Beitir NK kemur að landi með markrílfarm. Ljósm. Sylvía Kolbrá HákonardóttirÍ dag er verið að landa 650 tonnum af frystum makríl úr Hákoni EA og er gert ráð fyrir að það sé á meðal síðustu farmanna sem landað verður á vertíðinni. Alls hafa yfir 30.000 tonn af makríl borist til Neskaupstaðar á vertíðinni enda gengu veiðarnar yfirleitt mjög vel. Rúmlega 19.200 tonnum var landað til vinnslu í fiskiðjuverinu en engum makríl var landað beint til mjöl- og lýsisvinnslu. Allur aflinn sem unnin var í fiskiðjuverinu kom frá fjórum skipum: Beitir NK landaði 7.194 tonnum, Börkur NK 5.913 tonnum, Bjarni Ólafsson AK 5.117 tonnum og Margrét EA 985 tonnum. Vinnslan á makrílnum gekk vel og að sögn Jón Gunnars Sigurjónssonar, yfirverkstjóra í fiskiðjuverinu, var fiskurinn betri en á undanförnum vertíðum. „Fiskurinn var mjög stór og góður alla vertíðina, sérstaklega var hráefnið gott í ágústmánuði. Segja má að allt hafi gengið eins og í sögu á vertíðinni að sölumálunum undanskildum eins og menn vita,“ sagði Jón Gunnar.Fyrir utan makrílaflann sem barst til vinnslu í fiskiðjuveri Síldarvinnslunnar lönduðu vinnsluskip 12.800 tonnum í frystigeymslur Síldarvinnslunnar á vertíðinni. Dálítill hluti af því sem landað var er síld sem fékkst sem meðafli. Vinnsluskipin sem færðu þennan afla að landi voru þrjú: Kristina EA, Vilhelm Þorsteinsson EA og Hákon EA.
