Frystitogarinn Blængur NK kom til heimahafnar í Neskaupstað í gær að aflokinni 30 daga veiðiferð. Landað verður úr skipinu í dag. Afli skipsins var 666 tonn upp úr sjó og er verðmæti aflans um 300 milljónir króna. Heimasíðan ræddi við Sigurð Hörð Kristjánsson skipstjóra og spurði fyrst hvar hefði verið veitt. “Það var veitt bæði fyrir austan og vestan land. Við byrjuðum fyrir austan í leit að grálúðu með heldur litlum árangri. Þá var haldið vestur fyrir og mest verið á Hampiðjutorginu og í Kartöflugarðinum. Síðan var farið austur fyrir á ný og aftur leitað að gráluðu en sú leit skilaði einnig heldur litlu. Þá var farið í ýsu á Undirbyrðahrygg og þar gekk bara vel. Aflinn í túrnum var mest ýsa eða um 150 tonn, síðan voru um 120 tonn af þorski og einnig dálítið af ufsa, karfa og grálúðu. Segja má að veðrið hafi verið gott í túrnum en þó kom ein fjögurra eða fimm daga bræla. Sérstaklega var veðrið gott hér austurfrá og það var notalegt að vera þar. Sjórinn er oft stilltari fyrir austan landið,” segir Sigurður Hörður.
Gert er ráð fyrir að Blængur haldi á ný til veiða um hádegi næstkomandi mánudag að aflokinni ljúfri sjómannadagshelgi.
