Ljósm. Gunnlaugur Hafsteinsson
Ísfisktogarinn Gullver NS var í Færeyjum í um mánaðartíma þar sem ýmsum viðhaldsverkefnum í skipinu var sinnt. Skipið lagði af stað til Seyðisfjarðar á laugardagskvöld en þangað er rúmlega sólarhrings sigling. Heimasíðan sló á þráðinn til Færeyja og ræddi við Þórhall Jónsson skipstjóra. Fyrst var spurt hvað hefði verið gert í skipinu. „Það voru ýmis verkefni á dagskrá. Það þurfti að taka upp aðalvél og ljósavél og þá hefur töluverð járnavinna farið fram. Eins ber að nefna að eldhúsið í skipinu var algerlega endurnýjað þannig að kokkurinn er búinn að fá fyrirmyndaraðstöðu. Við fórum sex að sækja skipið og auðvitað hefur verið gott að vera hér á meðal frænda okkar. Strax og komið verður til Seyðisfjarðar verður skipið karað og veiðarfæri tekin um borð. Síðan verður haldið beint til veiða,“ segir Þórhallur.
