Framkvæmdir við stækkun Norðfjarðarhafnar ganga vel

Þrengsli í Norðfjarðarhöfn hafa oft verið mikil og erfitt fyrir stærstu skip að athafna sig. Ljósm.: Jón Már JónssonFramkvæmdir við stækkun Norðfjarðarhafnar ganga vel og virðast tímaáætlanir ætla að standast í öllum meginatriðum. Þessar framkvæmdir skipta Síldarvinnsluna miklu máli enda hafa stærstu skip átt mjög erfitt með að athafna sig í höfninni til þessa. Slík skip geta einungis siglt inn í höfnina í blíðviðri og jafnvel þarf björgunarbáturinn Hafbjörg að aðstoða lóðsbátinn Vött við að koma þeim að bryggju. Umferð um höfnina er mikil og má nefna að á árinu 2012 voru skipakomurnar 519 og eru þá smærri bátar ekki taldir með. Þá hafa þrengsli í höfninni oft verið til óþæginda og ekki er óalgengt að skip þurfi að bíða úti á firði til að komast að.

Skrifað hefur verið undir þrjá verktakasamninga vegna núverandi framkvæmda við höfnina. Í maí var skrifað undir samning við Héraðsverk sem sér um jarðvinnuhlutann, þ. e. hafnargarða, grjótfláa, gerð nýrrar smábátahafnar o. fl. Framkvæmdir að hálfu Héraðsverks hafa gengið vel og er fyrsti áfangi verksins langt kominn en verklok eru áætluð í desember. Annar áfangi þess verks sem Héraðsverk sinnir verður síðan unninn á næsta ári og er helstu þáttur þess verkhluta færsla grjótgarðs. Gert er ráð fyrir að vinna við annan áfanga hefjist 15. apríl og ljúki 31. október 2014. 

Í júlímánuði í sumar var skrifað undir samning við Björgun um dýpkun hafnarinnar og dælingu efnis undir nýja grjótgarðinn. Dælingin verður einnig unnin í áföngum og á dælingu innan hafnar að verða lokið um mánaðamótin janúar – febrúar 2014 og er sá hluti verksins á áætlun. Vinna við síðari hluta verksins hefst síðan á vormánuðum en þá verður gamli grjótgarðurinn fluttur utar. Verklok við dýpkunarframkvæmdir og dælingu á efni eru áætluð í júnímánuði 2014.

Þriðji verksamningurinn vegna hafnarframkvæmdanna var undirritaður hinn 14. nóvember sl. Var hann gerður við Hagtak og felur í sér lengingu stálþils togarabryggjunnar um 60 metra. Þeirri framkvæmd á að vera lokið um mánaðamótin apríl – maí 2014.



Lesa meira...

Kassafrystarnir frá Skaganum leystu vandann - grein Útvegsblaðsins

ÚtvegsblaðiðSmelltu hér til að lesa umfjöllun Útvegsblaðsins

 

 

 

 

Góð veiði en rysjótt tíðarfar

Trollið tekið á Bjarti NK. Ljósm. Þorgeir BaldurssonTogarar Síldarvinnslunnar, Barði NK og Bjartur NK, hafa verið að veiðum í rysjóttu tíðarfari að undanförnu en afli hefur hins vegar verið góður þegar færi hefur gefist til veiða. Frystitogarinn Barði kom til heimahafnar í Neskaupstað í gær og var með blandaðan afla, alls 334 tonn upp úr sjó. Stærstur hluti aflans var ufsi og þorskur en einnig töluvert af gullkarfa og grálúðu. Bjarni Ólafur Hjálmarsson skipstjóri segir að þetta hafi verið mikill brælutúr og alls hafi skipið verið eina 5-6 sólarhringa í vari ýmist vegna veðurs eða bilunar.

Lesa meira...

Ekkert að sjá í gær en mokveiði í dag

Bjarni Ólafsson að landa í NeskaupstaðÞað skipast fljótt veður í lofti. Afar lítið var að sjá af síld á Breiðafjarðarmiðum í gær en í dag er þar mokveiði og allir bátar að fá í sig. Bjarni Ólafsson AK lagði af stað til Neskaupstaðar í hádeginu í dag með 700 tonna afla. Hann mun koma þangað aðra nótt. Beitir NK er á miðunum og var slegið á þráðinn til Hjörvars Hjálmarssonar skipstjóra. „Við erum komnir með 800-900 tonn og erum að fá um 300 tonn frá Hákoni. Það var nánast ekkert að sjá af síld í gær en nú er hún komin svo um munar. Og hún er á hinum hefðbundnu slóðum á Grundarfirði þannig að það er tiltölulega auðvelt að eiga við hana. Það má segja að mokveiði hafi verið í dag, hér á Grundarfirðinum eru 6 bátar og þeir eru allir að fá í sig. Það er svona sem við viljum hafa það“, sagði Hjörvar að lokum.

Þrálátar brælur og lítið af síld – hvað er að gerast ?

Beitir NK kom til Neskaupstaðar í gær.  Ljósm. Þorgeir BaldurssonBeitir NK kom til Neskaupstaðar í gærmorgun með 1200 tonn af íslenskri sumargotssíld. Síldin er góð og fer öll til manneldisvinnslu í fiskiðjuveri Síldarvinnslunnar. Aflinn fékkst í tveimur köstum innan við Hrútey á Breiðafirði við Danskinn. Í fyrra kastinu fengust tæplega 100 tonn en í seinna kastinu 1100 tonn. Hjörvar Hjálmarsson skipstjóri á Beiti segir að vertíðin til þessa hafi verið heldur óskemmtileg og hafi hún einkennst af þrálátum brælum og lítilli síldargegnd á Breiðafjarðarmiðum. „Menn eru farnir að velta fyrir sér hvar síldin heldur sig“, segir

Lesa meira...

Árshátíðarferðin til Búdapest – myndaalbúm

Boeing 757- þotan Grímsvötn ferðbúin á Egilsstaðaflugvelli. Spenntir farþegar ganga um borð.Starfsmenn Síldarvinnslunnar ásamt mökum héldu til Búdapest í októbermánuði síðastliðnum og áttu þar ánægjulega daga. Árshátíð starfsmannanna  fór fram í þessari fornfrægu höfuðborg Ungverjalands og þótti vel til takast. Haldið var utan og heim í tveimur hópum; fyrri hópurinn flaug frá Egilsstöðum til Búdapest 17. október en hinn síðari daginn eftir. Fyrri hópurinn kom síðan heim hinn 21. en sá síðari 22. Ferðin gekk að öllu leyti eins og best varð á kosið; veðrið lék við ferðalangana, hótelið sem gist var á var þægilegt, árshátíðin var afar vel heppnuð og það var margt að skoða í borginni. Þá nutu ungverskir stórmarkaðir góðs af þessari heimsókn í verulegum mæli.

Föstudaginn 18. október flaug þotan lágt yfir Norðfjörð farþegum til mikillar ánægju. Á myndinni sést athafnasvæði Síldarvinnslunnar.Guðlaugur Birgisson tók mikið af myndum í ferðinni og munu lesendur heimasíðunnar nú fá að njóta sýnishorns af þeim í meðfylgjandi myndaalbúmi.

Áhöfn farþegaþotunnar stóð sig frábærlega í ferðinni. Flugstjórinn, Kári Kárason, er Norðfirðingur og fyrrverandi starfsmaður Síldarvinnslunnar en Kári er lengst til hægri á myndinni.

Búdapest er fögur borg sem stendur á bökkum Dónár.

Keisarahöllin í Búdapest ber vitni um merka sögu.

Ferðalangarnir bjuggu á Hotel Novotel City og þar fór vel um mannskapinn.

Lesa meira...

Góðri makríl- og síldarvertíð lokið

Makrílvinnsla í sumar.  Ljósm. Þórhildur Eir SigurgeirsdóttirSíðastliðinn miðvikudag kom Hákon EA til Neskaupstaðar með um 700 tonn af frystri norsk- íslenskri síld. Þetta var hans síðasta veiðiferð á makríl- og síldarvertíðinni og er vertíðinni þar með lokið en önnur skip sem hafa verið við veiðar á makríl og norsk-íslenskri síld og landað í Neskaupstað eru hætt þessum veiðum fyrir nokkru enda veiðiheimildir uppurnar.

Lesa meira...

Stærsti mánuður ársins í útflutningi á frystum afurðum

Frystar afurðir lestaðar í Neskaupstað. Ljósm. Þórhildur Eir SigurgeirsdóttirÍ októbermánuði síðastliðnum fóru samtals 13.500 tonn af frystum afurðum úr frystigeymslum Síldarvinnslunnar í Neskaupstað. Langstærstur hluti afurðanna var makríll og norsk-íslensk síld. Alls lestuðu 7 flutningaskip um 12.000 tonn úr geymslunum og að auki voru um 1.500 tonn flutt á brott landleiðis í gámum og með flutningabílum. Heimir Ásgeirsson yfirverkstjóri í frystigeymslunum segir að októbermánuður hafi verið stærsti mánuður ársins hvað varðar útflutning á frystum afurðum úr frystigeymslum Síldarvinnslunnar. Jafnframt upplýsir hann að langmest af afurðunum þennan mánuðinn hafi verið flutt til kaupenda í Austur-Evrópu.

Rafvæðing fiskimjölsverksmiðja - grein Útvegsblaðsins

ÚtvegsblaðiðSmelltu hér til að lesa umfjöllun Útvegsblaðsins

Á ýmsu gengur í Breiðafirðinum

Beitir NK er á landleið með 1250 tonn af síld. Ljósm. Þórhildur Eir SigurgeirsdóttirBeitir NK er á leið til heimahafnar með 1250 tonn af sumargotssíld úr Breiðafirðinum. Er skipið væntanlegt í fyrramálið og þá mun vinnsla hefjast á ný í fiskiðjuverinu en hlé hefur verið á vinnslunni meðal annars vegna ótíðar. Atli Rúnar Eysteinsson stýrimaður á Beiti segir að þessi veiðiferð hafi verið heldur sérkennileg en skipið var fimm daga í Breiðafirðinum en gat ekkert aðhafst vegna brælu í eina þrjá daga. „Það er mjög erfitt að athafna sig þarna inn á milli skerjanna á svona stóru skipi í miklum vindi“, sagði Atli Rúnar,“ þannig að við gátum ekkert gert á meðan veðrið gekk yfir. Síðan er alls ekki mikið að sjá af síld ennþá en menn eru vongóðir; hún hlýtur að fara að ganga þarna inn fljótlega. Við fengum 90 tonn í fyrsta kastinu okkar en í næsta kasti rifnaði nótin og ekkert kom út úr því. Jóna Eðvalds SF gaf okkur síðan 370 tonn. Börkur NK tók síðan kast sem við áttum að njóta góðs af og það reyndist ekki vera neitt  smákast því í nótinni voru 1000 tonn. Við fengum 800 tonn af því en hann dældi síðan 200 tonnum í sig. Á þessu sést að það gengur á ýmsu í Breiðafirðinum“.

Vinnsla á sumargotssíld gengur vel

Vinnsla á síld í fiskiðjuveri Síldarvinnslunnar.Vinnsla á íslenskri sumargotssíld hófst í fiskiðjuveri Síldarvinnslunnar í Neskaupstað í síðustu viku og hefur hún gengið vel. Síldin hefur reynst stærri og betri en á síðustu vertíð en hún er bæði heilfryst og flökuð. Þá hefur ekki orðið vart við nýja sýkingu í síldinni og er sýkingarvandi síðustu vertíða á hröðu undanhaldi. Segja má því að vertíðin hafi farið ágætlega af stað og nú bíða menn þess að síldin þétti sig í miklu magni á Breiðafirðinum.

Börkur með 1000 tonn úr Breiðafirðinum

Börkur NK að síldveiðum á Hofsstaðavogi á Breiðafirði.  Ljósm. Kristján Mar UnnarssonBörkur NK kom til Neskaupstaðar í morgun úr sinni fyrstu veiðiferð í Breiðafjörðinn á þessari vertíð. Aflinn var 1000 tonn af íslenskri sumargotssíld og hófst löndun um hádegisbil þegar lokið var við að vinna aflann úr Beiti NK en hann kom úr sinni fyrstu veiðiferð í Breiðafjörðinn  sl. laugardag. Haft var samband við Sigurberg Hauksson skipstjóra á Berki þegar skipið sigldi inn Norðfjörð og spurt tíðinda af veiðiferðinni. „Við fengum aflann í þremur köstum á laugardaginn og vorum að veiðum á Hofsstaðavogi. Góður afli fékkst í síðasta kastinu og dældum við 200 tonnum úr því í Kap VE. Veiðum lauk um sjöleytið á laugardagskvöld. Síldin sem fékkst þarna er ágætlega stór og falleg og ætti að henta vel til vinnslu. Hins vegar sést ekki enn mikið af síld en hafa ber í huga að í fyrra varð ekki vart við mikla síld þarna fyrr en um mánaðamótin október-nóvember“.


Breiðafjarðarballið er byrjað

Beitir NK á landleið.  Ljósm. Þorgeir BaldurssonBeitir NK hélt til veiða á íslenskri sumargotssíld sl. þriðjudag. Eins og síðustu ár var stefnan tekin á Breiðafjörðinn en þangað er 36 tíma stím frá Neskaupstað. Skipið hóf veiðar í gærmorgun og lagði af stað heimleiðis með 1100-1200 tonn á milli klukkan 9 og 10 í gærkvöldi. Beitir var að nálgast Vestmanneyjar þegar haft var samband við Hálfdan Hálfdanarson skipstjóra og hann spurður út í gang veiðiferðarinnar. „Það var  ekkert sérstaklega mikið af síld að sjá þarna“,sagði Hálfdan,“ það voru einungis tvö skip á miðunum, við og Ingunn AK og þess vegna fengum við góðan afla. Við köstuðum tvisvar við Hrútey á Breiðafirðinum og fengum samtals um 700 tonn. Ingunn AK fékk hinsvegar 1000 tonna kast og við fengum gefins hjá þeim 400-500 tonn“.

Börkur NK liggur nú á Grundarfirði og bíður eftir að hefja veiðar á Breiðafirðinum. Mikilvægt er að hann komi ekki að landi með afla fyrr en vinnslu á afla Beitis er um það bil að ljúka í fiskiðjuverinu í Neskaupstað. Allt er lagt upp úr að hráefnið sé sem ferskast  þegar það kemur til vinnslu og því er tímasetning veiðanna lykilatriði.

Frábær ferð til Búdapest og mögnuð árshátíð

Frá árshátíðinni í Búdapest.  Ljósm. Guðlaugur BirgissonStarfsmenn Síldarvinnslunnar ásamt mökum héldu til Búdapest í síðustu viku og skiluðu sér heim eftir helgina að aflokinni frábærri ferð og árshátíð sem allir minnast með  gleði og ánægju. Samtals voru ferðalangarnir  rúmlega 360 talsins og skiptust í tvo hópa. Fyrri hópurinn flaug utan sl. fimmtudag og kom heim á mánudag en sá síðari hélt af landi brott á föstudag og kom heim á þriðjudag. Flogið var með Boeing 757 vél frá Icelandair sem ber heitið Grímsvötn og var Norðfirðingurinn Kári Kárason flugstjóri en Kári starfaði áður hjá Síldarvinnslunni bæði til lands og sjávar. Síðari hópnum er upphaf flugferðarinnar einkar hugstætt en þegar vélin hafði hafið sig á loft frá Egilsstaðaflugvelli í veðurblíðunni var flogið rétt yfir jökulinn Fönn og síðan niður í Fannardal. Þá var flogið lágflug út alla Norðfjarðarsveit og yfir Neskaupstað en síðan var gefið í og flugið hækkað yfir Norðfjarðarflóanum. Fullvíst má telja að aldrei áður hafi svo stórt loftfar flogið lágflug yfir byggðinni  í Norðfirði og vissu sumir á jörðu niðri vart hvaðan á sig stóð veðrið þegar flugvélin birtist með þessum hætti og sumum fannst þeir nánast geta snert hana með því að tylla sér á tá.

Í Búdapest nutu allir lífsins til hins ítrasta og á laugardagskvöldinu var haldin árshátíð starfsmanna á veitingastaðnum Larus. Farið var í skipulagðar skoðunarferðir um borgina, margir nutu siglingar á Dóná og þar fyrir utan ráðstafaði fólk tíma sínum til að kynna sér matarmenningu og aðra siði innfæddra. Þá má ekki gleyma verslunarröltinu sem er fastur liður hjá landanum þegar erlendar borgir eru heimsóttar. Búið var á góðu hóteli þannig að vel fór um alla og ekki skemmdi veðrið fyrir; alla dagana var þurrt og hlýtt og rigningin sem oft heimsækir Ungverja um þetta leyti árs hélt sig víðs fjarri.

Árshátíðin þótti heppnast afar vel í alla staði og allt það kvöld mátti sjá bros á hverju andliti. Eftir að Gunnþór Ingvason framkvæmdastjóri hafði sett hátíðina tók Brynja Valdís Gísladóttir leikkona  við veislustjórn og stýrði hún gleðinni styrkri hendi. Sjálfur Geir Ólafs birtist og söng þannig að jafnvel stífustu menn tóku að dilla sér og ekki minnkaði ánægjan þegar ungverskur kór undir stjórn Ferenc Utassy sté á svið. Kórinn var hreinasta afbragð og sannaði ágæti sitt þegar hann flutti „Úr útsæ rísa Íslands fjöll“ sem enginn hefur haldið fram að sé auðveldasta kórlag sem þekkist. Hér skal þess getið að kórstjórinn var um nokkurra ára skeið búsettur á Stöðvarfirði og stýrði þar tónlistarmálum. Á árshátíðinni voru bornar fram dýrindis veitingar í mat og drykk og ekki var það til að draga úr ánægjunni. Að afloknu borðhaldi var síðan dans stíginn fram eftir nóttu þar til haldið var heim á hótel í ungverskri næturkyrrð.

Í reynd hjálpaðist allt að til að gera þessa Búdapestferð eftirminnilega og virðist það samdóma álit ferðalanganna að ferð sem þessi eigi svo sannarlega sinn þátt í því að þjappa starfsfólkinu saman og gera gott fyrirtæki enn betra.


Eitt kemur þá annað fer

Flutningaskip mætast í Norðfirði.  Ljósm. Jón Már JónssonUm þessar mundir er mikið skipað út af frystum makríl og síld úr frystigeymslum Síldarvinnslunnar í Neskaupstað. Koma flutningaskipin hvert á fætur öðru og lesta stóra farma. Í gær var lokið við að lesta skip og þegar það hélt úr höfn  sigldi næsta skip inn Norðfjarðarflóann til lestunar og mættust skipin á miðjum flóanum. Alls taka þessi tvö skip rúmlega 7000 tonn af frystum afurðum og um þessar mundir er skipað út allan sólarhringinn. Skipin tvö sem hér um ræðir eru engin smásmíði, annað er 137 metrar á lengd og hitt 134. Mun farmur beggja skipanna fara til hafna við Svartahaf.


Leiðin liggur til Búdapest – nokkrar hagnýtar upplýsingar

Búdapest á góðum eftirmiðdegi.Næstkomandi fimmtudag og föstudag heldur starfsfólk Síldarvinnslunnar ásamt mökum í árshátíðar- og skemmtiferð til Búdapest. Árshátíðin verður haldin á skemmtistaðnum Larus á laugardagskvöld en skemmtistaðurinn er í einungis 5 mínútna göngufjarlægð frá hótelinu sem gist verður á ( Hotel Novotel City). Fyrir utan árshátíðina munu þátttakendur í ferðinni nýta dvölina til að skoða borgina og njóta ánægjulegra samvista.

Hér þarf að koma á framfæri nokkrum hagnýtum upplýsingum fyrir ferðalangana sem mikilvægt er að starfsmenn deili sín á milli:

  • Þeir sem koma til Egilsstaðaflugvallar akandi á eigin bifreiðum þurfa að mæta til innritunar á milli kl. 6 og 6.30, en innritun hefst kl. 6 báða brottfarardagana.
  • Á fimmtudagsmorgun fer rútan frá Neskaupstað til Egilsstaðaflugvallar stundvíslega kl. 6.15. Lagt er af stað frá versluninni Nesbakka en farþegar einnig teknir upp við Olís.
  • Á föstudagsmorgun fara tvær rútur frá Neskaupstað til Egilsstaðaflugvallar. Sú fyrri fer kl. 6.15 en sú síðari kl. 6.45. Starfsfólk í fiskiðjuveri og fiskimjölsverksmiðju ásamt mökum fara með fyrri rútunni en með síðari rútunni fer starfsfólk skrifstofu ásamt mökum. Báðar rúturnar leggja af stað frá versluninni Nesbakka og taka einnig upp farþega við Olís.
  • Síldarvinnslan býður ferðalöngunum upp á morgunhressingu á Egilsstaðaflugvelli.
  • Allir þurfa að muna eftir að taka með farseðla og vegabréf.
GÓÐA SKEMMTUN


Lífrænt ræktaðar gulrætur og fiskimjöl frá Síldarvinnslunni

Starfsmenn fiskimjölsverksmiðjunnar í Neskaupstað gæða sér á gulrótunum frá Stefáni.  Ljósm. Smári GeirssonÁ Akurseli í Öxarfirði eru ræktaðar lífrænar gulrætur í stórum stíl og eru þær þekktar fyrir bragðgæði. Uppskeran í ár mun vera um 130 tonn. Við ræktunina er enginn tilbúinn áburður notaður en í stað hans er notað fiskimjöl frá Síldarvinnslunni í Neskaupstað sem er sérstaklega vottað til lífrænnar ræktunar ásamt höfrum sem bændurnir í Akurseli rækta sjálfir. Þá er lögð áhersla á að akurinn sé vökvaður með vatni úr Jökulsá á Fjöllum sem fellur til sjávar spölkorn frá Akurseli. Nánast öll uppskeran frá Akurseli er seld í verslunum Hagkaupa og Bónus og er eftirspurn eftir þessari gæðavöru mikil og vaxandi.

Stefán Gunnarsson bóndi í Akurseli segir að þegar unnt var að kaupa vottað fiskimjöl til lífrænnar framleiðslu hafi skapast forsendur til hinnar lífrænu ræktunar á gulrótunum. Fiskimjölsverksmiðja Síldarvinnslunnar í Neskaupstað er eina verksmiðjan á landinu sem hefur slíka vottun og fiskimjölið sem notað er í Akurseli er keypt þaðan. „Við höfum sinnt þessari lífrænu ræktun í 4-5 ár“, segir Stefán,“og allan þann tíma höfum við fengið fiskimjölið frá Neskaupstað.  Það hefur verið einstaklega gott að eiga viðskipti við starfsmenn Síldarvinnslunnar og þeir hafa allt viljað fyrir okkur gera bæði hvað varðar afgreiðslu og umbúðir“. Að sögn Stefáns  anna þau á Akurseli ekki eftirspurn í ár enda líki framleiðslan afar vel.

Guðjón B. Magnússon verksmiðjustjóri fiskimjölsverksmiðju Síldarvinnslunnar í Neskaupstað segir það mikið gleðiefni að framleiðsla verksmiðjunnar skuli notuð til lífrænnar ræktunar. Hann upplýsir að í vor hafi verið seld rúmlega 8 tonn af lífrænu mjöli til Akursels og mjög ánægjulegt sé að eiga samskipti við fólkið þar. „Við fáum líka send sýnishorn af framleiðslunni á Akurseli með reglulegu millibili og þá er veisla hjá okkur. Þessar gulrætur eru einstaklega safaríkar og bragðgóðar og það verður enginn svikinn af þeim. Um daginn kom hér fullur poki af gulrótum og hann hvarf eins og dögg fyrir sólu – menn hakka þær í sig“.


Makríl- og síldarvertíð lokið hjá skipum Síldarvinnslunnar

Börkur NK á landleið.  Ljósm. Þorgeir BaldurssonBörkur NK kom til hafnar í Neskaupstað í nótt með 870 tonn af norsk-íslenskri síld sem fékkst í færeysku lögsögunni. Allur aflinn fer til manneldisvinnslu í fiskiðjuveri Síldarvinnslunnar. Þar með er makríl- og síldarvertíðinni sem hófst í júní lokið hjá skipum Síldarvinnslunnar en Beitir NK landaði sínum síðasta síldarfarmi sl. þriðjudag.

Vinnsluskipin Hákon EA og Vilhelm Þorsteinsson EA eru enn að veiðum en þau landa afla sínum í frystigeymslur Síldarvinnslunnar í Neskaupstað.


Áhrif makrílaveiða og makrílvinnslu á Síldarvinnsluna - grein Útvegsblaðsins

ÚtvegsblaðiðSmelltu hér til að lesa umfjöllun Útvegsblaðsins








Ennþá berst norsk-íslensk síld til Neskaupstaðar

Börkur NK og Beitir NK að landa í Neskaupstað.Makríl- og síldarvertíðinni er ekki lokið í Neskaupstað. Þrjú skip hafa veitt til löndunar í fiskiðjuver Síldarvinnslunnar og hafa tvö þeirra, Bjarni Ólafsson AK og Beitir NK lokið veiðum, en Börkur NK er í sinni síðustu veiðiferð. Vinnsluskipin Hákon EA og Vilhelm Þorsteinsson EA hafa ekki lokið veiðum en þau landa frystum aflanum í frystigeymslur Síldarvinnslunnar. Bæði Hákon og Vilhelm Þorsteinsson eru að landa í dag, Hákon um 750 tonnum og Vilhelm um 600 tonnum.     

Nú er farið að hyggja að veiðum á íslenskri sumargotssíld og leitar hugurinn þá í ríkum mæli vestur í Breiðafjörð.

Undirflokkar