Þegar tekur að hausta verða á dagskrá Stöðvar 2 þættir sem munu bera yfirskriftina Beint úr messa. Það er Bubbi Morthens sem stýrir þáttunum og verða þeir byggðir á svipaðri hugmynd og þættirnir Beint frá býli sem voru á dagskrá á síðasta ári.
Einn þáttanna úr væntanlegri þáttaröð verður með skip Síldarvinnslunnar og fólkið sem tengist þeim í aðalhlutverki, en annars verða þættirnir teknir upp víða um land.
Í gær kom Bubbi ásamt tökuliði til Neskaupstaðar og voru þá tekin upp viðtöl og tónlistaratriði fyrir þáttinn. Efnt var til tónleika í messa eins skipanna og þar fóru Papar ásamt Gylfa Ægissyni á kostum. Áheyrendur í messanum skemmtu sér hið besta og það verður fróðlegt að sjá afrakstur vinnu Bubba og félaga birtast á skjánum í haust.
