Bergur-Huginn styrkir íþróttastarf og færir Grunnskólanum gjöf

Arnar Richardsson og Hörður Orri Grettisson við afhendingu styrks Bergs-Hugins.Arnar Richardsson og Hörður Orri Grettisson við afhendingu styrks Bergs-Hugins.Nú nýverið afhenti Arnar Richardsson, rekstrarstjóri Bergs-Hugins í Vestmannaeyjum, Herði Orra Grettissyni, framkvæmdastjóra ÍBV, myndarlegan fjárstyrk til styrktar íþróttastarfi í Eyjum. Arnar segir að Bergur-Huginn vilji leggja sitt af mörkum til að unnt sé að halda uppi öflugu íþróttastarfi hjá ÍBV enda sé slíkt starf mikilvægur þáttur í samfélaginu. Heimasíðan ræddi við Hörð Orra og spurði hann hvort styrkur eins og sá sem Bergur-Huginn afhenti skipti miklu máli. „Já, hann skiptir svo sannarlega miklu máli. ÍBV varð fyrir gífurlegu efnahagslegu áfalli þegar ekki var unnt að halda þjóðhátíð og þá þurfa menn að reiða sig á styrki í ríkari mæli en áður. Það er samfélagslega mikilvægt að halda úti íþróttastarfi hér í Eyjum og það þarf að halda æfingagjöldum lágum svo allir eigi möguleika á að taka þátt í starfinu og styrkir fyrirtækja gera það kleift nú á þessum erfiðu tímum. Við erum svo sannarlega þakklát fyrir styrkinn frá Bergi-Hugin og það munu allar deildir félagsins njóta góðs af honum – handboltinn, fótboltinn og barna- og unglingastarfið,“ segir Hörður Orri.
 
Arnar Richardsson getur þess að Bergur-Huginn hafi fyrr á árinu styrkt ýmis verkefni á vegum ÍBV og hann sé sannfærður um að þeim fjármunum hafi verið vel varið. Þá nefnir hann að fyrir nokkru hafi Bergur-Huginn fært Grunnskóla Vestmannaeyja vesti að gjöf fyrir yngstu bekki skólans en vestin nota börnin í öryggisskyni þegar farið er út fyrir skólalóðina.
 
Anna Rós Hallgrímsdóttir skólastjóri Grunnskóla Vestmannaeyja tók á móti öryggisvestum frá Bergi-Hugin sem Arnar Richardsson afhentiAnna Rós Hallgrímsdóttir skólastjóri
Grunnskóla Vestmannaeyja tók á móti
öryggisvestum frá Bergi-Hugin sem
Arnar Richardsson afhenti

Áhugasamar í íslenskunámi

Starfsmenn frystihúss Síldarvinnslunnar á Seyðisfirði sem sótt hafa íslenskunám hjá Austurbrú í vetur. Talið frá vinstri: Everita Zulke frá Lettlandi, Marianna Weinrauch frá Ungverjalandi og Daniella Sokolov frá Serbíu. Ljósm. Ómar BogasonStarfsmenn frystihúss Síldarvinnslunnar á Seyðisfirði sem sótt hafa íslenskunám hjá Austurbrú í vetur. Talið frá vinstri: Everita Zulke frá Lettlandi, Marianna Weinrauch frá Ungverjalandi og Daniella Sokolov frá Serbíu. Ljósm. Ómar BogasonAusturbrú hefur í vetur boðið upp á íslenskunám fyrir útlendinga á Seyðisfirði. Kennari hefur verið Ólafía Stefánsdóttir. Þrír starfsmenn frystihúss Síldarvinnslunnar á Seyðisfirði hafa sótt námskeiðið og hafa sýnt náminu einstakan áhuga. Heimasíðan spjallaði við Ólafíu og spurði hana nánar út í námið. „Það er Austurbrú sem stendur fyrir náminu og það hefur gengið vel. Í haust var byrjað á námskeiði fyrir byrjendur og sóttu það átján nemendur þegar mest var, þar af þrjár konur frá frystihúsi Síldarvinnslunnar. Þær eru frá Lettlandi, Ungverjalandi og Serbíu og sýndu náminu einstakan áhuga. Þegar ég ætlaði að hlífa nemendum og sleppa þeim við heimavinnu komu þær og báðu um heimaverkefni. Mikið væri gott ef allir nemendur væru svona. Fyrir utan námskeiðið notuðu þær netið óspart en þar er unnt að finna gott námsefni eins og Icelandic Online frá Háskóla Íslands. Þetta var námskeið fyrir byrjendur en síðan verður boðið upp á áframhaldandi nám eftir áramót. Ég vona að þá komi fleiri starfsmenn frystihússins. Fyrirtækin greiða námskeiðskostnaðinn fyrir starfsmenn sína og það gerir Síldarvinnslan. Sum fyrirtæki hvetja starfsfólk sitt sérstaklega til að sækja námskeiðin og það er einmitt það sem Síldarvinnslan gerir,“ segir Ólafía.
 
Ómar Bogason hjá frystihúsinu á Seyðisfirði segir að mikil ánægja sé með íslenskunámskeið Austurbrúar. Hann segir jafnframt að í frystihúsinu sé mikil áhersla lögð á að tala íslensku við erlenda starfsmenn og eigi það örugglega þátt í því að margir þeirra ná tökum á málinu á undraskömmum tíma.
 
 

Jólasíldin slær í gegn enn eitt árið

Jólasíldin sett í fötur. Ljósm. Jón Gunnar SigurjónssonJólasíldin sett í fötur. Ljósm. Jón Gunnar SigurjónssonFyrir marga sem starfa hjá Síldarvinnslunni eða tengjast fyrirtækinu er jólasíld Síldarvinnslunnar ómissandi hluti jólahátíðarinnar. Í hugum flestra er Síldarvinnslujólasíldin besta síldin og mikið tilhlökkunarefni að fá að neyta hennar. Síldin er framleidd eftir kúnstarinnar reglum í fiskiðjuverinu í Neskaupstað og yfirverkstjórinn, Jón Gunnar Sigurjónsson, stýrir framleiðslunni. Jón Gunnar segir að ávallt sé ánægjulegt að fá þakkir fyrir jólasíldina og ekkert fari á milli mála að framleiðslan í ár sé vel heppnuð. Síldin er framleidd í takmörkuðu magni og er áhersla lögð á að hráefnið sé af bestu gæðum. Framleiðsluferillinn er að sjálfsögðu leyndarmál en hann byggir bæði á mikilli þekkingu og næmni.
 
Jón Gunnar segir að það sé ávallt gaman að fást við framleiðslu á jólasíldinni. „Fólk segir í ár að síldin sé sú besta. Það höfum við heyrt áður og það sýnir að við erum alltaf á réttri leið. Ég tel að jólasíldin í ár sé algjört ljúfmeti og hún er í reynd lokapunkturinn á frábærlega vel heppnaðri síldarvertíð,“ segir Jón Gunnar.
 
Fyrir utan þá jólsíld sem starfsfólk og velunnarar Síldarvinnslunnar hafa fengið hefur fyrirtækið sent Mæðrastyrksnefnd síld og mun hún örugglega vera vel metin á þeim vettvangi. Auk jólasíldar fékk Mæðrastyrksnefnd fisk að gjöf frá Síldarvinnslunni og eins var Samhjálp styrkt til matargjafa. Fyrir utan þetta hefur Síldarvinnslan lagt sitt af mörkum til matargjafa í Neskaupstað og á Seyðisfirði.
 
 

Stór og fallegur kolmunni

Bjarni Ólafsson AK er á landleið með fullfermi af kolmunna. Ljósm. Smári GeirssonBjarni Ólafsson AK er á landleið með fullfermi af kolmunna. Ljósm. Smári GeirssonBjarni Ólafsson AK er væntanlegur til Neskaupstaðar í kvöld með fullfermi af kolmunna eða um 1.870 tonn. Heimasíðan ræddi við Runólf Runólfsson skipstjóra og spurði fyrst hvar aflinn hefði fengist. „Við vorum að veiðum á gráa svæðinu suður af Færeyjum alveg við skosku línuna. Þarna var svolítið lóð á köflum, en það var ekki að gefa mjög mikið. Það þurfti semsagt að draga lengi eða frá 6 tímum og upp í 24. Aflinn fékkst í sex holum og það voru frá 200 tonnum og upp í 350 tonn í holi. Þetta er stór og fallegur kolmunni sem þarna fékkst, eðlilegur göngufiskur. Vandamálið í síðasta túr var það að skipin fengu einungis smáfisk þó víða væri farið, en nú var allt annað upp á teningnum. Veðrið var misjafnt í túrnum. Við vorum sex daga að veiðum og fengum þrjá góða daga, en svo brældi inn á milli,“ segir Runólfur.

 

 

Jólatónleikar Síldarvinnslunnar og Eskju

Jólatónleikar Síldarvinnslunnar og EskjuSíldarvinnslan og Eskja bjóða starfsfólki sínu upp á glæsilega jólatónleika á netinu laugardaginn 12. desember nk. Útsending hefst kl. 20 og tónleikarnir hefjast kl. 20.30.
 
Á tónleikunum koma fram stórsöngvararnir Jóhanna Guðrún og Eyþór Ingi ásamt frábærri hljómsveit.
 
Nánari upplýsingar koma fram á auglýsingum á vinnustöðum.
                                                                          
Góða skemmtun !
 
 
 
 
 

Eyjarnar eru fyrir austan

Vestmannaey VE í Norðfjarðarhöfn í morgun. Ljósm. Smári GeirssonVestmannaey VE í Norðfjarðarhöfn í morgun.
Ljósm. Smári Geirsson
Skip Bergs-Hugins í Vestmannaeyjum hafa verið að veiða fyrir austan land að undanförnu og landað í Neskaupstað og á Eskifirði. Bergey VE landaði á þriðjudag í Neskaupstað og Vestmannaey VE á miðvikudag. Síðan landaði Bergey á ný á Eskifirði í gærmorgun. Nú liggja bæði skipin í höfn og bíða þess að óveðrið gangi yfir. Heimasíðan ræddi stuttlega við Birgi Þór Sverrisson skipstjóra á Vestmannaey og spurði út í tíðarfarið. „Það eru búnar að vera helvítis brælur að undanförnu og erfitt tíðarfar, en það koma hlé inn á milli. Ég geri ráð fyrir að við förum út í nótt og það spáir vel næstu daga,“ segir Birgir Þór.

 

 

 

Enginn óútskýrður launamunur hjá Síldarvinnslunni þriðja árið í röð

Enginn óútskýrður launamunur hjá Síldarvinnslunni þriðja árið í röðÍ síðustu viku fór fram úttekt á jafnlaunakerfi Síldarvinnslunnar. Fyrirtækið BSÍ á Íslandi framkvæmdi úttektina. Í slíkri úttekt er skoðað mjög ítarlega hvort fyrirtækið hagi launamálum í samræmi við jafnlaunastaðalinn ÍST 85:2012. Áður en til úttektar kom hafði farið fram greining á launagögnum þar sem skoðað var með svonefndri aðhvarfsgreiningu hvort einhvern óútskýrðan launamun væri að finna hjá fyrirtækinu. Svo reyndist ekki vera. Launagreiningin var framkvæmd af fyrirtækinu Intenta ehf. Úttekt BSÍ og launagreiningin staðfesta að Síldarvinnslan hagar launamálum sínum í samræmi við jafnlaunastaðalinn og að engan óútskýrðan launamun sé að finna hjá fyrirtækinu. Hákon Ernuson starfsmannastjóri Síldarvinnslunnar sagðist vera mjög ánægður með niðurstöðuna. “Við vitum alveg að launamálin hjá okkur eru faglega unnin, en það er alltaf gott að fá slíkt staðfest af óháðum aðilum. Það er skýrt í starfsmannastefnunni okkar, jafnréttis- og jafnlaunastefnunni, að þættir eins og kyn, kynhneigð og uppruni fólks eiga ekki að hafa nein áhrif á launasetningu. Slíkar úttektir staðfesta að svo er ekki, sem kemur okkur svo sem ekkert á óvart, enda er þetta þriðja úttektin af þessu tagi sem við förum í gegnum. Við stefnum nú sem endranær að því að borga laun samkvæmt samningum og lögum og að vera samkeppnishæf um góða starfsmenn af öllum kynjum,” segir Hákon.

Blængur úr Barentshafinu

Barentshafsfiski landað úr Blængi NK í gær. Ljósm. Smári GeirssonBarentshafsfiski landað úr Blængi NK í gær.
Ljósm. Smári Geirsson
Frystitogarinn Blængur NK kom til Neskaupstaðar í gærmorgun að loknum rúmlega mánaðar túr í Barentshafið. Afli skipsins var 536 tonn upp úr sjó og var verðmæti hans 176 milljónir króna. Heimasíðan bað Theodór Haraldsson skipstjóra um segja stuttlega frá veiðiferðinni. „Við héldum til veiða 22. október og það tók okkur þrjá og hálfan sólarhring að sigla þessar 1100 mílur á veiðisvæðið. Fyrstu tvo eða þrjá dagana var aflinn þokkalegur eða upp undir tvö tonn á tímann en það reyndist bara vera smá glenna. Það brældi síðan og þá hvarf fiskurinn að mestu. Það sem eftir var túrsins vorum við yfirleitt að fá 400-500 kg. á togtímann og það er of lítið til að menn séu sáttir. Við fengum fréttir um betri veiði annars staðar en sú reyndist ekki vera raunin. Við færðum okkur því aftur til baka og vorum í reynd að veiða allan tímann á Skolpenbankanum. Túrinn einkenndist því af heldur lítilli veiði og 15-20 metra vindi megnið af tímanum. Staðreyndin er sú að þetta var heldur lítið spennandi en geðheilsan um borð var samt ótrúlega fín. Þetta getur gerst og menn vita að það eru ekki alltaf jólin í þessum bransa, en auðvitað eru menn fegnir að koma heim. Heimsiglingin tók fjóra sólarhringa enda sigldum við suður með Noregi til að sleppa við illviðri og það lengdi siglinguna töluvert,“ segir Theodór.
 
Gert er ráð fyrir að Blængur haldi á ný til veiða í fyrramálið.
 
 

Rúmlega 4.700 tonn af kolmunna til Neskaupstaðar

Beitir NK kemur til löndunar síðdegis í gær. Ljósm. Smári GeirssonBeitir NK kemur til löndunar síðdegis í gær.
Ljósm. Smári Geirsson
Bjarni Ólafsson AK kom til Neskaupstaðar í fyrrinótt með rúm 1.100 tonn af kolmunna. Börkur NK kom síðan í gærmorgun með tæp 1.900 tonn og Beitir NK síðdegis í gær með tæp 1.700 tonn. Aflann fengu skipin í færeyskri lögsögu.
 
Heimasíðan ræddi við Runólf Runólfsson skipstjóra á Bjarna Ólafssyni og spurði hvernig veiðiferðin hefði gengið. „Hún hefði mátt ganga betur. Við komum með 1.160 tonn sem fengust í sjö holum. Það er einungis tekið eitt hol á sólarhring og við fengum mest 300 tonn í holi en aflinn fór alveg niður í 20 tonn. Vandinn var sá að fiskurinn sem fékkst var of smár og það kom okkur á óvart. Við leituðum að stærri fiski og fórum víða. Veitt var austur af eyjunum, norðaustur og suðaustur en alls staðar var þetta sama sagan. Venjulega hefur fengist stór og góður kolmunni í færeysku lögsögunni á þessum árstíma en stóri fiskurinn lét ekki sjá sig á meðan við vorum þarna. Ég held að stóri fiskurinn gangi svo austarlega að hann komi ekki inn í lögsöguna. Allavega gerði hann það ekki á meðan túrinn stóð yfir. Nú er búið að loka stórum svæðum í lögsögunni vegna smáfisksins og það er eðlilegt. Vonandi rætist úr þessu og þarna eru skip sem beðið er frétta frá, en nú spáir hann vitlausu veðri á þessum slóðum út vikuna,“ segir Runólfur.
 
Grænlenska skipið Polar Amaroq hélt til kolmunnaveiða í lok síðustu viku og samkvæmt fréttum í morgun fæst nú stærri kolmunni í færeysku lögsögunni. Gert er ráð fyrir að Börkur, Beitir og Bjarni Ólafsson haldi á ný til veiða á morgun.

Síldarvinnslan gefur Verkmenntaskóla Austurlands búnað til kennslu í kælitækni

afliði Hinriksson og Arnar Guðmundsson við kennslubúnað í kælitækni.  Ljósm. Smári GeirssonHafliði Hinriksson og Arnar Guðmundsson við kennslubúnað í kælitækni. Ljósm. Smári GeirssonNýlega færði Síldarvinnslan Verkmenntaskóla Austurlands búnað til kennslu í kælitækni að gjöf. Um er að ræða lekaleitartæki, vigt fyrir kælimiðla, vacumdælu, tæmingardælu og mælibretti. Að sögn þeirra Hafliða Hinrikssonar, deildarstjóra rafdeildar skólans og Arnars Guðmundssonar, deildarstjóra málmdeildar, munu tækin nýtast afar vel til kennslu á vélstjórnarbraut og vélvirkjabraut. Benda þeir á að þekking á sviði kælitækni sé sífellt að verða mikilvægari og því afar brýnt að skólinn geti þjálfað nemendur í notkun þess búnaðar sem almennt er nýttur á því sviði. Segja þeir að nýi búnaðurinn, sem nú bætist við þá tækjaeign sem fyrir var, geri skólanum kleift að veita haldgóða kennslu.
 
Þeir Hafliði og Arnar vilja að fram komi að sá stuðningur sem fyrirtæki veiti skólanum til tækjakaupa sé ómetanlegur. Segja þeir að fyrirtæki á borð við Síldarvinnsluna sýni það svo sannarlega í verki að þau vilji að skólinn sé öflugur og geti veitt góða kennslu enda muni fyrirtækin njóta góðs af því þegar nemendurnir komi út á vinnumarkaðinn að námi loknu. „Skólinn er afar þakklátur fyrir þá velvild sem hann nýtur og víst er að þeir 20 nemendur sem nú strax fá að njóta nýju tækjanna munu fá betri undirbúnig en ella fyrir sín framtíðarstörf,“ sögðu þeir Hafliði og Arnar.
 
Nemandi leitar að leka í kælikerfi. Ljósm. Hafliði HinrikssonNemandi leitar að leka í kælikerfi. Ljósm. Hafliði Hinriksson

„Þetta lítur vel út“

Polar AmaroqPolar AmaroqGrænlenska uppsjávarskipið Polar Amaroq kom til Neskaupstaðar í nótt að loknum loðnuleitarleiðangri sem hófst sl. föstudag. Geir Zoëga skipstjóri segir að nú sé búið að senda Hafrannsóknastofnun sýni og önnur gögn úr leiðangrinum og spennandi verði að heyra hvernig þau verði metin. „Eins og ég hef sagt þá lítur þetta vel út. Það var mikið að sjá og loðnan er stór og falleg,“ sagði Geir.
 
Að sögn Geirs mun Polar Amaroq væntanlega halda til kolmunnaveiða í færeysku lögsögunni annað kvöld. „Við eigum eftir einn kolmunnatúr en að honum loknum værum við svo sannarlega tilbúnir að fara í aðra loðnuleit. Mér finnst bráðskemmtilegt að leita að loðnunni og það er svo spennandi. Sérstaklega er þetta skemmtilegt þegar eitthvað gott kemur út úr þessu eins og ég held að hafi gerst í leitinni núna,“ sagði Geir að lokum.
 
 

Gjöf til minningar um látinn sjómann

Magnús Kristinsson afhendir Arnóri Arnórssyni, formanni Björgunarfélags Vestmannaeyja, gjöfinaMagnús Kristinsson afhendir Arnóri Arnórssyni, formanni Björgunarfélags Vestmannaeyja, gjöfinaFyrir nokkru afhenti Magnús Kristinsson, fyrrverandi framkvæmdastjóri útgerðarfélagsins Bergs-Hugins í Vestmannaeyjum, Björgunarfélagi Vestmannaeyja eina milljón króna til minningar um Finn Kristján Halldórsson sjómann á Bergey VE. Finnur Kristján drukknaði fyrir 35 árum en hann var einungis 23 ára að aldri þegar hann lést.
Við afhendinguna rifjaði Magnús upp þennan sorgaratburð og sagði að útgerðin, hann sjálfur og fjölskylda hans vildu minnast Finns Kristjáns heitins og það væri best gert með því að styðja við bakið á Björgunarfélaginu.
 
Arnór Arnórsson formaður Björgunarfélags Vestmannaeyja veitti gjöfinni móttöku. Í þakkarræðu gat hann þess að þetta væri ekki í fyrsta sinn sem Björgunarfélagið nyti myndarlegra styrkja frá Bergi-Hugin og þætti félagsmönnum afar vænt um þann hlýhug sem fram kæmi með gjöfinni.
 
 

Stór og falleg loðna að ganga inn í íslenska lögsögu

Grænlenska skipið Polar Amaroq leitar nú að loðnu norður af landinuGrænlenska skipið Polar Amaroq leitar nú að loðnu norður af landinuGrænlenska uppsjávarskipið Polar Amaroq hélt til loðnuleitar sl. föstudag, en það eru Samtök fyrirtækja í sjávarútvegi sem standa fyrir leitinni. Mun leitarleiðangurinn taka tæplega viku. Heimasíðan ræddi við Geir Zoëga skipstjóra skömmu fyrir hádegi en þá var verið að taka sýni norðaustur af Kolbeinsey. „Þessi leiðangur er farinn í nánu samráði við Hafrannsóknastofnun en þó er enginn fulltrúi frá stofnuninni um borð. Við tökum sýni og könnum þau og frystum einnig sýni fyrir stofnunina. Hafrannsóknastofnun fær öll gögn leiðangursins þannig að allt er gert eins og um hefðbundna vetrarmælingu sé að ræða. Við hófum leitina norðvestur af Straumnesi en síðan eru farnir ákveðnir leggir austur með kantinum. Það var full ástæða til að leita núna enda hafa borist heilmiklar loðnufréttir frá togurum sem hafa verið að veiðum á svæðinu. Við fundum strax loðnu. Hún var dálítið blönduð fyrst en fljótlega var einungis um að ræða stóra kynþroska loðnu. Það hefur semsagt verið loðna á 180 sjómílna belti sem við höfum nú farið yfir og inn á milli hafa verið góðar torfur. Loðnan kemur að norðan og virðist vera að ganga upp að landinu í verulegu magni. Þetta ætti ekki að koma á óvart og er í góðum takti við haustmælinguna 2019. Ég hef verið bjartsýnn á loðnuvertíð í vetur og nú hef ég góð rök fyrir bjartsýninni. Þetta lítur bara afskaplega vel út,“segir Geir.

Með fullt skip að afloknum brælutúr

Bergey VE kom til hafnar í Vestmannaeyjum í morgun með fullfermi. Ljósm. Guðmundur AlfreðssonBergey VE kom til hafnar í Vestmannaeyjum í morgun með fullfermi. Ljósm. Guðmundur AlfreðssonÍsfisktogarinn Bergey VE lagðist að bryggju í Vestmannaeyjum í morgun með fullfermi og var uppistaða aflans ufsi. Jón Valgeirsson skipstjóri segir að túrinn hafi einkennst af brælu. „Það gekk vel að veiða ef tekið er tillit til þess að við vorum á sífelldum flótta undan veðri. Við byrjuðum í Sláturhúsinu og síðan færðum við okkur vestur á Öræfagrunn, Kötlugrunn og loks í Reynisdýpið. Það var ekkert hægt að kvarta undan aflanum en veðrið hefði mátt vera miklu betra. Aflanum verður landað í dag og veðurútlit mun síðan hafa mikið að segja um framhaldið,“ segir Jón.
 
Systurskipið Vestmannaey VE hefur verið að karfaveiðum fyrir sunnan og vestan Eyjar. Afli hefur verið ágætur á daginn en lélegur yfir nóttina. Gert er ráð fyrir að skipið fylli í kvöld og landi í Eyjum. 
 
 

Norskir fiskframleiðendur vilja sóttkvíarhótel á viðráðanlegu verði

Norskir fiskframleiðendur vilja sóttkvíarhótel á viðráðanlegu verðiÞorskvertíðin við Lofoten og Vesterȧlen í Noregi mun hefjast fljótlega á nýju ári og þá mun erlent starfsfólk streyma til landsins. Gert er ráð fyrir að fiskvinnslufyrirtækin á vertíðarsvæðinu þurfi að ráða allt að 4.000 manns til starfa og verður vart annað séð en að það starfsfólk muni koma erlendis frá. Að vísu er atvinnuleysi umtalsvert í Noregi en talið er að erfitt muni reynast að fá Norðmenn til að koma til starfa á vertíðarsvæðinu auk þess sem störf við fiskvinnsluna reyna á líkamlega og þykja því ekki girnileg.
 
Gert er ráð fyrir að erlent starfsfólk fari í sýnatöku við komuna til landsins og ef sýnið er neikvætt þarf fólkið að fara í tíu daga sóttkví áður en það getur hafið störf. Í sóttkvínni þarf viðkomandi að dveljast í einstaklingsherbergi sem gera má ráð fyrir að yrði þá oftast í verbúð viðkomandi fyrirtækis. Samtök fiskframleiðenda í Noregi sér galla á þessu fyrirkomulagi og telur að heppilegra sé að fólkið dvelji í þessa tíu daga á sérstökum sóttkvíarhótelum sem starfrækt yrðu við alþjóðaflugvöllinn í Gardermoen í nágrenni Osló og við landamærin þar sem verkafólkið kæmi landleiðina til Noregs. Telja samtökin að erfitt yrði fyrir starfsfólkið að dvelja í sóttkvínni í verbúð í litlu samfélagi þar sem hætta væri á að það yrði litið hornauga. Geir Ove Ystmark, framkvæmdastjóri Samtaka fiskframleiðenda, telur eðlilegt að ríkið styrki dvöl erlenda starfsfólkisins á slíkum sóttkvíarhótelum. Segir Ystmark að þegar hafi orðið vart við að íbúar í sjávarbyggðunum líti erlent starfsfólk fiskvinnslufyrirtækja hornauga jafnvel þó að starfsfólkið hafi fasta búsetu í Noregi. Hann hafi því verulegar áhyggjur af stöðu mála þegar mikill fjöldi starfsfólks komi erlendis frá við upphaf vertíðar og mikilvægt sé þá að unnt sé að upplýsa íbúana um að allt þetta fólk hafi farið í sýnatöku og sóttkví áður en það kom á staðinn.
 
Fram kemur í máli Ystmarks að nauðsynlegt sé að dvöl erlenda starfsfólksins á sóttkvíarhótelum verði fyrirtækjunum ekki alltof kostnaðarsöm og þurfi ríkið því að taka meiri þátt í kostnaði en gert hefur verið ráð fyrir. Þá hefur hann einnig áhyggjur af því að hótelin muni alls ekki geta rúmað allan þann fjölda starfsfólks sem þarf að fara í sóttkví við komuna til landsins.
 
(Fréttin birtist í Fiskeribladet)

Vinnsla í frystihúsinu á Seyðisfirði gengur vel

Vinnsla í frystihúsinu á Seyðisfirði. Ljósm. Ómar BogasonVinnsla í frystihúsinu á Seyðisfirði. Ljósm. Ómar BogasonVinnsla í frystihúsi Síldarvinnslunnar á Seyðisfirði hefur gengið vel að undanförnu. Ýmsar jákvæðar breytingar hafa átt sér stað og þá er húsið fullmannað, en heldur erfiðlega gekk að fá fólk til starfa sl. haust. Heimasíðan ræddi við Róbert Inga Tómasson framleiðslustjóra og spurði hvaða breytingar hefðu átt sér stað á starfseminni að undanförnu. „Það er ýmislegt sem veldur því að starfsemin í frystihúsinu hefur gengið vel síðustu mánuði. Í fyrsta lagi ber að nefna bættan vélbúnað. Hér var tekin í notkun flokkunarvél sem eykur afköst við pökkun og einnig hausari. Þessi nýi vélbúnaður er farinn að virka afar vel. Í öðru lagi höfum við verið að þróa breytingar á framleiðslunni sem virðast hafa tekist vel og er þá fyrst og fremst verið að bæta nýtingu hráefnisins. Í þriðja lagi hefur hráefnið sem unnið hefur verið reynst vera afar gott, en togarinn Gullver sér húsinu að mestu fyrir hráefni. Ný krapavél var sett í Gullver sl. sumar og hefur tilkoma hennar aukið gæði hráefnisins til muna og gefið kost á betri nýtingu þess. Í fjórða lagi hefur það gerst að húsið er fullmannað en það gekk erfiðlega að ráða fólk að afloknu sumarfríi. Nú síðustu vikurnar hafa fyrirspurnir um störf hins vegar aukist og er það í samræmi við það atvinnuástand sem ríkir í landinu vegna covid. Mestu máli skiptir þó hvað okkar góða starfsfólk er tilbúið að taka þátt í þeim breytingum sem gerðar hafa verið og vinna í nýju starfsumhverfi. Auðvitað eru allir þreyttir á ástandinu og starfsumhverfið er allt annað en það var fyrir faraldurinn. Núna er starfsfólkinu til dæmis skipt upp í hópa sem umgangast ekki hver annan og búningsklefa og kaffistofu er skipt upp. Það er allt gert til að forðast kórónuveiruna. Á heildina litið hefur þróunin hjá okkur í frystihúsinu verið jákvæð og það er ánægjulegt,“ segir Róbert Ingi.

Börkur og Beitir með íslenska sumargotssíld

Beitir NK og Börkur NK í Norðfjarðarhöfn í morgun. Ljósm. Smári GeirssonBeitir NK og Börkur NK í Norðfjarðarhöfn í morgun.
Ljósm. Smári Geirsson
Börkur NK kom til Neskaupstaðar í fyrrinótt með rúmlega 1.000 tonn af íslenskri sumargotssíld. Vinnsla á síldinni hófst í gærmorgun í fiskiðjuveri Síldarvinnslunnar. Heimasíðan ræddi við Hjörvar Hjálmarsson skipstjóra á Berki og spurði fyrst hvar síldin hefði fengist. „Við fengum síldina í fjórum holum á tveimur dögum í Faxadýpinu. Minnsta holið var 135 tonn en stærsta 430 tonn. Þetta er síld sem er á bilinu 300-320 grömm, en stærri síldin fékkst seinni daginn sem veitt var. Það má segja að þarna hafi verið kroppveiði og það var svolítið af síld að sjá þegar leið á túrinn,“ segir Hjörvar.
 
Beitir NK kom síðan til Neskaupstaðar í morgun og er hann einnig með rúmlega 1.000 tonn af sumargotssíld. Mun vinnsla á afla hans hefjast strax og vinnslu á afla Barkar lýkur. Tómas Kárason skipstjóri segir að aflinn hafi fengist í fimm holum í Faxadýpinu. „Holin voru misjafnlega stór eða frá 150 tonnum og upp í 320 tonn. Við vorum heppnir með veður þannig að þetta gekk bara vel. Á næturnar fæst hrein síld, en í dagholunum þegar dregið er við botn er aflinn blandaður spærlingi,“ segir Tómas.
 
Ekki er gert ráð fyrir að Börkur og Beitir haldi áfram síldveiðum og er kolmunnaveiði í færeyskri lögsögu næst á dagskrá hjá þeim. Munu skipin skipta um veiðarfæri og halda á kolmunnamiðin að lokinni löndun á síldinni.

Bjarni Ólafsson heldur til kolmunnaveiða

Bjarni Ólafsson AK er að hefja kolmunnaveiðar í færeyskri lögsögu. Ljósm. Smári GeirssonBjarni Ólafsson AK er að hefja kolmunnaveiðar í færeyskri lögsögu. Ljósm. Smári GeirssonBjarni Ólafsson AK heldur til kolmunnaveiða í færeyskri lögsögu í dag. Í tilefni af því sló heimasíðan á þráðinn til Runólfs Runólfssonar skipstjóra. „Við munum halda til veiða í dag en oft hefur veiðin í færeysku lögsögunni verið að byrja um þetta leyti. Færeysk skip hafa að undanförnu verið að fá þarna smáan kolmunna en sá stærri er væntanlega handan við hornið. Á undanförnum árum hefur veiðin oft verið góð á þessum árstíma en svo var þó ekki í fyrra enda alltaf vitlaust veður. Við gerum ráð fyrir að leggja stund á þessar veiðar fram að jólum eða á meðan kvóti er til staðar. Menn eru bara bjartsýnir á veiðarnar. Það er þó fyrirsjáanlegt að veðrið verður slæmt síðustu daga þessarar viku en síðan mun það ganga niður eins og alltaf,“ segir Runólfur.

 

 

Togaralandanir á sunnudegi

Bergey VE að toga. Ljósm. Egill Guðni GuðnasonBergey VE að toga. Ljósm. Egill Guðni GuðnasonÍsfisktogararnir Gullver NS, Vestmannaey VE og Bergey VE lönduðu allir í gær. Gullver landaði á Seyðisfirði en Vestmannaey og Bergey í Neskaupstað. Afli Gullvers var 95 tonn en afli Vestmannaeyjar rúm 50 tonn og Bergeyjar 62 tonn. Öll skipin héldu út til veiða á ný strax að löndun lokinni. Gert er ráð fyrir að Vestmannaey og Bergey haldi suður fyrir land og verður lögð áhersla á að skipin veiði annað en þorsk á næstunni. Heimasíðan ræddi við Rúnar L. Gunnarsson skipstjóra á Gullver í morgun en þá var skipið statt í brælu úti í Seyðisfjarðardýpi. „Síðasti túr gekk alveg þokkalega. Við byrjuðum að vísu í Berufjarðarálnum í leit að karfa en þar var sannast sagna ekkert að hafa. Síðan vorum við mest á Fæti og Herðablaði og þar fengum við þorsk og einnig dálítið af ýsu. Nú erum við í leiðindaveðri og þannig verður það í dag, en síðan mun það væntanlega lagast,“ segir Rúnar.

Heimasíðan ræddi einnig við Egil Guðna Guðnason stýrimann á Vestmannaey í morgun. „Eftir löndun í gær héldum við suðureftir og nú erum við í Sláturhúsinu úti fyrir Mýrunum í leiðindaveðri að reyna að veiða kola. Hér er ástæða til að reyna enda erum við í skjóli af jöklinum. Áformað er að leggja áherslu á annað en þorsk næstu daga og síðan verður væntanlega landað í Eyjum. Bergey er á alveg sama róli og við,“ segir Egill Guðni.

Íslensk sumargotssíld

Börkur NK hélt til veiða á íslenskri sumargotssíld í gær. Ljósm. Smári GeirssonBörkur NK hélt til veiða á íslenskri sumargotssíld í gær.
Ljósm. Smári Geirsson
Börkur NK hélt til veiða á íslenskri sumargotssíld í gærdag. Í tilefni af því ræddi heimasíðan stuttlega við Hjörvar Hjálmarsson skipstjóra. „Við gerum einungis ráð fyrir einum túr vestur fyrir land. Mér skilst að veiðin á þessari síld hafi verið í Faxadýpi og Jökuldýpinu að undanförnu. Gert er ráð fyrir að Beitir fari einnig í einn túr. Íslensk sumargotssíld hefur undanfarin ár haldið sig á þessu svæði og vonandi munum við koma með góðan afla til vinnslu í Neskaupstað eftir helgina. Það er alveg kominn tími til að þessi síldarstofn fari að rétta úr kútnum en undanfarin ár hefur þessi síld einkum verið veidd þarna fyrir vestan land. Að loknum þessum síldartúr geri ég ráð fyrir að farið verði að hyggja að kolmunnaveiðum,“ segir Hjörvar.

 

 

Undirflokkar