Átta tillögur að minningareit

Svæðið sem fyrirhugaður minningareitur verður gerður á. Ljósm. Smári GeirssonSvæðið sem fyrirhugaður minningareitur
verður gerður á. Ljósm. Smári Geirsson
Í júlímánuði sl. tilkynnti Síldarvinnslan að fyrirhugað væri að gera minningareit á austasta hluta gömlu fiskimjölsverksmiðjunnar sem eyðilagðist í snjóflóði 20. desember 1974. Skyldi reiturinn helgaður þeim sem farist hafa í störfum hjá fyrirtækinu. Tekið var fram að ætlast væri til að gamli gufuketillinn sem stendur á grunninum yrði hluti reitsins.
 
Auglýst var samkeppni um útfærslu á minningareitnum og var öllum gefinn kostur á að setja fram hugmyndir. Skilafrestur á tillögum var  til 1. október sl. Nú liggur fyrir að átta tillögur bárust og verða þær metnar af sérstakri dómnefnd. Í dómnefndinni sitja Guðný Bjarkadóttir skrifstofustjóri Síldarvinnslunnar, Björk Þórarinsdóttir stjórnarmaður í Síldarvinnslunni og Anna Berg Samúelsdóttir umhverfisstjóri Fjarðabyggðar. Gert er ráð fyrir að nefndin hefji störf síðar í þessum mánuði og ljúki störfum 20. nóvember nk.
 
Veitt verða verðlaun að upphæð 600.000 kr. fyrir vinningstillöguna en þegar samkeppnin var auglýst var tekið fram að Síldarvinnslan áskildi sér rétt til að hafna öllum tillögum. Þá var einnig tekið fram að gert væri ráð fyrir að arkitekta- eða verkfræðistofa fullynni þá tillögu sem fyrir valinu yrði. Eins var tíundað að heimilt væri að nýta fleiri en eina tillögu til frekari útfærslu og skiptist þá verðlaunaféð á milli viðkomandi þátttakenda.

Tæknidagurinn var frábær

Ánægðir gestir á sýningarsvæði Síldarvinnslunnar. Ljósm. Smári GeirssonÁnægðir gestir á sýningarsvæði Síldarvinnslunnar.
Ljósm. Smári Geirsson
 
Tæknidagur fjölskyldunnar var haldinn í Verkmenntaskóla Austurlands í Neskaupstað sl. laugardag. Dagurinn var mjög fjölsóttur og komu gestir víða að af Austurlandi. Fjölmörg fyrirtæki, félagasamtök og stofnanir kynntu starfsemi sína á deginum og eins var starfsemi Verkmenntaskólans kynnt. Á deginum vígði t.d. menntamálaráðherra nýja suðuaðstöðu í málmdeild skólans. Eins var boðið upp á ýmislegt forvitnilegt fyrir ungu kynslóðina og má þar nefna að unnt var að upplifa himingeiminn og fylgjast með vélmennum keppa. Þá ber að nefna að gestum gafst kostur á að gæða sér á sælgæti úr hafinu og voru síldarréttir þar helst á dagskrá.
 
Mikill fjöldi gesta heimsótti sýningu Síldarvinnslunnar á Tæknideginum. Ljósm. Smári GeirssonMikill fjöldi gesta heimsótti sýningu
Síldarvinnslunnar á Tæknideginum.
Ljósm. Smári Geirsson
Síldarvinnslan var að sjálfsögðu með sýningarsvæði á deginum og var lögð áhersla á að fræða gesti um starfsemi fyrirtækisins bæði á sjó og landi. Sýningarsvæði Síldarvinnslunnar var fjölsótt og kom fram í spjalli við gestina að þeim þótti Tæknidagurinn frábær og fannst hann lofsvert framtak hjá Verkmenntaskólanum og Austurbrú. 
 
Tæknidagur fjölskyldunnar virðist vera búinn að festa sig rækilega í sessi og fer gestum dagsins fjölgandi frá ári til árs. Mjög vel er að deginum staðið og geta allir aflað sér mikillar þekkingar á austfirku samfélagi með því að sækja hann.
 
 
 
 

Áfram hörkusíldveiði

Beitir NK er á landleið með 1530 tonn af síld. Ljósm. Helgi Freyr ÓlasonBeitir NK er á landleið
með 1530 tonn af síld.
 Ljósm. Helgi Freyr Ólason
Þessar vikurnar er yfirleitt góð síldveiði út af Austfjörðum og gjarnan er það einungis slæmt veður sem truflar veiðarnar. Bjarni Ólafsson AK kom með 930 tonn sem unnin voru í fiskiðjuveri Síldarvinnslunnar fyrir helgi en nú er skipið farið til Akureyrar í slipp þar sem það verður næstu tvær vikurnar eða svo. Börkur NK kom síðan með 1.400 tonn á sunnudagsmorgun og er verið að vinna þann afla. 
 
Beitir NK er á landleið með 1.530 tonn og Sigurður Valgeir Jóhannesson stýrimaður segir að vel hafi gengið að veiða. „Við fengum aflann í fimm holum og það er stutt dregið. Minnst fengum við 170 tonn í holi en í morgun fengum við 480 tonn úr glæsilegri torfu sem við römbuðum á. Við vorum að veiða um það bil 130 mílur austur af landinu og reiknum með að koma til Neskaupstaðar í nótt. Það er bræla á móti og við förum rólega svo vel fari um aflann í kælitönkunum. Síldin sem við fáum hér er afskaplega falleg og stór, sannkölluð demantssíld. Það geta margir öfundað okkur að fá að veiða svona síld,“ segir Sigurður. 
 
 
 

Síldarveisla – austfirskt hráefni í öndvegi

Veisluborðið í Randulffs-sjóhúsi í gærkvöldi var girnilegt.Veisluborðið í Randulffs-sjóhúsi
í gærkvöldi var girnilegt
.
 
Í gærkvöldi var boðið upp á síldarveislu í Randulffs-sjóhúsi á Eskifirði. Þar voru á boðstólum um 20 girnilegir síldarréttir. Það er Tinna Rut Ólafsdóttir smurbrauðsjómfrú í Neskaupstað sem hefur veg og vanda að veislunni en sænkur matreislumaður, Peter Bengtson, leggur einnig sitt af mörkum. Peter dvelur í Neskaupstað um þessar mundir á vegum MatAttack verkefnisins, en MatAttack tengist ArtAttack verkefninu sem hófst með áberandi hætti í fyrra.
 
Peter Bengtson og Tinna Rut Ólafsdóttir. Ljósm. Smári GeirssonPeter Bengtson og Tinna Rut Ólafsdóttir.
Ljósm. Smári Geirsson
Heimasíðan ræddi við Tinnu Rut fyrir veisluna í gær, en Tinna er menntuð smurbrauðsjómfrú frá Danmörku og heillaði gesti Hótels Eddu í Neskaupstað á nýliðnu sumri með einstaklega girnilegu  smurbrauði. Tinna lærði í Danmörku og var Ida Danielsen lærimeistari hennar en segja má að Ida sé toppurinn í smurbrauðsbransanum. Tinna segist hafa kynnst því í Danmörku hvað síld sé frábær matur. „Það er hægt að gera svo ótrúlega margt með síld og Íslendingar virðast aldrei hafa verið duglegir að matreiða hana. Til dæmis í Danmörku og Svíþjóð þykir síld algjör herramannsmatur og þar er hún matreidd með fjölbreyttum hætti. Ég vil kynna fyrir Austfirðingum síldarrétti sem eru þekktir annars staðar á Norðurlöndum og ég vil nota í réttina austfirskt hráefni í eins ríkum mæli og mögulegt er. Ég fæ mikið af hráefni frá Síldarvinnslunni og einnig frá Loðnuvinnslunni og Eskju. Allt brauð kemur frá Sesam bakaríi á Reyðarfirði og boðið er upp á síld sem steikt er úr byggi frá Vallanesi. Þá er bjórinn sem boðið er upp á frá Beljanda brugghúsi. Allt hráefni sem ég nota er frábært og mér finnst að Austfirðingar þurfi að kynnast því hvernig unnt er að matreiða úr því. Þá vil ég leggja áherslu á að Randulffs-sjóhús leggur til alla aðstöðu og gerir þetta framkvæmanlegt.
 
Peter Bengtson er sænskur matreiðslumaður sem er að starfa hjá Hótel Hildibrand í Neskaupstað í tengslum við MatAttack verkefnið og það lá beint við að hann tæki þátt í þessari síldarveislu.
 
Við ætlum að bjóða upp á síldarrétti á Tæknidegi fjölskyldunnar í  Verkmenntaskóla Austurlands í Neskaupstað á morgun. Ég vona að fólk sleppi ekki tækifærinu sem þar gefst til að kynnast fjölbreyttum og frábærum síldarréttum,“ segir Tinna Rut.
 
Síldarveislan í Randulffs-sjóhúsi í gærkvöldi þótti takast frábærlega. Fjöldi fólks lagði leið sína í veisluna og kvaddi satt og ánægt. Margir höfðu orð á því að það væri hreint ótrúlegt hvað unnt væri að gera úr síldinni.
 
 Síldarveisla – austfirskt hráefni í öndvegi      Síldarveisla – austfirskt hráefni í öndvegi                            
 

Síldarvinnslan með hæst gjöld sjávarútvegsfyrirtækja

Síldarvinnslan með hæst gjöld sjávarútvegsfyrirtækjaSíldarvinnslan greiddi hæst opinber gjöld sjávarútvegsfyrirtækja á síðasta ári. Ríkisskattstjóraembættið hefur nýlega sent frá sér lista yfir þau fjörutíu fyrirtæki og stofnanir sem greiddu hæstu opinberu gjöldin á árinu. Síldarvinnslan er þar í 17. sæti og hæst sjávarútvegsfyrirtækja. Ef bankar og opinber fyrirtæki á listanum eru undanskilin er Síldarvinnslan í 5. sæti. Fram kemur á listanum að Síldarvinnslan greiddi 718.157.808 kr. í tekjuskatt og tryggingagjald á árinu 2017.
 
Ef tekið er tillit til veiðigjalda færist Síldarvinnslan enn ofar á lista yfir þau fyrirtæki sem greiða hæst opinber gjöld. Alls greiddi Síldarvinnslan veiðigjöld upp á 530 milljónir á síðasta ári þannig að fyrirtækið greiddi alls rúmlega 1.248 milljónir í skatta og veiðigjöld á árinu 2017.

Mokveiði í síldinni fyrir austan

Beitir NK fékk rúmlega 1.200 tonn af síld á 16 klukkutímum. Ljósm. Helgi Freyr Ólason.Beitir NK fékk rúmlega 1.200 tonn af síld á
16 klukkutímum. Ljósm. Helgi Freyr Ólason.
Um nýliðna helgi var vinnsluhlé í fiskiðjuveri Síldarvinnslunnar í Neskaupstað. Vinnsla hófst á ný í gærmorgun en þá var Börkur NK  kominn með 1.340 tonn af fallegri síld. Vel hefur gengið að vinna aflann úr Berki, en hann er bæði flakaður og heilfrystur.
 
Klukkan fjögur á sunnudag hélt Beitir NK til síldveiða og kom hann inn snemma í morgun með 1.225 tonn. Tómas Kárason skipstjóri á Beiti segir að það hafi verið mokveiði. „Við fengum aflann í þremur stuttum holum. Stærsta holið var 690 tonn og þá var dregið í tvo og hálfan tíma. Aflinn fékkst austur og norðaustur úr svonefndum Hornfláka, eða um það bil 35 sjómílur frá Norðfjarðarhorni. Þarna var mjög mikið að sjá og lóðningarnar voru rosalega flottar. Veiðin var náttúrulega frábær því aflann fengum við á sextán klukkutímum. Byrjuðum að veiða um klukkan níu á sunnudagskvöld og vorum hættir veiðum um hádegi í gær. Það er vart hægt að hugsa sér það mikið betra. Mönnum hlýtur að lítast vel á framhald þessara veiða, það er ekki hægt annað,“ segir Tómas.

Síldarvinnslan Fyrirmyndarfyrirtæki í rekstri

Síldarvinnslan Fyrirmyndarfyrirtæki í rekstriSíldarvinnslan er Fyrirmyndarfyrirtæki í rekstri 2018 samkvæmt mati Viðskiptablaðsins og Keldunnar. Listi yfir Fyrirmyndarfyrirtækin 2018 var birtur í Viðskiptablaðinu 27. september sl. en 3% íslenskra fyrirtækja komast á listann. Forsendurnar sem byggt er á við matið eru eftirtaldar:
 
  • Rekstrarárið 2017 er lagt til grundvallar en einnig er tekið tillit til reksturs á árinu 2016.
  • Afkoma þarf að hafa verið jákvæð.
  • Tekjur þurfa að hafa verið umfram 30 milljónir kr.
  • Eignir þurfa að hafa verið yfir 80 milljónir kr.
  • Eiginfjárhlutfall þarf að hafa verið umfram 20%.
  • Aðrir þættir eru metnir af Viðskiptablaðinu og Keldunni. Er þar t.d. tekið tillit til skila á ársreikningi og rekstrarforms.
 
Samkvæmt úttekt Viðskiptablaðsins og Keldunnar er Síldarvinnslan í 18. sæti í flokki stórra fyrirtækja þegar framangreindar forsendur eru metnar.  Þar kemur til dæmis fram að tekjur fyrirtækisins á árinu 2017 voru rúmlega 23 milljarðar og eignir rúmlega 51,5 milljarður. Eiginfjárhlutfallið var 64%.

Tæknidagur fjölskyldunnar

Frá sýningarsvæði Síldarvinnslunnar á Tæknidegi fjölskyldunnar 2016. Ljósm: Smári GeirssonFrá sýningarsvæði Síldarvinnslunnar á Tæknidegi
fjölskyldunnar 2017. Ljósm: Smári Geirsson
Tæknidagur fjölskyldunnar verður haldinn í Verkmenntaskóla Austurlands í sjötta sinn nk. laugardag. Það eru Verkmenntaskólinn og Austurbrú sem standa fyrir deginum og eins og venjulega hefur verið vandað til alls undirbúnings. Aðgangur er ókeypis og hefst dagskráin kl. 12 og lýkur kl. 16.
 
Samkvæmt venju er boðið upp á fjölbreytta dagskrá á tæknideginum og lögð áhersla á að höfða til allra aldurshópa. Fjöldi fyrirtækja og stofnana munu kynna starfsemi sína og eins munu gestir geta aflað sér upplýsinga um tækninýjungar af ýmsum toga. Þá verður fjölbreytt námsframboð Verkmenntaskólans kynnt og gestir munu geta séð þann kennslubúnað sem skólinn hefur upp á að bjóða. Á deginum munu gestir t.d. geta upplifað himingeiminn og fylgst með vélmennum keppa svo eitthvað sé nefnt. Dagskráin er svo sannarlega forvitnileg.
 
Að sjálfsögðu mun Síldarvinnslan taka fullan þátt í tæknideginum eins og áður. Starfsemi fyrirtækisins verður kynnt og þá verður gestum boðið að smakka ýmsar framleiðsluvörur. Hjá starfsmönnum Síldarvinnslunnar er tæknidagurinn ávallt tilhlökkunarefni. Dagurinn hefur verið afar fjölsóttur og rétt eins og áður má gera ráð fyrir því að margir leggi leið sína í Verkmenntaskólann nk. laugardag.

Annir í frystigeymslunum

Norðfjarðarhöfn í morgun. Vilhelm Þorsteinsson EA heldur til veiða að lokinni löndun. Fjærst er Hákon EA að landa frystum makríl. Börkur NK er að landa síld til frystingar. Ljósm. Smári GeirssonNorðfjarðarhöfn í morgun. Vilhelm Þorsteinsson EA
heldur til veiða að lokinni löndun. Fjærst er
Hákon EA að landa frystum makríl. Börkur NK
er að landa síld til frystingar. Ljósm. Smári Geirsson
Það hefur verið nóg að gera hjá starfsmönnum frystigeymsla Síldarvinnslunnar í Neskaupstað að undanförnu. Á makrílvertíðinni hafa frystigeymslurnar tekið á móti um 20.000 tonnum og kemur makríllinn frá fiskiðjuveri Síldarvinnslunnar og frystiskipunum Vilhelm Þorsteinssyni EA og Hákoni EA. Tekið hefur verið á móti um 4.500 tonnum frá Vilhelm og um 3.500 tonnum frá Hákoni. Þá hefur einnig verið unnin grálúða í fiskiðjuverinu og eins hefur gengið vel að frysta þar norsk-íslenska síld frá því að veiðar á henni hófust.
 
Nú hefur Vilhelm Þorsteinsson hafið síldveiðar og landaði 580 tonnum af síldarflökum í gær en í dag er Hákon að landa rúmlega 500 tonnum af makríl.
 
Heimir Ásgeirsson, verkstjóri í frystigeymslunum, segir að miklar annir hafi verið hjá starfsmönnum frystigeymslanna síðustu mánuði. „Við erum að senda frá okkur 500-600 tonn í gámum í hverri einustu viku en gámarnir fara í skip á Reyðarfirði. Þá koma flutningaskip nokkuð reglulega og lesta frystar afurðir. Það er til dæmis væntanlegt skip í þessari viku sem mun taka um 2.500 tonn af síld og makríl hjá okkur,“ segir Heimir.
 

Blængur millilandar

Blængur NK. Ljósm. Theodór HaraldssonBlængur NK. Ljósm. Theodór HaraldssonFrystitogarinn Blængur NK millilandaði á Akureyri í gær. Hann mun halda til veiða á ný í dag. Heimasíðan sló á þráðinn til Bjarna Ólafs Hjálmarssonar skipstjóra og spurði hann hvernig túrinn hefði gengið. „Það má segja að túrinn hafi gengið vel til þessa. Við byrjuðum að veiða fyrir austan en færðum okkur síðan á suðvesturmið og Vestfjarðamið. Aflinn hefur verið góður allan tímann. Í gær fóru í land um 16.000 kassar eða um 500 tonn og uppistaða aflans var ufsi og karfi. Við  eigum eftir rúmlega hálfan mánuð af þessari veiðiferð þannig að hún mun taka 40 daga í heildina. Að loknum túrnum mun síðan skipið fara í slipp,“ segir Bjarni Ólafur.

 

 

 

Nýtingin er afar góð

Öll síldin er flökuð og fryst. Ljósm. Hákon ErnusonStærsta hol Beitis NK í veiðiferðinni  var 460 tonn. 
Ljósm. Helgi Freyr Ólason

Vinnsla á norsk-íslensku síldinni gengur mjög vel í fiskiðjuveri Síldarvinnslunnar í Neskaupstað. Síldin er stór og nýtingin eins og best verður á kosið. Unnin eru á milli 700-800 tonn á sólarhring, en öll síldin er flökuð og ýmist fryst með hefðbundnum hætti eða vakúmpökkuð. Síðustu dagana hefur vinnslan verið samfelld en framundan er helgarfrí.
 

Stærsta hol Beitis NK í veiðiferðinni var 460 tonn. Ljósm. Helgi Freyr ÓlasonÖll síldin er flökuð og fryst.
Ljósm. Hákon Ernuson

Nú er verið að vinna síld sem Beitir NK kom með sl. nótt. Aflinn er 1.340 tonn og fékkst norðan við á Glettinganesflak. Tómas Kárason skipstjóri segir að vel hafi gengið að veiða. „Við fengum aflann í fjórum holum og það var stutt dregið, eða í tvo til fjóra tíma. Stærsta holið var um 460 tonn. Þessi síld er góð  og það er talsvert mikið að sjá af henni. Á daginn eru stórar torfur niðri og á næturnar koma þær upp. Sú síld sem við fylgdumst með virtist þokast í norður eða norðvestur. Það er ekki hægt annað en lítast vel á áframhaldandi veiði og það er ánægjulegt að sjá hve mikið af norsk-íslenskri síld er inni lögsögunni og skammt frá landi, en þegar við hættum veiðum vorum við um 45 mílur frá Norðfirði,“ segir Tómas.
 
 
 
 
 
 
 
 
 

Haustbragur á veiðunum

Bergey VE kemur til hafnar með góðan afla. Ljósm. Tói VídóBergey VE kemur til hafnar með góðan afla.
Ljósm. Tói Vídó
Dótturfélag Síldarvinnslunnar í Vestmannaeyjum, Bergur-Huginn, gerir út togarana Vestmannaey og Bergey. Eins og undanfarin ár hafa skipin lagt stund á veiðar út af Suðausturlandi og Austfjörðum á þessum árstíma. Aflanum er svo ýmist landað fyrir austan eða í Eyjum. Arnar Richardsson, rekstrarstjóri, segir að veiðarnar hafi gengið vel síðustu vikurnar. „Það er haustbragur á veiðum skipanna og það hefur aflast vel. Vestmannaey landaði fullfermi á Seyðisfirði í gær og var uppistaða aflans þorskur og ýsa. Vestmannaey hóf veiðar í túrnum út af Suðausturlandi en færði sig svo á Austfjarðamið. Bergey er á miðunum út af Suðausturlandinu og er að veiða ýsu, kola og ufsa. Gert er ráð fyrir að hún landi í Vestmannaeyjum á morgun. Við erum kátir með veiðarnar og verðin hafa verið að þokast upp á við,“ segir Arnar.

Stór og gullfalleg síld

Börkur NK. Ljósm. Helgi Freyr ÓlasonBörkur NK. Ljósm. Helgi Freyr ÓlasonSíldveiðin fer vel af stað austur af landinu og vinnsla gengur vel í fiskiðjuveri Síldarvinnslunnar í Neskaupstað þar sem síldin er flökuð og fryst. Uppúr hádegi í gær kom Börkur NK með 1.200 tonn af síld til vinnslu. Hjörvar Hjálmarsson skipstjóri segir að þetta sé stór og gullfalleg síld. „Við fengum aflann í fjórum holum við og utan við Glettinganestotuna. Þarna var svolítið líf og við toguðum aldrei lengi eða frá tveimur og hálfum og upp í fimm tíma. Það má segja að síldveiðin hafi farið vel af stað og síldin er afar heppileg til vinnslu. Þetta er yfir 400 gramma síld,“ segir Hjörvar.
 
Bjarni Ólafsson AK kom til Neskaupstaðar í morgun og er þetta önnur veiðiferð hans á síldarmiðin austur af landinu. Aflinn er 680 tonn og verður væntanlega byrjað að vinna hann á morgun.
 
Beitir NK mun halda til síldveiða síðar í dag.

Miklar landanir aðkomuskipa í Neskaupstað

Capture

Kaldbakur EA landar í Neskaupstað. Ljósm: Hákon Ernuson

                Í sumar hafa aðkomutogarar landað oft í Neskaupstað og þegar landaður afli þeirra er tekinn saman reynist hann vera tæplega 1.700 tonn. Togararnir sem um ræðir eru Samherjaskipin Björgúlfur EA og Hjalteyrin EA auk Kaldbaks EA sem gerður er út af Útgerðarfélagi Akureyringa.  Skipin hafa verið að veiðum út af Austfjörðum og hagkvæmt hefur þá verið að landa aflanum eystra. Áður hefur komið fram hér á heimasíðunni að Kaldbakur hefur einnig landað sex sinnum á Seyðisfirði nú í ágúst og september.

                Björgúlfur EA landaði fjórum sinnum í Neskaupstað í sumar, samtals um 540 tonnum. Hjalteyrin EA landaði þar alls sjö sinnum, samtals 545 tonnum. Þá er Kaldbakur EA nú að landa í fjórða sinn og er afli hans samtals um 580 tonn.

                Að auki hefur Anna EA landað grálúðu í Neskaupstað, einkum í byrjun árs og í sumar. Landanir hennar þar eru tólf hingað til og heildarafli um 1030 tonn. Anna veiðir grálúðuna í net. Drjúgur hluti grálúðuafla Önnu hefur verið unninn í fiskiðjuveri Síldarvinnslunnar og þá hefur hluta þess afla sem Anna hefur landað annars staðar verið ekið til Neskaupstaðar þar sem hann hefur verið unninn.

                Þá ber einnig að hafa í huga aðkomubáta sem gerðir eru út á línu frá Neskaupstað drjúgan hluta úr ári og skapa mikil umsvif við höfnina.

                Fyrir liggur að þessar landanir skipta hafnarsjóð Fjarðabyggðar miklu máli og segir Hákon Ásgrímsson framkvæmdastjóri Fjarðabyggðarhafna þær afar jákvæðar. „Þessar landanir hafa aukist mikið frá fyrri árum og þær hafa jákvæð áhrif á tekjur hafnarsjóðs, bæði tekjur í formi hafnargjalda og aflagjalda. Ekki má heldur gleyma því að landanirnar eru mikilvægar fyrir fyrirtæki á svæðinu. Ég vil til dæmis í því sambandi nefna fyrirtæki sem sinna löndunarþjónustu og flutningafyrirtæki. Auðvitað fögnum við þessari auknu umferð skipa um hafnirnar, hún er afar jákvæð,“ segir Hákon.

Vinnsla á norsk-íslenskri síld hafin af fullum krafti

BO agust 2017 HE

Bjarni Ólafsson AK siglir inn Norðfjörð. Ljósm: Smári Geirsson

                Í gærmorgun kom Bjarni Ólafsson AK með 460 tonn af norsk-íslenskri síld til Neskaupstaðar og hófst þegar vinnsla á henni í fiskiðjuveri Síldarvinnslunnar. Gísli Runólfsson skipstjóri segir að auðvelt hafi reynst að sækja aflann. „Við fórum bara hérna út í Seyðisfjarðardýpið og tókum tvö stutt hol en leituðum ekkert víðar. Á landleiðinni sáum við svo töluverða síld hérna alveg upp við land eða 6-8 mílur út af Norðfjarðarhorni. Ég held að þetta líti bara ágætlega út. Síldin sem við fengum er stór og falleg og af allra bestu gerð. Hún er algerlega átulaus og meðalþyngdin reyndist vera um 400 gr. Ég held að þessi síld hljóti að henta afar vel í vinnsluna,“ segir Gísli.

                Jón Gunnar Sigurjónsson yfirverkstjóri í fiskiðjuverinu tekur undir með Gísla. Hann segir að síldin sé mjög góð og fín og hún sé öll flökuð. „Þessi síld hentar afar vel í vinnsluna og hún á eftir að verða enn betri,“ segir Jón Gunnar.

                Nú er bræla á síldarmiðunum og bæði Börkur NK og Bjarni Ólafsson liggja í höfn eins og er. Beitir NK er hins vegar væntanlegur úr Smugunni með um 1.100 tonn af makríl en megnið af aflanum fékkst í gær.

               

Makrílvertíð að ljúka

Borkur og Bjarni

Börkur NK bíður löndunar. Verið að landa úr Bjarna Ólafssyni AK. Ljósm: Smári Geirsson

                Í morgun var lokið við að landa 1.400 tonnum af makríl úr Berki NK. Aflinn fékkst í Smugunni í tveimur holum og fór hann allur til manneldisvinnslu í fiskiðjuveri Síldarvinnslunnar. Nú er makrílvertíð að ljúka hjá skipum Síldarvinnslunnar en Beitir NK er þó enn að veiðum í Smugunni. Munu skipin nú snúa sér að síldveiðum og hefur Bjarni Ólafsson AK þegar hafið slíkar veiðar.  

                Heimasíðan hafði samband við Hjörvar Hjálmarsson skipstjóra á Berki og spurði hann hvað helst hefði einkennt makrílveiðarnar í ár. „Í fyrsta lagi þá byrjuðum við veiðarnar seinna en undanfarin ár og í öðru lagi virðist hafa verið minna af makríl hér við landið. Ástæða þess að makríllinn stoppaði lítið við landið er án efa sú að það var minna um átu hérna en verið hefur undanfarin ár. Veiðarnar þróuðust síðan þannig að þær fóru að miklu leyti fram í Síldarsmugunni, en veiðin var misjöfn frá einum tíma til annars. Stundum gekk vel að veiða en stundum þurfti líka að leita töluvert að fiskinum sem gat verið tímafrekt. Það er ekkert sem segir að makrílveiðin á næsta ári muni hafa þessi sömu einkenni. Í ár voraði seint í sjónum sunnan við landið þar sem gönguleið makrílsins er og því varð átumyndun lítil. Vonandi verður þetta með allt öðrum hætti á næsta ári. Auðvitað eru menn bjartsýnir eins og alltaf,“ segir Hjörvar.

               

Síldarvinnslan fyrir hálfri öld

Það er ávallt lærdómsríkt að skyggnast aftur í tímann og rifja upp söguna. Hér er ætlunin í örstuttu máli að greina frá því hvernig starfsemi Síldarvinnslunnar var háttað árið 1968 eða fyrir hálfri öld. Verum þess ávallt minnug að unnt er að afla sér hagnýtrar þekkingar með því að kynnast sögunni.
 
Árið 1968 rak Síldarvinnslan síldarverksmiðju í Neskaupstað auk þess sem fyrirtækið starfrækti þar fiskvinnslustöð og útgerð. Í flota Síldarvinnslunnar voru þá síldveiðiskipin Barði, Bjartur, Börkur og Birtingur. 
 

Það rauk út síldarverksmiðju Síldarvinnslunnar einungis í fáeina daga sumarið 1968. Ljósm. Garðar Sveinn ÁrnasonSíldveiðiskipið Börkur NK að togveiðum sumarið 1968. Fjær er Júpiter RE. Júpiter hét áður Gerpir NK og var gerður út frá Neskaupstað á árunum 1957-1960. Ljósm. úr safni Kristins BenediktssonaÁrið 1968 var hið svonefnda síldarævintýri endanlega að líða undir lok. Sumarið 1967 lögðu íslensk skip stund á síldveiðar á hafsvæðinu við Jan Mayen en þegar haustaði gekk síldin á vetursetustöðvarnar úti fyrir Austfjörðum og þegar vel viðraði fékkst góður afli á Rauða torginu. Afgerandi breyting varð hins vegar á hegðun síldarinnar árið 1968. Það sumar eltust bátarnir við síldina lengst norður í Dumbshafi en þegar síldin gekk á hefðbundnar vetursetustöðvar í október þétti hún sig ekki og var því ekki veiðanleg í nót.

  • Sumarið og haustið 1968 héldu Norðfjarðarbátar til síldveiða í Norðursjó. Þar á meðal voru Síldarvinnsluskipin Barði og Bjartur. Birtingur hafði reyndar lagt stund á veiðar í Norðursjó um tíma sumarið áður.
  • Síldarverksmiðja Síldarvinnslunnar tók einungis á móti tæplega 3.000 tonnum af síld til vinnslu á árinu 1968. Til samanburðar tók verksmiðjan á móti rúmlega 33.000 tonnum árið 1967 og tæplega 108.000 tonnum árið 1966.
  • Aðeins voru saltaðar 23.300 tunnur af norsk-íslenskri síld í Neskaupstað árið 1968 ef talin er með sú síld sem söltuð var um borð í veiðiskipum og skipað þar á land. Til samanburðar var saltað í tæplega 44.000 tunnur árið 1967 og 53.000 tunnur árið 1966. Söltunarstöð Síldarvinnslunnar saltaði í rúmlega 7.000 tunnur árið 1968.
  • Vegna hinnar lélegu síldveiði árið 1968 var gripið til þess ráðs að útbúa síldveiðiskipin Börk og Birting til togveiða. Þeir fiskuðu ágætlega um sumarið og sköpuðu veiðar þeirra mikla atvinnu í fiskvinnslustöð Síldarvinnslunnar. Þegar hausta tók hentuðu bátarnir síður til þessara veiða og hófust þá umræður um hvort skynsamlegt væri að Síldarvinnslan festi kaup á skuttogara. Alls var unnið úr 887 tonnum af bolfiski í fiskvinnslustöð Síldarvinnslunnar árið 1968 og var það meira en tvöföldun á þeim afla sem unnin hafði verið árið áður. Sumarið 1968 lá ekki mikið á að gera síldartunnurnar klárar til söltunar. Ljósm. Garðar Sveinn Árnason
    Það rauk út síldarverksmiðju Síldarvinnslunnar einungis í fáeina daga sumarið 1968. Ljósm. Garðar Sveinn Árnason
  • Vorið 1968 fyllti hafís Norðfjörð og hafði hann þau áhrif að atvinnulíf fór verulega úr skorðum. Til dæmis komust togveiðibátarnir ekki heim með aflann og þær útgerðir sem ætluðu að senda báta sína til síldveiða gátu ekki komið þeim í slipp í Neskaupstað. Bátarnir lágu í öðrum höfnum og biðu þess að hafísinn hörfaði.
  • Loðna barst fyrst til Neskaupstaðar á loðnuvertíðinni 1968. Þann 21. febrúar það ár kom Börkur með fullfermi og var aflanum landað í síldarverksmiðju Síldarvinnslunnar. Það þóttu nokkur tímamót þegar þessi fyrsti loðnufarmur var tekinn til vinnslu og veltu menn því fyrir sér hvort loðnan gæti að einhverju leyti komið í stað norsk-íslensku síldarinnar sem horfin var af miðunum við landið. Á þessari vertíð lögðu Síldarvinnslubátarnir Börkur og Birtingur stund á loðnuveiðar og lönduðu þeir 7.700 tonnum af loðnu í heimahöfn.

 

 

Síldveiðiskipið Börkur NK að togveiðum sumarið 1968. Fjær er Júpiter RE. Júpiter hét áður Gerpir NK og var gerður út frá Neskaupstað á árunum 1957-1960.  Ljósm. úr safni Kristins BenediktssonarSumarið 1968 lá ekki mikið á að gera síldartunnurnar klárar til söltunar. Ljósm. Garðar Sveinn Árnason

Hafís rekur inn Norðfjörð vorið 1968. Ljósm. Kristinn V. JóhannssonHafís rekur inn Norðfjörð vorið 1968.
Ljósm. Kristinn V. Jóhannsson
 
 
 
 
 
 
 
 
 
 
 
 
 
 
 
 
 
 

Smíði á Vestmannaey og Bergey hafin

Fyrsti hlutinn af nýrri Vestmannaey kominn til Aukra. Ljósm. Guðmundur AlfreðssonFyrsti hlutinn af nýrri Vestmannaey kominn
til Aukra. Ljósm. Guðmundur Alfreðsson
Undir lok síðasta árs undirrituðu fulltrúar fjögurra íslenskra útgerðarfélaga samninga um smíði sjö togara hjá norsku skipasmíðastöðinni Vard. Dótturfélag Síldarvinnslunnar, Bergur-Huginn ehf. í Vestmannaeyjum, lætur smíða tvö þessara skipa en þeim er ætlað að koma í stað núverandi Vestmannaeyjar VE og Bergeyjar VE. Skipin sem hér um ræðir verða 28,95 m að lengd og 12 m að breidd. Í þeim verða tvær aðalvélar með tveimur skrúfum og einnig ný kynslóð rafmagnsspila frá Seaonics. Skipin verða vel búin í alla staði og í þeim verða íbúðir fyrir 13 manns og þau munu taka um 80 tonn af ísuðum fiski í lest. Þá hefur verið vandlega hugað að orkunýtingu við hönnun skipanna. Vinnuaðstaða sjómanna verður sérstaklega höfð í huga við hönnun á vinnsludekki og öll áhersla lögð á góða meðhöndlun á fiski og öfluga kælingu.
 
Guðmundur Alfreðsson hefur fylgst með smíðinni.Guðmundur Alfreðsson hefur fylgst með smíðinni.Guðmundur Alfreðsson ,viðhaldsstjóri, er nýlega kominn frá Noregi en hann fylgist vel með öllu er lýtur að hönnun og smíði skipanna. Hann segir að nú sé smíði hafin á Vestmannaey og byrjað að efna niður í Bergey. „Skipin eru smíðuð í einingum og fer smíði þeirra fram í skipasmíðastöðinni Salthammer í Tesfjord. Þaðan eru einingarnar dregnar á pramma til Aukra þar sem þær verða settar saman og allri vinnu við smíðina verður lokið þar. Allir þættir við smíði skipanna eru boðnir út og síðan koma starfsmenn þeirra fyrirtækja sem fá verkefnin til Aukra og vinna í þeim þar. Þannig eru einstakir hlutar skipanna smíðaðir víða en öll samsetning á sér stað í Aukra auk þess sem eitt skipanna verður að öllu leyti smíðað þar. Skrokkar okkar skipa verða smíðaðir í Salthammer og settir saman í Aukra en skrokkar fjögurra skipa verða hins vegar smíðaðir í Vietnam. Þegar smíðinni í Vietnam verður lokið verða skrokkarnir fluttir þaðan til Aukra og þar verða skipin síðan fullfrágengin. Nú liggur fyrir að afhending á nýrri Vestmannaey og Bergey dregst lítilsháttar frá því sem ráð var fyrir gert. Nú er gert ráð fyrir að Vestmannaey verði afhent í maí 2019 og Bergey í júní,“ segir Guðmundur Alfreðsson.

Samfelld makrílvinnsla – gott hráefni

Beitir NK bíður löndunar í haustblíðunni í morgun.  Ljósm. Karl Jóhann BirgissonBeitir NK bíður löndunar
í haustblíðunni í morgun.
 Ljósm. Karl Jóhann Birgisson
Að undanförnu hefur verið samfelld makrílvinnsla í fiskiðjuveri Síldarvinnslunnar í Neskaupstað. Verið var að ljúka við að vinna afla úr Bjarna Ólafssyni AK fyrir hádegi og þá hófst vinnsla úr Beiti NK sem kominn var með 950 tonn úr Smugunni. Jón Gunnar Sigurjónsson yfirverkstjóri í fiskiðjuverinu segir að vinnslan gangi afar vel. „Vinnslan hefur verið samfelld og hráefnið er sífellt betra. Fiskurinn er stinnur og fallegur og átulaus. Það er í reyndinni 100% nýting á afla skipanna. Það fer að síga á seinni hluta makrílvertíðarinnar hjá okkur og þá snúa menn sér að síldinni,“ segir Jón Gunnar.
 
Að undanförnu hafa borist fréttir af mikilli síld út af Austfjörðum þannig að væntanlega þurfa skipin ekki að sækja hana langan veg þegar veiðar hefjast.
 
 
 

Samfélagsspor Síldarvinnslunnar 2017

Samfélagsspor Síldarvinnslunnar 2017Endurskoðunarfyrirtækið PricewaterhouseCoopers hefur reiknað út svonefnt samfélagsspor Síldarvinnslusamstæðunnar fyrir árið 2017. Samfélagsspor er tiltekin aðferðafræði sem notuð er til að greina heildarframlag fyrirtækja til samfélagsins í formi skatta og opinberra gjalda. Til Síldarvinnslusamtæðunnar töldust árið 2017 auk móðurfélagsins Bergur-Huginn ehf., Fóðurverksmiðjan Laxá hf., Runólfur Hallfreðsson ehf. og SVN eignafélag ehf.
 
Hér skal getið um nokkrar mikilvægar niðurstöður samfélagssporsins:
 
  • Veiðiheimildir samstæðunnar á árinu voru 18.200 tonn í þorskígildum.
  • Fjöldi ársverka var 360.
  • Rekstrartekjur samstæðunnar námu 18,5 milljörðum kr. á árinu.
  • Meðaltal heildarlauna starfsmanna á árinu voru 10,2 milljónir króna.
  • Staðgreiðsla af launum starfsmanna nam 1.176 milljónum króna.
  • Meðallaunakostnaður á hvert ársverk var 13,9 milljónir króna með launatengdum gjöldum.
  • Samstæðan greiddi 307 milljónir króna í tryggingagjald.
  • Framlög í lífeyrissjóði námu 402 milljónum króna.
  • Samstæðan greiddi 530 milljónir króna í veiðigjöld.
  • Samstæðan greiddi 172 milljónir í kolefnisgjald.
  • Greiddar voru 186 milljónir í hafnargjöld og 84 milljónir í fasteignagjöld.
  • Fjármagnstekjuskattur nam 267 milljónum króna.
  • Alls námu greiddir og innheimtir skattar ásamt opinberum gjöldum samstæðunnar 4,5 milljörðum króna á árinu 2017. Ekki eru metin margfeldisáhrif vegna kaupa á innlendum vörum og þjónustu.
  • Til viðbótar við samfélagssporið styrkti Síldarvinnslusamstæðan sérstaklega ýmis samfélagsverkefni um 70-80 milljónir á árinu 2017. Má þar nefna styrki til listastarfsemi og íþróttastarfsemi ásamt styrkjum til björgunarsveita og annarra mikilvægra félagasamtaka. Þá hefur Síldarvinnslan lagt mikla áherslu á styrkveitingar til heilbrigðismála.

Undirflokkar