Það koma góðar gusur

Vestmannaey VE og Bergey VE í höfn í Vestmannaeyjum. Ljósm. Guðmundur AlfreðssonVestmannaey VE og Bergey VE í höfn í Vestmannaeyjum. Ljósm. Guðmundur AlfreðssonÍsfisktogarinn Bergey VE kom til Vestmannaeyja síðdegis í gær með fullfermi og systurskipið Vestmannaey VE kom þangað sl. nótt sömuleiðis með fullfermi. Í morgun ræddi heimasíðan stuttlega við Jón Valgeirsson skipstjóra á Bergey og Birgi Þór Sverrisson skipstjóra á Vestmannaey. Jón sagði að vel hefði gengið að veiða í blíðskaparveðri. „Við vorum mest á Pétursey og Vík. Fengum þorsk á Pétursey og blöndu af þorski og ýsu á Vík. Síðan fórum við á Kötlugrunn og þar var aðeins karfi. Það er stígandi í veiðinni enda er hinn hefðbundni vertíðartími að nálgast,“ segir Jón.
 
Birgir Þór tekur undir með Jóni og segir að fiskgengd sé að aukast. „Við vorum á Pétursey og Vík og það gekk ljómandi vel að fiska. Vertíðarkrafturinn á samt eftir að koma í þetta en það koma góðar gusur,“ segir Birgir Þór.
 
Bæði skipin halda til veiða á ný síðdegis á morgun og gert er ráð fyrir að þau komi síðan til löndunar á sunnudag.

Gullver í rall

Gullver NS tekur þátt í togararallinu í fyrsta sinn nú í ár. Ljósm. Ómar BogasonGullver NS tekur þátt í togararallinu í fyrsta sinn nú í ár.
Ljósm. Ómar Bogason
Hið árlega togararall eða marsrall hófst í gær. Fjögur skip taka þátt í rallinu, tvö hafrannsóknaskip og togararnir Breki VE og Gullver NS. Gert er ráð fyrir að rallið standi yfir næstu þrjár vikurnar en togað verður á tæplega 600 stöðvum umhverfis landið.
 
Togararallið hefur verið framkvæmt með líkum hætti árlega frá árinu 1985 og er megintilgangur þess að mæla stofna botnfiska við landið en einnig eru aðrar rannsóknir framkvæmdar.
 
Gullver hélt í rallið upp úr hádeginu í gær og hóf að toga síðdegis. Heimasíðan ræddi við Steinþór Hálfdanarson stýrimann í morgun en þá var skipið statt sunnan í Glettinganesflakinu. Steinþór sagði að Gullver væri á sínu níunda holi. „Við erum að toga hér í blíðuveðri. Svæðið sem við eigum að toga á er svonefnt norðaustursvæði og nær það frá Kolbeinsey í norðri og suður að Hvalbak. Að auki er okkur ætlað að toga á Þórsbanka. Þetta eru um 180 hol sem við eigum að taka á svæðinu. Það er ráðgert að landa einu sinni á meðan á rallinu stendur,“ segir Steinþór.
 
Hér skal tekið fram að Síldarvinnsluskip hafa áður tekið þátt í togararalli og líklega á Bjartur þátttökumet en hann rallaði samtals tuttugu og sex sinnum.
 

Loðnufrystingu lokið – hrognavinnsla næst á dagskrá

Polar Amaroq að loðnuveiðum. Ljósm. Sævar ÁskelssonPolar Amaroq að loðnuveiðum. Ljósm. Sævar ÁskelssonLoðnufrystingu er lokið í fiskiðjuverinu í Neskaupstað á þessari loðnuvertíð og nú er beðið eftir að hrognataka hefjist. Börkur NK er á Breiðafirði, Beitir NK á leiðinni vestur fyrir land og Bjarni Ólafsson AK bíður átekta í höfn syðra. Heimasíðan ræddi við Hálfdan Hálfdanarson skipstjóra á Berki í morgun og spurði hvenær veiðar á hrognaloðnunni hæfust. „Ég veit það ekki alveg. Það er hálfgerð bræla hér á Breiðafirðinum og við erum bara í biðstöðu. Í augnablikinu höfum við líka lítið séð en það mun breytast þegar skipum fjölgar hérna og veðrið lagast. Veðrið á að ganga niður í dag og ég held að eigi að verða fínt veður á morgun. Síðan er það bara spurningin hvort loðnan er tilbúin til hrognatökunnar,“ segir Hálfdan.
 
Grænlenska loðnuskipið Polar Amaroq frystir aflann um borð og hefur landað fullfermi sex sinnum það sem af er vertíðinni. Skipið landaði sl. laugardag og lá síðan inni á Faxaflóa að frysta afla á meðan á brælunni yfir helgina stóð en aflinn var geymdur í tönkum skipsins á meðan landað var. Ólafur Sigurðsson stýrimaður segir að vertíðin hafi gengið afar vel til þessa. „Við erum núna í sjöunda túr og það hefur allt gengið eins og í sögu. Vinnslan hefur gengið vel og veiðin verið góð. Við fórum út klukkan sex í morgun og erum núna suðvestur af Garðskaga að leita,“ segir Ólafur.

Síldarvinnslan kaupir nýtt fræðslukerfi

Síldarvinnslan kaupir nýtt fræðslukerfiSíldarvinnslan skrifaði í vikunni undir samning um kaup á nýju fræðslukerfi fyrir starfsmenn. Fyrir valinu varð kerfi sem heitir Eloomi, en fjölmörg fyrirtæki og stofnanir á íslenskum vinnumarkaði eru farin að nota það með góðum árangri. Kerfið býður upp á nýja möguleika til að skipuleggja fræðslu og koma námsefni á framfæri við notendur, óháð stað og stund. Notendur munu t.d. geta tekið námskeið í snjallsímunum sínum, í tölvu á vinnustöð eða heima hjá sér í hvaða snjalltæki sem hentar.
 
„Þetta einfaldar málin gífurlega mikið“, segir Sigurður Ólafsson, verkefnastjóri, sem mun stýra innleiðingu kerfisins. „Í stað þess að þurfa að kalla fólk saman í sal getum við tryggt að allir fái viðeigandi þjálfun og upplýsingar hvar og hvenær sem er og geti kynnt sér efnið á sínum hraða og forsendum. Þetta einfaldar málin mjög þegar talsverður hluti starfsmanna starfar á vöktum eða á skipum félagsins. Við munum auðvitað ekki hætta að kalla fólk saman til að hittast, læra eitthvað nýtt og ræða málin, en þetta kerfi mun gera okkur kleyft að koma þekkingu á framfæri án þess. Við höfum séð það á þessum leiðinlegu Covid-tímum að fólk er fljótt að tileinka sér nýjungar á borð við þessa og Eloomi kerfið er einstaklega notendavænt. Covid-tíminn hefur líka kennt okkur hvað það er mikilvægt að hafa fjölbreyttar leiðir til að hafa samskipti við fólkið okkar þegar því fylgir skyndilega áhætta að hittast í alvörunni. Við munum með þessu nýja kerfi stíga stórt framfaraskref hvað tæknina varðar og svo munum við í kjölfarið uppfæra fræðsluáætlun fyrirtækisins í samstarfi við Austurbrú. Það mun hjálpa okkur verulega að efla fræðslu hjá fyrirtækinu að hafa nýtt kerfi til að halda utan um fræðslustarfið og bæta við það stafrænni miðlun efnis. Við ætlum að halda ótrauð áfram að gera gott fyrirtæki enn betra og öflugt fræðslustarf er mikilvægur liður í því,“ segir Sigurður að lokum.