nemur 2.855 þorskígildistonnum.

Kaup þessi eru háð samþykki Samkeppniseftirlitsins.

Nánari upplýsingar veitir
Gunnþór Ingvason, forstjóri Síldarvinnslunnar
sími: 4707000 / netfang: This email address is being protected from spambots. You need JavaScript enabled to view it.


Síldveiðin byrjar vel að afloknu stuttu hléi

Beitir NK. Ljóm. Hákon Viðarsson Síldveiðiskip Síldarvinnslunnar, Beitir og Börkur, héldu til veiða á föstudagskvöld og á laugardag að afloknu stuttu hléi. Starfsfólk fiskiðjuversins fékk gott helgarfrí og allmargir starfsmenn fyrirtækisins sóttu sjávarútvegssýninguna þannig að hléið nýttist ágætlega.

Beitir kom síðan til hafnar í Neskaupstað í nótt með 900 tonna afla og er hann nánast hrein síld. Hálfdan Hálfdanarson skipstjóri segir að aflinn hafi fengist í fimm holum í Reyðarfjarðardýpinu 30-50 mílur frá Norðfjarðarhorni. „Þetta verður ekki styttra“, sagði Hálfdan, “og þar að auki er þetta stór og góð síld sem þarna fæst. Holin sem við tókum voru stutt enda er öll áhersla lögð á að koma með sem best hráefni að landi. Seinni part beggja daganna sem við vorum að veiðum fengust mjög góð hol.“

Börkur  er að veiðum á svipuðum slóðum og Beitir var á og hefur fiskað vel. Gert er ráð fyrir að löndun úr honum hefjist strax og löndun lýkur úr Beiti.

Nú er farið að styttast í þessari síldarvertíð þannig að brátt verður farið að hyggja að veiðum á íslenskri sumargotssíld.

Góð síldveiði og helgarfrí í fiskiðjuverinu

Nóg hefur verið að gera við vinnslu síldar í fiskiðjuverinu að undanförnu. Ljósm. Hákon Viðarsson.Lokið var við að landa rúmlega 600 tonnum af síld í fiskiðjuver Síldarvinnslunnar úr Beiti NK sl. miðvikudag og þá hófst þegar löndun úr Berki NK sem kominn var að landi með rúmlega 1000 tonn. Beitir fékk sinn afla austan við 10. gráðu eða um 130 mílur frá Norðfirði. Á þeim slóðum var ekki sérlega mikið af síld að sjá. Börkur var hins vegar að veiðum á Glettinganesflaki, um 35 mílur frá Norðfirði. Að sögn Hjörvars Hjálmarssonar skipstjóra á Berki var þar afar góð veiði undir lok túrsins. Sem dæmi fengust liðlega 500 tonn í síðasta holinu en þá var togað í rúmlega eina klukkustund.

Löndun úr Berki lauk í morgun og mun starfsfólk fiskiðjuversins fara í kærkomið helgarfrí þegar það hefur lokið við að þrífa verið hátt og lágt. Gert er ráð fyrir að Beitir haldi til veiða í kvöld og Börkur á morgun þannig að vinnsla hefjist á ný í fiskiðjuverinu strax eftir helgina.

Nú er eftir að veiða um 3.500 tonn af kvóta Síldarvinnslunnar í norsk-íslensku síldinni.


Á milli 40 og 50 starfsmenn Síldarvinnslunnar sækja sjávarútvegssýninguna

Frá Sjávarútvegssýningunni í Smáranum. Ljósm. Karl Rúnar RóbertssonIceFish, íslenska sjávarútvegssýningin, verður formlega opnuð í dag í Smáranum í Kópavogi. Hér er um að ræða elleftu sjávarútvegssýninguna hér á landi og munu um 500 fyrirtæki kynna starfsemi sína og framleiðslu á henni. Í tengslum við sýninguna verða því fyrirtæki sem þótt hefur skara fram úr á sviði sjávarútvegs veitt verðlaun og eins verða haldnar ráðstefnur og kynningafundir sem snerta það efni sem sýningin gerir skil.

Alls munu á milli 40 og 50 starfsmenn Síldarvinnslunnar sækja sýninguna og koma þeir frá öllum starfsstöðvum fyrirtækisins. Hákon Viðarsson starfsmannastjóri segir mikilvægt að starfsmenn fylgist með því nýjasta sem er að gerast innan greinarinnar og sjávarútvegssýningin veiti einstakt tækifæri til þess.


Barði kominn til hafnar með fullfermi af karfa og ufsa

Trollið tekið á Barða NK. Ljósm. Hreinn SigurðssonFrystitogarinn Barði NK kom til heimahafnar í Neskaupstað í morgun eftir vel heppnaða veiðiferð sem hófst þó ekki glæsilega. Fyrst hélt skipið til úthafskarfaveiða en gafst upp eftir sex sólarhringa og fékkst enginn afli á þessum tíma. Þá var haldið til Hafnarfjarðar og skipt um hlera og síðan hafnar gullkarfaveiðar í Víkurálnum. Theodór Haraldsson stýrimaður upplýsti heimasíðuna að gullkarfaveiðin hefði í reynd verið ævintýraleg, allt upp í 700 kg. á mínútu og því hefði skipið verið langtímum saman á reki á meðan vinnsla fór fram. „Þetta var sannkölluð Holið hjá Barða NK var 20 tonn. Ljósm. Hreinn Sigurðssonmokveiði“, sagði Theodór,“og við tókum þarna nokkur 15-20 tonna hol. Undir lok túrsins var ætlunin að veiða ufsa og þá var haldið á Halann en þar hafði verið ágætis ufsaveiði. Þegar við komum þangað hafði veiðin hins vegar dottið niður og því tekin ákvörðun um að reyna við ufsa hér fyrir austan. Við fylltum síðan skipið á tveimur sólarhringum á Papagrunni og í Berufjarðarál. Þar var þokkalegt nudd í ufsanum og reyndar var síðasta holið býsna gott, ein 12 tonn. Eftir að tilrauninni til veiða á úthafskarfa  lauk vorum við 11 sólarhringa á veiðum og er heildaraflinn um 330 tonn upp úr sjó. Túrinn tók alls 18 daga höfn í höfn og var fínasta veður allan tímann ef undanskilinn er einn bræludagur,“ sagði Theodór hinn ánægðasti.

Aflinn losaður í móttökuna. Ljósm. Hreinn SigurðssonGert er ráð fyrir að Barði haldi til veiða á ný á sunnudagskvöld og aftur verði lögð áhersla á að fiska karfa og ufsa.

Bjartur NK með 100 tonn af þorski eftir þriggja daga veiðiferð

Landað úr Bjarti NK. Ljósm. Hákon ViðarssonBjartur NK kom til löndunar í gærkvöldi með um 100 tonn af þorski. Steinþór Hálfdanarson skipstjóri segir að sæmilega hafi aflast í túrnum en veitt var í Seyðisfjarðardýpi og á Digranesflaki. Upplýsir Steinþór að hefðbundið sé að sækja á þessi mið á haustin því þarna megi þá yfirleitt fá þokkalegan fisk.

Bjartur mun halda á ný til veiða á morgun. 

Byrjuðum á Rauða torginu og enduðum í Seyðisfjarðardýpinu

Landað úr Berki NK. Ljósm. Hákon ViðarssonBörkur NK kom til löndunar í Neskaupstað í gær með rúmlega 800 tonn af síld. Að sögn Hjörvars Hjálmarssonar skipstjóra er um að ræða fína síld en hún er dálítið blönduð makríl og kolmunna. „Við byrjuðum að toga á Rauða torginu en enduðum í Seyðisfjarðardýpinu,“ sagði Hjörvar. „Það virðist ekki vera neitt mikið af síld hér nærri landinu og veiðin er dálítið gloppótt. Það er hins vegar unnt að finna verulega síld fjær landinu. Ég var að frétta að miklu meira væri að sjá austur á 9. gráðu. Annars er ekkert hægt að kvarta, veiðin hefur gengið þokkalega vel til þessa,“ sagði Hjörvar að lokum.

Unnið úr 700-800 tonnum af hráefni á sólarhring

Fiskiðjuver Síldarvinnslunnar í Neskaupstað. Ljósm. Sigurður Steinn EinarssonSíldveiðar úti fyrir Austfjörðum ganga vel. Nú er verið að landa 350 tonnum úr Bjarna Ólafssyni AK í fiskiðjuver Síldarvinnslunnar í Neskaupstað og hefur Bjarni þá lokið síldveiðum að sinni. Í gær var landað um 700 tonnum úr Berki NK og á undan honum landaði Beitir NK tæplega 800 tonnum. Jón Gunnar Sigurjónsson yfirverkstjóri í fiskiðjuverinu segir að síldin sé stór og góð og sú síld sem landað var úr Berki í gær hafi verið afar falleg. „Síldin er bæði flökuð og heilfryst og við vinnum úr 700-800 tonnum af hráefni á sólarhring,“ sagði Jón Gunnar. „ Þessi makríl- og síldarvertíð hefur gengið alveg einstaklega vel og segja má að hafi verið samfelld vinnsla hjá okkur frá því að vertíðin hófst um miðjan júlí. Stefnt er að því að ljúka veiðum og vinnslu á norsk-íslensku síldinni um næstkomandi mánaðamót eða í byrjun október,“ sagði Jón Gunnar að lokum.


Sigurður Steinn Einarsson ráðinn til Síldarvinnslunnar

Sigurður Steinn EinarssonSigurður Steinn Einarsson sjávarútvegsfræðingur hefur verið ráðinn til starfa hjá Síldarvinnslunni og mun sinna ýmsum sérverkefnum.  Sigurður er fæddur og uppalinn Norðfirðingur og lauk námi í sjávarútvegsfræðum frá Háskólanum á Akureyri sl. vor. Hann er ekki ókunnur Síldarvinnslunni því hann hefur starfað hjá fyrirtækinu flest  sumur frá árinu 2006. Sigurður starfaði við kennslu í Sjávarútvegsskóla Síldarvinnslunnar sumarið 2013 og gegndi starfi skólastjóra Sjávarútvegsskóla Fjarðabyggðar sem ýtt var úr vör sl. sumar.

Síldarvinnslan býður Sigurð velkominn til starfa.

Vinnsluskipin landa makríl hvert á fætur öðru

Frystum makríl landað úr Vilhelm Þorsteinssyni EA. Ljósm. Sigurður Steinn EinarssonSíðustu daga hafa vinnsluskip landað hátt í 3.400 tonnum af frystum makríl í frystigeymslur Síldarvinnslunnar í Neskaupstað. Heimir Ásgeirsson yfirverkstjóri í frystigeymslunum segir að það sé svo sannarlega nóg að gera hjá starfsmönnunum enda landanir eða útskipanir nánast upp á hvern dag. Lokið var við að landa 500 tonnum úr Vilhelm Þorsteinssyni EA sl. föstudagsmorgun og á sunnudag var 2.200 tonnum landað úr Kristinu EA. Í gær var síðan lokið við að landa 650 tonnum úr Hákoni EA.

Gert er ráð fyrir að Vilhelm Þorsteinsson komi á ný til löndunar  á miðvikudag.

Megnið af afurðunum í frystigeymslunum er skipað um borð í flutningaskip í Norðfjarðarhöfn en eins fer töluvert í gáma sem fluttir eru til útskipunar á Reyðarfirði.

Stór og falleg síld

Beitir NK að landa í Norðfjarðarhöfn. Ljósm. Hákon ViðarssonBeitir NK kom til löndunar með rúmlega 700 tonn sl. laugardag. Aflinn var að mestu síld en hún var þó blönduð makríl. Síldin var flökuð og fryst í fiskiðjuveri Síldarvinnslunnar og gengur vinnslan vel. Að sögn Tómasar Kárasonar skipstjóra fékkst síldin í Norðfjarðar- og Seyðisfjarðardýpi og gengu veiðarnar ágætlega. „Þetta er stór og falleg síld og það virðist vera töluvert af henni á þessum slóðum,“ sagði Tómas.

Börkur NK kom síðan til löndunar í gær með 750 tonna afla, mestmegnis síld.  Beitir og Bjarni Ólafsson eru á miðunum þegar þetta er skrifað. Upplýsti Tómas rétt í þessu að Beitir væri nú að veiðum í Reyðarfjarðardýpinu og allt gengi eins og í sögu.  


Til hamingju KFF

Bikarinn fór á loft á Norðfjarðarvelli í dag. Ljósm. Eysteinn Þór Kristinsson.Knattspyrnufélag Fjarðabyggðar vann 2. deild karla með yfirburðum og tók á móti sigurlaununum í dag að afloknum 2-0 sigri á Sindra á Norðfjarðarvelli. Fjarðabyggð beið einungis lægri hlut í einum leik í deildinni í sumar og hefur níu stiga forskot á næsta lið þegar einni umferð er ólokið. Stigin sem liðið hefur fengið eru 50 talsins og markahlutfallið glæsilegt og undirstrikar þá yfirburði sem liðið hefur haft.

Það ríkti svo sannarlega gleði á Norðfjarðarvelli í dag þegar bikarnum var lyft og var fjölmenni á vellinum sem samfagnaði liðsmönnum. Er þetta annað árið í röð sem KFF-liðið veitir sigurlaunum móttöku en liðið bar sigur úr býtum í 3. deildinni í fyrra.

Síldarvinnslan er stoltur stuðningsaðili KFF og sendir félaginu heillaóskir í tilefni af frábærum árangri á knattspyrnuvellinum. Áfram Fjarðabyggð !

Farið að huga að síldinni

Úr fiskiðjuveri Síldarvinnslunnar. Ljósm. Hákon ViðarssonUm þessar mundir er lítið eftir af makrílkvóta þeirra skipa sem landa afla sínum í fiskiðjuver Síldarvinnslunnar  í Neskaupstað. Því er nú farið að huga að síldveiðum af fullri alvöru. Síld hefur gjarnan verið meðafli hjá makrílveiðiskipunum og gera má ráð fyrir að makríll verði meðafli þegar öll áhersla verður lögð á síldveiðarnar. Norsk-íslenska síldin sem veiðst hefur að undanförnu hefur verið vel á sig komin og ætti að vera úrvalshráefni til vinnslu. Fyrir utan norsk íslensku síldina hefur nokkuð fengist af íslenskri sumargotssíld en hún er alls ekki eins eftirsóknarverð til vinnslu á þessum árstíma.

Bjarni Ólafsson AK er nú á landleið með um 500 tonna afla. Veiðisvæði skipsins var mun austar en það svæði sem makrílveiðarnar hafa helst farið fram á úti fyrir Austurlandi að undanförnu, en áformað var að Bjarni legði alla áherslu á að veiða síld. Aflinn er töluvert blandaður og þykir makrílhlutfallið vera of hátt. 

Beitir NK er nú á miðunum og er ætlunin að hann veiði síld. Mun hann reyna fyrir sér mun norðar en hann hefur veitt makríl að undanförnu.

Börkur NK er að landa í fiskiðjuverið tæplega 650 tonnum. Megnið af aflanum er makríll.


Makríllinn sífellt feitari og stinnari

Makríllinn verður sífellt betri. Ljósm. Smári GeirssonMakrílveiðin hjá skipunum sem landa til vinnslu í fiskiðjuveri Síldarvinnslunnar í Neskaupstað hefur gengið vel að undanförnu. Þegar þetta er skrifað liggur Bjarni Ólafsson AK í höfn að aflokinni löndun, Börkur NK er að veiðum og Beitir NK er að landa. Beitir kom til hafnar síðastliðna nótt með 600 tonna afla, 400 tonn af makríl og 200 af síld. Að sögn Tómasar Kárasonar skipstjóra á Beiti var skipið um 25 klukkustundir að veiðum í veiðiferðinni og veiðisvæðið var sunnan við svonefnda Holu eða 40-50 sjómílur suðaustur af Norðfjarðarhorni. „Aflinn er heldur blandaðri en hann hefur verið,“ sagði Tómas,“ en mestu munar þó um hreint 100 tonna síldarhol sem fékkst í Reyðarfjarðardýpinu nokkru norðar en við vorum annars að veiðum. Makríllinn er sífellt að verða betri og er orðinn býsna góður. Fiskurinn er feitur, fallegur og stinnur og afar lítil áta í honum. Hann er í reyndinni fyrirmyndarhráefni eins og hann er í dag.“

Að sögn Tómasar eru tæplega 2000 tonn eftir óveidd af makrílkvóta Síldarvinnslunnar.


Góð makrílveiði að aflokinni brælu

Beitir NK í höfn í Neskaupstað. Ljósm. Hákon ViðarssonUm síðustu helgi lágu makrílveiðar niðri á miðunum úti fyrir Austurlandi vegna leiðindaveðurs. Veðrið gekk niður á þriðjudag og þá hóf Bjarni Ólafsson AK veiðar. Tók skipið tvö hol og kom til löndunar í Neskaupstað í gærdag með um 250 tonn. Beitir NK kom síðan til löndunar sl. nótt með 560 tonn. Heimasíðan ræddi stuttlega við Tómas Kárason skipstjóra á Beiti um veiðiferðina: „Það hefur fiskast býsna vel eftir að brælunni lauk,“ sagði Tómas. „Við fengum þessi 560 tonn í þremur holum. Um er að ræða hreinan makríl og er þetta stór og góður fiskur. Við vorum að veiðum í Holunni sem er um 40 sjómílur suðaustur af Norðfjarðarhorni en Bjarni Ólafsson var að veiðum á sömu slóðum.“

Beitir hefur nú fiskað um 5.200 tonn af makríl á yfirstandandi vertíð.

Bölvuð bræla

Löndun úr Bjarti NK. Ljósm. Sigurður Steinn EinarssonÍsfisktogarinn Bjartur NK kom til Neskaupstaðar í gær að aflokinni stuttri veiðiferð. Aflinn var einungis 45 tonn sem þykir lítið en veður var vont í túrnum. Steinþór Hálfdanarson skipstjóri upplýsti heimasíðuna um að haldið yrði til veiða á ný í dag og vonandi væri veðrið eitthvað að ganga niður.

Brælan hefur líka haft sín áhrif á makríl- og síldveiðar en erfitt getur verið að finna makrílinn þegar brælir. Þetta hlé á veiðunum hefur verið notað til að þrífa í fiskiðjuveri Síldarvinnslunnar en það er gert með reglubundnum hætti. Þá er vinnsluhléið notað til að víxla dag- og næturvöktum í verinu. Vaktafyrirkomulagi í fiskiðjuverinu var breytt  13. ágúst og teknar upp tvískiptar vaktir í stað þrískiptra. Á þessum tíma er hefð fyrir að breyta vaktafyrirkomulaginu enda eru sumarstarfsmenn þá að hverfa á braut. Á hvorri vakt eru 25 starfsmenn en að auki eru 3 starfsmenn í fríi á hverjum tíma.

Bjarni Ólafsson AK fékk 16 túnfiska í einu holi

Einn af skipverjunum á Bjarna Ólafssyni AK og túnfiskarnirBjarni Ólafsson AK kom til Neskaupstaðar til löndunar sl. laugardag. Afli skipsins var 450 tonn og skiptist þannig að tæplega helmingur hans var makríll en rúmlega helmingur síld. Að auki færði skipið að landi meðafla sem vakti athygli, en það fékk hvorki fleiri né færri en 16 túnfiska í veiðiferðinni. Runólfur Runólfsson skipstjóri var ánægður með þennan óvænta afla og sagði eftirfarandi þegar heimasíðan ræddi við hann:“ Allir túnfiskarnir komu í eina og sama holinu. Við fórum út fyrir kantinn og tókum hol þar og þar virðist túnfiskur halda sig því Beitir NK fékk fjóra túnfiska á sömu slóðum fyrir nokkrum dögum. Þetta er óvenjulegt og ég man einungis eftir því að við á Bjarna Ólafssyni höfum einu sinni áður fengið túnfisk í trollið; það var fyrir allmörgum árum og þá voru fiskarnir sjö talsins. Fiskarnir 16 sem nú fengust voru af stærðinni 170-280 kg. en flestir þeirra voru í kringum 200 kg. að þyngd. Þegar í land var komið voru fiskarnir skornir. Við vorum svo heppnir að í Neskaupstað var staddur Japaninn Takahashi og stjórnaði hann skurðinum en Takahashi er fulltrúi japansks fyrirtækis sem kaupir mikinn fisk frá Íslandi og hefur góða þekkingu á því hvernig skal meðhöndla túnfisk. Áhöfnin á Bjarna Ólafssyni fékk að smakka túnfisk í gær og þótti hann góður. Í dag verður síðan efnt til heljarinnar túnfiskveislu um borð,“ sagði Runólfur Runólfsson að lokum.

 

Undirflokkar