Í nótt var lokið við að vinna rúmlega 800 tonn af makríl úr Margréti EA í fiskiðjuveri Síldarvinnslunnar í Neskaupstað. Í aflanum var töluverð áta og var hann ýmist heilfrystur, hausskorinn eða flakaður.
Í gær var góð makrílveiði í köntunum í Skeiðarárdýpinu og voru skipin í veiðisamstarfinu með rúmlega 1.000 tonn eftir daginn, en afli hvers skips var á bilinu 200 – 318 tonn. Fimm skip taka þátt í veiðisamstarfinu en það eru Barði NK, Beitir NK, Börkur NK og Vilhelm Þorsteinsson EA auk Margrétar sem var að landa í gær eins og fyrr greinir.
Nú er Vilhelm á leiðinni til Neskaupstaðar með um 1.100 tonn og hefst vinnsla úr honum strax og hann kemur til hafnar.
Það var minni veiði á miðunum í nótt en var í gær. Barði og Beitir voru með um 70 tonn hvor en Börkur var með 150 tonn. Nú er afli skipanna settur í Barða.
Alls er makrílafli skipanna í samstarfinu um 13.000 tonn það sem af er vertíðinni en veiðarnar hófust um síðustu mánaðamót. Er þetta mun meiri afli en á sama tíma í fyrra.
