Það mætti vera meiri kraftur

Vestmannaey VE. Ljósm. Guðmundur AlfreðssonVestmannaey VE. Ljósm. Guðmundur AlfreðssonBirgir Þór Sverrisson, skipstjóri á Vestmannaey VE, segir að sér finnist vanta meiri kraft í vertíðina í Vestmannaeyjum og hann telur að fiskgengdin sé ekki jafn mikil við Eyjarnar og verið hefur síðustu ár. „Það hefur verið góð veiði en ekki aðgæsluveiði eins og undanfarin ár. Hins vegar er alltaf fiskur að bætast við það sem fyrir er. Ýsan er til dæmis ekki komin að neinu ráði en í fyrra hófst ýsuveiði fyrst í lok mars. Undanfarin ár hefur fiskurinn gengið á miðin mjög snemma en hins vegar var ekkert óalgengt hér áður að vertíð hæfist um miðjan mars. Við höfum gjarnan verið úti í um tvo sólarhringa að undanförnu en þrálátar brælur hafa truflað veiðarnar verulega. Við fórum til dæmis út um hádegi sl. sunnudag og komum inn um hádegi í gær. Aflinn var um 75 tonn sem er bara mjög gott. Almennt má því segja að vertíð sé í fullum gangi en miðað við síðustu ár mætti krafturinn í henni vera dálítið meiri,“ segir Birgir Þór.
 

Grálúðu- og karfavinnsla í loðnuleysinu

Grálúðuvinnsla

Grálúðuvinnsla í fiskiðjuverinu. Ljósm: Smári Geirsson

                Venjulega er þessi árstími einhver mesti annatími starfsfólksins í fiskiðjuveri Síldarvinnslunnar í Neskaupstað. Þetta er sá tími sem loðnuvertíð hefur gjarnan verið í hámarki. Nú er hins vegar rólegra andrúmsloftið í verinu; starfsfólkið sinnir vinnslu á grálúðu og karfa í dagvinnu í stað þess að vinna loðnu á vöktum allan sólarhringinn. Loðnuleysið hefur svo sannarlega mikil áhrif á starfsfólk fiskiðjuversins og þessi tími ársins, sem hefur verið sá tími sem skilað hefur einna mestu í launaumslagið, hefur yfir sér allt annað og dauflegra yfirbragð.

Capture

Karfi á leið yfir flokkara. Ljósm: Smári Geirsson

                Heimasíðan ræddi við Eyðun Simonsen verkstjóra og spurði hann út í grálúðu- og karfavinnsluna. „Karfinn kemur frá okkar eigin skipum og hann er einnig keyptur á markaði. Grálúðan kemur hins vegar frá Önnu EA. Nú er verið að vinna grálúðuafla úr annarri veiðiferð Önnu. Þessi vinnsla hentar okkur mjög vel. Loðnuleysið er þungt högg fyrir allt okkar fólk því er mikilvægt fyrir okkur að hafa þessi verkefni.“ segir Eyðun.

Barði í rússneskum búningi

Bardi i sidustu vf

               Barði NK í síðustu veiðiferðinni í eigu Síldarvinnslunnar. Ljósm: Þorgeir Baldursson

Síldarvinnslan seldi togarann Barða til fyrirtækis í Murmansk í Rússlandi í júlímánuði 2017 en fyrirtækið hóf að gera skipið út árið 2002. Togarinn var smíðaður í Flekkefjord í Noregi fyrir Skipaklett hf. á Reyðarfirði árið 1989 og bar upphaflega nafnið Snæfugl. Skipaklettur og Síldarvinnslan sameinuðust árið 2001 og eftir það var skipið leigt skosku útgerðarfyrirtæki um tíma og bar á þeim tíma nafnið Norma Mary.

                Í upphafi gerði Síldarvinnslan Barða út sem frysti-  og ísfiskskip en síðar var megináhersla lögð á að frysta aflann um borð. Árið 2016 var síðan allur vinnslubúnaður tekinn úr skipinu og var hann rekinn sem ísfisktogari eftir það allt þar til hann var seldur til Rússlands.

1976 NORD WEST EX 1976 BARÐI NK 120 EX SNÆFUGL SU 20 I MURMANSK RUSSLANDI MYND GLIMYAROW ENENYSHIPSPOTTING 30. JAN. 2018

Hinn rússneski Nord West kemur til hafnar nýlega

                Fyrri myndin sem fylgir fréttinni er tekin í síðustu veiðiferð skipsins í eigu Síldarvinnslunnar en seinni myndin, sem tekin var nýlega,  sýnir skipið í rússneskum búningi koma til hafnar. Nafn skipsins eftir að það var selt til Rússlands er Nord West.

Bölvað óveður truflar veiðar

Bergey VE kemur til hafnar í Vestmannaeyjum í brælunni í gær. Ljósm. Guðmundur AlfreðssonBergey VE kemur til hafnar í Vestmannaeyjum í brælunni í gær. Ljósm. Guðmundur AlfreðssonSegja má að dagróðrafyrirkomulag ríki hjá skipum Bergs-Hugins í Vestmannaeyjum um þessar mundir. Veður hefur truflað veiðarnar að undanförnu og er lægðagangurinn býsna þrálátur. Afli hefur hins vegar verið góður þegar viðrað hefur til veiða. Sem dæmi hélt Bergey til veiða á laugardagsmorgun og landaði seinni partinn á sunnudag 54 tonnum, fór á ný út á miðnætti og kom inn í gær vegna bölvaðrar brælu og hélt til veiða á ný í morgun. Aflinn sem skipið kom með að landi í gær var 35 tonn sem er góð sólarhrings veiði. Þó svo að vel hafi fiskast tala sjómennirnir um að enn vanti vertíðarbraginn við Eyjar.

Bergey VE hélt til veiða í morgun. Ljósm: Guðmundur AlfreðssonBergey VE hélt til veiða í morgun.
Ljósm. Guðmundur Alfreðsson

 

 

 

 

 

 

 

 

 

Kolmunnalandanir í Neskaupstað og á Seyðisfirði

Gott kolmunnahol vestur af Írlandi. Ljósm. Helgi Freyr ÓlasonGott kolmunnahol vestur af Írlandi.
Ljósm. Helgi Freyr Ólason
Áfram berst kolmunni til vinnslu hjá fiskimjölsverksmiðjum Síldarvinnslunnar í Neskaupstað og á Seyðisfirði. Til verksmiðanna hafa nú borist tæplega 34.000 tonn frá því að veiðar vestur af Írlandi hófust snemma í febrúarmánuði. Verksmiðjustjórarnir, Hafþór Eiríksson í Neskaupstað og Gunnar Sverrisson á Seyðisfirði, segja að kolmunninn sé úrvalshráefni til vinnslu. Togtími hjá skipunum sé stuttur og aflinn vel kældur þannig að áhersla á gæði hráefnisins sé í hávegum höfð.
 
Margrét EA kom til Seyðisfjarðar í gær með 2.000 tonn og í gær landaði Hákon EA rúmlega 1.600 tonnum í fiskimjölsverksmiðjuna í Neskaupstað auk þess að landa 370 tonnum af frystum fiski. Bjarni Ólafsson AK kom síðan til Neskaupstaðar í nótt með 1.450 tonn.
 
Vegna veðurs er ljóst að hlé verður á vinnslu í verksmiðjunum þegar lokið verður við að vinna þennan afla, en kolmunnaskipin liggja nú í vari við Írland.

Legið í vari á Donegalflóa

Kolmunnaskip í vari á Donegalflóa á Írlandi í morgun. Ljósm. Tómas KárasonÁ Donegalflóa var sunnan gola í morgun og sveitabæir
allt um kring. Ljósm. Tómas Kárason
Það er slæmt veður á kolmunnamiðunum við Írland og spáin fyrir næstu daga er ljót. Ekki er gert ráð fyrir að fari að lægja fyrr en undir helgi eða á fimmtudag eða föstudag. Heimasíðan sló á þráðinn til Hálfdans Hálfdanarsonar skipstjóra á Berki og spurðist frétta. „Nú er ekki mikið að frétta af veiðiskap. Við komum á miðin og tókum tvö hol og þurftum þá að sigla í var. Aflinn í þessum tveimur holum var samtals um 380 tonn. Við liggjum nú í vari á Donegalflóa sem er mikill flói norðarlega á Írlandi. Á bak við næsta nes er bærinn Kyllibegs en það er sjávarútvegsbær og þar er eina stóra fiskimjölsverksmiðjan á Írlandi eftir því sem ég veit best. Hér á Donegalflóa liggja einnig Beitir, Sigurður og Grandaskipin Víkingur og Venus ásamt einum Færeyingi og einum Norðmanni. Aðalsteinn Jónsson er einnig að koma hingað þannig að segja má að það sé traffík á bleyðunni. Höfnin í Kyllibegs er síðan full af Norðmönnum. Það er ekkert útlit fyrir veiðiveður næstu daga og því er tíminn hér um borð nýttur til að lagfæra ýmislegt og þrífa. Það er alltaf nóg að gera. Hér á flóanum er bara sunnan gola og sveitabæir allt um kring þannig að við höfum ekki yfir neinu að kvarta. Í talstöðinni hljóma hins vegar sífelldar stormviðvaranir,“ segir Hálfdan.

Á Donegalflóa var sunnan gola í morgun og sveitabæir allt um kring. Ljósm. Tómas KárasonKolmunnaskip í vari á Donegalflóa á Írlandi í morgun.
Ljósm. Tómas Kárason

Blængur með góðan afla

Landað úr Blængi NK. Ljósm. Smári GeirssonLandað úr Blængi NK. Ljósm. Smári GeirssonFrystitogarinn Blængur NK er að landa í Neskaupstað að lokinni 24 daga veiðiferð. Aflinn var 536 tonn upp úr sjó að verðmæti 160 milljónir króna. Bjarni Ólafur Hjálmarsson skipstjóri segir að aflinn sé mjög blandaður en þó mest af karfa. „Við byrjuðum veiðiferðina fyrir suðaustan land en héldum síðan á Vestfjarðamið þar sem við vorum lengst af. Síðustu vikuna vorum við þó á Melsekk og Selvogsbanka í leit að karfa. Fyrsta hálfa mánuðinn voru nánast samfelldar brælur en síðasta vikan var aftur á móti góð veðurfarslega. Það hefur gengið vel að vinna fiskinn um borð og ekki undan neinu að kvarta hvað það varðar,“ segir Bjarni Ólafur.
 
Gert er ráð fyrir að Blængur haldi til veiða á ný á sunnudagskvöld.

Loðnunótin tekin um borð

Loðnunótin tekin um borð í Polar Amaroq í gær. Ljósm. Smári GeirssonLoðnunótin tekin um borð í Polar Amaroq
í gær. Ljósm. Smári Geirsson
Grænlenska uppsjávarskipið Polar Amaroq kom til Neskaupstaðar í gær í þeim tilgangi að sækja loðnunót, en skipið hefur að undanförnu sinnt loðnuleit við landið í samstarfi við Hafrannsóknastofnun. Heimasíðan ræddi við Geir Zoëga skipstjóra og spurði hann hvers vegna veiðarfærið væri sótt. „Við höfum verið að sinna loðnuleit fyrir sunnan land síðustu daga. Þar er loðna á ferðinni og ég trúi því að ef finnst meiri loðna fyrir norðan og út af Vestfjörðum þá verði gefinn út einhver kvóti. Við erum einmitt núna að halda norður fyrir land í frekari leit. Ef eitthvað finnst fyrir norðan og vestan og kvóti verður gefinn út þá mega menn engan tíma missa. Þess vegna tökum við nótina um borð. Við ætlum að vera tilbúnir að hefja veiðar strax og við ætlum að verða fyrstir til að kasta. Ég er mjög bjartsýnn á að finnist meiri loðna. Það hafa borist einhverjar fréttir frá skipum fyir norðan þannig að bjartsýni mín er rökstudd. Sannleikurinn er sá að það þýðir ekkert að vera svartsýnn og sjá allt dökkt framundan. Það hafa engir verið jafn iðnir við loðnuleit að undanförnu og við á Polar Amaroq og ég trúi því að það eigi eftir að finnast meiri loðna og sú trú er nokkuð sterk. Það var unaðslegt að taka nótina um borð. Ég fyllist alltaf ákveðinni vellíðunartilfinningu þegar nótaveiðar eru að hefjast og það þýðir ekkert annað en að trúa því að það sé að fara að gerast,“ segir Geir.

Öskudagsheimsóknir

ÖskudagsheimsóknirÍ dag er öskudagur og hver krakkahópurinn á fætur öðrum hefur heimsótt skrifstofur Síldarvinnslunnar og sungið fyrir starfsfólkið. Gjarnan eru krakkarnir klæddir í hina skrautlegustu búninga og söngurinn virðist vera þaulæfður. Kennarar og starfsfólk Nesskóla fylgja hópunum og allir voru brosandi og glaðir og virtust njóta dagsins til hins ítrasta. Fyrir heimsóknina og sönginn þáði unga fólkið harðfiskpoka að gjöf enda mjög viðeigandi að sjávarútvegsfyrirtæki gefi sælgæti úr hafinu.
 
Það er alltaf upplífgandi að fá heimsóknir sem þessar og meðfylgjandi eru nokkrar myndir sem Hákon Ernuson tók af syngjandi krakkahópum í dag.
 
Öskudagsheimsóknir
Öskudagsheimsóknir
Öskudagsheimsóknir
Öskudagsheimsóknir
Öskudagsheimsóknir
 

Beitir fékk á sig brot sl.laugardag

Beitir NK kemur til hafnar í Neskaupstað í gær með 3.100 tonn af kolmunna. Ljósm. Smári GeirssonBeitir NK kemur til hafnar í Neskaupstað í gær með
3.100 tonn af kolmunna. Ljósm. Smári Geirsson
Sl. laugardag þegar Beitir NK var á landleið af kolmunnamiðunum vestur af Írlandi fékk skipið á sig brot sem olli skemmdum um borð. Sem betur fer slasaðist enginn úr áhöfninni og viðbrögð hennar gerðu það að verkum að skemmdirnar urðu minniháttar. Sturla Þórðarson skipstjóri segir svo frá: „Við fylltum skipið um miðnætti aðfaranótt laugardagsins og lögðum þá af stað heim til Neskaupstaðar með 3.100 tonn. Fyrir höndum var löng sigling og þegar hún hófst áttum við eftir að fara um 860 mílur. Brátt skall á okkur hörkubræla og veðurfarið á þessum slóðum getur verið afar slæmt. Við vorum að stýra austan við norður en vindur og sjór var að suðvestan. Þegar vindur er mikill þarna verða öldurnar risavaxnar og heldur ógnvekjandi.  Í hádeginu á laugardag, þegar við vorum búnir að keyra í eina 12 tíma, skall fyrirvaralaust brot á bátinn. Það kom á hann aftarlega bakborðsmegin. Þetta var svakalegt dúndur. Tvö kýraugu í klefa á íbúðargangi aðalþilfars sprungu inn og svonefndar blindlúgur sem loka kýraugunum að innanverðu brotnuðu. Að auki brotnaði gluggi á dekkshúsi á efra þilfari. Sjórinn fossaði inn í umræddan klefa og þar var einn úr áhöfninni sem á endanum stóð í sjó í mitti. Fyrir hann hefur þetta verið einkar óþægileg upplifun. Sem betur fer slasaðist enginn í þessum látum og það má alltaf gera við járn og tré um borð. Eftir þetta slóguðum við í eina 12 tíma og komum ekki til löndunar fyrr en í gær,“ segir Sturla.
 
Strax og skipið lagðist að bryggju var byrjað að huga að viðgerðum eftir brotið. Ljósm. Smári GeirssonStrax og skipið lagðist að bryggju var byrjað að huga að viðgerðum eftir brotið. Ljósm. Smári GeirssonKarl Jóhann Birgisson, rekstrarstjóri útgerðar Síldarvinnslunnar, segir að hárrétt viðbrögð áhafnarinnar hafi komið í veg fyrir að skemmdir um borð í skipinu hafi orðið verulegar. „Sjórinn sem komst í klefann dreifðist síðan um allan íbúðarganginn og fór inn í alla klefa. Áhöfnin náði fljótt að þurrka allt svæðið sem sjórinn komst á og þétta kýraugun sem brotnuðu þannig að komið var í veg fyrir að skemmdir yrðu töluverðar. Þegar skipið kom í höfn í gær var strax ráðist í viðgerðir á kýraugunum og lauk því verki um miðnætti,“ segir Karl Jóhann.
 
Beitir hélt til veiða á ný strax að löndun lokinni.
 
 
 
 
 
 
 

Áhrif loðnubrests í Fjarðabyggð eru mikil og víðtæk

Loðnubrestur mikil áhrif á tekjur starfsmanna í sjávarútvegi.Loðnubrestur mikil áhrif á tekjur starfsmanna í sjávarútvegi.Fjármálastjóri Fjarðabyggðar hefur tekið saman greinargerð um áhrif loðnubrests á sveitarfélagið. Hér skulu birtar nokkrar lykilupplýsingar sem fram koma í greinargerðinni.
 
  • Í Fjarðabyggð var tekið á móti 47% alls loðnuafla á árinu 2018 en á síðustu fimm árum hefur þetta hlutfall verið á bilinu 34% - 47%.
  • Útflutningsverðmæti þeirrar loðnu sem unnin var í Fjarðabyggð á árinu 2018 nam um tíu milljörðum króna.
  • Loðnubrestur mun lækka launatekjur starfsmanna í sjávarútvegi um rúmlega 13% frá árinu 2018 og að öðru óbreyttu munu launatekjur íbúa sveitarfélagsins lækka um 5% eða um 1,25 milljarð króna.
  • Að öðru óbreyttu mun loðnubrestur leiða til þess að tekjur stóru sjávarútvegsfyrirtækjanna í sveitarfélaginu dragist saman um fimmtung frá árinu 2018.
  • Gera má ráð fyrir að velta fyrirtækja sem þjóna sjávarútvegnum beint lækki um nálægt 600 milljónum króna.
  • Samdrátturinn vegna loðnubrestsins mun hafa smitandi áhrif um allt samfélagið. Til dæmis mun draga úr fjárfestingum og þjónustukaupum. Eins mun áhrifa án efa gæta á fasteignamarkaði.
  • Gera má ráð fyrir að staðgreiðslutekjur sveitarfélagsins Fjarðabyggðar lækki um 160 milljónir króna á milli ára vegna loðnubrests. Þá má gera ráð fyrir að tekjur hafnarsjóðs lækki um 100 milljónir. Þannig munu heildartekjur sveitarfélagsins lækka um 260 milljónir króna ef engin loðna veiðist.
 
Enn er loðnu leitað og enn er haldið dauðahaldi í þá von að nægjanleg loðna finnist til að unnt sé að heimila einhverjar veiðar. Hafa skal í huga að verðmætasti hluti hverrar vertíðar er undir lokin þegar hrognavinnsla fer fram. 

Síldarvinnslan hefur tekið á móti um 23.000 tonnum af kolmunna og rúmlega 5.000 tonn eru á leiðinni

Beitir NK með 590 tonna hol á síðunni á miðunum vestur af Írlandi. Ljósm. Helgi Freyr ÓlasonBeitir NK með 590 tonna hol á síðunni á miðunum
vestur af Írlandi. Ljósm. Helgi Freyr Ólason
Kolmunnaveiðin vestur af Írlandi hefur gengið vel að undanförnu þegar veður hefur ekki hindrað veiðar. Síðustu daga hafa skip landað afla í fiskimjölsverksmiðjur Síldarvinnslunnar, bæði í Neskaupstað og á Seyðisfirði. Hákon EA landaði um 1.600 tonnum í Neskaupstað sl. föstudag og Margrét EA tæplega 2.000 tonnum á sunnudag. Bjarni Ólafsson landaði síðan tæplega 1.700 tonnum á Seyðisfirði í gær.
 
Nú hafa verksmiðjur Síldarvinnslunnar tekið á móti tæplega 23.000 tonnum af kolmunna á árinu. Alls hefur 17.600 tonnum verið landað í Neskaupstað og 5.200 tonnum á Seyðisfirði. Síðan er von á rúmlega 5.000 tonnum til viðbótar í dag; Beitir NK er væntanlegur til Neskaupstaðar með rúmlega 3.000 tonn og Börkur NK til Seyðisfjarðar með tæplega 2.200 tonn.
 
Verskmiðjustjórarnir, Hafþór Eiríksson í Neskaupstað og Gunnar Sverrisson á Seyðisfirði, segja að mjög gott sé að vinna kolmunnann sem berst að landi. Hráefnið sé eins og best verður á kosið. Það sé vel kælt um borð í skipunum og fiskurinn sé sæmilega feitur og vel á sig kominn.

Svipaður afli og í fyrra hjá Eyjunum

Bergey VE. Ljósm. Guðmundur AlfreðssonBergey VE. Ljósm. Guðmundur AlfreðssonÞað sem af er ári hefur afli hjá Vestmannaey VE og Bergey VE verið svipaður og á sama tíma í fyrra. Janúar var hagstæður veðurfarslega og þá veiddu skipin rétt tæplega 800 tonn og var uppistaða aflans þorskur og ýsa. Til samanburðar var veiðin um 750 tonn í janúar í fyrra.
 
Yfirstandandi febrúarmánuður hefur aftur á móti verið erfiður veðurfarslega og hefur þess vegna ekki verið unnt að sækja á þau mið sem venjulega er veitt á um þetta leyti árs. Þrátt fyrir ótíðina hafa skipin þó fiskað svipað magn í mánuðinum og í fyrra eða 950 tonn. Að undanförnu hefur mest verið fiskað við Vestmannaeyjar og þá einkum hlémegin við eyjarnar. Síðan hefur verið skotist inn og landað í brælustoppum. Á þessum miðum fæst í reynd ekkert nema þorskur en reynt er að skjótast annað þegar færi gefst til að ná í aðrar tegundir. Sl. sunnudag og mánudag náðist til dæmis að kroppa í ufsa og karfa á miðum fyrir austan Vík.

Þetta eru reffilegustu bátar

Í skipasmíðastöð Vard í Aukra. Talið frá vinstri: Einar Örn Þórsson yfirvélstjóri á Vestmannaey, Guðmundur Alfreðsson útgerðarstjóri, Birgir Þór Sverrisson skipstjóri á Vestmannaey, Hákon Seljan yfirvélstjóri á Bergey og Jón Valgeirsson skipstjóri á Bergey. Á bakvið sjást Vestmannaey og Bergey í smíðum.Í skipasmíðastöð Vard í Aukra. Talið frá vinstri: Einar Örn
Þórsson yfirvélstjóri á Vestmannaey, Guðmundur
Alfreðsson útgerðarstjóri, Birgir Þór Sverrisson skipstjóri
á Vestmannaey, Hákon Seljan yfirvélstjóri á Bergey og
Jón Valgeirsson skipstjóri á Bergey. Á bakvið sjást
Vestmannaey og Bergey í smíðum.
Þessa dagana eru skipstjórar og yfirvélstjórar Vestmannaeyjar VE og Bergeyjar VE ásamt Guðmundi Alfreðssyni útgerðarstjóra Bergs-Hugins í Noregi til að fylgjast með smíði nýrra skipa sem eiga að leysa núverandi skip útgerðarfélagsins af hólmi. Skipin eru smíðuð hjá skipasmíðastöð Vard í Aukra sem er skammt frá bænum Molde. Heimasíðan ræddi við Birgi Þór Sverrisson skipstjóra á Vestmannaey og Jón Valgeirsson skipstjóra á Bergey og spurði þá hvernig þeim litist á skipin. Birgir Þór sagði að sér litist afskaplega vel á skipin og hvernig staðið væri að smíði þeirra. „Hérna er mjög vel staðið að öllu og segja má að allt sé fyrsta flokks og það er mjög gott að fá tækifæri til að koma hér og benda á ýmislegt sem maður vill leggja áherslu á. Þessi skip eru í rauninni stór-lítil ef svo má að orði komast. Þau eru stutt, eða tæplega 29 metrar að lengd, en þau eru 12 metra breið og há. Menn eru mjög spenntir að fá þessi nýju skip í hendurnar en þau verða væntanlega afhent í sumar,“ segir Birgir.
 
Jón Valgeirsson skipstjóri á Bergey tekur undir með Birgi og segir að það sé afar gott að fá tækifæri til að koma með fáeinar ábendingar á meðan unnið er að smíðinni. „Ég er mjög ánægður með allt sem ég hef séð hér og mér sýnist þetta vera verklegir og hinir reffilegustu bátar. Það er komin allgóð heildarmynd á Vestmannaey en smíðin á Bergey er skemmra á veg komin, það var verið að hífa nefið á hana núna. Menn bíða spenntir eftir að fá þessi skip. Um borð í þeim verður betri aðbúnaður en í gömlu skipunum og aðstaða á millidekki verður miklu betri. Þá verður allt hljóðlátt um borð vegna þess að spilin verða rafmagnsknúin. Ég hef mikla trú á þessum skipum og það verður gaman að upplifa nýjungar eins og til dæmis tvær skrúfur,“ sagði Jón.

Hurðalaust helvítis rok

Trollið tekið á Gullver NS. Ljósm. Þorgeir BaldurssonTrollið tekið á Gullver NS. Ljósm. Þorgeir BaldurssonHeimasíðan hafði samband við ísfisktogarann Gullver NS í morgun og ræddi við Rúnar L.  Gunnarsson skipstjóra og Steinþór Hálfdanarson stýrimann. Fyrst var spurt um fiskirí frá áramótum og sagði Rúnar skipstjóri að það hefði verið þokkalegt. „Við höfum töluvert verið að veiða á Digranesflakinu og Langanesgrunni en þar hefur verið hægt að fá þorsk. Reyndar var ýsa suður frá á okkar hefðbundnu miðum í byrjun mánaðarins en þar er nú lítinn þorsk að hafa. Þorskurinn er þar úttroðinn af loðnu og er að elta hana. Það gekk vel að fiska í janúar en þá náðum við um 500 tonnum í sjö túrum. Veðrið hefur hins vegar sett strik í reikninginn núna í febrúarmánuði,“ sagði Rúnar.
 
Steinþór stýrimaður tekur undir það að veðurlagið í febrúar hafi verið leiðinlegt. „Það hefur verið mikill lægðagangur og sífelldar umhleypingar í febrúar en janúar var hins vegar býsna góður hvað veður varðar hérna fyrir austan. Núna er til dæmis hurðalaust helvítis rok. Við erum austur úr Gerpi og erum að dóla upp undir landið. Ætlunin er að fara norðureftir, það mun hægja fyrr fyrir norðan. Við eigum að landa á fimmtudag og erum komnir með rúmlega 40 tonn,“ sagði Steinþór.

Kolmunnaskip með góðan afla

Kolmunna landað úr Margréti EA í gær. Ljósm. Smári GeirssonKolmunna landað úr Margréti EA í gær.
Ljósm. Smári Geirsson
Um helgina hafa þrjú kolmunnaskip landað afla í fiskimjölsverksmiðjur Síldarvinnslunnar í Neskaupstað og á Seyðisfirði. Beitir NK kom fyrstur aðfaranótt föstudagsins og landaði 2.750 tonnum í Neskaupstað. Margrét EA kom í kjölfar hans til Neskaupstaðar aðfaranótt sunnudagsins með 1.850 tonn og Bjarni Ólafsson AK kom til Seyðisfjarðar skömmu síðar með um 1.800 tonn.
 
Heimasíðan ræddi stuttlega við Tómas Kárason skipstjóra á Beiti og spurði hann hvernig veiðiferðin hefði gengið. „Veiðiferðin gekk í sjálfu sér vel þegar við gátum verið að. Við fengum aflann í tíu holum en veðrið var afskaplega leiðinlegt og gerði okkur erfitt fyrir. Það var nægur fiskur þarna á miðunum vestur af Írlandi en það virðist þó vera enn meiri fiskur innan línunnar þar sem við getum ekki veitt. Fiskurinn gengur þarna út úr lögsögunni og síðan inn í hana aftur og við verðum að taka hann á meðan hann er utan línunnar. Holin hjá okkur gáfu misjafnan afla en í síðasta holinu fengum við 470 tonn eftir að hafa einungis dregið í nokkrar mínútur. Það var veisla. Þó nokkur fjöldi skipa er að veiðum innan línunnar og eru það helst Danir, Norðmenn og Hollendingar. Einhverntímann í marsmánuði fer kolmunninn að ganga norður eftir og heldur sig þá mikið innan færeyskrar lögsögu. Við erum bjartsýnir á að unnt verði að fara þó nokkra túra á miðin þarna vestur af Írlandi áður en hann fer að ganga norður eftir fyrir alvöru. Það er verst hve langt er á þessi mið en þegar við lögðum af stað til löndunar voru 618 mílur heim,“ segir Tómas.
 
Börkur NK er nú á landleið af kolmunnamiðunum með 2.200 tonn og mun löndun úr honum væntanlega hefjast um hádegisbil á morgun.

Japanskir loðnukaupendur áhyggjufullir

Japanskir loðnukaupendur

Fulltrúar Síldarvinnslunnar ásamt japönskum loðnukaupendum í Neskaupstað. Fremst sitja Masayuki Okada og Gunnþór Ingvason framkvæmdastjóri Síldarvinnslunnar. Ljósm: Smári Geirsson                

Þessa dagana dvelja fulltrúar fjögurra japanskra fyrirtækja í Neskaupstað og bíða frétta af loðnuleit. Þeir segja að það sé grafalvarlegt mál ef engin íslensk loðna kemur inn á markaðinn í ár en japanskir neytendur þekkja loðnuna frá Íslandi sem gæðavöru. Í fyrra keyptu japönsk fyrirtæki 20.000 tonn af loðnu frá Íslandi auk þess sem Japanir eru helstu kaupendur loðnuhrogna. Í Japan fer loðnan  öll til manneldis og fyrir hana fást góð verð, en Síldarvinnslan hefur verið stærsti íslenski framleiðandinn á loðnu inná Japansmarkað.

                Heimasíðan ræddi við þrjá Japani sem nú dvelja í Neskaupstað til þess að fræðast um þeirra sýn á þá alvarlegu stöðu sem nú blasir við hvað loðnuna varðar. Enn er leitað að loðnu en ekki hefur mælst nægjanlegt magn til að unnt sé að ákveða kvóta og hefja veiðar. Japanirnir sem rætt var við eru Takaho Kusayanagi og Hiroaki Takahasi sem báðir starfa hjá fyrirtækinu K&T Inc. sem sérhæfir sig í að kaupa fisk til Japan og selja hann síðan fyrirtækjum sem vinna hann fyrir neytendamarkað. Þriðji Japaninn sem rætt var við er Masayuki Okada en hann kemur frá fyrirtækinu Okada Suisan sem meðal annars sérhæfir sig í að vinna fisk fyrir neytendamarkað. Okada Suisan rekur vinnslustöðvar í Japan, Kína, Indónesíu og Tælandi og eru starfsmenn þeirra samtals rúmlega 1.100. Allir þrír viðmælendur heimsíðunnar eru gjörkunnugir á Íslandi. Takahashi hefur dvalið tímabundið á Íslandi á hverju ári í 34 ár, Kusayanagi í 28 ár og Okada í 26 ár. K&T hefur keypt loðnu frá Íslandi í rúmlega aldarfjórðung og Okada Suisan í um fjörutíu ár. Auk loðnunnar hafa fyrirtækin keypt umtalsvert magn af makríl frá íslenskum fyrirtækjum á síðari árum.

                Takahasi segir að þetta sé í fyrsta sinn sem hann komi til Íslands á vertíðartíma og útlit sé fyrir að það verði engin loðnuvertíð. „Hver vertíð hefur sína sérstöðu. Stundum hafa vertíðir byrjað snemma og stundum seint. Stundum hefur gengið vel að finna loðnuna en stundum hefur það verið erfiðleikum bundið. Stundum hafa veiðarnar verið miklar og stundum höfum við fengið litlar vertíðir. En ég viðurkenni að útlitið hefur nánast aldrei verið jafn dökkt og nú. Það er grafalvarlegt mál ef við fáum ekki íslenska loðnu inn á japanskan neytendamarkað því þá er hættan sú að neytendur beini sjónum sínum að öðrum vörum og erfitt verði að vinna markaðinn til baka“.

salted dried capelin

Söltuð þurrkuð hrognafull íslensk loðna. Vinsæll réttur í Japan.

                Fram kom hjá viðmælendunum þremur að ef engin loðna fengist á Íslandi myndu japanskir kaupendur beina sjónum sínum að Rússlandi og Kanada. Hugsanlegt væri að fá loðnu þaðan en það væri hins vegar staðreynd að íslenska loðnan væri best og hefði unnið sér sérstakan sess hjá japönskum neytendum. Aftur á móti væri það staðreynd að neytendur væru oft fljótir að breyta neysluvenjum og það væri alvarlegt ef vara dytti algjörlega út af markaði.

                Kusayanagi segir að fulltrúar kaupenda bíði loðnufrétta hér á landi og séu nákvæmlega jafn spenntir og áhyggjufullir og forsvarsmenn íslenskra loðnufyrirtækja. „Við erum hér og bíðum og gerum okkur grein fyrir að loðnuleysið hefur ekki einungis neikvæð áhrif á fyrirtækin sem við störfum fyrir heldur á allt íslenska samfélagið og þá einkum á þau bæjarfélög þar sem loðna er unnin og þaðan sem loðnuskip eru gerð út. Þetta er vond staða fyrir alla sem nálægt loðnuveiðum og loðnuvinnslu koma. Enn er þó von og við bíðum góðra frétta.“

dried caplein

Þurrkuð íslensk loðna í japanskri verslun.

                Okada kom til Íslands 18. febrúar sl. og reiknar með að öllu óbreyttu að dvelja á landinu í vikutíma eða svo. Hann segir að fyrirtæki sitt vinni gjarnan úr um 8.000 tonnum af loðnu sem veidd er við Ísland á ári hverju en mest hafi það unnið úr 16.000 tonnum. Loðnan er þurrkuð, steikt og unnin með ýmsum hætti fyrir neytendamarkaðinn. „Íslensk loðna er geysivinsæl í Japan og vinnsla hennar er drjúgur hluti starfsemi Okada Suisan. Ef við fáum ekki loðnu frá Íslandi þá höfum við áhuga á að fá annan íslenskan fisk til vinnslu, til dæmis makríl. Okkur hefur reynst heldur erfitt að fá fólk til starfa í fiskvinnslu í Japan og það er mjög slæmt ef við lendum í hráefnaskorti því þá fer fólkið okkar í önnur störf. Það er mikil eftirspurn eftir vinnuafli í Japan um þessar mundir ekki síst vegna Olympíuleikanna sem haldnir verða í Tokyo sumarið 2020. Uppbygging vegna leikanna er afar umfangsmikil. Nú er útlit fyrir loðnuveiðar hér ekki bjart en við bíðum og vonum. Menn verða alltaf að halda í vonina. Ef staðreyndin er sú að loðnustofninn sé í lægð þá verður að bregðast skynsamlega við því. Við megum ekki bara hugsa um vertíðina núna, við verðum að hugsa til langrar framtíðar og mestu máli skiptir þá að stofninn nái sér á strik á ný. Við verðum einhvernveginn að glíma við loðnuleysi í eitt ár þó það hafi í för með sér erfiða stöðu.“

Bergur-Huginn selur Bergey VE til Grundarfjarðar

Bergey VE-544. Ljósm. Guðmundur AlfreðssonBergey VE-544. Ljósm. Guðmundur AlfreðssonÍ gær var undirritaður samningur um að útgerðarfélagið Bergur-Huginn í Vestmannaeyjum, dótturfélag Síldarvinnslunnar, selji Guðmundi Runólfssyni hf. í Grundarfirði togskipið Bergey VE 544. Gert er ráð fyrir að skipið verði afhent nýjum eiganda í síðasta lagi í septembermánuði næstkomandi.
 
Bergey VE er 486 brúttótonn að stærð og smíðuð í Gdynia í Póllandi árið 2007. Útgerð Bergeyjar hefur ávallt gengið vel rétt eins og útgerð systurskipsins Vestmannaeyjar VE. Í lok síðasta mánaðar var greint frá því að aflaverðmæti Bergeyjar, frá því að skipið hóf veiðar í ágústmánuði 2007, hefði rofið tíu milljarða múrinn og á þeim tíma var heildaraflinn orðinn rúmlega 39.000 tonn.
 
Áður hefur komið fram að Bergur-Huginn á tvö skip í smíðum í Noregi og er þeim ætlað að leysa núverandi Bergey og Vestmannaey af hólmi. Gert er ráð fyrir að útgerðarfélagið fái nýju skipin afhent á komandi sumari. Nýju skipin eru 28,95 m að lengd og 12 m að breidd og verða þau að öllu leyti afar vel búin og lögð áhersla á góða vinnuaðstöðu, góða orkunýtingu og sem fullkomnasta nýtingu á afla.
 
Magnús Kristinsson, fyrrverandi framkvæmdastjóri og núverandi stjórnarmaður í útgerðarfélaginu Bergur-Huginn, segir að það sé eftirsjá að Bergey. „Ég kem til með að sakna skipsins mikið. Að mínu mati eru Bergey og Vestmannaey best heppnuðu skip sem veitt hafa við Ísland. Við sjáum það svart á hvítu á aflanum sem þau hafa borið að landi og aflaverðmætunum. Það gekk einstaklega vel að hanna og smíða þessi skip og þar höfðu starfsmenn útgerðarfélagsins mikil áhrif. Útgerð skipanna hefur gengið einstaklega vel enda hafa þau ávallt verið vel mönnuð. Ég er líka spenntur fyrir nýju skipunum sem félagið á í smíðum og vona að þau verði jafn miklar happafleytur og þau gömlu. Það eru spennandi tímar framundan,“ segir Magnús.
 
Guðmundur Smári Guðmundsson, framkvæmdastjóri Guðmundar Runólfssonar hf., segir að ástæður fyrir skipakaupunum séu einkum tvær. Í fyrsta lagi sé fyrirtækið að taka í notkun nýja og afkastamikla fiskvinnslustöð og því sé brýnt að auka veiðigetu skipa þess. Og í öðru lagi mun nýja skipið leysa af hólmi eldra og minna skip sem nú er í eigu fyrirtækisins. „Við trúum því að við séum að fá öflugt og gott skip sem hentar okkar starfsemi vel. Við eigum fyrir sambærilegt skip og það verður hagkvæmt að gera þau út saman. Hér ríkir mikil ánægja með þessi skipakaup,“ segir Guðmundur Smári.

Lakari fiskgengd en síðustu ár

Vestmannaey VE. Ljósm. Guðmundur AlfreðssonVestmannaey VE. Ljósm. Guðmundur AlfreðssonHeimasíðan hafði samband við Birgi Þór Sverrisson skipstjóra á Vestmannaey VE og spurði hvort vertíð væri hafin af krafti. „Nei, það er varla hægt að segja það. Hér hefur fengist þokkalegur afli en það er miklu minna af fiski en hefur verið um þetta leyti árs síðustu þrjú árin. Þá er fiskurinn dreifður og styggur. Það er ætisleysi á slóðinni og til dæmis lítið um spærling. Ætisleysið gerir það að verkum að það fiskast vel á línuna. Fiskurinn ræðst á línukrókana. Togveiðiskipin gera það hins vegar ekki eins gott og síðustu ár en segja má að við séum kröfuharðir því við erum orðnir svo góðu vanir. Ég hef trú á því að mikið af vertíðarfiskinum eigi eftir að ganga hér á miðin og aflinn á eftir að aukast. Hafa verður í huga að vetrarvertíð hefur oft ekki hafist fyrr en í byrjun mars. Við höfum að undanförnu mest verið að fiska í Háfadýpinu, á Pétursey og erum nú út af Vík í Mýrdal. Veður hefur verið að stríða okkur töluvert og staðreyndin er sú að við höfum mest verið að skjótast út á milli lægða. Það ríkir bölvuð vetrartíð um þessar mundir,“ segir Birgir á Vestmannaey.

Kolmunni til Neskaupstaðar og Seyðisfjarðar

Börkur NK að toga á kolmunnamiðunum vestur af Írlandi. Ljósm. Helgi Freyr ÓlasonBörkur NK að toga á kolmunnamiðunum vestur af Írlandi.
Ljósm. Helgi Freyr Ólason
Norska skipið Manon kom til Neskaupstaðar sl. föstudag með 1.900 tonn af kolmunna. Í kjölfar hans kom síðan Börkur NK á sunnudagsmorgun með tæplega 2.300 tonn. Bjarni Ólafsson AK landaði tæplega 1.800 tonnum á Seyðisfirði aðfaranótt sunnudagsins. Þetta var fyrsti kolmunninn sem berst til Seyðisfjarðar á árinu en í Neskaupstað hefur verið tekið á móti um 5.800 tonnum.
 
Hjörvar Hjálmarsson skipstjóri á Berki segir að vel hafi gengið að fylla skipið. „Við fengum aflann í sex holum þannig að það gekk vel að veiða. Veiðisvæðið var um 300 mílur suður af Rockall en það er sunnan við mitt Írland. Við þurftum að sigla 790 mílur heim til að landa og það er andskoti langt. Á þessu svæði eru oft leiðinleg veður á þessum árstíma og þarna er búin að vera bræla síðan í gær. Auðvitað ættum við að vera á loðnu núna í staðinn fyrir að vera að veiða kolmunnann þarna. Við erum nú á leiðinni á kolmunnamiðin og á Papagrunninnu voru loðnutorfur út um allt, á 17 mílna svæði. Og það hafa borist fréttir af loðnu út á Verkamannabanka sem er suður við færeysku línuna. Ég hef aldrei heyrt um loðnu svo sunnarlega. Það hefur gengið illa að mæla nægilega mikla loðnu svo unnt sé að gefa út kvóta en ég hef trú á því að það muni takast á endanum. Það þýðir ekkert annað en að vera bjartsýnn og hér um borð eru menn það,“ segir Hjörvar.

Undirflokkar