Kolmunnamok

Beitir NK með 600 tonna hol á síðunni. Ljósm. Helgi Freyr ÓlasonBeitir NK með 600 tonna hol á síðunni.
Ljósm. Helgi Freyr Ólason
Fyrir og um nýliðna helgi var mokveiði hjá kolmunnaskipunum í færeysku lögsögunni. Skipin voru gjarnan að fylla sig á einum sólarhring eða svo og þurfti að hægja á veiðunum vegna þess að kolmunninn er viðkvæmt hráefni. Fiskurinn er kældur um borð í skipunum en hann geymist ekki vel eftir löndun. Burðargeta þeirra skipa sem landa hjá Síldarvinnslunni er um 12.800 tonn en samanlögð afkastageta verksmiðjanna í Neskaupstað og á Seyðisfirði er 2.500 tonn á sólarhring. Kolmunninn er þess eðlis að afar mikilvægt er að stilla saman veiðar og vinnslu á honum.
 
Bæði Gunnar Sverrisson verksmiðjustjóri á Seyðisfirði og Hafþór Eiríksson verksmiðjustjóri í Neskaupstað segja að vinnslan á kolmunnanum gangi mjög vel, en mikilvægt sé að hráefnið sé unnið sem fyrst eftir löndun. Á Seyðisfirði landaði Beitir NK 3.000 tonnum á mánudaginn en á undan honum lönduðu Margrét EA 2.100 tonnum og Vilhelm Þorsteinsson EA 2.100 tonnum. Í Neskaupstað er Vilhelm Þorsteinsson EA að landa 2.100 tonnum en á undan honum lönduðu Börkur NK 2.330 tonnum og Bjarni Ólafsson AK 1.830 tonnum.

Starfslokanámskeið

StarfslokanámskeiðNæstkomandi miðvikudag, 2. maí, verður haldið starfslokanámskeið á vegum Síldarvinnslunnar. Það er ætlað starfsmönnum í Neskaupstað sem eru orðnir 62 ára eða eldri. Námskeiðið verður haldið í Kreml og stendur frá kl. 13.00 – 16.00. Starfsmenn geta skráð námsskeiðssetuna sem vinnutíma.
 
Námskeiðið fjallar fyrst og fremst um fjárhagslega hlið starfsloka, en flókið getur verið að átta sig á þeim málum og ekki ráð nema í tíma sé tekið. Námskeiðið er haldið á vegum Félagsmálaskóla alþýðu og leiðbeinandi er Guðmundur Hilmarsson sem hefur mikla reynslu af slíku námskeiðahaldi. Námskeiðið er hluti af fræðsluáætlun Síldarvinnslunnar og sér Austurbrú um skipulag og framkvæmd þess. Efnistökin eru þessi:
 
Farið er yfir greiðslu ellilífeyris frá almannatryggingum og hvernig skattskyldar tekjur geta haft áhrif á ellilífeyri. Eftrtöldum spurningum verður svarað:
 
•  Hvernig er lífeyrir frá almennum lífeyrissjóðum uppbyggður, hver er upphæð lífeyris ?
•  Hvenær er hægt að hefja töku lífeyris frá almannatryggingum og lífeyrissjóðum ?
•  Hefur ellilífeyrir frá lífeyrissjóði áhrif á lífeyri frá almannatryggingum ?
•  Ef greitt hefur verið í séreignasjóð, hvenær er best að taka þann lífeyri ?
 
Áhugasamir geta skráð sig á námskeiðið með því að senda tölvupóst á This email address is being protected from spambots. You need JavaScript enabled to view it. eða með því að skrá sig á skráningarblöð sem liggja frammi á skrifstofu, í fiskiðjuveri og í fiskimjölsverksmiðju í Neskaupstað.
 
Sambærileg námskeið verða í boði fyrir starfsmenn Síldarvinnslunnar á Seyðisfirði og í Helguvík en þau verða auglýst síðar.
 
Sjómenn á skipum Síldarvinnslunnar sem ekki eiga möguleika á að sækja umrædd námskeið en hefðu áhuga á því eru beðnir um að hafa samband við Hákon Ernuson starfsmannastjóra.

Prentuð útgáfa starfsmannastefnunnar

Starfsmannastefna 2018Nú hefur starfsmannastefna Síldavinnslunnar verið gefin út á prentuðu formi. Frá því að hún tók gildi árið 2016 hefur hún eingöngu verið aðgengileg á heimasíðu fyrirtækisins. Starfsmannastefnan útskýrir hvernig fyrirtækið hyggst vinna að því að tryggja og auka starfsánægju og velferð starfsmanna. Meginatriði stefnunnar eru eftirfarandi:
Síldarvinnslan er hátæknivætt sjávarútvegsfyrirtæki í fremstu röð. Slíkur rekstur stendur og fellur með þekkingu og frammistöðu starfsfólks. Það skiptir Síldarvinnsluna því miklu máli að hafa á að skipa góðu og ánægðu starfsfólki. Í því skyni er stefnt að því að bjóða upp á vinnuumhverfi sem einkennist af hvatningu, öryggi og góðum samskiptum. Fyrirtækið vill bjóða fólki upp á:
 
  • vinnuumhverfi þar sem stjórnendur og starfsfólk vinnur að því í sameiningu að auka sífellt öryggi, velferð og árangur
  • trygga vinnu og góða afkomu
  • vinnu þar sem starfsfólk er hvatt til að gera sitt besta og efla stöðugt þekkingu sína og færni
  • sveigjanleika og jafnvægi milli vinnu og einkalífs eins og frekast er unnt
  • samskipti sem einkennast af samráði og virðingu
  • jafnrétti til launa og tækifæra
 
Starfsmannastefnan er prentuð á íslensku, ensku og pólsku og verður hún aðgengileg öllum á starfsstöðvum fyrirtækisins innan skamms.

25.000 tonn af kolmunna frá miðjum apríl

Fiskimjölsverksmiðja Síldarvinnslunnar á Seyðisfirði. Ljósm. Hákon ErnusonFiskimjölsverksmiðja Síldarvinnslunnar á Seyðisfirði.
Ljósm. Hákon Ernuson
Íslensk skip hófu veiðar á kolmunna í færeyskri lögsögu snemma í þessum mánuði. Fyrsta kolmunnanum eftir að veiðarnar hófust var landað í fiskimjölsverksmiðju Síldarvinnslunnar á Seyðisfirði 12. apríl og í verksmiðjuna í Neskaupstað daginn eftir. Nú hefur verksmiðjan á Seyðisfirði tekið á móti 11.800 tonnum en Margrét EA landaði þar tæpum 1.900 tonnum sl. laugardag og Beitir NK tæplega 3.100 tonnum sl. nótt. Verksmiðjan í Neskaupstað hefur tekið á móti 13.350 tonnum en Börkur NK er að landa þar 2.300 tonnum. Samtals hafa verksmiðjurnar því tekið á móti 25.150 tonnum frá því að veiðarnar í færeysku lögsögunni hófust en fyrr á árinu höfðu þær tekið á móti kolmunna sem veiddur var vestur af Írlandi.
 
Hafþór Eiríksson verksmiðjustjóri í Neskaupstað segir að kolmunninn sé gott hráefni til vinnslu og undir það tekur Gunnar Sverrisson verksmiðjustjóri á Seyðisfirði. „Það gengur mjög vel að vinna kolmunnann og vinnslan hefur verið samfelld að undanförnu. Við höfum stundum þurft að hægja dálítið á til að hafa vinnsluna samfellda. Þegar um kolmunna er að ræða skiptir kæling á aflanum um borð í skipunum öllu máli. Kolmunninn er viðkvæmt hráefni og það er ekki gott að geyma hann lengi eftir löndun, hann skemmist mjög hratt.  Það skiptir því miklu að fá hráefnið vel kælt úr skipunum og vinna það strax,“ segir Gunnar.

Blængur í Barentshafið

Blængur NK er tilbúinn í Barentshafið. Ljósm. Hákon ErnusonBlængur NK er tilbúinn í Barentshafið. Ljósm. Hákon ErnusonFrystitogarinn Blængur NK kom til löndunar í Neskaupstað sl. laugardag. Afli skipsins var 365 tonn upp úr sjó eða 15.000 kassar. Verðmæti aflans er um 70 milljónir króna. Bjarni Ólafur Hjálmarsson var skipstjóri í veiðiferðinni og segir hann að hún hafi gengið mjög vel. „Við vorum að veiðum á Reykjaneshrygg og aflinn var gullkarfi og djúpkarfi. Það fiskaðist afar vel allan túrinn en hann tók 14 daga höfn í höfn þannig að við vorum einungis 10-11 daga að veiðum,“ segir Bjarni Ólafur.
 
Í kvöld er ráðgert að Blængur haldi til veiða í Barentshafið. Skipstjóri í þeirri veiðiferð verður Theodór Haraldsson. Theodór segir að mönnum lítist vel á Barentshafsveiðarnar. „Þetta verður spennandi enda hefur yfirleitt verið mjög góð þorskveiði á þessum slóðum um þetta leyti árs. Við ættum að vera komnir á miðin á laugardag og það er áætlað að vera þarna að veiðum fram undir sjómannadag. Um borð verður 26 manna áhöfn auk rússnesks eftirlitsmanns, segir Theodór.
 

Samfelld kolmunnavinnsla í Neskaupstað og á Seyðisfirði

Fiskimjölsverksmiðja Síldarvinnslunnar í Neskaupstað. Ljósm. Smári GeirssonFiskimjölsverksmiðja Síldarvinnslunnar í Neskaupstað.
Ljósm. Smári Geirsson
Það er áframhald á góðri kolmunnaveiði í færeysku lögsögunni og þessa dagana er samfelld vinnsla í fiskimjölsverksmiðjum Síldarvinnslunnar í Neskaupstað og á Seyðisfirði. Í Neskaupstað var lokið við að landa fullfermi úr Berki NK í fyrrinótt og verið er að ljúka við að landa 1.700 tonnum úr Hákoni EA á Seyðisfirði. Vilhelm Þorsteinsson EA er á landleið til Neskaupstaðar með 2.100 tonn.
 
Skipin hafa verið að fá allt upp í 600-650 tonna hol þegar best lætur og veður hefur að mestu verið gott frá því að veiðar hófust.

Verkefnastjóri Háskólaseturs Austfjarða ráðinn

Christoph MerschbrockChristoph MerschbrockAð undanförnu hefur verið unnið að því að koma á fót Háskólasetri Austfjarða í nánu samstarfi við Háskólann á Akureyri. Síldarvinnslan hefur tekið virkan þátt í undirbúningsstarfinu og hefur Hákon Ernuson starfsmannastjóri fyrirtækisins átt sæti í stýrihópi um Háskólasetrið.
 
Nú hefur verkefnastjóri fyrir Háskólasetrið verið ráðinn. Það er Christoph Merschbrock og mun hann hefja störf 1. ágúst nk. Christoph lauk Dipl.-Ing. í byggingaverkfræði frá Hochschule Ostwestfalen-Lippe í Þýskalandi og meistaragráðu í byggingaverkfræði frá Háskólanum í Reykjavík. Auk þess hefur hann lokið doktorsprófi í Information Systems frá Háskólanum í Agder í Noregi.
 
Christoph hefur starfað sem lektor í Háskólanum í Jönköping í Svíþjóð en var áður lektor í Oslo and Akershus University College. Hann starfaði sem tæknimaður og verkefnastjóri hjá Ístaki á árunum 2005-2010. Samhliða störfum sínum við Háskólasetur Austfjarða mun Christoph sinna rannsóknastörfum og kennslu við Háskólann í Jönköping.
 
Christoph Merschbrock er kvæntur Svölu Skúladóttur frá Neskaupstað. Þau eiga þrjú börn.

Ágætis kropp í kolmunnanum

Löndun að ljúka úr Beiti NK í morgun. Ljósm. Hákon ErnusonLöndun að ljúka úr Beiti NK í morgun. Ljósm. Hákon ErnusonBeitir NK kom til Neskaupstaðar í gær og landaði 3.003 tonnum af kolmunna sem fékkst í færeysku lögsögunni. Heimasíðan hafði samband við Hjörvar Hjálmarsson skipstjóra á Berki NK í morgun og sagði hann að það væri ágætis kropp í kolmunnanum. Er Börkur kominn með 850 tonn og er það sólarhringsafli. Aflinn fékkst í tveimur holum. Bjarni Ólafsson AK er á miðunum og við það að fylla.
 
Hafþór Eiríksson, verksmiðjustjóri í Neskaupstað, segir að kolmunninn sé ágætt hráefni fyrir fiskimjölsverksmiðjurnar. „Aflinn er vel kældur um borð í skipunum og skipin fá í sig á tiltölulega stuttum tíma. Aflinn er því nokkuð ferskur þegar honum er landað, en fiskurinn er hins vegar heldur magur á þessum árstíma,“ segir Hafþór.

Eyjarnar gera það gott

Bergey VE heldur til veiða. Ljósm. Guðmundur AlfreðssonBergey VE heldur til veiða. Ljósm. Guðmundur AlfreðssonVestmannaey VE og Bergey VE hafa fiskað afar vel það sem af er ári. Afli skipanna var 2.900 tonn af slægðum fiski fyrstu þrjá mánuði ársins og var aflaverðmætið um 640 milljónir króna. Er þetta mesti afli sem skipin hafa fært að landi á þremur fyrstu mánuðum árs en það ár sem næst kemst hvað afla varðar er 2009 en þá var afli skipanna rúmlega 2.500 tonn. Hvað aflaverðmæti varðar kemst árið 2015 næst en þá var það rúmlega 630 milljónir. Það er Bergur-Huginn, dótturfyrirtæki Síldarvinnslunnar,  sem gerir út Eyjarnar.
 
Í marsmánuði sl. veiddu skipin tæplega 1.140 tonn en þau voru hvort um sig einungis 16 daga á sjó, þannig að meðalafli hvors skips var 36 tonn á dag. Aflasamsetningin í marsmánuði er býsna fjölbreytt en skipin komu alls með 22 tegundir að landi. Þorskur var 35% aflans, ýsa 23%, ufsi 14%, karfi 10% og lýsa 3,5%.
 
Frá því í febrúarmánuði hefur helsta veiðisvæði skipanna verið í kringum Vestmannaeyjar og því hefur ekki þurft að sigla langt á miðin. Í marsmánuði fór hvort skip tvær veiðiferðir í viku og tók hver veiðiferð að meðaltali innan við tvo sólarhringa. Ekki var óalgengt að landað væri fullfermi að lokinni 30 tíma veiðiferð.

Skipin landa kolmunna

Beitir NK með 600 tonna kolmunnahol í gær. Ljósm. Helgi Freyr ÓlasonBeitir NK með 600 tonna kolmunnahol í gær.
Ljósm. Helgi Freyr Ólason
Bjarni Ólafsson AK kom með 1.800 tonn af kolmunna til Seyðisfjarðar í gærkvöldi og í morgun kom Börkur NK með rúmlega 2.100 tonn til Neskaupstaðar. Hákon EA er síðan væntanlegur til Seyðisfjarðar í kvöld með um 1.700 tonn. Í morgun var Beitir NK kominn með 2.100 tonn og var að toga. 
 
Heimasíðan ræddi við Gísla Runólfsson, skipstjóra á Bjarna Ólafssyni, og sagði hann að kolmunnaveiðin í færeysku lögsögunni færi mjög vel af stað. „Hjá okkur gekk afar vel að fá í bátinn. Við fengum þessi 1.800 tonn í þremur holum og toguðum fyrst í 14 tíma, síðan í 7 og loks í 12. Það verður að segjast að þetta er góð veiði og byrjunin lofar góðu. Það var töluvert að sjá á veiðislóðinni en fiskurinn var ekki á stóru svæði. Það var prýðisveður á meðan við vorum á miðunum og það skiptir alltaf miklu máli. Fiskurinn sem fæst er líka góður og strákarnir segja að hann sé stærri en í fyrra,“ sagði Gísli.

Vinnsla á grálúðu hafin í fiskiðjuverinu

Grálúðuvinnsla í fiskiðjuverinu. Ljósm. Karl Rúnar RóbertssonGrálúðuvinnsla í fiskiðjuverinu.
Ljósm. Karl Rúnar Róbertsson
Í gær hófst vinnsla á grálúðu í fiskiðjuveri Síldarvinnslunnar í Neskaupstað. Alls bárust 50 tonn til vinnslu en það er Anna EA sem veiðir grálúðuna í net lengst norður af landinu og ganga veiðarnar vel. Heimasíðan ræddi við Eyðun Simonsen verkstjóra og spurði hvernig vinnslan gengi. „Þetta er í fyrsta sinn sem grálúða er unnin hér í fiskiðjuverinu en þetta fer vel af stað. Við fengum mann frá Dalvík, sem þekkir vel til þessarar vinnslu, til okkar í gær og hann skoðaði aðstæður og leiðbeindi okkur. Við reiknum með að klára þennan fyrsta skammt fyrir helgi en síðan er von á öðrum skammti í næstu viku. Við eigum að fá grálúðuna sporðskorna en síðan hausskerum við fiskinn og slógdrögum og síðan er hann frystur. Við flokkum grálúðuna í þrjá flokka eftir stærð og síðan eru hausarnir einnig flokkaðir og frystir. Þetta er gott verkefni fyrir okkur á meðan hlé er á uppsjávarvinnslunni,“ sagði Eyðun.

 

 

 

 

Gullver fiskaði vel í marsmánuði

Gullver NS í höfn á Seyðisfirði. Ljósm. Ómar BogasonGullver NS í höfn á Seyðisfirði. Ljósm. Ómar BogasonÍsfisktogarinn Gullver NS kom til löndunar á Seyðisfirði í morgun með 102 tonn og er þorskur uppistaða aflans. Marsmánuður var góður hjá Gullver og var afli togarans 550 tonn í fimm veiðiferðum. Verðmæti aflans í mánuðinum reyndist vera tæplega 110 milljónir króna. Rúnar Gunnarsson skipstjóri segir að vel hafi gengið að fiska í öllum marsmánuði og einnig það sem af er apríl. „Við vorum að veiða í Hvalbakshallinu í þessum túr en í síðustu þremur túrum þar á undan vorum við á Selvogsbanka. Aflinn hefur verið jafn og góður og fiskurinn sem fæst stór og fallegur. Það skiptir miklu máli að veður hefur verið gott að undanförnu, en veðurfarið í vetur reyndist okkur oft býsna erfitt,“ sagði Rúnar.

Fínasta kolmunnaveiði

Beitir NK að toga í færeysku lögsögunni í dag. Ljósm. Helgi Freyr ÓlasonBeitir NK að toga í færeysku lögsögunni í dag.
Ljósm. Helgi Freyr Ólason
Kolmunnaveiðin fer vel af stað í færeysku lögsögunni. Bjarni Ólafsson fékk 580 tonn í fyrsta holi en togað var í 13 tíma. Hákon EA fékk um 500 tonn eftir 16 tíma og Börkur NK fékk 600 tonn eftir 15 tíma. Hér er um að ræða fínustu veiði og það tekur væntanlega ekki langan tíma að fá í skipin ef framhald verður á henni. Heimasíðan ræddi við Hjörvar Hjálmarsson skipstjóra á Berki eftir hádegið í dag og var hann hinn ánægðasti.“Þetta byrjar vel og heldur fyrr en í fyrra. Þá voru fyrstu bátar að byrja að toga 9. og 10. apríl. Fyrsta skipið á miðin núna var Hoffell SU og þeir fylltu í fjórum holum og lögðu af stað í land í nótt. Við vorum að klára að dæla úr öðru holinu okkar, togað var í 12 tíma og það gaf 460 tonn þannig að við erum komnir með tæp 1.100 tonn. Það er ekkert sérstaklega mikið að sjá hérna, en það er ágætis líf á kafla og það gefur vel í trollið. Menn hljóta að vera ánægðir með þessa byrjun á veiðunum,“ sagði Hjörvar.
 
Beitir NK er með sitt fyrsta hol þegar þetta er skrifað.
 
 
 
 

Kolmunnaflotinn heldur til veiða

Kolmunnaveiðar eru hafnar í færeysku lögsögunni. Ljósm. Helgi Freyr ÓlasonKolmunnaveiðar eru hafnar í færeysku lögsögunni.
Ljósm. Helgi Freyr Ólason
Kolmunnaskipin sem lágu í Norðfjarðarhöfn yfir páskana héldu til veiða um nýliðna helgi. Miðað við síðustu ár gætu kolmunnaveiðar í færeysku lögsögunni verið að hefjast um þessar mundir en fiskurinn er að ganga í norður úr skosku lögsögunni. Heimasíðan ræddi við Ólaf Gunnar Guðnason, stýrimann á Berki NK, í morgun og spurðist frétta. „Við köstuðum klukkan þrjú í nótt og það er eitthvað rag að sjá hérna. Hoffell SU er búið að vera hér á miðunum í tvo daga og þeir hafa tvisvar tekið einhver 300 tonn. Það tekur einhverja daga að fá verulegan kraft í þetta en fiskurinn er augljóslega byrjaður að ganga inn í færeysku lögsöguna. Hér er fullt af skipum að veiðum. Auk okkar og Hoffells eru Víkingur, Bjarni Ólafsson og Hákon komin á miðin og svo er hér fullt af Færeyingum og Rússum. Vonandi kemst kraftur í þetta fljótlega,“ sagði Ólafur Gunnar.

Norsk kolmunnaskip landa á Seyðisfirði og í Neskaupstað

Beitir hol 2017 HFO

Kolmunnahol. Ljósm: Helgi Freyr Ólason

Síðustu daga hafa norsk kolmunnaskip landað á Íslandi í töluverðum mæli. Þrjú skipanna hafa landað í verksmiðjur Síldarvinnslunnar á Seyðisfirði og í Neskaupstað, samtals 5.530 tonnum. Ligrunn landaði á Seyðisfirði 1.550 tonnum á annan í páskum og sama dag landaði Knester í Neskaupstað 2.030 tonnum. Í gær landaði síðan Havskjer á Seyðisfirði 1.950 tonnum. Kolmunninn veiðist í skosku lögsögunni þar sem íslensk skip hafa ekki heimild til veiða.

                Hafþór Eiríksson, verksmiðjustjóri í Neskaupstað, segir að kolmunninn úr norsku skipunum sé gott hráefni. „Veiðin er ágæt og skipin eru fljót að fylla þannig að hráefnið er tiltölulega ferskt þegar það kemur,“ sagði Hafþór.

Góður karfatúr hjá Blængi

Landað úr Blængi NK í Neskaupstað. Ljósm. Smári GeirssonLandað úr Blængi NK í Neskaupstað. Ljósm. Smári GeirssonFrystitogarinn Blængur NK kom til Neskaupstaðar í morgun að loknum góðum karfatúr. Theodór Haraldsson skipstjóri segir að veiðiferðin hafi gengið vel í alla staði og veður hafi verið með ágætum, einkum undir lokin. „Við fórum út 9. mars og þá var farið beint vestur á Melsekk. Þar vorum við allan túrinn. Þarna var mjög góð gullkarfaveiði eins og er venjulega á þessum árstíma. Aflinn var tæplega 800 tonn upp úr sjó eða tæplega 31.000 kassar. Við millilönduðum í Hafnarfirði 23. mars 17.200 kössum og nú er verið að landa um 13.500 kössum. Þetta verður að teljast gott enda vorum við einungis 22 daga á veiðum. Þá gekk vinnslan um borð mjög vel,“ sagði Theodór.
 
Gert er ráð fyrir að Blængur láti úr höfn nk. föstudag og þá verður stefnan væntanlega á ný tekin á Melsekk.
 

Mikill afli en verðmætin minnka

Frá aðalfundi

Gunnþór B. Ingvason framkvæmdastjóri Síldarvinnslunnar fer yfir rekstur og stöðu fyrirtækisins á aðalfundinum sl. miðvikudag. Ljósm: Hákon Ernuson

                Á aðalfundi Síldarvinnslunnar sl. miðvikudag var ítarlega farið yfir rekstur fyrirtækisins og stöðu. Þá var þróun starfseminnar síðustu ár rakin og mjög áhugaverðar upplýsingar birtar. Afli skipa fyrirtækisins á árinu 2017 var mun meiri en árið áður en skýrt kom fram að verðmætin eru mun minni. Þegar þróun bolfiskveiða hjá skipum félagsins er skoðuð kemur fram að veiðarnar fóru vaxandi ár frá ári á árunum 2010- 2015 enda festi fyrirtækið kaup á bolfiskkvóta og fyrirtækjum sem réðu yfir slíkum kvóta á  á því tímabili. Á árinu 2015 var hápunkti náð hvað viðkemur verðmætum. Þá veiddu bolfiskskip Síldarvinnslunnar um 20.000 tonn og verðmæti aflans voru tæplega 6 milljarðar króna. Síðan hafa verðmætin farið minnkandi með afgerandi hætti og á síðasta ári námu þau einungis rúmlega 4 milljörðum þrátt fyrir að afli væri svipaður og á árinu 2015. Kemur þetta skýrt fram á meðfylgjandi skýringarmynd.

Veiði bolfiskskipa

                 Hvað viðkemur uppsjávarveiðunum má segja að þróunin sé svipuð hvað aflaverðmæti varðar en veiðarnar einkennast þar af meiri sveiflum. Verðmætin fóru vaxandi á árunum 2010-2013 og á árinu 2013 náðu þau 5,3 milljörðum króna. Verðmætin féllu niður í 4 milljarða árið 2014 en hækkuðu á ný upp í rúmlega 4,5 milljarða árið 2015. Eftir það hefur verðmætakúrfan sigið niður á við og á síðasta ári námu verðmætin einungis 3,7 milljörðum þrátt fyrir að aflinn væri jafn mikill og í bestu árum eins og fram kemur á meðfylgjandi skýringarmynd.

Veiði uppsjávarskipa

                Afkoma sjávarútvegsfyrirtækja og sjómanna hefur breyst í samræmi við það sem rakið hefur verið hér að framan og eins hefur þessi þróun haft mikil áhrif á afkomu þeirra sveitarfélaga sem byggja á sjávarútvegi.

Kolmunnaflotinn í höfn

Beitir NK mun væntanlega halda til kolmunnaveiða á ný fyrri hluta aprílmánaðar. Ljósm. Helgi Freyr ÓlasonBeitir NK mun væntanlega halda til kolmunnaveiða á ný fyrri
hluta aprílmánaðar. Ljósm. Helgi Freyr Ólason
Öll kolmunnaskipin sem landa hjá Síldarvinnslunni komu til hafnar fyrir helgina enda kolmunnaveiðin á miðunum vestur af Írlandi dottin niður. Eftirtalin skip lönduðu á Seyðisfirði í lok síðustu viku: Börkur NK 1.350 tonnum, Beitir NK rúmlega 300 tonnum, Margrét EA tæplega 200 tonnum og Vilhelm Þorsteinsson EA rúmlega 1.100 tonnum. Frá því um miðjan mars hefur tæplega 5.000 tonnum af kolmunna verið landað á Seyðisfirði. Hákon EA landaði 1.700 tonnum í Neskaupstað  18. mars sl. en þar hefur tæplega 2.500 tonnum verið landað í þessum mánuði.
 
Sturla Þórðarson skipstjóri á Beiti segir að gera megi ráð fyrir að nú verði hlé á kolmunnaveiðunum. „Ekki er ósennilegt að haldið verði til veiða á ný viku af apríl, en veiði hefur oft hafist í færeysku lögsögunni um miðjan aprílmánuð,“ sagði Sturla.

Sjávarútvegurinn er skattlagður langt umfram aðrar atvinnugreinar

 

orsteinnMírBaldvinsson 10 minni

Hér á eftir fer ræða sem Þorsteinn Már Baldvinsson, stjórnarformaður Síldarvinnslunnar hf., flutti á aðalfundi félagsins sl. miðvikudag. Í ræðunni tekur hann meðal annars skýr dæmi um það hvernig íslenskur sjávarútvegur er skattlagður umfram aðrar atvinnugreinar. Ræðan er hér birt í heild sinni.

Ágætu hluthafar og gestir.

Rekstur Síldarvinnslunnar gekk ágætlega á síðasta ári. Veiðar og vinnsla gengu vel og var meira veitt á síðasta ári en árið áður þrátt fyrir verkfall fyrstu tvo mánuði ársins. Þrátt fyrir meiri afla voru verðmæti minni en árið áður og sýnir það e.t.v. hversu hratt aðstæður geta breyst í sjávarútvegi og í raun í hversu síbreytilegu umhverfi við störfum. Fyrirtæki þurfa því að vera í stakk búin til að bregðast við slíkum breytingum. Það hefur Síldarvinnslan gert með því að nýta góð skilyrði undanfarinna ára til að fjárfesta í innviðum og framleiðslutækjum. Uppbygging landvinnslu undanfarin ár og fjárfestingar í uppsjávarskipum eru að skila sér. Á síðasta aðalfundi gáfum við út að ráðist yrði í endurnýjun bolfisktogaranna. Fyrstu skrefin hafa verið tekin með samkomulagi við VARD Aukra skipasmíðastöðina í Noregi um smíði tveggja 29 metra togara sem verða með heimahöfn í Vestmannaeyjum.

Síldarvinnslan fer hins vegar ekki varhluta af breytingum í rekstrarumhverfinu frekar en önnur fyrirtæki í útflutningi. Breytingar á gengi íslensku krónunnar, hækkun sumra kostnaðarliða og sveiflur í afurðarverðum úti í heimi er erfitt að stjórna og hafa áhrif á. Aftur á móti eru aðrar breytingar í umhverfi okkar sem við Íslendingar höfum stjórn á. Dæmi um það er þróun kostnaðar við eftirlitsmenn um borð í frystiskipum. Árið 2015 var kostnaður við eftirlitsmann um borð í frystiskipi 30.000 kr. á dag en er nú um 84.000 kr. á dag. Þetta er hækkun upp á 270% á tveimur árum.

Annað dæmi eru veiðigjöldin. Á fyrstu fjórum mánuðum yfirstandandi fiskveiðiárs greiddi Síldarvinnslan 250 milljónir króna í veiðigjöld. Þetta eru þrjár og hálf milljón á hverjum virkum degi en ef horft er á Norðausturkjördæmi allt eru það 15 milljónir hvern virkan dag. Veiðigjöldin taka ekki mið af aðstæðum í umhverfi okkar í dag heldur þegar aðstæður voru allt aðrar og betri. Til samanburðar borgar Orkuveita Reykjavíkur engin gjöld þrátt fyrir afnot af vatnsauðlindum en hagnaður hennar á síðasta ári nam 16,3 milljörðum króna. Í þessu sambandi má einnig nefna að húshitunarkostnaður er mjög breytilegur eins og alkunna er, en hluti landsmanna á kost á að kynda með heitu vatni sem óneitanlega er sameiginleg auðlind þjóðarinnar. Í Neskaupstað kostar til dæmis tvöfalt meira að kynda 140 fermetra hús en í Reykjavík.

Þriðja dæmið sem ég vil taka eru kolefnisgjöld. Síldarvinnslan greiddi 172 milljónir í kolefnisgjöld á síðasta ári. Til stendur að hækka gjaldið um 50%. Samkeppnisaðilar okkar í nágrannalöndunum og annars staðar í heiminum búa ekki við viðlíka skilyrði. Í raun er kolefnisgjaldið ekkert annað en skattur, enda er það greitt þó skipin séu að veiðum á alþjóðlegu hafsvæði eða í lögsögum annarra ríkja. Eins ber að nefna að flutningaskip og skemmtiferðaskip greiða ekkert kolefnisgjald því þau taka ekki olíu á Íslandi og eins greiða flugfélög nánast ekkert kolefnisgjald til íslenska ríkisins. Þá má einnig nefna að vinnuvélar og tæki sem nota svokallaða litaða olíu greiða ekki kolefnisgjald. Á þessu sést að kolefnisgjaldið er alls ekki gjald sem sett er á vegna mengunar í íslenskri lögsögu heldur skattur sem kemur lang þyngst niður á sjávarútvegnum.

Fjórða dæmið eru stimpilgjöld. Þegar Beitir var keyptur þurfti að greiða yfir 80 milljónir króna í stimpilgjöld. Það þarf hins vegar engin slík gjöld að greiða af flugvél sem keypt er til landsins, ekki heldur af flutningaskipum íslenskra skipafélaga, sem eru reyndar öll skráð erlendis, eða af vinnuvélum eða virkjunum. Hér hafa fiskiskipin algera sérstöðu og öll önnur atvinnutæki eru undanþegin stimpilgjöldum.

Fyrir utan allt það sem kemur fram í fyrrgreindri upptalningu veitir fyrirtæki eins og Síldarvinnslan mörgum atvinnu og skapar störf sem mörg hver eru vel launuð og eftirsótt. Þá kaupir Síldarvinnslan þjónustu af mörgum fyrirtækjum og hefur rutt brautina fyrir tæknifyrirtæki sem til dæmis hafa þróað búnað fyrir sjávarútveginn, fyrst á Íslandi og sem síðan hefur orðið að útflutningsvöru með afar jákvæðum áhrifum. Margfeldisáhrif fyrirtækja eins og Síldarvinnslunnar eru ótvíræð. Þrátt fyrir þetta verður að viðurkennast að sátt um greinina er vart til staðar þó hún sé skattlögð langt umfram aðrar atvinnugreinar. Þá ber að hafa í huga að íslenskur sjávarútvegur er í samkeppni við sjávarútveg annarra þjóða en erlendis finnst engin hliðstæða hvað álögur varðar. Vonandi fær íslenskur sjávarútvegur að dafna í framtíðinni og njóta sannmælis sem atvinnugrein.

Það er staðreynd að utan fjármálafyrirtækja og opinberra aðila eru fjögur sjávarútvegsfyrirtæki hæstu skattgreiðendur landsins ásamt Icelandair og Síldarvinnslan er í þeim hópi.

Góðir fundarmenn.

Á síðasta ári var haldið upp á 60 ára afmæli Síldarvinnslunnar með ýmsum hætti. Það var einstaklega ánægjulegt að njóta afmælishátíðarinnar í Póllandi og eins fengum við í hendur glæsilegt afmælisrit um sögu fyrirtækisins. Saga Síldarvinnslunnar er einstök  vegna þess hve fyrirtækið hefur varðveitt hana vel og gert hana öllum aðgengilega. Ég vil nota tækifærið og þakka Smára Geirssyni en hann hefur unnið sannkarlað þrekvirki í upplýsingaöflun, skrifum og söfnun mynda. Þakka ég honum heilshugar fyrir hans mikla starf og fyrir þetta einstaklega glæsilega verk.

Að lokum vil ég þakka stjórnendum, starfsfólki og stjórnarmönnum samstarfið á liðnu starfsári. Við getum verið stolt af þeim árangri sem Síldarvinnslan hefur náð og ég veit að Síldarvinnslan hefur á að skipa góðu starfsfólki sem mun ráða vel við þær áskoranir sem framundan eru.

Stjórnin endurkjörin

Stjórn, varastjórn og framkvæmdastjóri Síldarvinnslunnar. Talið frá vinstri: Ingi Jóhann Guðmundsson, Guðmundur R. Gíslason, Arna Bryndís Baldvins McClure, Gunnþór B. Ingvason framkvæmdastjóri, Anna Guðmundsdóttir, Þorsteinn Már Baldvinsson, Björk Þórarinsdóttir og Halldór Jónasson. Ljósm. Smári GeirssonStjórn, varastjórn og framkvæmdastjóri Síldarvinnslunnar.
Talið frá vinstri: Ingi Jóhann Guðmundsson, Guðmundur R.
Gíslason, Arna Bryndís Baldvins McClure, Gunnþór B. Ingvason
framkvæmdastjóri, Anna Guðmundsdóttir, Þorsteinn Már Baldvinsson,
Björk Þórarinsdóttir og Halldór Jónasson. Ljósm. Smári Geirsson
Á aðalfundi Síldarvinnslunnar hf., sem haldinn var í gær, var stjórn félagsins endurkjörin. 
Stjórnin er þannig skipuð:
             Anna Guðmundsdóttir
             Björk Þórarinsdóttir
             Guðmundur Rafnkell Gíslason
             Ingi Jóhann Guðmundsson
             Þorsteinn Már Baldvinsson
    Varamenn:
              Arna Bryndís Baldvins McClure
              Halldór Jónasson
 
Á stjórnarfundi að loknum aðalfundinum var Þorsteinn Már Baldvinsson kjörinn formaður stjórnarinnar. Þorsteinn hefur verið stjórnarformaður frá árinu 2003 en hann hefur átt sæti í stjórn félagsins frá árinu 2001.

Undirflokkar