Tæknidagur fjölskyldunnar, sem haldinn var í Verkmenntaskóla Austurlands í Neskaupstað sl. laugardag, heppnaðist mjög vel. Þetta var í áttunda sinn sem dagurinn er haldinn en hann féll niður síðustu tvö ár vegna kóvíd. Mikið fjölmenni lagði leið sína í skólann og gátu gestir kynnt sér starfsemi fjölmargra stofnana og fyrirtækja ásamt því að skoða kennsluaðstöðuna í skólanum. Að þessu sinni heimsótti forseti Íslands skólann á tæknideginum og veitti ungmennum verðlaun fyrir góðan árangur í samkeppni um tillögur að nýtingu á þara og þangi. Það var Verkmenntaskólinn og MATÍS sem stóðu fyrir keppninni.
Margir heimsóttu sýningarsvæði Síldarvinnslunnar en þar var unnt að fræðast um starfsemi fyrirtækisins og framkvæmdir sem unnið er að á vegum þess. Má þar til dæmis nefna framkvæmdirnar við fiskimjölsverksmiðjuna í Neskaupstað en þar er unnið að uppsetningu á tvískiptri verksmiðju, annars vegar lítilli sem fyrst og fremst er hugsuð til að vinna afskurð og þann fisk sem flokkast frá í fiskiðjuverinu og hins vegar stórri og afkastamikilli verksmiðju. Litla verksmiðjan á að afkasta 380 tonnum á sólarhring en sú stóra mun afkasta 2.000 tonnum. Gert er ráð fyrir að litla verksmiðjan muni nýtast vel til ýmissa þróunarverkefna en áhersla verður lögð á vinnslu verðmætari afurða en hingað til hafa verið framleiddar í fiskimjölsverksmiðjum. Auk þess að fræðast á sýningarsvæði Síldarvinnslunnar gátu gestir gætt sér á fjölbreyttum síldarréttum og ekta íslenskum harðfiski.
Verkmenntaskóli Austurlands á heiður skilinn fyrir að efna til tæknidags með jafn myndarlegum hætti og raun ber vitni.
