Barði NK kom með fyrsta kolmunnafarm haustsins til Neskaupstaðar á sunnudagskvöld. Afli skipsins var 2020 tonn. Haldið var til veiða á ný strax að löndun lokinni og hafði heimasíðan samband við Þorkel Pétursson skipstjóra og spurði fyrst hvernig fyrsti túrinn hefði gengið. „Þessi fyrsti túr gekk bara býsna vel. Aflinn fékkst að vísu í nokkuð mörgum holum, ég held þau hafi verið níu talsins. Veiðin fór heldur hægt af stað en hefur farið vaxandi þó ekki sé um neitt mok að ræða. Fiskurinn sem fæst er bæði feitur og fallegur og engin leið að kvarta hvað það varðar. Við fórum út strax að löndun lokinni og nú er búið að taka fjögur hol og aflinn orðinn 1150 tonn. Þetta lítur bara býsna vel út og auðvitað mikilvægt að taka kolmunnann í Rósagarðinum innan lögsögunnar. Það hafa þó nokkur íslensk skip verið að veiðum þarna og einnig tvö færeysk. Börkur kom á miðin í nótt en hann kastaði ekki fyrr en í morgun vegna brælu,“ segir Þorkell.
