Ljósm. Egill Guðni Guðnason
Eyjaskipin Vestmannaey VE og Bergur VE héldu til veiða sl. miðvikudag og komu bæði til hafnar með fullfermi á föstudag. Afli skipanna var mest þorskur og síðan nokkuð af ýsu. Birgir Þór Sverrisson, skipstjóri á Vestmannaey, segir að það hafi verið mokveiði. “Við vorum á Ingólfshöfða og tókum síðan eins sköfu á Víkinni. Þarna fékkst fallegur vertíðarfiskur, 7 kg. og stærri. Það er slæm ölduspá framundan og því er ekki ákveðið hvenær farið verður út á ný,” segir Birgir Þór.
Jón Valgeirsson, skipstjóri á Bergi, segir að þeir hafi veitt á Ingólfshöfða og síðan klárað á Víkinni. “Þetta var hörkutúr, alveg þrælfínn. Og fiskurinn sem fékkst var súper vertíðarfiskur, fullur af lifur og gotu. Veðrið í heimsiglingunni var ekki sérstaklega skemmtilegt en það er ekkert nýtt,” segir Jón.
