Framhaldsaðalfundur Síldarvinnslunnar hf.

Framhaldsaðalfundur Síldarvinnslunnar hf.Framhaldsaðalfundur Síldarvinnslunnar hf. verður haldinn fimmtudaginn 5. september 2013 í Hótel Egilsbúð Neskaupstað kl. 14:00.


Dagskrá:

1. Skýrsla stjórnar
2. Endurskoðaðir reikningar lagðir fram til staðfestingar
3. Tekin ákvörðun um greiðslu arðs
4. Tillaga stjórnar um starfskjarastefnu
5. Ákveðin þóknun til stjórnar félagsins
6. Breytingar á samþykktum félagsins
  • a. Tillaga um að fjölga stjórnarmönnum úr þremur í fimm
  • b. Tillaga um nýtt ákvæði til samræmis við ákvæði hlutafélagalaga varðandi kynjakvóta við stjórnarkjör
  • c. Tillaga um nýtt ákvæði er varðar tilkynningar um framboð til stjórnar og meðferð þeirra.
  • d. Tillaga um breytingu á ákvæði er varðar heimild varastjórnarmanna til setu á stjórnarfundum.
  • e. Tillaga um breytingu á ákvæði er varðar skuldbindingarheimild stjórnar þannig að undirskrift þriggja stjórnarmanna sé nauðsynleg í stað tveggja áður.
7. Kosin stjórn félagsins
8. Kosnir endurskoðendur
9. Önnur mál, löglega fram borin


Stjórn Síldarvinnslunnar hf.

Á ýmsu gengur á makríl- og síldarvertíðinni

Makrílhol tekið á Barða NK. Ljósm. Þorgeir BaldurssonAð undanförnu hefur afli makrílskipanna úti fyrir Austur- og Suðausturlandi verið töluvert síldarblandaður og hafa sumir farmar verið makríll og síld til helminga eða jafnvel meirihlutinn síld. Til að komast í hreinni makríl héldu Beitir NK og Börkur NK vestur fyrir land og hafa verið þar við veiðar frá því í gær. Í morgun voru komin um 300 tonn um borð í Beiti en afla beggja skipa hefur verið dælt um borð í hann. Vonast er til að Beitir geti lagt af stað til heimahafnar með góðan afla síðar í dag en þangað er um 30 tíma sigling. Börkur mun hinsvegar halda áfram veiðum vesturfrá.
 
Bjarni Ólafsson AK, þriðja skipið sem landar makríl og síld til vinnslu í fiskiðjuverinu í Neskaupstað, er við veiðar á austurmiðum og kemur væntanlega til löndunar í kvöld.
 
Frystitogarinn Barði NK hefur verið á makrílveiðum vestur af landinu og hefur hann nú lokið við veiða sinn makrílkvótakvóta á vertíðinni. Ekki er gert ráð fyrir að Barði komi til löndunar eftir að makrílveiðum lýkur heldur mun hann þegar hefja ufsaveiðar úti fyrir Vestfjörðum en þar hefur verið góð veiði síðustu vikur. Gert er síðan ráð fyrir að Barði landi í Neskaupstað um mánaðamótin.

Góður andi og frábær laun í fiskiðjuverinu

Lilja Tekla Jóhannsdóttir að störfum í fiskiðjuverinu. Ljósm. Þórhildur Eir SigurgeirsdóttirSíðastliðið vor réði Síldarvinnslan rúmlega 50 sumarstarfsmenn til starfa í fiskiðjuverinu í Neskaupstað. Flestir þessara starfsmanna voru á aldrinum 18-20 ára og stunduðu þeir vaktavinnu á makríl- og síldarvertíðinni. Um þessar mundir eru sumarstarfsmennirnir að láta af störfum enda skólar að byrja og ný verkefni að komast á dagskrá.
 
Til að forvitnast um viðhorf þessara ungu sumarstarfsmanna til starfanna í fiskiðjuverinu voru tveir þeirra teknir tali. Fyrir valinu urðu Smári Björn Gunnarsson og Lilja Tekla Jóhannsdóttir en þau eru bæði fædd á árinu 1995 og eru á þriðja námsári í Verkmenntaskóla Austurlands.
 
Smári sagði að sér hefði líkað sumarvinnan vel en þó hefði komið í ljós að vaktavinna ætti ekki sérlega vel við sig. Sérstaklega fannst honum næturvaktirnar erfiðar og langar. Á vinnustaðnum hefði ríkt góður andi og félagsskapurinn verið skemmtilegur.
 
Lilju Teklu féll aftur á móti vaktavinnan vel og sagði að sér hefði reynst létt að aðlaga sig að vinnuskipulaginu. Þá sagði Lilja að vinnan hefði í sjálfu sér ekki verið erfið en langvarandi stöður við færibönd hefðu hins vegar verið þreytandi fyrir sig. Þá tók hún undir með Smára og sagði að vinnufélagarnir hefðu verið góðir og starfsandinn eins og best verður á kosið.
 
Bæði Smára og Lilju Teklu var tíðrætt um launin sem þau voru sammála um að væru frábær. Fram kom hjá þeim að launin fyrir júlímánuð hefðu verið á milli 500-600 þúsund krónur og víst væri að flestir jafnaldrar þeirra á landinu dauðöfunduðu þau af þeim. Fram kom að makríl- og síldarvertíðin hefði hafist heldur seinna í ár en síðastliðin ár og því hefði vaktavinna ekki hafist fyrr en um mánaðamótin júní-júlí og sumarlaunin væru því heldur lægri en að undanförnu. Þau voru sammála um að nauðsynlegt væri að borga vel fyrir þessa vinnu því þeir sem sinntu henni gætu ekki fengist við neitt annað á meðan; íþróttastarf og annað félagslíf væri varla á dagskrá hjá þeim sem réðu sig í sumarvinnu í fiskiðjuverið.

Vinningsverkefni nemenda í Sjávarútvegsskólanum

Vinningshópurinn að störfum. Ljósm. Margrét Þórðardóttir.Í Sjávarútvegsskóla Síldarvinnslunnar þurftu nemendur að skila hópverkefni. Fengu hóparnir ráðrúm til að ljúka verkefnum sínum eftir að skóla lauk en þeim þurfti að skila í síðasta lagi hinn 15. ágúst. Hóparnir voru fimm talsins og skiluðu þeir allir verkefnum sínum á tilsettum tíma. Þremur verkefnanna var skilað í formi veggspjalda, einu í formi ritgerðar og einu í stafrænu formi.

Verkefnin sem hóparnir völdu sér voru af ýmsum toga. Einn hópurinn tók viðtöl við einstaklinga sem höfðu reynslu af ýmsum þáttum sjávarútvegs á meðan annar fjallaði um þær breytingar sem orðið hafa á sjómennsku frá miðri síðustu öld og gerði einnig sjómennsku kvenna nokkur skil. Þriðji hópurinn tók síldarævintýrið fyrir og sá fjórði fjallaði um nýsköpunartogarann Egil rauða NK. Fimmti og síðasti hópurinn gerði grein fyrir ýmsum tegundum veiðarfæra og notkun þeirra.

Gefið hafði verið út að besta verkefnið yrði verðlaunað og því þurfti að fara fram mat á þeim. Tvö verkefnanna þóttu standa upp úr og vera áberandi best; annars vegar verkefnið um veiðarfærin og hins vegar verkefnið um Egil rauða. Að lokinni nákvæmri skoðun varð niðurstaðan sú að verkefnið um Egil rauða bæri sigur úr býtum.

Lesa meira...

Margrét Þórðardóttir lætur af störfum

Margrét Þórðardóttir í kveðjusiglingunni með starfsfélögum sínum á skrifstofu Síldarvinnslunnar þeim Jóni Má Jónssyni, Sindra Sigurðssyni og Axel Ísakssyni. Ljósm. Sigurður Steinn EinarssonSíðastliðinn föstudag lét Margrét Þórðardóttir af störfum hjá Síldarvinnslunni. Hún hafði starfað hjá fyrirtækinu í tæplega 18 ár og mörg undanfarin ár hefur hún verið einkaritari framkvæmdastjóra. Störf Margrétar voru þess eðlis að hún þurfti að vera í samkiptum við marga og má því segja að hún hafi verið einskonar andlit fyrirtækisins út á við.  Eitt af síðustu verkum Margrétar var að veita Sjávarútvegsskóla Síldarvinnslunnar forstöðu en þar var um að ræða athyglisvert brautryðjandaverkefni.
 
Í lok síðasta vinnudags kvaddi starfsfólk skrifstofu Síldarvinnslunnar Margréti með virktum og fór kveðjuathöfnin fram á meðan siglt var um Norðfjarðarflóann í blíðviðri.
 
Margrétar verður sárt saknað en hún heldur nú til náms í Keili. Síldarvinnslan vill þakka henni góð störf í þágu fyrirtækisins og það er aldrei að vita nema kynnin verði endurnýjuð að námstímanum loknum.

Makríllinn fer batnandi

Makríll unninn í fiskiðjuverinu. Ljósm: Þórhildur Eir SigurgeirsdóttirBeitir NK kom til Neskaupstaðar í morgun með um 460 tonn af makríl og síld og er nú verið að landa úr honum í fiskiðjuverið. Mikill meirihluti aflans er makríll en um 80 tonn er síld.

Makríllinn sem borist hefur að landi að undanförnu er mun betri en sá makríll sem barst fyrr á vertíðinni og er farmurinn úr Beiti staðfesting á því. Eftir því sem fiskurinn verður betri gengur vinnslan betur og eru menn ánægðir með þessa þróun eins og gefur að skilja.

Allt samkvæmt áætlun í fiskiðjuverinu

Fiskiðjuver og frystigeymslur Síldarvinnslunnar.  Ljósm. Þórhildur Eir SigurgeirsdóttirÍ fiskiðjuveri Síldarvinnslunnar í Neskaupstað gengur allt samkvæmt áætlun. Landað var úr Berki NK í gær um 460 tonnum og í dag er verið að landa rúmum 400 tonnum úr Bjarna Ólafssyni AK. Hlé var gert á vinnslu í nótt á meðan þrif fóru fram en að sjálfsögðu þarf að þrífa fiskiðjuverið með reglubundnum hætti. Beitir NK er síðan væntanlegur til löndunar í fyrramálið.

Aflinn sem Börkur og Bjarni Ólafsson komu með er töluvert blandaður. Í Berki var um helmingur aflans makríll og um helmingur síld, í Bjarna Ólafssyni er hins vegar makríll rúmlega helmingur aflans.


Barði NK í sínum þriðja makríltúr

Makrílhol.  Ljósm. Þorgeir BaldurssonFrystitogarinn Barði NK er nú í sínum þriðja makríltúr á vertíðinni. Reyndar landaði skipið tvisvar fullfermi í síðasta túr. Þegar heimasíðan hafði samband við Barða skömmu fyrir hádegi í dag var hann á veiðum í Hornafjarðardýpi og upplýsti Geir Stefánsson stýrimaður síðuna um að aflinn væri nægjanlegur til að halda fullum afköstum í vinnslunni. Að sögn Geirs ætti skipið að vera í landi með fullfermi upp úr næstu helgi ef ekkert hlé yrði á vinnslu.Makrílvinnsla um borð í Barða NK.  Ljósm. Þorgeir Baldursson

 

Sjávarútvegsskóla Síldarvinnslunnar slitið í fyrsta sinn

Nemendur Sjávarútvegsskólans með útskriftarskirteinin. Ljósm. Sigurður Steinn EinarssonSjávarútvegsskóla Síldarvinnslunnar var slitið í fyrsta sinn í dag. Skólinn hóf starfsemi sína hinn 29. júlí og starfaði í tvær vikur. Alls veittu 24 nemendur útskriftarskírteinum móttöku í Safnahúsinu í Neskaupstað og að því loknu var boðið upp á góða hamborgaraveislu.
Síðustu dagar skólastarfsins voru viðburðaríkir en þá áttu sér stað heimsóknir í vinnslustöðvar Síldarvinnslunnar ásamt því að skrifstofur fyrirtækisins voru heimsóttar. Eins fengu nemendur fyrirlestur um störfin sem framkvæmd eru á skrifstofunum.

Í vinnslustöðvunum var tekið á móti nemendahópnum og hann fræddur um starfsemina. Í fiskimjölsverksmiðjunni var framleiðsluferillinn útskýrður og vakin athygli nemenda á því að verksmiðjan er að mestu leyti tölvustýrð. Þá voru störfin á rannsóknastofu verksmiðjunnar kynnt.
Þórhallur Jónasson gæðastjóri fræðir nemendur á rannsóknastofu fiskimjölsverksmiðjunnar. Ljósm. Margrét Þórðardóttir

Nemandi í Sjávarútvegsskólanum að hefja flökun á ufsa. Ljósm. Margrét Þórðardóttir

Lesa meira...

Vinnsluskip með 3400 tonn af frystum afurðum á fjórum dögum

Kristina EA að landa frystum afurðum í frystigeymslur Síldarvinnslunnar. Ljósm. Þórhildur Eir SigurgeirsdóttirMiklar annir eru hjá starfsmönnum frystigeymsla Síldarvinnslunnar í Neskaupstað þessa dagana. Vinnsluskipin koma hvert á fætur öðru til löndunar og eru þau gjarnan með fullfermi af frystum makríl og síld. Barði NK landaði í gær 184 tonnum, Vilhelm Þorsteinsson EA er að landa 480 tonnum og á morgun er Hákon EA væntanlegur með um 700 tonn. Á laugardag er síðan stærsta fiskiskip Íslendinga, Kristina EA, væntanlegt með um eða yfir 2000 tonn. Á þessum fjórum dögum eru því vinnsluskip að landa tæplega 3400 tonnum af makríl í frystigeymslurnar og er það með mesta móti.

Fyrir utan makrílinn sem vinnsluskipin bera að landi er fiskiðjuver Síldarvinnslunnar að framleiða frystan makríl og með framleiðslu þess má áætla að frystigeymslurnar séu að taka á móti tæplega 5000 tonnum á þessum fjórum dögum.

Barði NK með fullfermi af makríl – fyrsta veiðiferð Geirs Stefánssonar sem skipstjóra

Frystitogarinn Barði NK kom til hafnar í Neskaupstað í gær með fullfermi af frystum makríl eða 184 tonn. Veiðiferðin gekk vel og og nánast allan tímann var framleitt með fullum afköstum. Skipið var í sjö og hálfan sólarhring að veiðum og fór veiðin fram á miðunum sauðaustur af landinu.
Geir Stefánsson. Ljósm. Margrét ÞórðardóttirÞessi veiðiferð var hin fyrsta sem Geir Stefánsson var með skipið. Geir réðist í skipsrúm á Barða árið 2004, fyrst sem háseti en um tveimur árum síðar sem 2. stýrimaður. Síðan hefur Geir mikið leyst af sem 1. stýrimaður og nú kom að því að hann gegndi stöðu skipstjóra.

Sjómennskuferill Geirs er fjölbreyttari en flestra annarra. Á árunum 1995 til 2003 var hann búsettur í Petropavlosk á Kamstjaka-skaga í Rússlandi og starfaði þar sem gæðastjóri um borð í rússneskum fiskiskipum og verksmiðjuskipum. Geir fluttist frá Rússlandi árið 2003 og áður en hann réðist í skipsrúm á Barða starfaði hann sem aðstoðarframleiðslustjóri á suður-afrísku skipi sem lagði stund á tannfiskveiðar í Indlandshafi.

Geir segir að vissulega sé nokkur munur á að vera á íslensku fiskiskipi en erlendum en hann kunni einstaklega vel við sig um borð í Barða og sé mjög ánægður að starfa hjá Síldarvinnslunni.

Starf Sjávarútvegsskólans gengur vel

Jón Einar Marteinsson framkvæmdastjóri Fjarðanets fræðir nemendur um veiðarfæragerð.  Ljósm. Margrét ÞórðardóttirSjávarútvegsskóli Síldarvinnslunnar hóf á ný störf í dag eftir vel heppnaða verslunarmannahelgi. Þessi dagur var helgaður útgerð Síldarvinnslunnar. Karl Jóhann Birgisson rekstrarstjóri útgerðarsviðs fyrirtækisins hóf daginn með stuttum fyrirlestri um útgerðina og skipakostinn. Fór hann meðal annars yfir allan þann fjölda stofnana og fyrirtækja sem Síldarvinnslan er í samstarfi við vegna skipanna. Þá var haldið inn í höfn og farið í heimsóknir um borð í uppsjávarveiðiskipið Beiti NK og ísfisktogarann Bjart NK. Skipstjórar og vélstjórar tóku á móti hópnum um borð í skipunum og fræddu nemendur um tækjabúnað, veiðarfæri, vélbúnað og starfsaðstöðu skipverja. 

Undir lok síðustu viku hlýddu nemendur á fyrirlestra um ýmsa þætti eins og til dæmis starfsmannamál, gæðamál, markaðsmál  og fleira. Þá var farið í heimsóknir til Fjarðanets, Vélaverkstæðis G. Skúlasonar, Verkmenntaskóla Austurlands og Matís.

Skólinn leggur áherslu á fjölþætta fræðslu og góða kynningu á störfum innan sjávarútvegsins. Þá er mikilvægt að nemendur átti á sig á fjölbreytni starfanna og þeim menntunarkröfum sem gerðar eru til starfsmanna.

Skólinn mun starfa út þessa viku og þá daga sem eftir eru verður nemendum boðið upp á fróðlega fyrirlestra og gagnlegar heimsóknir í vinnslustöðvar Síldarvinnslunnar. Þá munu nemendur einnig sinna hópavinnu en hóparnir vinna verkefni tengd sjávarútvegi.


Frí í fiskiðjuverinu um verslunarmannahelgina

Makríll unninn í fiskiðjuveri Síldarvinnslunnar.  Ljósm. Þórhildur Eir SigurgeirsdóttirVinnsla í fiskiðjuveri Síldarvinnslunnar í Neskaupstað verður stöðvuð í fyrramálið og mun ekki hefjast á ný fyrr en á mánudagskvöld. Starfsfólkinu gefst því gott tækifæri til að njóta fjölbreyttrar dagskrár Neistaflugshátíðarinnar um helgina.

Á vertíðinni hefur fiskiðjuverið tekið á móti tæplega 6000 tonnum af makríl og rúmlega 4.000 tonnum af síld.  Þá hafa vinnsluskip landað tæplega 6.000 tonnum af frystum afurðum í frystigeymslur Síldarvinnslunnar.


Karl Róbertsson ráðinn gæðastjóri

Karl RóbertssonKarl Róbertsson hefur verið ráðinn í starf gæðastjóra hjá Síldarvinnslunni og hefur hann störf hinn 1. október næstkomandi.

Karl er borinn og barnfæddur Norðfirðingur og lauk námi í matvælafræði frá Háskóla Íslands árið 1998. Frá þeim tíma hefur hann starfað hjá Rannsóknastofnun fiskiðnaðarins og Matís, lengst af í Neskaupstað en einnig á Ísafirði. 

Karl mun hafa umsjón með gæðakerfinu í fiskiðjuverinu í Neskaupstað og eins mun hann starfa að gæðamálum í fiskimjölsverksmiðjum fyrirtækisins ásamt Þórhalli Jónassyni gæðastjóra þeirra.

Fiskimjöls- og lýsisiðnaður í 100 ár

Fiskimjöls- og lýsisiðnaður í 100 ár            Síldarvinnslan hf. mun bjóða Austfirðingum að koma og njóta farandsýningarinnar Fiskimjöls- og lýsisiðnaður í 100 ár um verslunarmannahelgina (frá föstudegi til mánudags). Sýningin verður sett upp í Safnahúsinu í Neskaupstað og samanstendur af texta og myndefni á fimmtán skiltum. Alla sýningardagana verður Safnahúsið opið á milli kl. 13 og 17 og geta gestir þá einnig notið annarra safna í húsinu í boði Síldarvinnslunnar.
            Það er Síldarminjasafnið á Siglufirði sem á veg og vanda að uppsetningu sýningarinnar og er ráðgert að hún fari víða um land. Síldarvinnslan hf. mun bjóða Austfirðingum að koma og njóta farandsýningarinnar Fiskimjöls- og lýsisiðnaður í 100 ár um verslunarmannahelgina (frá föstudegi til mánudags). Sýningin verður sett upp í Safnahúsinu í Neskaupstað og samanstendur af texta og myndefni á fimmtán skiltum. Alla sýningardagana verður Safnahúsið opið á milli kl. 13 og 17 og geta gestir þá einnig notið annarra safna í húsinu í boði Síldarvinnslunnar.

Það er Síldarminjasafnið á Siglufirði sem á veg og vanda að uppsetningu sýningarinnar og er ráðgert að hún fari víða um land.

Sjávarútvegsskóli Síldarvinnslunnar settur í fyrsta sinn

Nemendur Sjávarútvegsskóla Síldarvinnslunnar.  Ljósm. Margrét ÞórðardóttirÍ morgun var Sjávarútvegsskóli Síldarvinnslunnar settur í fyrsta sinn. Það var Gunnþór Ingvason framkvæmdastjóri Síldarvinnslunnar sem setti skólann og bauð nemendur velkomna til starfa. Síðan hlýddu nemendur á fyrirlestra um sögu útgerðar og sögu fiskvinnslu ásamt því að skoða gögn um útgerðarsöguna frá Skjala- og myndasafni Norðfjarðar. Mikill áhugi reyndist vera fyrir skólastarfinu og eru nemendur 27 að tölu, 17 stúlkur og 10 piltar. Nemendurnir eru allir fæddir á árunum 1999 og 1998.

Síldarvinnslan telur mjög mikilvægt að gefa ungmennum kost á að fræðast um sjávarútveg en námsefni sem notað er í íslenskum skólum virðist leggja litla áherslu á að veita upplýsingar um þessa undirstöðuatvinnugrein þjóðarinnar. Frumkvæðið sem Síldarvinnslan  hefur sýnt með stofnun Sjávarútvegsskólans hefur þegar smitað út frá sér og mun Íslenski sjávarklasinn verða með samsvarandi skóla í Grindavík í ágústmánuði næstkomandi. Skólinn í Grindavík er nefndur Codland vinnuskólinn.

Sjávarútvegsskóli Síldarvinnslunnar mun starfa í tvær vikur. Auk kennslu um sögu sjávarútvegs og fiskvinnslu fá nemendur fræðslu um gæða- og markaðsmál, starfsmannamál, menntun starfsfólks í sjávarútvegi og tengdum greinum o. s. frv. Einnig munu nemendur heimsækja fiskiðjuver og fiskimjölsverksmiðu ásamt því að fara í vettvangsheimsóknir í fyrirtæki sem þjóna sjávarútveginum eins og til dæmis, netagerð, vélaverkstæði og rannsóknastofur.Síðast en ekki síst munu nemendur fara um borð í fiskveiðiskip og fá fræðslu um búnað þeirra og starfsemina um borð. Á meðan skólinn starfar munu góðir gestir koma í heimsókn og fræða nemendur um eigin reynslu á sviði sjómennsku og fiskvinnslu.

Það voru glaðir nemendur sem mættu til skólasetningar í Sjávarútvegsskóla Síldarvinnslunnar í morgun og víst er að margir munu fylgjast með því hvaða árangri þetta athyglisverða tilraunaverkefni mun skila. 


Makríllinn berst að landi en veiðar mættu ganga betur

Makrílvinnsla í fiskiðjuveri Síldarvinnslunnar.  Ljósm. Þórhildur Eir SigurgeirsdóttirMakrílveiðar hefðu mátt ganga betur á miðunum fyrir austan land. Þrjú skip, Beitir NK, Börkur NK og Bjarni Ólafsson AK, landa til vinnslu í fiskiðjuverinu í Neskaupstað og dugar afli þeirra vart til að halda uppi samfelldri vinnslu. 

Ísfisktogarinn Bjartur NK kom til Neskaupstaðar í morgun úr sínum fyrsta makríltúr á vertíðinni. Aflinn var um 80 tonn og fékkst hann í Hvalbakshalli. Togarinn var í einn og hálfan sólarhring á veiðum og gekk ágætlega að meðhöndla aflann um borð en hann er settur í ískrapa í körum. Um 90% aflans var makríll og um 10% síld. Bjartur heldur aftur til makrílveiða í kvöld.

Frystitogarinn Barði NK er á makrílveiðum og það annar túrinn sem hann fer á vertíðinni en hann landaði í byrjun vikunnar.

Birtingur NK kemur til löndunar í Neskaupstað í fyrramálið og er hann með um 1500 tonn af makríl úr grænlensku lögsögunni.

Grænlenska uppsjávarveiðiskipið Polar Amaroq er á leið til Helguvíkur með um 1600 tonn úr grænlensku lögsögunni og er það annar farmurinn sem skipið kemur með þangað. 


Barði NK kemur með fullfermi af frystum makríl og Bjartur NK heldur til makrílveiða

Landað úr Barða NK.  Ljósm. Þorgeir BaldurssonFrystitogarinn Barði NK kom með fullfermi eða um 170 tonn af frystum makríl til Neskaupstaðar síðastliðinn laugardag og hófst löndun úr skipinu í dag.  Bjarni Ólafur Hjálmarsson skipstjóri sagði að veitt hefði verið fyrir vestan land í túrnum og hefði aflast vel eða eins og frystitækin önnuðu. Upplýsti Bjarni að Barði myndi halda til veiða á ný í kvöld og gerðu menn sér vonir um að unnt yrði að finna góðan fisk fyrir austan land, allt of langt væri að sigla á miðin fyrir vestan. Helsti munurinn á vertíðinni nú og síðustu vertíðum er sá að mati Bjarna að makríllinn er mun smærri. Sagði Bjarni að gert væri ráð fyrir að Barði færi 5-6 makríltúra og yrði við þær veiðar út ágústmánuð. Barði mun halda til veiða á ný í kvöld.

Ísfisktogarinn Bjartur NK mun væntanlega halda til makrílveiða í dag. Mun hann fara 2-3 makríltúra og koma með 50-60 tonn að landi úr hverri veiðiferð.  


Umhverfisframkvæmdum við fiskiðjuverið að ljúka

Umhverfisframkvæmdum við fiskiðjuverið að ljúka.  Ljósm. Þórhildur Eir SigurgeirsdóttirUmhverfisframkvæmdir við fiskiðjuver Síldarvinnslunnar í Neskaupstað hófust um 10. júní og mun þeim ljúka í þessari viku. Framkvæmdirnar eru allumfangsmiklar og felast meðal annars í mótun lands og vegkanta, hellulögn, smíði mikils timburpalls, gerð beða og gróðursetningu trjáa og runna. Umrætt svæði er áberandi og blasir við þegar ekið er eftir þjóðveginum inn í Neskaupstað.

Það er Tandraberg ehf. sem annast framkvæmdirnar en lóðin var hönnuð af Landmótun. Einar B. Kristjánsson framkvæmdastjóri Tandrabergs segir að lóðarframkvæmdin hafi gengið vel í alla staði og hún sé fullkomlega á áætlun. 


Vinnsluskip hafa landað rúmlega 4000 tonnum af makríl og síld í Neskaupstað

Útskipun á frystum afurðum í Neskaupstað.  Ljósm. Þórhildur Eir SigurgeirsdóttirÞað sem af er yfirstandandi makríl- og síldarvertíð hafa vinnsluskip landað rúmlega 4000 tonnum af frystum makríl og síld í frystigeymslur Síldarvinnslunnar í Neskaupstað. Skipin sem um ræðir eru Vilhelm Þorsteinsson EA, Hákon EA og Kristina EA. Að auki taka frystigeymslurnar á móti framleiðslu fiskiðjuversins í Neskaupstað.

Að sögn Heimis Ásgeirssonar yfirverkstjóra hefur litlu verið skipað út af frystum afurðum frá yfirstandandi vertíð. Fyrr í vikunni tók þó skip 500 tonn til Sankti Pétursborgar og nú er verið að skipa út 2800 tonnum af frystum afurðum í skip sem fer til Svartahafsins en þar er að mestu um að ræða loðnu frá síðustu loðnuvertíð. Fyrsta alvöru útskipunin með afurðum yfirstandandi vertíðar verður í skip sem kemur eftir helgi. Það mun taka 4500 tonn og sigla með það til Nígeríu.


Undirflokkar