Beitir NK kom til Neskaupstaðar á fimmtudagskvöld með 3.000 tonn af kolmunna. Veitt var í færeyskri lögsögu fast við bresku línuna. Afliinn fékkst í fimm holum og var veiðin góð. Tómas Kárson skipstjóri var ánægður með veiðiferðina. “Aflinn fékkst í fimm holum og var dregið frá sex tímum og upp í sextán tíma. Aflinn í holi var frá 300 tonnum og upp í 840 tonn. Þetta 840 tonna hol er stærsta kolmunnahol sem ég hef tekið á mínum skipstjóraferli. Undir lokin dró dálítið úr veiðinni og virtist fiskurinn vera að ganga inn í bresku lögsöguna. Nú í dag verður loðnunótin tekin um borð í Beiti og verið er að gera allt klárt fyrir loðnuveiðar. Allir um borð eru spenntir fyrir loðnuvertíðinni og það liggur vel á mönnum. Þegar veitt er í flotvörpu erum við átta um borð en á nótaveiðum er fjölgað í tólf. Mér sýnist þetta líta mjög vel út og það verður virkilega gaman að fást við loðnuna,” sagði Tómas.
Börkur NK er á kolmunnamiðunum suður af Færeyjum og var kominn með 1.700 tonn um borð síðast þegar fréttist.
