99 starfsmönnum boðin ristilspeglun

Elín Hjaltalín Jóhannesdóttir hjúkrunarfræðingur og Jón Sen skurðlæknir hjá ristilspeglunartækinu. Elín Hjaltalín Jóhannesdóttir hjúkrunarfræðingur og Jón Sen skurðlæknir hjá ristilspeglunartækinu.Sl. gamlársdag var undirritaður samningur á milli Síldarvinnslunnar og Heilbrigðisstofnunar Austurlands um að öllum starfsmönnum Síldarvinnslunnar sem náð hafa 50 ára aldri gefist kostur á ristilspeglun þeim að kostnaðarlausu. Fram kom að Síldarvinnslan myndi greiða allan kostnað vegna speglananna og að auki færa Fjórðungssjúkrahúsinu í Neskaupstað að gjöf nýtt speglunartæki. Mun nýja tækið gera sjúkrahúsinu betur kleift en áður að sinna almennri þjónustu á þessu sviði.
 
Í gær heimsóttu tíðindamenn heimasíðunnar Fjórðungssjúkrahúsið í Neskaupstað og hittu þar að máli Jón Sen lækni en hann mun annast speglanirnar þar. Jón var að vonum ánægður með þá þróun sem átt hefur sér stað hvað varðar speglanir á sjúkrahúsinu. „Nýja tækið var tekið í notkun nýlega og það gjörbreytir allri aðstöðu okkar,“ sagði Jón. „Það er mikil eftirspurn eftir ristilspeglun um þessar mundir og nú getum við gert tvær speglanir á klukkustund með þeim tveimur tækjum sem eru til staðar þannig að segja má að afköstin hafi tvöfaldast. Það var biðlisti í ristilspeglanir en nú fer hann hratt minnkandi. Hins vegar eru mikil verkefni framundan og þá skipta speglanirnar á starfsmönnum Síldarvinnslunnar miklu máli. Þetta nýja tæki er algert topptæki og gott að vinna með því þannig að þessi þáttur starfseminnar á eftir að ganga vel.
 
Í töluverðan tíma hefur verið skorað á stjórnvöld að tryggja fjármagn til skipulegrar skimunar á ristilkrabbameini enda sú tegund krabbameins hin þriðja algengasta hjá báðum kynjum. Það hefur ekki tekist að fá fjármagn í þetta verkefni og þá tekur fólkið sjálft og fyrirtæki eins og Síldarvinnslan málin í sínar hendur. Ákvörðun Síldarvinnslunnar er til hreinnar fyrirmyndar og ég þykist vita að mörg fyrirtæki veiti henni athygli. Ef ristilkrabbamein finnst á frumstigi eru yfirgnæfandi líkur á lækningu en þetta krabbamein veldur einkennum tiltölulega seint og því er skimun svo mikilvæg. Með skimuninni sem framkvæmd er með speglun sjást meira að segja forstigseinkenni sjúkdómsins og þá er unnt að grípa strax inn í. Það borgar sig í reyndinni fyrir alla að fara í ristilspeglun þegar tilteknum aldri er náð, speglunin sjálf tekur um hálfa klukkustund en hins vegar tekur sjúklinginn um heilan dag að undirbúa sig fyrir speglunina.“
 
Að sögn Hákons Ernusonar starfsmannastjóra Síldarvinnslunnar eru starfsmenn fyrirtækisins, sem eru 50 ára og eldri, 99 talsins og eiga þeir allir rétt að ristilspeglun á kostnað þess. Gert er ráð fyrir að verkefnið hefjist á næstu dögum og þá verði fyrstu einstaklingarnir í starfsmannahópnum boðaðir í speglunina. Að mati Hákons er einkar ánægjulegt að geta hafið verkefnið í sjálfum mottu-mars. Síðan mun aukinn kraftur settur í verkefnið í maímánuði og gert er ráð fyrir að síðustu starfsmennirnir verði kallaðir í speglun undir lok ársins. Á haustmánuðum verður tilkynnt um fyrirkomulag  speglana á starfsmönnum Síldarvinnslunnar í Helguvík og á Seyðisfirði. 

Loðnuhrogn og brælur

Birtingur NK með gott kast á síðunni. Ljósm. Örn Rósmann KristjánssonBirtingur NK með gott kast á síðunni. Ljósm. Örn Rósmann KristjánssonAlla helgina voru unnin loðnuhrogn í fiskiðjuverinu í Neskaupstað og hefur vinnslan  gengið vel. Lokið var við að vinna hrogn úr afla Beitis NK snemma í morgun og þá hófst vinnsla úr Bjarna Ólafssyni AK. Sömu sögu er að segja frá Helguvík. Þar hefur vinnslan verið samfelld síðustu daga og gengið vel að sögn Guðjóns Helga Þorsteinssonar.
 
Bátarnir fengu takmarkaðan tíma til að athafna sig á miðunum á Breiðafirði í gær. Aflinn var þokkalegur en í gærkvöldi var enn á ný komin bræla. Veðrið ætti að ganga niður nú með kvöldinu og svo merkilega vill til að veðurútlit fyrir næstu daga er býsna gott.
 
Birtingur NK fyllti í gær og er á austurleið. Mun hrygnuhlutfall í aflanum vera hátt. Vilhelm Þorsteinsson EA og Polar Amaroq fengu 1400-1500 tonn og héldu til Helguvíkur. Börkur NK fékk 1400 tonn og liggur nú í vari við Snæfellsnes og bíður þess að veðrið gangi niður.
 

Mjölsíló með mottu

Motta á mjölsílói. Ljósm. Hákon ErnusonMotta á mjölsílói. Ljósm. Hákon ErnusonÍ dag, föstudaginn 13. mars, hvetur Krabbameinsfélagið alla landsmenn, konur og karla, til að halda upp á Mottudaginn með því að leyfa karlmennskunni að blómstra. Í gær fengu loðnuskip Síldarvinnslunnar, Birtingur og Börkur, veglega mottu sem þeir munu skarta út mánuðinn. Karlarnir í fiskimjölsverksmiðjunni í Neskaupstað vildu ekki vera neinir eftirbátar og í morgun fékk eitt mjölsílóanna samskonar mottu og skipin fengu í gær. Allir sem eiga leið fram hjá verksmiðjunni munu geta séð hvað mottan fer sílóinu vel.

Birtingur og Börkur taka þátt í mottumars

Birtingur og Börkur taka þátt í mottumars

Nú skarta loðnuskipin Birtingur og Beitir hinni fínustu mottu eins og reyndar fleiri skip í íslenska flotanum. Mottan virðist fara þeim ágætlega og eru kallarnir um borð hinir ánægðustu með skeggvöxt skipanna. Aðspurðir sögðu þeir Barkarmenn að það væri ánægjulegt að geta vakið athygli á góðu málefni með þessum hætti en nokkuð virtist skorta á að skeggvöxtur sumra í áhöfninni stæðist kröfur mottumars. Hér fylgja myndir af Birtingi og Berki með motturnar virðulegu en Hákon Ernuson tók þær nú um hádegisbil.

 

Birtingur og Börkur taka þátt í mottumars