Nýr Bjarni Ólafsson AK til landsins

Nýr og glæsilegur Bjarni Ólafsson AK kemur til Neskaupstaðar. Ljósm. Guðlaugur BirgissonNýr og glæsilegur Bjarni Ólafsson AK kemur til Neskaupstaðar. Ljósm. Guðlaugur BirgissonÍ morgun kom nýr Bjarni Ólafsson AK til Neskaupstaðar. Nýja skipið leysir af hólmi eldra skip með sama nafni. Nýi Bjarni Ólafsson er keyptur frá Noregi og bar áður heitið Fiskeskjer. Skipið var smíðað árið 1999 og er um 2000 brúttótonn að stærð, 67,4m að lengd og 13m að breidd. Aðalvél  er 7500 hestöfl af gerðinni Wartsila. Burðargeta skipsins er 1980 tonn og er unnt að kæla allan aflann. 
 
Gísli Runólfsson skipstjóri á Bjarna Ólafssyni segist vera afar ánægður með skipið. „Þetta er traust og gott skip og stærra og öflugra en gamli Bjarni. Gamli Bjarni var smíðaður árið 1978 og það var kominn tími á endurnýjun. Þetta skip er betra togskip, burðarmeira og allur aðbúnaður og tækjabúnaður er betri en í gamla skipinu. Áhöfnin er afar sæl með þetta nýja skip og það verður svo sannarlega gaman að hefja veiðar,“ sagði Gísli.
 
Ráðgert er að nýi Bjarni Ólafsson haldi til kolmunnaveiða í færeysku lögsögunni á morgun.
 
Það er fyrirtækið Runólfur Hallfreðsson ehf. á Akranesi sem á og gerir út Bjarna Ólafsson. Síldarvinnslan á rúmlega þriðjungshlut í fyrirtækinu. Runólfur Hallfreðsson ehf. hóf útgerð árið 1973 og festi þá kaup á skipi af Síldarvinnslunni. Þar var um að ræða fyrsta skipið sem bar nafnið Börkur. Bátar í eigu Runólfs Hallfreðssonar ehf. hafa löngum verið í miklum viðskiptum við Síldarvinnsluna og hefur samstarf fyrirtækjanna verið farsælt. „Samstarfið við Síldarvinnsluna hefur ávallt verið afar gott og í reynd alltaf betra og betra með árunum. Þetta er frábært samstarf sem báðir aðilar njóta góðs af,“ sagði Gísli Runólfsson að lokum.  

Barði og Bjartur með fína túra

Landað úr Barða NK. Ljósm. Hákon ErnusonLandað úr Barða NK. Ljósm. Hákon ErnusonFrystitogarinn Barði kom til Neskaupstaðar með fullfermi á þriðjudaginn. Hann hafði verið 25 daga á veiðum og millilandaði fullfermi hinn 13. apríl. Að sögn Theodórs Haraldssonar, sem var skipstjóri síðari hluta veiðiferðarinnar, aflaðist vel og var veður þokkalegt allan tímann sem skipið var að veiðum. „Í upphafi túrsins var reynt við grálúðu og ufsa en við enduðum í gullkarfa í Víkurálnum. Þar var góð veiði – dregið stutt og mest legið í vinnslu. Aflinn í túrnum var hátt í 800 tonn upp úr sjó og er verðmæti hans um 165 milljónir. Þetta var fínn túr,“ sagði Theodór.
 
Barði mun halda til veiða á ný að kvöldi laugardagsins 2. maí.
 
Ísfisktogarinn Bjartur landaði einnig í Neskaupstað á þriðjudaginn. Aflinn var um 90 tonn og var uppistaða hans ufsi og þorskur. Bjartur heldur til veiða á ný í kvöld og er væntanlegur til löndunar þriðjudaginn 5. maí.
 

Kolmunnaaflinn að glæðast

Beitir NK verður á Seyðisfirði í kvöld með fullfermi af kolmunna. Ljósm. Hákon ErnusonBeitir NK verður á Seyðisfirði í kvöld með fullfermi af kolmunna. Ljósm. Hákon ErnusonSíðustu tvo daga hefur kolmunnaaflinn í færeysku lögsögunni verið að glæðast töluvert. Í gær voru skipin að fá allt upp í 500 tonn í holi þó svo að aflinn færi í einstaka tilvikum niður í 200 tonn. Beitir er á landleið með fullfermi og verður á Seyðisfirði í kvöld. Hákon verður í Neskaupstað með fullfermi á svipuðum tíma. Börkur fyllti sig í gærkvöldi og er væntanlegur til Seyðisfjarðar í fyrramálið.
 
Birtingur kom til Neskaupstaðar í gær með 1100 tonn og hélt aftur til veiða í nótt sem leið.

Heldur lítið um að vera á kolmunnamiðunum

Polar Amaroq. Ljósm. Þorgeir BaldurssonPolar Amaroq. Ljósm. Þorgeir BaldurssonKolmunnaskipin sem eru að veiðum í færeysku lögsögunni láta ekki mjög vel af sér. Stundum er eitthvað af fiski að sjá en þess á milli afar lítið. Skipin toga lengi og ekki er óalgengt að aflinn sé á milli 200 og 300 tonn í holi. Norska kolmunnaskipið Kvannøy er væntanlegt til Seyðisfjarðar í nótt með 1100 tonn og grænlenska skipið Polar Amaroq er að landa fullfermi eða 1900 tonnum í Neskaupstað.