Sneisafullar Eyjar

Bergey VE að toga á Víkinni. Ljósm. Egill Guðni GuðnasonBergey VE að toga á Víkinni. Ljósm. Egill Guðni GuðnasonBáðar Eyjarnar, Bergey VE og Vestmannaey VE, komu sneisafullar til löndunar í heimahöfn í gærmorgun. Aflinn var mest ýsa. Heimasíðan sló á þráðinn til Birgis Þórs Sverrissonar skipstjóra á Vestmannaey og spurði hvar skipin hefðu verið að fiska. „Við og Bergey fylgdumst að að mestu leyti í þessum túr eins og reyndar oft áður. Við byrjuðum á Víkinni og tókum þar eitt hol en þar var lítið að hafa. Síðan tókum við hol út af Ingólfshöfða og þar var sama sagan. Þá var haldið alla leið austur á Breiðdalsgrunn. Bergey fór beint þangað en við tókum eitt ufsahol á Lúlla og Lovísu á leiðinni. Það var rólegt fiskiríið á Breiðdalsgrunni og þá var haldið til baka. Við reyndum fyrir okkur í Sláturhúsinu út af Mýrum og lentum þar í hörku ýsuveiði og fylltum skipin. Aflinn í túrnum var því mest ýsa og smotterí af þorski og ufsa,“ segir Birgir Þór.
 
Bæði Bergey og Vestmannaey munu halda til veiða á ný í dag og þá verður stefnan tekin austur fyrir land. Að sögn Birgis Þórs er gert ráð fyrir að fiskað verði fyrir austan á næstunni og þá verði væntanlega landað í Neskaupstað eða á Seyðisfirði.

Botnfiskveiðar Síldarvinnsluskipa á nýliðnu fiskveiðiári

Blængur NK með gott hol. Ljósm. Hreinn SigurðssonBlængur NK með gott hol.
Ljósm. Hreinn Sigurðsson
Afli togara Síldarvinnslunnar og dótturfélagsins Bergs-Hugins á fiskveiðiárinu sem var að líða var samtals 20.800 tonn . Afli hvers skips var sem hér segir (miðað er við slægðan afla):

                         Gullver NS                     5.300 tonn
                         Bergey VE                     2.900 tonn
                         Vestmannaey VE          3.300 tonn
                         Smáey VE                     2.000 tonn (einungis gerð út hluta úr árinu)
                         Blængur NK                  7.300 tonn

Segja má að fiskveiðiárið hafi verið viðburðaríkt þar sem tvö ný skip, Vestmannaey VE og Bergey VE, hófu veiðar á árinu. Ný Vestmannaey hóf veiðar í byrjun októbermánaðar og ný Bergey VE í janúar. Um tíma var Smáey VE einnig gerð út en í febrúarmánuði var skipið leigt Samherja hf. og það síðan selt þorbirni hf. í Grindavík í maímánuði. Útgerð nýju skipanna hefur gengið afar vel frá upphafi og lönduðu þau 6.200 tonnum samtals á sínu fyrsta fiskveiðiári.

Veðurfarslega var síðasta haust erfitt og enn versnaði tíðarfarið þegar kom fram á veturinn. Til að mynda lönduðu Vestmannaeyjaskipin engum afla fyrr en eftir miðjan janúar í kjölfar jólastopps vegna stöðugrar brælu við suðurströnd landsins.

Eftir hinn erfiða vetur tók við mikið fall á eftirspurn eftir ferskum fiski vegna óvissu og aðgerða sem tengdust covid-19 faraldrinum. Hægt var á sókn ísfisktogara vegna þessa frá marsmánuði og fram í maí og var í reynd enginn fiskur veiddur til fersks útflutnings nema hann væri fyrirfram seldur.

Hjá öllum skipunum var stöðugur eltingaleikur við ufsann. Gekk erfiðlega að finna hann og kemur það til dæmis fram í aflatölum hjá Gullver NS en skipið fiskaði rúmlega helmingi minna af ufsa á nýliðnu kvótaári en á árinu á undan eða einungis 540 tonn í stað 1.205 tonna. Þrátt fyrir þetta gekk útgerð Gullvers vel á árinu og var heildarafli skipsins 5.300 tonn eins og að framan greinir þó um minni sókn hafi verið að ræða.

Trollið tekið hjá Vestmannaey VE. Ljósm. Egill Guðni GuðnasonTrollið tekið hjá Vestmannaey VE.
Ljósm. Egill Guðni Guðnason
Afar vel gekk að veiða djúpkarfa og grálúðu hjá frystitogaranum Blængi NK en hápunktur ársins hjá skipinu var þó Barentshafstúrinn sem farið var í í júnímánuði sl. Um var að ræða mettúr hjá Blængi en aflinn var 1430 tonn upp úr sjó að verðmæti 512 milljónir króna fob. 

Á nýliðnu kvótaári leigði Síldarvinnslan til sín aflaheimildir sem námu 1.205 tonnum og náðist allur kvóti að undanskildum örfáum kílóum af flatfiskum.

 

 

 

 

Nýr Börkur sjósettur

Vinna við sjósetningu nýs Barkar í Gdynia í Póllandi hófst í morgunVinna við sjósetningu nýs Barkar í Gdynia í Póllandi hófst í morgunÍ morgun hófst vinna við að sjósetja nýjan Börk en hann er í smíðum hjá danska fyrirtækinu Karstensens Skibsværft AS. Skrokkur skipsins er smíðaður í skipasmíðastöð Karstensens í Gdynia í Póllandi og þar fer sjósetningin fram. Í október nk. verður síðan skrokkurinn dreginn til Skagen í Danmörku og þar verður skipið fullklárað. Skipið verður sjósett án yfirbyggingar en hún verður sett á eftir sjósetninguna.

Sjósetningin fer þannig fram að hjólabúnaður er settur undir skipsskrokkinn og honum ekið út á stóran flotpramma sem er síðan dreginn frá bryggju og út á nægjanlegt dýpi. Sjó er síðan dælt í tanka prammans og honum sökkt nægilega mikið til að skipið fljóti. Það er síðan dregið að bryggju við skipsamíðastöðina þar sem haldið verður áfram að vinna í því.

Hinn nýi Börkur verður hið glæsilegasta skip í alla staði en það er byggt til nóta – og flotvörpuveiða. Lengd skipsins er 88 metrar, breiddin 16,6 metrar og dýptin 9,6 metrar. Stærð skipsins er 4.100 brúttótonn. Í skipinu verða tvær aðalvélar 3.600 kw hvor og ásrafall skipsins verður 3.500 kw. Þá verður í skipinu 820 kw hjálparvél. Alls verða 13 kælitankar í skipinu og til að kæla aflann verða tvö kerfi, hvort um sig 1.500 kw. Samtals verða tankarnir 3.420 rúmmetrar. Vistarverur verða fyrir 16 manns.

Gert er ráð fyrir að smíði skipsins verði að fullu lokið á komandi vori.

Beitir með 1800 tonn

Beitir NK kominn til hafnar með 1.800 tonn af makríl. Ljósm. William Geir ÞorsteinssonBeitir NK kominn til hafnar með 1.800 tonn af makríl.
Ljósm. William Geir Þorsteinsson
Beitir NK kom með 1.800 tonn af makríl til Neskaupstaðar í gær. Heimasíðan ræddi við Tómas Kárason skipstjóra og spurði fyrst í hve mörgum holum aflinn hefði fengist. „Við fengum þennan afla í sex holum. Minnsta holið gaf um 150 tonn en það stærsta tæp 500 tonn. Það var einfaldlega gífurlega góð veiði. Síðasta daginn tókum við þrjú hol og þau gáfu 480, 450 og 400 tonn. Öll þessi hol voru stutt, einungis dregið í tvo til tvo og hálfan tíma. Það kvartar enginn þegar veiðin er svona. Núna er hins vegar komin bræla á miðunum í Smugunni og útlit fyrir brælu alveg fram á fimmtudag. Það er víst komið haust með öllu sem því fylgir. Núna er maður bara farinn að hugsa um síld. Mér líst afar vel á síldarvertíð og það virðist vera nóg af henni. Færeyska skipið Finnur fríði fékk til dæmis 1.600 tonn af 460 gr síld við Kolbeinsey á dögunum. Þetta var semsagt sannkölluð stórsíld og svona fréttir fá mann til að hyggja að síldinni. Um makrílvertíðina verður að segja að hún hafi gengið afar vel þrátt fyrir að langt hafi verið að sækja makrílinn. Samstarf Síldarvinnsluskipanna um veiðarnar hefur skipt miklu máli og skilað ótvíræðum árangri. Ég held að allir séu afar ánægðir með samstarfið og það sé í reynd forsendan fyrir því hve vertíðin heppnaðist vel,“ segir Tómas.