Gert er ráð fyrir að Síldarvinnsluskipin Barði NK, Beitir NK og Börkur NK haldi til kolmunnaveiða eftir páskana. Veiðin mun hefjast syðst í færeysku lögsögunni, á hinu svonefnda gráa svæði. Heimasíðan ræddi við Hálfdan Hálfdanarson, skipstjóra á Berki, og spurði hann fyrst hvort ríkti bjartsýni um kolmunnaveiðarnar. „Já, ég held að menn séu afar bjartsýnir. Í febrúarmánuði bárust þær fréttir frá Norðmönnum að það hefði verið óvenju mikið af kolmunna að sjá vestur af Írlandi. Veiðin var svo mikil að menn lentu í bölvuðum vandræðum og veiðarfærin slitnuðu jafnvel aftan úr skipunum. Þessi fiskur gengur norður eftir og er yfirleitt kominn á gráa svæðið á milli 10. og 15. apríl. Í fyrra hófum við veiðarnar 11. eða 12. apríl. Mönnum líst semsagt afar vel á kolmunnaveiðarnar framundan,“ segir Hálfdan.
