Dagurinn í gær var síðasti starfsdagur Auðar Hauksdóttur á skrifstofu Síldarvinnslunnar en hún hefur starfað þar í rétt þrjátíu ár eða frá árinu 1991. Þegar Auður hóf störf á skrifstofunni annaðist hún sjómannalaunin en þegar Elísabet Karlsdóttir lét af störfum sem aðalbókari árið 2000 tók Auður við því starfi.
Auður segir að mikið hafi breyst á þessum þrjátíu árum og það sé einkum tölvuvæðingin og tölvutæknin sem orsakað hefur þá breytingu. Starf aðalbókarans hafi breyst eins og öll önnur skrifstofustörf og miklu skipti í nútímanum að unnt sé að sækja nánast allar upplýsingar í bókhaldið hvenær sem er. Auður segist ætla að njóta lífsins í framtíðinni og nú hugsi hún mest um golfsumarið sem framundan er.
Arftaki Auðar í starfi aðalbókara er Rakel Kristinsdóttir. Þá mun Eva Þorfinnsdóttir hefja störf við bókhald nú um mánaðamótin en aukið álag er á skrifstofunni vegna þess að fyrirtækið mun fara á markað í maímánuði.
