Ljósm. Ómar Bogason
Ísfisktogarinn Gullver NS landaði 100 tonnum á Seyðisfirði í gær. Aflinn var blandaður, mest ufsi, karfi og ýsa. Skipið mun síðan halda norður til Akureyrar í dag þar sem það fer í slipp. Rúnar L. Gunnarsson, skipstjóri, segir að túrinn hafi gengið vel. „Við byrjuðum að veiða í Skeiðarárdýpinu og síðan var farið austur eftir alveg á Berufjarðarálshorn. Túrinn var síðan kláraður á Stokksnesgrunni. Gert er ráð fyrir að skipið verði í slipp til 24. júlí og haldið verði til veiða á ný 27. júlí,“ segir Rúnar.
Sumarlokun frystihúss Síldarvinnslunnar á Seyðisfirði mun hefjast í lok næstu viku eða 9. júlí. Húsið verður lokað í fjórar vikur.
