Bölvuð bræla

Löndun úr Bjarti NK. Ljósm. Sigurður Steinn EinarssonÍsfisktogarinn Bjartur NK kom til Neskaupstaðar í gær að aflokinni stuttri veiðiferð. Aflinn var einungis 45 tonn sem þykir lítið en veður var vont í túrnum. Steinþór Hálfdanarson skipstjóri upplýsti heimasíðuna um að haldið yrði til veiða á ný í dag og vonandi væri veðrið eitthvað að ganga niður.

Brælan hefur líka haft sín áhrif á makríl- og síldveiðar en erfitt getur verið að finna makrílinn þegar brælir. Þetta hlé á veiðunum hefur verið notað til að þrífa í fiskiðjuveri Síldarvinnslunnar en það er gert með reglubundnum hætti. Þá er vinnsluhléið notað til að víxla dag- og næturvöktum í verinu. Vaktafyrirkomulagi í fiskiðjuverinu var breytt  13. ágúst og teknar upp tvískiptar vaktir í stað þrískiptra. Á þessum tíma er hefð fyrir að breyta vaktafyrirkomulaginu enda eru sumarstarfsmenn þá að hverfa á braut. Á hvorri vakt eru 25 starfsmenn en að auki eru 3 starfsmenn í fríi á hverjum tíma.

Bjarni Ólafsson AK fékk 16 túnfiska í einu holi

Einn af skipverjunum á Bjarna Ólafssyni AK og túnfiskarnirBjarni Ólafsson AK kom til Neskaupstaðar til löndunar sl. laugardag. Afli skipsins var 450 tonn og skiptist þannig að tæplega helmingur hans var makríll en rúmlega helmingur síld. Að auki færði skipið að landi meðafla sem vakti athygli, en það fékk hvorki fleiri né færri en 16 túnfiska í veiðiferðinni. Runólfur Runólfsson skipstjóri var ánægður með þennan óvænta afla og sagði eftirfarandi þegar heimasíðan ræddi við hann:“ Allir túnfiskarnir komu í eina og sama holinu. Við fórum út fyrir kantinn og tókum hol þar og þar virðist túnfiskur halda sig því Beitir NK fékk fjóra túnfiska á sömu slóðum fyrir nokkrum dögum. Þetta er óvenjulegt og ég man einungis eftir því að við á Bjarna Ólafssyni höfum einu sinni áður fengið túnfisk í trollið; það var fyrir allmörgum árum og þá voru fiskarnir sjö talsins. Fiskarnir 16 sem nú fengust voru af stærðinni 170-280 kg. en flestir þeirra voru í kringum 200 kg. að þyngd. Þegar í land var komið voru fiskarnir skornir. Við vorum svo heppnir að í Neskaupstað var staddur Japaninn Takahashi og stjórnaði hann skurðinum en Takahashi er fulltrúi japansks fyrirtækis sem kaupir mikinn fisk frá Íslandi og hefur góða þekkingu á því hvernig skal meðhöndla túnfisk. Áhöfnin á Bjarna Ólafssyni fékk að smakka túnfisk í gær og þótti hann góður. Í dag verður síðan efnt til heljarinnar túnfiskveislu um borð,“ sagði Runólfur Runólfsson að lokum.

 

Barði NK með fullfermi af karfa og ufsa úr Víkurálnum

Barði NK að landa í Norðfjarðarhöfn. Ljósm. Hákon ViðarssonFrystitogarinn Barði NK er að landa fullfermi af karfa og ufsa í Neskaupstað. Aflinn fékkst á Vestfjarðamiðum, mest í Víkurálnum að sögn Bjarna Ólafs Hjálmarssonar skipstjóra. Mokveiði var allan tímann og fiskurinn sem fékkst ágætur. Veiðiferðin tók samtals 13 daga en einungis 11 daga var verið á veiðum. Bjarni Ólafur segir að áhöfnin sé ánægð með túrinn og ráðgert sé að halda til veiða á ný undir helgi en þá verður væntanlega búið að gera við togspil sem bilaði í veiðiferðinni.

25 þúsund tonnum af makríl landað í Neskaupstað á vertíðinni

Birtingur NK kemur með makríl til löndunar. Ljósm. Sigurður Steinn Einarsson.Um þessar mundir hefur rúmlega 13.000 tonnum af makríl verið landað til vinnslu í fiskiðjuver Síldarvinnslunnar í Neskaupstað á yfirstandandi vertíð. Megnið af aflanum hafa Beitir NK, Börkur NK og Bjarni Ólafsson AK fært að landi en eins hafa Birtingur NK og Bjartur NK landað makríl til vinnslu. Þá hafa vinnsluskip landað tæpum 12.000 tonnum af frystum makríl í frystigeymslur Síldarvinnslunnar. Af frystiskipunum  hefur Vilhelm Þorsteinsson EA landað mestu en þar á eftir kemur Kristina EA. Þá hefur Barði NK einnig landað frystum makríl í geymslurnar.

Fyrir utan makrílinn hefur töluvert borist af síld á land í Neskaupstað en síld er meðafli á makrílvertíðinni.