Loðnan brellin ekki síður en síldin

29136135 10211278773820775 4981228178556059648 o

Á loðnumiðunum austan við Vestmannaeyjar í gær. Ljósm: Helgi Freyr Ólason

Loðnan hagar sér heldur skringilega nú undir lok vertíðar. Fyrir helgi voru skipin að fá afla á Faxaflóa, við Vestmannaeyjar og fyrir norðan land. Loðnan sem veiddist nyrðra þótti henta til Japansfrystingar en syðra var lögð áhersla á að fá hrognaloðnu. Í gær brá svo við að lítið aflaðist við Eyjar en þá hófust veiðar á Breiðafirði.

Beitir NK landaði 1.800 tonnum í Helguvík á laugardag og voru unnin hrogn úr hluta aflans. Beitir er nú á Breiðafirði og freistar þess að veiða 1.500 tonn en þá hafa Síldarvinnsluskipin lokið loðnuveiðum á vertíðinni.

Bjarni Ólafsson AK er að landa 1.600 tonnum í Neskaupstað og fékkst sú loðna að mestu í Faxaflóa. Unnin eru hrogn úr aflanum.

Börkur NK fékk 1.200 tonn við Eyjar á laugardag og bíður nú löndunar í Neskaupstað. Gert er ráð fyrir hrognavinnslu úr aflanum.

Vilhelm Þorsteinsson EA landaði 1.700 tonnum í Helguvík í gær og var stór hluti aflans kreistur. Vilhelm er nú á Breiðafirði.

Polar Amaroq er fyrir norðan land. Skipið fékk 500-600 tonn á Skagagrunni aðfaranótt föstudags og hefur síðan fengið 800 tonn í tveimur köstum á Skjálfanda. Loðnan fyrir norðan hentar vel til frystingar eins og fyrr greinir og var aflinn frystur um borð. Þegar þetta er ritað hafa Polarmenn lokið frystingu og eru um 500 tonn í frystilestum skipsins. Munu þeir síðan  freista þess að halda áfram veiðum og klára kvóta sinn áður en haldið verður til hafnar. Fleiri skip voru fyrir norðan og fengu afla meðal annars út af Gjögri og inni á Eyjafirði.

Á framansögðu sést að loðnuvertíðin er á síðustu metrunum og eru flest skipin að ljúka veiðum þessa dagana.

Loðnuveiði úti fyrir Norðurlandi

Polar Amaroq að loðnuveiðum úti fyrir Norðurlandi. Ljósm. Sigmund av TeigumPolar Amaroq að loðnuveiðum úti fyrir Norðurlandi.
Ljósm. Sigmund av Teigum
Loðnuveiðar hafa gengið heldur erfiðlega á Faxaflóa að undanförnu og því hafa nokkur skipanna farið norður fyrir land í von um að finna þar veiðanlega loðnu sem hentar vel til vinnslu. Polar Amaroq kom á Skagagrunn um miðnætti og kastaði þar þrisvar í nótt. Skipstjóri er Sigurður Grétar Guðmundsson en hann er í sinni fyrstu veiðiferð sem skipstjóri á skipi sem veiðir með nót. Vart verður annað sagt en byrjunin á nótaveiðinni sé glæsileg hjá Sigurði því Polar Amaroq fékk á milli 500 og 600 tonn af fínustu loðnu í köstunum þremur. „Hér eru ágætis lóðningar en loðnan stendur djúpt og er alveg niðri á botni yfir daginn. Við erum með tvær nætur um borð og fengum besta kastið með djúpnót sem er 330 faðma löng og 85 faðma djúp. Þessi loðna er með 18% hrognafyllingu og hentar vel til frystingar en við erum að frysta um borð af fullum krafti. Það eru fleiri skip komin hingað norðurfyrir eins og Aðalsteinn Jónsson, Hoffell, Álfsey og Ásgrímur Halldórsson. Þessi skip keyrðu áfram og fundu loðnu út af Eyjafirði. Það virðist vera töluverð loðna hér nyrðra,“ sagði Sigurður.

Stefnumót í Háskóla Íslands

Fulltrúar sjávarútvegsfyrirtækja og Háskóla Íslands á stefnumótinu sl. þriðjudag. Talið frá vinstri: Örvar Guðni Arnarsson, Ægir Páll Friðbertsson, Jón Atli Benediktsson rektor HÍ, Ásta Dís Óladóttir, Friðrik Friðriksson og Sigurður Ólafsson. Ljósm. Kristinn IngvarssonFulltrúar sjávarútvegsfyrirtækja og Háskóla Íslands á stefnumótinu
sl. þriðjudag. Talið frá vinstri: Friðrik Friðriksson, Örvar Guðni Arnarsson, Jón Atli Benediktsson rektor HÍ, Ásta Dís Óladóttir, Ægir Páll Friðbertsson og Sigurður Ólafsson.
Ljósm. Kristinn Ingvarsson
Á yfirstandandi misseri býður Háskóli Íslands upp á námskeiðið Rekstur í sjávarútvegi. Það er Viðskiptafræðideild skólans sem stendur fyrir námskeiðinu en það er opið nemendum á þriðja ári í grunnnámi og öllum sem leggja stund á framhaldsnám við skólann. Í námskeiðinu er viðfangsefnið nálgast með þverfræðilegum hætti og koma fræðimenn á sviði viðakiptafræði, verkfræði, lögfræði, hagfræði og matvælafræði að kennslunni. Þá hafa nemendur farið í vettvangsheimsóknir til sjávarútvegsfyrirtækja. Umsjón með námskeiðinu hefur Ásta Dís Óladóttir lektor.
 
Sl. þriðjudag áttu nemendur í námskeiðinu stefnumót við nokkra fulltrúa sjávarútvegsfyrirtækja. Á stefnumótinu fluttu þeir Örvar Guðni Arnarsson frá Ísfélagi Vestmannaeyja, Ægir Páll Friðbertsson frá Brim, Friðrik Friðriksson frá HB-Granda og Sigurður Ólafsson frá Síldarvinnslunni erindi um ýmis mikilvæg málefni sem snerta sjávarútveginn. Í erindinum var meðal annars fjallað um þróun greinarinnar, markaðsmál og þætti sem hafa áhrif á rekstur og starfsemi sjávarútvegsfyrirtækja. Sigurður Ólafsson gerði í erindi sínu grein fyrir starfsemi Síldarvinnslunnar, starfsmannastefnu, öryggismálum og líðan starfsfólks á vinnustað. Að loknum erindunum áttu sér stað fjörlegar umræður.
 
Það hlýtur ávallt að vera fagnaðarefni þegar æðstu menntastofnanir þjóðarinnar gefa grunnatvinnugrein eins og sjávarútvegi einhvern gaum og taka til umfjöllunar málefni sem snerta hann sérstaklega.

Hrognavinnsla í fullum gangi

Loðnuhrogn unnin í fiskiðjuveri Síldarvinnslunnar í Neskaupstað. Ljósm. Hákon ErnusonLoðnuhrogn unnin í fiskiðjuveri Síldarvinnslunnar í Neskaupstað.
Ljósm. Hákon Ernuson
Á vegum Síldarvinnslunnar er verið að vinna loðnuhrogn bæði í Helguvík og Neskaupstað. Fyrstu hrognaloðnunni var landað úr Vilhelm Þorsteinssyni EA í Helguvík í fyrrinótt og í gær og er enn verið að frysta hrogn úr honum. Að sögn Guðjóns Helga Þorsteinssonar gekk vel að vinna hrognin og reyndust gæði þeirra mikil.  „Við vonumst bara eftir því að fá meiri loðnu til hrognavinnslu hið fyrsta, en það er að sjálfsögðu háð því hvernig gengur að veiða,“ sagði Guðjón.
 
Byrjað var að kreista hrogn úr farmi Barkar NK í Neskaupstað sl. nótt. Að sögn Jóns Gunnars Sigurjónssonar, yfirverkstjóra í fiskiðjuverinu, hefur vinnslan gengið vel. „Það kemur mikið af hrognum úr farminum og þroskinn er nokkuð góður,“ sagði Jón Gunnar. Gert er ráð fyrir að lokið verði við að vinna hrogn úr farmi Barkar í fyrramálið en skipið kom að landi með 2.000 tonn.

Börkur með 2.000 tonn af hrognaloðnu

Börkur NK að nótaveiðum út af Snæfellsnesi í gærmorgun. Ljósm. Stefán Pétur HaukssonBörkur NK að nótaveiðum út af Snæfellsnesi í gærmorgun.
Ljósm. Stefán Pétur Hauksson
Börkur NK er á leið austur til Neskaupstaðar með 2.000 tonn af loðnu. Gert er ráð fyrir að hann komi til hafnar klukkan eitt í nótt og þá strax hefst hrognavinnsla hjá Síldarvinnslunni. Heimasíðan hafði samband við Hjörvar Hjálmarsson skipstjóra í morgun þegar skipið var statt út af Alviðru. „Við fengum þennan afla í sjö köstum á tveimur dögum. Fyrri daginn vorum við á miðjum Faxaflóa en í gær vorum við um 10 mílur út af Snæfellsnesi. Út af nesinu var ein góð torfa sem megnið af flotanum var í og var hún nánast veidd upp. Það er víða loðnu að sjá en það er eins og hún hafi lítið skilað sér inn á Faxaflóann. Auðvitað er alltaf beðið eftir fréttum af vestangöngu. Undanfarin ár hefur komið góð gusa að vestan en þá hafa skipin oft verið búin með kvótann. Í loðnunni sem við erum með núna er hrognafyllingin á milli 26 og 27% og hrognaþroskinn 95-100%. Þetta ætti að henta vel í hrognavinnsluna,“ sagði Hjörvar.
 

Hrognavinnsla hafin í Helguvík

Vilhelm Þorsteinsson EA í Helguvík. Ljósm. Eggert Ólafur EinarssonVilhelm Þorsteinsson EA í Helguvík.
Ljósm. Eggert Ólafur Einarsson
Hrognavinnsla hófst í Helguvík sl. nótt þegar Vilhelm Þorsteinsson EA kom þangað með 1.500 tonn af loðnu sem fengust í Faxaflóa og út af Snæfellsnesi. Hrognin eru unnin í samvinnu við Saltver ehf. í Reykjanesbæ. Loðnan er kúttuð og hreinsuð í Helguvík en fryst í húsnæði Saltvers í Njarðvík. 
 
Að sögn Eggerts Ólafs Einarssonar, verksmiðjustjóra í Helguvík, fer hrognavinnslan rólega af stað að venju en í morgun var allt farið að snúast þokkalega að hans sögn.
 
Alls eru rúmlega 4.000 tonn af loðnu komin á land í Helguvík á vertíðinni að meðtöldum þeim afla sem nú er verið að landa úr Vilhelm Þorsteinssyni. Grænlenska loðnuskipið Polar Amaroq landaði þar 900 tonnum í gær.

Blængur veiddi eftir veðri

Frystum afurðum landað úr Blængi NK í dag. Ljósm. Smári GeirssonFrystum afurðum landað úr Blængi NK í dag.
Ljósm. Smári Geirsson
Í dag er verið að landa úr frystitogaranum Blængi NK í Norðfjarðarhöfn. Skipið hélt til veiða 9. febrúar og er aflinn 540 tonn upp úr sjó að verðmæti um 125 milljónir. Bjarni Ólafur Hjálmarsson skipstjóri segir að það hafi verið bræla nánast alla veiðiferðina og það hafi verið veitt eftir veðri. „Við byrjuðum norðaustur af landinu, héldum síðan suður fyrir land, þá á Vestfjarðamið og loks var karfi veiddur á Melsekk. Þrátt fyrir brælu var veiði allan túrinn. Það var til dæmis ágæt ufsaveiði á Vestfjarðamiðum og mjög góð karfaveiði á Melsekk í lokin,“ sagði Bjarni Ólafur.
 
Gert er ráð fyrir að Blængur haldi til veiða á ný á föstudagskvöld.
 
 
 

Aðalfundur Síldarvinnslunnar

SVN LOGO2 Prent

Aðalfundur Síldarvinnslunnar hf. verður haldinn miðvikudaginn 21. mars 2018 kl. 13.00 á Hótel Hildibrand í Neskaupstað.

              Dagskrá fundarins verður svofelld:

  1. Skýrsla stjórnar
  2. Endurskoðaðir reikningar lagðir fram til staðfestingar
  3. Tekin ákvörðun um greiðslu arðs
  4. Tillaga stjórnar um starfskjarastefnu
  5. Ákveðin þóknun til stjórnar félagsins
  6. Kosin stjórn félagsins
  7. Kosnir endurskoðendur
  8. Önnur mál, löglega fram borin

Japansfrysting heldur áfram í Neskaupstað

Beitir NK að loðnuveiðum í gær. Ljósm. Helgi Freyr ÓlasonBeitir NK að loðnuveiðum í gær.
Ljósm. Helgi Freyr Ólason
Í gær kom Börkur NK með 1.500 tonn af loðnu til Neskaupstaðar. Þegar hófst frysting úr honum og er fryst á Japan. Gert er ráð fyrir að lokið verði við að vinna úr Berki í kvöld. Beitir NK er á landleið til Neskaupstaðar með 1.900 tonn. Sturla Þórðarson, skipstjóri á Beiti, sagði að aflinn hefði fengist á tveimur dögum; fyrri daginn var kastað út af Alviðru og seinni daginn vestan við Portland. „Við fengum 800 tonna kast í gær og hrognafyllingin í þeirri loðnu er meiri en í fyrri köstunum en þá var hún um 18%,“ sagði Sturla. 
 
Fulltrúar japanskra kaupenda eru í Neskaupstað og ræddi tíðindamaður heimasíðunnar við þá í gær. Þeir voru mjög ánægðir með loðnuna sem verið var að frysta úr Berki og sögðu að hún uppfyllti ágætlega þær kröfur sem þeir gerðu til hráefnisins. Vonast er til að loðnufrystingu á Japan verði haldið áfram í Neskaupstað fram yfir helgi en síðan má gera ráð fyrir að hrognavinnsla hefjist. 
 
 

Góð veiði við Eyjar

Vestmannaey VE. Ljósm. Guðmundur AlfreðssonVestmannaey VE. Ljósm. Guðmundur AlfreðssonBæði Vestmannaey VE og Bergey VE hafa verið að fiska vel að undanförnu þrátt fyrir óhagstætt tíðarfar. Þriggja daga brælustopp var hjá skipunum um sl. helgi en síðan var haldið til veiða á mánudag. Bæði skipin komu til löndunar í morgun, Vestmannaey með um 80 tonn og Bergey með um 50 tonn. Aflinn fékkst við Vestmannaeyjar. Heimasíðan hafði samband við Birgi Þór Sverrisson, skipstjóra á Vestmannaey, og sagði hann að veiðin væri fín þegar friður væri fyrir veðri. „Vertíðarfiskurinn er farinn að mæta hér við Eyjarnar og í sannleika sagt hefur aflinn verið ótrúlega góður. Núna í síðasta túr var aflinn hjá okkur um 40% þorskur en síðan voru þetta allar sortir; lýsa, skata, ufsi og karfi. Ýsan er ekki enn farin að láta sjá sig í miklum mæli hér á Eyjamiðunum. Mér líst býsna vel á þetta og nú er útlit fyrir batnandi veður sem skiptir miklu máli,“ sagði Birgir.

 

 

Loðnuveiðar hafnar við suðurströndina eftir brælu

Bjarni Ólafsson AK. Ljósm. Hákon ErnusonBjarni Ólafsson AK. Ljósm. Hákon ErnusonLoðnuveiðar úti fyrir Suðurlandi hófust í fyrradag eftir langvarandi brælu. Bjarni Ólafsson AK er kominn til Neskaupstaðar og er verið að landa úr honum tæplega 1.000 tonnum í fiskiðjuver Síldarvinnslunnar.
 
Gott veður var á loðnumiðunum syðra í gær og góð veiði. Vilhelm Þorsteinsson EA er á leið til Neskaupstaðar með 1.790 tonn og Börkur NK kastaði einu sinni og fékk 680 tonn. Börkur hélt áfram veiðum í morgun, fékk 260 tonn í fyrsta kasti og var að draga þegar rætt var við Hjörvar Hjálmarsson skipstjóra. Hjörvar segir að hrognafylling loðnunnar sé 21-22%. Beitir NK er á leiðinni á miðin.
 
Gísli Runólfsson, skipstjóri á Bjarna Ólafssyni, segir að nokkuð sé af loðnu við Vestmannaeyjar og skipin hafi verið að fá ágæt köst. „Við byrjuðum að veiða í fyrradag eftir bræluna. Köstuðum þá tvisvar og fengum 500 tonn. Síðan köstuðum við einu sinni í gærmorgun 10 mílur norðvestur af Eyjum og fengum hátt í 500 tonn í því kasti. Það er verið að frysta loðnuna sem við komum með á Japan,“ sagði Gísli.

Það er loðna úti fyrir öllu Norðurlandi

Loðnufrysting um borð í Polar Amaroq í yfirstandandi veiðiferð. Ljósm. Geir ZoëgaLoðnufrysting um borð í Polar Amaroq í yfirstandandi veiðiferð.
Ljósm. Geir Zoëga
Grænlenska loðnuskipið Polar Amaroq hefur síðustu daga verið að loðnuveiðum úti fyrir Norðurlandi. Loðnan er fryst um borð og er skipið komið með fullfermi. Gert er ráð fyrir að aflanum verði skipað um borð í flutningaskip í Norðfjarðarhöfn nk. fimmtudag. Polar Amaroq er eina loðnuskipið sem veitt hefur fyrir norðan land síðustu daga á sama tíma og íslenski loðnuflotinn gat ekkert getað aðhafst á loðnumiðunum suður af landinu vegna veðurs. Heimasíðan hafði samband við Geir Zoëga skipstjóra á Polar Amaroq í morgun en þá var skipið statt á Rifsbanka út af Sléttu. „Við erum núna á Rifsbanka og hér er loðnu að sjá. Það er loðna úti fyrir öllu Norðurlandi. Í þessum túr köstuðum við á Skagafirði, Skjálfanda og norður af Fljótum og eins var loðna á Öxarfirði og víðar. Í gær og fyrradag vorum við á Skjálfanda og fengum fínustu köst við Flatey og síðasta kastið tókum við rétt utan við Húsavík. Loðnan sem veiðist hér er með um 15% hrognafyllingu. Hér fyrir norðan er best að ná loðnunni á kvöldin og fram eftir nóttu, en á daginn stendur hún djúpt. Við erum að klára að frysta – frystilestin er að verða full. Það er býsna gott að hafa verið hér fyrir norðan og fengið fullfermi á meðan brælan hefur einkennt veðurfarið syðra. Þessi túr okkar verður átta dagar höfn í höfn og það datt einungis einn dagur út vegna brælu. Ég tel að það sé enn að koma loðna hér upp að Norðurlandinu. Ég var að fá mynd frá skipstjóra sem var staddur suðvestur af Kolbeinsey og þar eru myndarlegar loðnutorfur,“ sagði Geir Zoëga.

 

Polar Amaroq að loðnuveiðum á Skjálfanda í gær. Ljósm. Geir ZoëgaPolar Amaroq að loðnuveiðum á Skjálfanda í gær.
Ljósm. Geir Zoëga

Sáttmáli gegn einelti og áreitni

Sáttmáli gegn einelti og áreitniSíldarvinnslan er þessa dagana að kynna nýjan sáttmála gegn einelti, áreitni og ofbeldi á vinnustöðum. Sáttmálanum fylgir uppfærð stefna og viðbragðsáætlun sem fylgja skal þegar slík mál koma upp. Sigurður Ólafsson, verkefnisstjóri á starfsmannasviði, segir mikilvægt að þessi mál séu tekin alvarlega. „Tímarnir eru að breytast og þá er eini raunhæfi kosturinn að aðlagast þeim. Árið 2015 voru lagalegar kröfur til fyrirtækja um uppbyggileg samskipti á vinnustað skýrðar og hertar verulega. #Metoo-umræðan sýnir svo svart á hvítu að það var ekki vanþörf á. Það er ennþá alltof algengt að það viðgangist óeðlilegir hlutir í samskiptum fólks á vinnustöðum. Í dag er einfaldlega gerð krafa um að samskipti á vinnustað séu yfirveguð, fagleg og uppbyggileg. Við eigum að sýna hvert öðru virðingu og það á enginn að þurfa að búa við neinskonar ógn í samskiptum á vinnustaðnum. Síldarvinnslan hefur tekið skýra stefnu um að líða ekki slík samskipti og ég tel að það sé afar jákvætt fyrir okkur öll,“ sagði Sigurður.
 
Sáttmálinn er gefinn út prentaður á þremur tungumálum; íslensku, ensku og pólsku. Auk þess verður hann aðgengilegur á heimasíðu fyrirtækisins. Sáttmálanum verður dreift á alla vinnustaði Síldarvinnslunnar á næstu dögum og efni hans kynnt fyrir starfsfólki.

Polar Amaroq veiðir loðnu út af Skagafirði

Polar Amaroq. Ljósm. Hákon ErnusonPolar Amaroq. Ljósm. Hákon ErnusonÍ gærkvöldi og nú undir morgun fékk grænlenska loðnuskipið Polar Amaroq um 400 tonn af loðnu út af Skagafirði. Heimasíðan hafði samband við Geir Zoëga skipstjóra og spurði hvort þarna væri mikla loðnu að sjá. „Já, hér er töluvert að sjá. Loðnan stendur hins vegar djúpt á daginn en kemur upp á næturnar. Það var bræla framan af í nótt en við köstuðum í gærkvöldi og undir morgun þegar veðrið skánaði. Alls var kastað fjórum sinnum. Fengum afla í þremur köstum en búmmuðum einu sinni. Hér ætti að vera hægt að fá góðan afla með djúpri nót og í þokkalegu veðri. Og við höfum verið að kasta skammt frá landi, það eru núna um 15 mílur í Hraun á Skaga. Loðnan sem hér um ræðir er skemmra komin en loðnan fyrir sunnan. Hrognafyllingin er um 13%. Mér finnst afskaplega gaman að glíma við þetta og nú erum við búnir að fá afla hér fyrir norðan í tveggja sólarhringa vinnslu á meðan það er bullandi bræla og engin veiði við suðurströndina. Nú er veðrið að versna hérna en við ætlum að ná einu kasti í viðbót áður en brælir. Í reyndinni ætti það ekki að koma mönnum á óvart að loðna sé hér við Norðurlandið. Á vertíðinni 2014-2015 hryngdi töluvert af loðnu hérna fyrir norðan og þessi loðna sem hér er nú er komin heim til að hrygna. Loðnan er laxfiskur og menn þekkja hegðun laxfiska. Annars virðist vera loðna mjög víða. Ég var núna að fá fréttir um að loðnutorfur væru á Halanum,“ sgaði Geir.

Fyrsta loðnan á vertíðinni til Helguvíkur

Fiskimjölsverksmiðja Síldarvinnslunnar í Helguvík. Ljósm. Sigurður K. KolbeinssonFiskimjölsverksmiðja Síldarvinnslunnar í Helguvík.
Ljósm. Sigurður K. Kolbeinsson
Fyrsta loðnan barst til fiskimjölsverksmiðju Síldarvinnslunnar í Helguvík þriðjudagskvöldið 20. febrúar. Það var vinnsluskipið Hákon EA sem landaði þá 330 tonnum af fráflokkaðri loðnu. Eggert Ólafur Einarsson verksmiðjustjóri sagði í samtali við heimasíðuna að þó svo að þarna hefði ekki verið um mikið magn að ræða væru það ávallt tímamót þegar fyrsta loðnan á hverri vertíð bærist til verksmiðjunnar. Þá segir Eggert að mikilvægt hafi verið að fá þessi tonn til að gangsetja verksmiðjuna og prufa búnaðinn að loknu hléi, en afar vel hafi gengið að vinna hráefnið.
 
Verksmiðjan í Helguvík tekur fyrst og fremst á móti loðnu undir lok vertíða þegar hrognataka stendur yfir. Á síðustu loðnuvertíð tók verksmiðjan á móti um 16.000 tonnum. 

900 sjómílur á kolmunnamiðin – Beitir á landleið með rúmlega 3.000 tonn

Beitir NK á kolmunamiðunum suðvestur af Írlandi. Ljósm. Helgi Freyr ÓlasonBeitir NK á kolmunamiðunum suðvestur af Írlandi.
Ljósm. Helgi Freyr Ólason
Beitir NK hélt til kolmunnaveiða frá Neskaupstað 13. febrúar sl. Hann kom við í Færeyjum en hóf veiðar á kolmunnamiðunum suðvestur af Írlandi sl. sunnudag. Veiðarnar hafa gengið vel og hafði heimasíðan samband við Tómas Kárason skipstjóra í dag. „Við höfum verið að veiða um 200 sjómílur suðvestur af Írlandi eða um 100 mílur vestur af hafsvæði sem nefnist Porcupine. Frá Norðfirði á þessi mið eru um 900 sjómílur eða rúmlega þriggja sólarhringa sigling. Hér er svakalega mikið að sjá, lóðningarnar eru alveg rosalegar. Þetta er aðgæsluveiði, hættan er sú að fá of mikið. Stundum vorum við að hífa 300-400 tonn á tveggja tíma fresti. Við erum komnir með rúmlega 3.000 tonn og vorum að leggja af stað heim til löndunar. Við verðum komnir til Neskaupstaðar seinni partinn á sunnudag. Beitir hefur verið eina íslenska skipið á miðunum að undanförnu en Guðrún Þorkelsdóttir SU var komin á undan okkur og lagði af stað í land með 1.500 tonn í fyrrinótt. Hér er talsverður fjöldi af skipum annarra þjóða; Rússar, Norðmenn og Færeyingar, “ sagði Tómas.

Japansfrysting hafin af fullum krafti

Japaninn Kusayanagi og Líneik Haraldsdóttir fylgjast með gæðum loðnunnar. Ljósm. Hákon ErnusonJapaninn Kusayanagi og Líneik Haraldsdóttir fylgjast með
gæðum loðnunnar. Ljósm. Hákon Ernuson
Seinni partinn í gær lauk vinnslu á loðnu úr Bjarna Ólafssyni AK í fiskiðjuveri Síldarvinnslunnar en hluti af afla hans fór í frystingu á Japansmarkað. Í gær dúraði á loðnumiðunum fyrir sunnan land og fengu mörg skipanna góðan afla. Vilhelm Þorsteinsson EA kom til Neskaupstaðar í morgun með 1.480 tonn og verður hluti aflans frystur á Japan. Börkur NK kemur síðan í kjölfar Vilhelms með 1.430 tonn og er einnig ætlunin að afli hans fari í Japansfrystingu. Hjörvar Hjálmarsson skipstjóri á Berki segir að þeir hafi fengið aflann í Skarðsfjörunni í fimm köstum. Hrognafylling loðnunnar sé 16-17% og hún ætti því að henta vel til Japansfrystingar. Telur Hjörvar að einhver möguleiki verði til veiða á morgun en annars sé veðurútlit slæmt við suðurströndina allavega fram á sunnudag.
 
Polar Amaroq skipaði frystri loðnu um borð í flutningaskip í Norðfjarðarhöfn í gær en hélt síðan til veiða norður fyrir land þar sem norski loðnuflotinn hefur haldið sig. Heimasíðan ræddi við Geir Zoëga skipstjóra á Polar Amaroq í morgun en þá voru þeir Polarmenn með fyrsta kast á Skjálfanda. „ Við fundum loðnu strax og við komum hér og erum að draga núna. Það er eitthvað í þessu hjá okkur. Loðnan stendur djúpt en Norðmennirnir segja að hún komi upp á kvöldin. Mér líst bara vel á þetta en það var veðurútlitið sem gerði það að verkum að við fórum hingað norður fyrir land. Hér verður blíða á morgun og eftir morgundaginn hverfa norsku skipin á braut. Þá verðum við einir hér. Hrognafyllingin í loðnunni hérna er um 15% og það hentar okkur vel,“ sagði Geir.
 
Eins og fram kemur hjá Geir er einungis einn dagur eftir af þeim tíma sem Norðmenn mega stunda loðnuveiðar við landið. Eru allar líkur á því að þeir muni nánast ljúka við að veiða þann kvóta sem þeir hafa til ráðstöfunar á þeim tíma.

Veður truflar loðnuveiðar

Polar Amaroq í Norðfjarðarhöfn. Ljósm. Hákon ErnusonPolar Amaroq í Norðfjarðarhöfn. Ljósm. Hákon ErnusonÍslensku loðnuskipin voru að fá ágæt köst á föstudag og laugardag en í gær var erfitt að kasta vegna leiðindaveðurs. Flotinn var kominn að Vík í Mýrdal en eins hefur fengist afli austar með suðurströndinni. Norsku loðnuskipin hafa verið að veiðum úti fyrir Norðurlandi og fengu þar ágætis afla fyrir helgi. Nú eiga Norðmennirnir einungis eftir að veiða rúmlega 11.000 tonn en þeir mega veiða við landið til 23. febrúar.
 
Lokið var við að landa úr Berki NK í Neskaupstað sl. nótt en alls voru fryst tæplega 1.400 tonn úr honum fyrir Asíumarkað. Vinnslan á afla Barkar gekk vel og þegar henni lauk kom röðin að Bjarna Ólafssyni AK en hann kom til hafnar í gær með 1.300 tonn sem fengust í fjórum köstum. Auk þessara skipa lönduðu Vilhelm Þorsteinsson EA og norsku skipin Østerbris og Hardhaus í Neskaupstað um helgina.
 
Í morgun var grænlenska loðnuskipið Polar Amaroq inni á Norðfjarðarflóa. Það mun landa í kvöld og á morgun en undir lok veiðiferðarinnar skoðuðu Polarmenn fjörurnar syðra í samstarfi við Hafrannsóknastofnun. Heimasíðan sló á þráðinn til Geirs Zoëga skipstjóra og spurði hann frétta. „Þessi veiðiferð gekk vel hjá okkur. Við fengum góð köst og settum meðal annars met í afköstum við frystinguna um borð. Fórum yfir 200 tonn á sólarhring í fyrsta sinn. Síðan krussuðum við fjörurnar í samstarfi við Hafró og mældum loðnuna. Það er ljóst að þarna er mikið af loðnu á ferðinni og hún gengur mjög grunnt með ströndinni. Hún er alveg upp í broti. Það var mest að sjá í kringum Ingólfshöfðann en við fórum alveg vestur að Alviðru þar sem skipin hafa verið að veiða núna. Þetta voru aðallega tvær lengjur sem hvor um sig var um 20 mílur og alls staðar var mikið líf, fuglar og hvalir. Austast sáum við lóðningar innan við Hrollaugseyjar. Fyrir utan þetta hafa skip séð loðnu dýpra og bæði Börkur og Bjarni Ólafsson urðu varir við loðnu á siglingu austur af miðunum. Hafrannsóknaskipið Árni Friðriksson hefur verið fyrir norðan þar sem norski flotinn hefur verið að veiðum og vonandi hjálpa mælingar okkar við suðurströndina fiskifræðingunum að fá sæmilega heildarmynd af loðnugöngunum. Hann spáir illa næstu daga ekki síst fyrir sunnan landið þannig að ég er alvarlega að velta fyrir mér að halda til veiða norður fyrir land að löndun lokinni,“ sagði Geir.

Loðnan virðist vera að hlaupa saman og bátarnir hafa verið að fá ágæt köst

IMG 3017

Börkur NK hélt til loðnuveiða eftir nokkurt hlé í fyrrakvöld. Í gær fékk hann 740 tonn í fjórum köstum. Heimasíðan sló á þráðinn til Hjörvars Hjálmarssonar skipstjóra. „Hér er loðna með allri fjörunni suður af landinu en það var ekkert sérstakt stand á henni í gær. Þetta var þunnt lag og fleiri tugir mílna á lengd. Skipin voru ekki að fá neitt sérstök köst. Nú virðist loðnan hins vegar vera að hlaupa saman og menn hafa verið að fá mun betri köst í dag en í gær. Við tókum tvö köst í dag, fengum 200 tonn í því fyrra og 500 í því síðara. Nú erum við lagðir af stað í land með 1.500 tonn. Allur aflinn er kældur og gert er ráð fyrir að hann fari til manneldisvinnslu. Við verðum í Neskaupstað um klukkan tvö í nótt. Það virðist vera loðna út um allt. Norsku skipin eru að veiða á Skjálfanda og Öxarfirði  og fullyrt er að loðnu sé einnig að sjá dýpra þarna norðurfrá,“ sagði Hjörvar.

Bjarni Ólafsson AK hélt til loðnuveiða í gærkvöldi en Beitir NK er á leið á kolmunnamiðin vestur af Írlandi.

Öskudagur

ÖskudagurHver skrautlegi krakkahópurinn á fætur öðrum kom í heimsókn á skrifstofur Síldarvinnslunnar í dag. Krakkarnir voru klæddir hinum skrautlegustu búniningum og sungu eins og englar. Í þakklætisskyni þáðu þau harðfiskpoka að gjöf. Það er ávallt fagnaðarefni að fá öskudagsheimsóknir á skrifstofuna og meðfylgjandi eru myndir af nokkrum hópanna.

 

Öskudagur

 

 

 

 

 

 

 

 

 

  

Öskudagur

 

 

 

 

 

 

 

 

 

 

 

Undirflokkar