Eins og áður hefur verið greint frá hefur Bergur-Huginn, dótturfélag Síldarvinnslunnar í Vestmannaeyjum, selt Vísi hf. í Grindavík togarann Berg VE og hefur hann fengið nafnið Jóhanna Gísladóttir GK. Skipið var í slipp í Reykjavík í tvær vikur og voru gerðar á því ýmsar lagfæringar. Meðal annars var togdekkið tvöfaldað, aðalvél öll yfirfarin og það málað grænt. Þá hafa skoðanir á skipinu verið framkvæmdar eins og ávallt er gert þegar skip er selt.
Togarinn var smíðaður árið 1998 hjá Karstensens Skibsværft í Skagen í Danmörku og er hann 569 brúttótonn.
Í gær var skipið afhent hinum nýja eiganda og fylgja því heillaóskir frá seljandanum.
