Vestmannaeyjaskipin Bergur VE og Vestmannaey VE hafa verið að fiska vel að undanförnu. Vestmannaey landaði fullfermi í Eyjum á sunnudag og Bergur landaði fullfermi á laugardag og aftur í dag. Heimasíðan sló á þráðinn til Jóns Valgeirssonar, skipstjóra á Bergi og spurði fyrst hvar veitt hefði verið: “Við höfum að undanförnu verið á Ingólfshöfðanum og þar hefur verið fantaveiði. Í fyrri túrnum upplifðum við loksins gott veður. Við vorum í reyndinni að veiða í himneskri blíðu og það var kominn tími til eftir langa brælutíð. Í seinni túrnum var farið beint á Höfðann og veiðin byrjaði heldur rólega fyrst en svo brast á með mokveiði. Þarna var fiskurinn í loðnu. Við vorum einungis í tvo sólarhringa á miðunum þannig að skipið var fyllt á stuttum tíma. Þetta var þokkalegasta blanda sem þarna fékkst; ýsa, þorskur, ufsi og koli. Allan tímann var alger blíða og flottheit og mikið er maður feginn að fá loksins svona veður,” sagði Jón.
