Umhverfishópurinn stendur fyrir sínu

Naglhreinsað í skreiðarskemmunni. Ljósm. Smári GeirssonUndanfarin ár hefur Síldarvinnslan ávallt ráðið hóp ungmenna til sumarstarfa í Neskaupstað. Hópnum er ætlað að sinna ýmsum umhverfisverkefnum auk þess sem hann sinnir tilfallandi öðrum verkefnum. Í sumar skipa 10 ungmenni þennan hóp og hefur hann notið verkstjórnar Konráðs Sveinssonar, Sigfúsar Sigfússonar og Sigurjóns Jónusonar. Í samtali við verkstjórana kom fram að hópurinn hefur staðið sig vel og sinnt sínum störfum af samviskusemi. „Hópurinn fæst við ótrúlega fjölbreytt verkefni en megintilgangurinn með störfum hans er að gera fínt; þrífa, mála og taka til,“ sagði Sigfús.

 

Umhverfishópurinn hóf störf um mánaðamótin maí-júní og mun væntanlega starfa fram í ágústmánuð. Þegar tíðindamaður heimasíðunnar fór inn á athafnasvæði Síldarvinnslunnar í morgun hafði hópnum verið skipt upp; nokkrir úr hópnum voru að naglhreinsa í svonefndri skreiðarskemmu, aðrir voru að hreinsa til í svonefndri saltfiskskemmu og enn aðrir aðstoðuðu við matseld um borð í Beiti NK en þar er hópur iðnaðarmanna að störfum. Þá lá fyrir að hópurinn myndi skipta um merkingar á brettum með frystum afurðum síðar í dag. Á þessu sést að ungmennin í umhverfishópnum kynnast fjölþættum störfum og ef marka má orð verkstjóranna stendur hann fullkomlega fyrir sínu.