900 sjómílur á kolmunnamiðin – Beitir á landleið með rúmlega 3.000 tonn

Beitir NK á kolmunamiðunum suðvestur af Írlandi. Ljósm. Helgi Freyr ÓlasonBeitir NK á kolmunamiðunum suðvestur af Írlandi.
Ljósm. Helgi Freyr Ólason
Beitir NK hélt til kolmunnaveiða frá Neskaupstað 13. febrúar sl. Hann kom við í Færeyjum en hóf veiðar á kolmunnamiðunum suðvestur af Írlandi sl. sunnudag. Veiðarnar hafa gengið vel og hafði heimasíðan samband við Tómas Kárason skipstjóra í dag. „Við höfum verið að veiða um 200 sjómílur suðvestur af Írlandi eða um 100 mílur vestur af hafsvæði sem nefnist Porcupine. Frá Norðfirði á þessi mið eru um 900 sjómílur eða rúmlega þriggja sólarhringa sigling. Hér er svakalega mikið að sjá, lóðningarnar eru alveg rosalegar. Þetta er aðgæsluveiði, hættan er sú að fá of mikið. Stundum vorum við að hífa 300-400 tonn á tveggja tíma fresti. Við erum komnir með rúmlega 3.000 tonn og vorum að leggja af stað heim til löndunar. Við verðum komnir til Neskaupstaðar seinni partinn á sunnudag. Beitir hefur verið eina íslenska skipið á miðunum að undanförnu en Guðrún Þorkelsdóttir SU var komin á undan okkur og lagði af stað í land með 1.500 tonn í fyrrinótt. Hér er talsverður fjöldi af skipum annarra þjóða; Rússar, Norðmenn og Færeyingar, “ sagði Tómas.

Japansfrysting hafin af fullum krafti

Japaninn Kusayanagi og Líneik Haraldsdóttir fylgjast með gæðum loðnunnar. Ljósm. Hákon ErnusonJapaninn Kusayanagi og Líneik Haraldsdóttir fylgjast með
gæðum loðnunnar. Ljósm. Hákon Ernuson
Seinni partinn í gær lauk vinnslu á loðnu úr Bjarna Ólafssyni AK í fiskiðjuveri Síldarvinnslunnar en hluti af afla hans fór í frystingu á Japansmarkað. Í gær dúraði á loðnumiðunum fyrir sunnan land og fengu mörg skipanna góðan afla. Vilhelm Þorsteinsson EA kom til Neskaupstaðar í morgun með 1.480 tonn og verður hluti aflans frystur á Japan. Börkur NK kemur síðan í kjölfar Vilhelms með 1.430 tonn og er einnig ætlunin að afli hans fari í Japansfrystingu. Hjörvar Hjálmarsson skipstjóri á Berki segir að þeir hafi fengið aflann í Skarðsfjörunni í fimm köstum. Hrognafylling loðnunnar sé 16-17% og hún ætti því að henta vel til Japansfrystingar. Telur Hjörvar að einhver möguleiki verði til veiða á morgun en annars sé veðurútlit slæmt við suðurströndina allavega fram á sunnudag.
 
Polar Amaroq skipaði frystri loðnu um borð í flutningaskip í Norðfjarðarhöfn í gær en hélt síðan til veiða norður fyrir land þar sem norski loðnuflotinn hefur haldið sig. Heimasíðan ræddi við Geir Zoëga skipstjóra á Polar Amaroq í morgun en þá voru þeir Polarmenn með fyrsta kast á Skjálfanda. „ Við fundum loðnu strax og við komum hér og erum að draga núna. Það er eitthvað í þessu hjá okkur. Loðnan stendur djúpt en Norðmennirnir segja að hún komi upp á kvöldin. Mér líst bara vel á þetta en það var veðurútlitið sem gerði það að verkum að við fórum hingað norður fyrir land. Hér verður blíða á morgun og eftir morgundaginn hverfa norsku skipin á braut. Þá verðum við einir hér. Hrognafyllingin í loðnunni hérna er um 15% og það hentar okkur vel,“ sagði Geir.
 
Eins og fram kemur hjá Geir er einungis einn dagur eftir af þeim tíma sem Norðmenn mega stunda loðnuveiðar við landið. Eru allar líkur á því að þeir muni nánast ljúka við að veiða þann kvóta sem þeir hafa til ráðstöfunar á þeim tíma.

Veður truflar loðnuveiðar

Polar Amaroq í Norðfjarðarhöfn. Ljósm. Hákon ErnusonPolar Amaroq í Norðfjarðarhöfn. Ljósm. Hákon ErnusonÍslensku loðnuskipin voru að fá ágæt köst á föstudag og laugardag en í gær var erfitt að kasta vegna leiðindaveðurs. Flotinn var kominn að Vík í Mýrdal en eins hefur fengist afli austar með suðurströndinni. Norsku loðnuskipin hafa verið að veiðum úti fyrir Norðurlandi og fengu þar ágætis afla fyrir helgi. Nú eiga Norðmennirnir einungis eftir að veiða rúmlega 11.000 tonn en þeir mega veiða við landið til 23. febrúar.
 
Lokið var við að landa úr Berki NK í Neskaupstað sl. nótt en alls voru fryst tæplega 1.400 tonn úr honum fyrir Asíumarkað. Vinnslan á afla Barkar gekk vel og þegar henni lauk kom röðin að Bjarna Ólafssyni AK en hann kom til hafnar í gær með 1.300 tonn sem fengust í fjórum köstum. Auk þessara skipa lönduðu Vilhelm Þorsteinsson EA og norsku skipin Østerbris og Hardhaus í Neskaupstað um helgina.
 
Í morgun var grænlenska loðnuskipið Polar Amaroq inni á Norðfjarðarflóa. Það mun landa í kvöld og á morgun en undir lok veiðiferðarinnar skoðuðu Polarmenn fjörurnar syðra í samstarfi við Hafrannsóknastofnun. Heimasíðan sló á þráðinn til Geirs Zoëga skipstjóra og spurði hann frétta. „Þessi veiðiferð gekk vel hjá okkur. Við fengum góð köst og settum meðal annars met í afköstum við frystinguna um borð. Fórum yfir 200 tonn á sólarhring í fyrsta sinn. Síðan krussuðum við fjörurnar í samstarfi við Hafró og mældum loðnuna. Það er ljóst að þarna er mikið af loðnu á ferðinni og hún gengur mjög grunnt með ströndinni. Hún er alveg upp í broti. Það var mest að sjá í kringum Ingólfshöfðann en við fórum alveg vestur að Alviðru þar sem skipin hafa verið að veiða núna. Þetta voru aðallega tvær lengjur sem hvor um sig var um 20 mílur og alls staðar var mikið líf, fuglar og hvalir. Austast sáum við lóðningar innan við Hrollaugseyjar. Fyrir utan þetta hafa skip séð loðnu dýpra og bæði Börkur og Bjarni Ólafsson urðu varir við loðnu á siglingu austur af miðunum. Hafrannsóknaskipið Árni Friðriksson hefur verið fyrir norðan þar sem norski flotinn hefur verið að veiðum og vonandi hjálpa mælingar okkar við suðurströndina fiskifræðingunum að fá sæmilega heildarmynd af loðnugöngunum. Hann spáir illa næstu daga ekki síst fyrir sunnan landið þannig að ég er alvarlega að velta fyrir mér að halda til veiða norður fyrir land að löndun lokinni,“ sagði Geir.

Loðnan virðist vera að hlaupa saman og bátarnir hafa verið að fá ágæt köst

IMG 3017

Börkur NK hélt til loðnuveiða eftir nokkurt hlé í fyrrakvöld. Í gær fékk hann 740 tonn í fjórum köstum. Heimasíðan sló á þráðinn til Hjörvars Hjálmarssonar skipstjóra. „Hér er loðna með allri fjörunni suður af landinu en það var ekkert sérstakt stand á henni í gær. Þetta var þunnt lag og fleiri tugir mílna á lengd. Skipin voru ekki að fá neitt sérstök köst. Nú virðist loðnan hins vegar vera að hlaupa saman og menn hafa verið að fá mun betri köst í dag en í gær. Við tókum tvö köst í dag, fengum 200 tonn í því fyrra og 500 í því síðara. Nú erum við lagðir af stað í land með 1.500 tonn. Allur aflinn er kældur og gert er ráð fyrir að hann fari til manneldisvinnslu. Við verðum í Neskaupstað um klukkan tvö í nótt. Það virðist vera loðna út um allt. Norsku skipin eru að veiða á Skjálfanda og Öxarfirði  og fullyrt er að loðnu sé einnig að sjá dýpra þarna norðurfrá,“ sagði Hjörvar.

Bjarni Ólafsson AK hélt til loðnuveiða í gærkvöldi en Beitir NK er á leið á kolmunnamiðin vestur af Írlandi.

Öskudagur

ÖskudagurHver skrautlegi krakkahópurinn á fætur öðrum kom í heimsókn á skrifstofur Síldarvinnslunnar í dag. Krakkarnir voru klæddir hinum skrautlegustu búniningum og sungu eins og englar. Í þakklætisskyni þáðu þau harðfiskpoka að gjöf. Það er ávallt fagnaðarefni að fá öskudagsheimsóknir á skrifstofuna og meðfylgjandi eru myndir af nokkrum hópanna.

 

Öskudagur

 

 

 

 

 

 

 

 

 

  

Öskudagur

 

 

 

 

 

 

 

 

 

 

 

Það fiskast þrátt fyrir veðrið

Gullver NS kom til löndunar í gær. Ljósm. Ómar BogasonGullver NS kom til löndunar í gær. Ljósm. Ómar BogasonÍsfisktogarinn Gullver NS kom til Seyðisfjarðar í gær og var aflinn 110 tonn. Uppistaða aflans var þorskur. Heimasíðan sló á þráðinn til Þórhalls Jónssonar skipstjóra og spurði hvernig veiðiferðin hefði gengið: „Við vorum fyrir norðan á Rifsbankanum og það var kolvitlaust veður. Það var á mörkunum að hægt væri að vera að. Hins vegar var nægan fisk að fá og þetta var fínn fiskur. Túrinn tók þrjá sólarhringa höfn í höfn og við vorum einungis tvo sólarhringa á veiðum. Það er búin að vera rysjótt tíð frá áramótum en það hefur fiskast þokkalega engu að síður. Janúaraflinn hjá okkur var um 480 tonn og það er allt í lagi. Lægðirnar halda áfram að koma og við ætluðum út í gærkvöldi en brottför var frestað til dagsins í dag vegna veðurs. Tíðarfarið hlýtur að fara að skána,“ sagði Þórhallur.

 

 

 

Lítið að gerast á loðnumiðunum

Norsk loðnuskip og Síldarvinnsluskip í Norðfjarðarhöfn í morgun. Ljósm. Petter Geir SmådalNorsk loðnuskip og Síldarvinnsluskip í Norðfjarðarhöfn
í morgun. Ljósm. Petter Geir Smådal
Það er afar rólegt yfir loðnuveiðinni. Um helgina lönduðu fjögur norsk skip um 2.000 tonnum í Neskaupstað en fjöldi norskra skipa liggur inni á Austfjarðahöfnum og bíður þess að fá að hefja veiðar. Í gær voru Norðmennirnir að kasta grunnt norður af Sléttu en árangurinn reyndist misjafn. Norsku skipin eru búin að tilkynna 19.000 tonna afla það sem af er vertíð og eiga þá eftir að veiða um 44.000 tonn.
 
Í gær fréttist að hinn færeyski Júpíter hefði fengið 1.000 tonn af loðnu í þremur köstum og mun hann hafa haldið til Færeyja með aflann.
 
Eftir því sem best er vitað eru einungis þrjú íslensk skip á loðnumiðunum en þau munu halda sig við Stokksnes. Skipin eru Vilhelm Þorsteinsson EA, Ísleifur VE og Hoffell SU. Þegar þetta er skrifað liggur grænlenska skipið Polar Amaroq inni á Reyðarfirði og er að frysta. Aflinn fékkst við Suðausturland og sló heimasíðan á þráðinn til Geirs Zoëga skipstjóra: „Við gerum ráð fyrir að skipa aflanum um borð í flutningaskip á miðvikudag. Þetta er sjötti túrinn okkar á vertíðinni og við erum búnir að veiða 5.199 tonn. Vertíðin hefur gengið vel hjá okkur því við tókum 10 daga í loðnumælingar í samstarfi við Hafró. Ég tel að það sé framtíðin að veiðiskip taki virkan þátt í loðnumælingum undir stjórn Hafró og allt samstarf okkar við stofnunina hefur verið hið ánægjulegasta. Það er gríðarlega mikið af loðnu út af Suðausturlandinu. Við keyrðum þarna í 10 sjómílur í lóði og fórum aldrei vestur úr því. Aflann fengum við á Lónsvíkinni og þar var mikið líf. Þarna var til dæmis mikill fjöldi hvala. Nú eru Norðmenn að veiða norður við Langanes og í sumar þegar við vorum að leita að makríl við Grænland fundum við mikið af fallegri loðnu vestan við Angmassalik. Kannski verður sú loðna uppistaðan í vestangöngu í ár ? Það er víða loðna á ferðinni,“ sagði Geir.
 
Eins og flest íslensk loðnuskip liggja Síldarvinnsluskipin í höfn í Neskaupstað. Beitir NK landaði 1.320 tonnum af kolmunna um helgina en aflinn fékkst í færeysku lögsögunni.

Gamall kunningi með kolmunna til Neskaupstaðar

Gardar að landa kolmunna í Neskaupstað í morgun. Ljósm. Smári GeirssonGardar að landa kolmunna í Neskaupstað í morgun.
Ljósm. Smári Geirsson
Norska skipið Gardar kom í morgun með 1.800 tonn af kolmunna til Neskaupstaðar. Skipið er gamall kunningi Norðfirðinga, en það var í eigu Síldarvinnslunnar á árunum 2010-2013 og bar þá nafnið Beitir. Skipstjórinn á Gardar, Jonny Tøkje, upplýsti að aflinn hefði fengist vestur af Írlandi og þar væri mikið magn af kolmunna á ferðinni. „Það var svo sannarlega mikið að sjá og það þurfti aldrei að leita. Þarna var mikið fiskirí. Það tók okkur 2 ½ sólarhring að sigla af miðunum til Neskaupstaðar,“ sagði Jonny.
 
Jonny Tøkje skipstjóri á Gardar. Ljósm. Smári GeirssonJonny Tøkje skipstjóri á Gardar.
Ljósm. Smári Geirsson
Gardar kom til löndunar á Íslandi meðal annars vegna þess að nú er áformað að skipið veiði loðnukvóta sinn við landið. „Við höfum 1.120 tonna kvóta og við þurfum að gefa okkur tíma til að ná honum. Það tekur tíma að sinna loðnuveiðinni. Það mega 30 norsk loðnuskip veiða loðnu við landið samtímis og til dæmis núna bíða 22 eftir því að geta hafið veiðar. Ég hafði samband við önnur skip frá sömu útgerð sem voru úti í nótt en þetta eru skipin Manon og Slaatterøy. Skipin voru austur af Langanesi og þær upplýsingar fengust að lítið væri að hafa. Loðnan stendur djúpt og erfitt að ná henni í nót. Í gær melduðu norsk skip 2.700 tonn af loðnu og allir sjá að það er ekki mikið. En við erum bjartsýnir og trúum því að veiðin eigi eftir að batna. Það tekur dálítið á þolinmæðina að þurfa að bíða eftir því að fá að hefja veiðar en nú eru vetrarolympíuleikarnir að hefjast og þá verður hægt að fylgjast með þeim í sjónvarpi alla daga þannig að okkur ætti ekki að leiðast,“ sagði Jonny Tøkje að lokum.
 
 
 

Sérkennileg loðnuvertíð

Landað úr Liafjord til manneldisvinnslu í morgun. Ljósm. Smári GeirssonLandað úr Liafjord til manneldisvinnslu í morgun.
Ljósm. Smári Geirsson
Segja má að það sé sérskennileg staða að íslenski loðnuflotinn skuli vera bundinn við bryggju um þessar mundir að undanskildum fimm skipum sem hafa haldið til kolmunnaveiða í færeyskri lögsögu. Á loðnumiðunum eru einungis norsk skip sem melduðu inn 5.500 tonn sl. sólarhring. Norsku skipin eru mörg með 200-500 tonna afla og munu sex þeirra landa hjá Síldarvinnslunni í Neskaupstað, ýmist til manneldisvinnslu eða til mjöl- og lýsisframleiðslu. Í morgun var verið að landa úr Liafjord til manneldisvinnslu og var ráðgert að landað yrði úr Norderveg og Fiskskjer á eftir honum. Þá munu Strand Senior og Vea landa í fiskimjölsverksmiðjuna.
 
Það sem af er loðnuvertíðinni hafa vinnsluskipin Hákon EA og Vilhelm Þorsteinsson EA landað tæplega 5.000 tonnum í frystigeymslur Síldarvinnslunnar í Neskaupstað. Þá hefur grænlenska skipað Polar Amaroq skipað fjórum förmum beint um borð í flutningaskip, tvisvar á Eskifirði og tvisvar í Neskaupstað. Polar Amaroq lá inni á Norðfjarðarflóa í morgun og var að frysta.

Norsk loðnuskip landa í Neskaupstað

Norsk loðnuskip í Norðfjarðarhöfn í gær. Ljósm. Hákon ErnusonNorsk loðnuskip í Norðfjarðarhöfn í gær. Ljósm. Hákon ErnusonUm helgina lönduðu fjögur norsk loðnuskip slöttum í Neskaupstað. Þetta voru skipin Tronderbas, Vendla, Vea og Havsnurp og munu þau samtals hafa landað um 1.100 tonnum. Mörg norsku skipanna hafa verið í biðstöðu að undanförnu m.a. vegna óhagstæðs tíðarfars og átu í loðnunni. Um helgina voru norsku skipin einungis búin að melda 6.200 tonn en þá mátti gera ráð fyrir að þau ættu eftir að veiða um 60.000 tonn.

Beitir á kolmunna

Beitir NK að kolmunnaveiðum. Ljósm. Helgi Freyr ÓlasonBeitir NK að kolmunnaveiðum.
Ljósm. Helgi Freyr Ólason
Beitir NK hélt til kolmunnaveiða í gærkvöldi, en önnur uppsjávarskip Síldarvinnslunnar bíða frétta um niðurstöðu loðnumælinga. Heimasíðan sló á þráðinn til Sturlu Þórðarsonar skipstjóra á Beiti í morgun. „Við erum á leiðinni á gráa svæðið syðst í færeysku lögsögunni, en mér skilst að þar hafi Færeyingarnir verið að fiska vel að undanförnu. Þetta er 360-370 mílna sigling á miðin. Það eru fleiri íslensk skip á leiðinni á þessi mið, ég veit um Hoffell SU og Guðrúnu Þorkelsdóttur SU“, sagði Sturla.
 
 
 
 
 

Loðnumælingum lokið – nú er reiknað

Hafrannsóknaskipið Árni Friðriksson við festar á Norðfirði í morgun. Ljósm. Smári GeirssonHafrannsóknaskipið Árni Friðriksson við festar á
Norðfirði í morgun. Ljósm. Smári Geirsson
Loðnumælingum á vegum Hafrannsóknastofnunar er lokið að sinni. Rannsóknaskipin Árni Friðriksson og Polar Amaroq eru komin til Norðfjarðar en Bjarni Sæmundsson er á leið til Reykjavíkur. Þorsteinn Sigurðsson sviðsstjóri uppjávarsviðs Hafrannsóknastofnunar segir að leiðangursstjórarnir á Árna Friðrikssyni og Polar Amaroq hafi komið með flugi til Reykjavíkur í morgun og nú sé reiknað af krafti.
 
Að sögn Þorsteins er nú unnið við að kvarða fiskileitartækin um borð í Árna Friðrikssyni og tækin um borð í Polar Amaroq verði kvörðuð í kvöld eða á morgun. Í kvörðuninni felst að mæld er næmni hvers tækis og er það gert fyrir flesta leiðangra. Tækin um borð í Bjarna Sæmundssyni voru kvörðuð áður en haldið var af stað í leiðangurinn.
 
Gögnunum frá rannsóknaskipunum verður safnað saman og þá fæst ákveðin heildarmynd af þeirri loðnu sem mælist. Á grundvelli mælingarniðurstöðunnar verður síðan tekin ákvörðun um hvort bætt verður við kvótann. Lengi gilti sú regla að skilja þurfti eftir 400 þúsund tonn af þeirri loðnu sem mældist til að hrygna en nú gildir hins vegar ný  veiðiregla sem ákveðin var af stjórnvöldum á Íslandi, Grænlandi og í Noregi en Alþjóðahafrannsóknaráðið mat það svo að sú regla  tæki fullnægjandi tillit til óvissu í hverri mælingu. Nýja reglan leiðir gjarnan til þess að minna er veitt af þeirri loðnu sem mælist.
 
Þorsteinn segir að erfitt sé að segja til um hvenær niðurstaða úr loðnumælingunni liggi fyrir. Slík niðurstaða muni ekki liggja fyrir á morgun en með bjartsýni megi ef til vill gera ráð fyrir henni á föstudag. Hann segir hins vegar að öll áhersla sé lögð á að útreikningarnir gangi hratt fyrir sig.

Síldarvinnslan bæði framúrskarandi og til fyrirmyndar

 
Síldarvinnslan bæði framúrskarandi og til fyrirmyndarSamkvæmt mælingum Creditinfo töldust 868 fyrirtæki á Íslandi vera framúrskarandi á árinu 2017. Það munu vera 2,2% þeirra fyrirtækja sem starfa á landinu. Fyrirtækin sem komast á listann yfir framúrskarandi fyrirtæki þurfa að mæta ákveðnum skilyrðum um ábyrgan og arðbæran rekstur. Skilyrðin eru m.a. eftirfarandi: Þurfa að hafa skilað ársreikningi síðastliðin þrjú ár, vera í lánshæfisflokki 1-3, rekstrarhagnaður (ebit) verið jákvæður þrjú ár í röð, ársniðurstaða verið jákvæð þrjú ár í röð, eiginfjárhlutfall 20% eða meira þrjú ár í röð og eignir a.m.k. 90 milljónir kr. árið 2016 og 80 milljónir 2015 og 2014.
 
Á lista Creditinfo í ár er Síldarvinnslan í sjöunda sæti í flokki stórra fyrirtækja og hefur færst upp um eitt sæti frá því í fyrra. Þá ber að nefna að á listanum er einnig að finna dóttur- og hlutdeildarfyrirtæki Síldarvinnslunnar og má þar nefna G. Skúlason vélaverkstæði í Neskaupstað, Runólf Hallfreðsson ehf. á Akranesi, Fjarðanet hf. og Fóðurverksmiðjuna Laxá hf. á Akureyri.
 
Þá eru Viðskiptablaðið og Keldan í samstarfi um val á fyrirmyndarfyrirtækjum í rekstri. Fyrr í þessum mánuði lá niðurstaða valsins fyrir. Í heildina komust rúmlega 850 fyrirtæki á lista yfir fyrirmyndarfyrirtæki en það eru um 2% allra fyrirtækja sem starfa á landinu. Til að komast á listann þurftu fyrirtækin að hafa skilað ársreikningi og uppfylla ýmis önnur ströng skilyrði. Tekjur þeirra þurftu til dæmis að vera yfir 30 milljónum króna, eignir yfir 80 milljónum og eiginfjárhlutfall yfir 20%. Byggir listinn á ársreikningum fyrirtækjanna fyrir 2016 en þau eru flokkuð í þrjá stærðarflokka.
 

Síldarvinnslan bæði framúrskarandi og til fyrirmyndar

Eins og við var að búast var Síldarvinnslan á listanum yfir stór fyrirmyndarfyrirtæki og var þar reyndar í sjötta sæti. Í þeim flokki var Samherji í efsta sætinu og á eftir honum komu Icelandair Group, Félagsbústaðir hf., Marel hf., Össur hf. og síðan Síldarvinnslan. Þá er einnig að finna dóttur- og hlutdeildarfyrirtæki Síldarvinnslunnar á listanum yfir fyrirmyndarfyrirtækin. Má þar nefna Fjarðanet hf., Runólf Hallfreðsson ehf., G. Skúlason vélaverkstæði, Fóðurverksmiðjuna Laxá hf. og Gullberg ehf. á Seyðisfirði.
 
 
 
 

Frystigeymslurnar í Neskaupstað tóku á móti tæplega 61.000 tonnum árið 2017

Heimir Ásgeirsson yfirverkstjóri í frystigeymslunum fylgist með útskipun. Ljósm. Hákon ErnusonHeimir Ásgeirsson yfirverkstjóri í frystigeymslunum
fylgist með útskipun. Ljósm. Hákon Ernuson
Alls tóku frystigeymslur Síldarvinnslunnar í Neskaupstað á móti 60.800 tonnum af frystum afurðum á árinu 2017. Vinnsluskip lönduðu 23.406 tonnum í geymslurnar en frá fiskiðjuveri fyrirtækisins komu 37.400 tonn af uppsjávarfiski og 101 tonn af bolfiski. Eftirtalin skip lönduðu afurðum í frystigeymslurnar á árinu:
 
Vilhelm Þorsteinsson EA ... 10.154 tonn
Hákon EA ............................ 9.319 tonn
Polar Amaroq ...................... 1.363 tonn
Blængur NK ......................... 2.570 tonn
 
Öll skipin lönduðu uppsjávartegundum að Blængi undanskildum, en hann landaði botnfisktegundum.
 
Alls var á árinu skipað út 62.991 tonnum af afurðum sem geymdar voru í frystigeymslunum. Þar af fóru 45.153 tonn beint um borð í skip í Norðfjarðarhöfn en 17.848 tonn voru flutt með gámum til útskipunar í öðrum höfnum. Flutningabílar sóttu gámana og þurftu þeir að fara yfir Oddsskarð allt þar til Norðfjarðargöng voru opnuð fyrir umferð í nóvembermánuði sl. Hér er um að ræða um 1.500 ferðir slíkra bíla fram og til baka.

Mikill brælutúr hjá Blængi

Blængur NKBlængur NKFrystitogarinn Blængur NK er að landa í Neskaupstað í dag. Veiðiferðin tók 23 daga og er aflinn 388 tonn upp úr sjó að verðmæti um 97 milljónir króna. Togarinn millilandaði í Hafnarfirði 16. janúar. Heimasíðan hitti Bjarna Ólaf Hjálmarsson skipstjóra að máli og spurði hvernig túrinn hefði gengið. „Þetta var mikill brælutúr. Við fórum suður fyrir land og síðan á Vestfjarðarmið. Þar var verið í karfa og síðan millilandað í Hafnarfirði. Við þurftum síðan að flýja undan veðri á Austfjarðamið og þar var aflinn blandaður. Heilt yfir var frekar tregt í túrnum. Loðnan var að ganga upp að landinu og fiskurinn fer til móts við hana til að éta. Það mun rætast úr veiðinni hjá okkur þegar loðnan gengur upp á grunnin við Suðausturland,“ sagði Bjarni Ólafur.
 
Blængur mun halda til veiða á ný á þriðjudagskvöld.

Fiskiðjuver Síldarvinnslunnar framleiddi rúmlega 37.000 tonn á árinu 2017

Árið 2017 var gott ár í fiskiðjuverinu. Ljósm. Guadalupe LaizÁrið 2017 var gott ár í fiskiðjuverinu. Ljósm. Guadalupe LaizFiskiðjuver Síldarvinnslunnar í Neskaupstað framleiddi samtals 37.351 tonn af afurðum á árinu 2017. Til samanburðar var framleiðslan 39.216 tonn á árinu 2016 og 30.860 tonn á árinu 2015. Eins og áður er öll áhersla lögð á framleiðslu á uppsjávarfiski í fiskiðjuverinu en bolfiskur einungis unnin þegar hlé er á vinnslu uppsjávartegunda. Afköst fiskiðjuversins hafa verið aukin að undanförnu og skiptir það máli því sífellt hærra hlutfall uppsjávarafla fer til manneldisvinnslu.
 
Í töflunni hér á eftir sést skipting framleiðslunnar á milli tegunda á árunum 2015 – 2017:
 
Fiskiðjuver Síldarvinnslunnar framleiddi rúmlega 37.000 tonn á árinu 2017
 
 
 
 
 
 
 

Þéttar lóðningar sem gefa mikið

lodna08

Loðna unnin í fiskiðjuveri Síldarvinnslunnar.

                Beitir NK kom til Neskaupstaðar í gærkvöldi með 2.550 tonn af loðnu. Allur aflinn er kældur og er verið að vinna hann í fiskiðjuveri Síldarvinnslunnar. Tómas Kárason skipstjóri segir að vertíðin líti vel út. „Við vorum að veiða 68 mílur austnorðaustur af Norðfjarðarhorni og það verður að segjast að veiðiferðin gekk vel. Við fengum aflann í fimm holum og toguðum alltaf í fjóra tíma eða skemur. Í síðasta holinu fengum við 590 tonn og toguðum einungis í einn og hálfan tíma. Það er talsvert mikið að sjá af loðnu. Lóðningarnar eru þéttar og þær gefa vel. Sú breyting hefur orðið að nú fiskast jafnt að nóttu sem degi en fyrr á vertíðinni fékkst lítið yfir nóttina. Nú bíður maður spenntur eftir niðurstöðu mælinga en það hlýtur að verða bætt við kvótann. Það er samdóma álit manna á skipunum að það sé töluvert mikið af loðnu á ferðinni og hún sést víða. Skipin hafa verið að veiða á nokkrum blettum og það er langt á milli þeirra. Ég held og vona að þetta verði ágætis vertíð,“ segir Tómas.

                Slæmt veður er á loðnumiðunum núna og útlit fyrir leiðindaveður næsta sólarhringinn. Bjarni Ólafsson AK og Vilhelm Þorsteinsson EA eru á miðunum en það er lítið um að vera vegna veðurs. Börkur NK er í höfn að lokinni löndun og bíður þess að veðrið gangi niður. Polar Amaroq ætlaði að skipa frystri loðnu um borð í flutningaskip í Norðfjarðarhöfn í dag en vegna veðurs hefur skipið ekki komist inn í höfnina.

Fínasta loðnuveiði

Um borð í Beiti NK á loðnumiðunum. Ljósm. Helgi Freyr ÓlasonUm borð í Beiti NK á loðnumiðunum. Ljósm. Helgi Freyr ÓlasonÞað hefur verið fínasta loðnuveiði síðustu daga. Beitir NK landaði tæplega 2.000 tonnum í Neskaupstað í gær og í dag er Bjarni Ólafsson AK að landa rúmlega 1.000 tonnum til vinnslu í fiskiðjuveri Síldarvinnslunnar.
 
Börkur NK er á landleið með rúmlega 2.100 tonn og hafði heimasíðan samband við Hjörvar Hjálmarsson skipstjóra. „Það hefur verið fínasta veiði og töluvert að sjá. Loðnan virðist vera á stóru svæði og skipin eru víða að fá góðan afla. Það eru kannski 20 mílur á milli skipa og þau eru öll að gera það tiltölulega gott. Við fengum þennan afla í 5 holum og erum yfirleitt að draga í 4-5 tíma. Við fengum til dæmis 1.600 tonn á 16 tímum og það er fjarri því að vera slæmt. Í síðasta holinu drógum við í 6 tíma og fengum 660 tonn. Það er í reynd mokveiði. Nú bíða menn spenntir eftir niðurstöðu rannsóknaskipanna en tvö skip frá Hafró og grænlenska skipið Polar Amaroq hafa verið við mælingar að undanförnu. Ég er bjartsýnn á að bætt verði verulega við kvótann. Það er svo víða loðnu að finna og auk þess er þetta fínasta loðna sem veiðist,“ sagði Hjörvar.
 
Einungis eitt norskt loðnuskip, Endre Dyrøy, er komið á miðin en heyrst hefur að fleiri séu væntanleg á næstunni.

Bölvuð bræla í janúar þar til núna

Gullver NS að landa á Seyðisfirði. Ljósm. Ómar BogasonGullver NS að landa á Seyðisfirði. Ljósm. Ómar BogasonÍsfisktogarinn Gullver NS kom til Seyðisfjarðar í morgun með 95 tonn. Aflinn er mest þorskur. Heimasíðan hafði samband við Þórhall Jónsson skipstjóra og spurði hvernig veiðiferðin hefði gengið. „Þessi túr gekk vel. Við vorum að veiðum í þrjá sólarhringa og aflinn var þokkalegur. Þetta var svona nudd. Það var alger blíða á miðunum og það var skemmtileg tilbreyting. Það er búin að vera bölvuð bræla allan janúar þar til í þessum túr. Aflinn framan af mánuðinum var takmarkaður en hafa ber í huga að veðrið truflaði veiðar, það virtist ekki vera mikill fiskur á miðunum hér eystra og við vorum jafnvel einskipa á slóðinni. Nú hefur veður skánað, allavega í bili, og við verðum varir við meira af fiski. Þá hefur skipum fjölgað mjög á Austfjarðamiðum vegna veðurfars á öðrum miðum við landið. Hingað eru komnir frystitogarar og eins eru Vestmannaeyjaskipin komin hingað austur. Með tilkomu þeirra fæst betri vitneskja um stöðuna á miðunum. Núverandi blíða gefur fyrirheit um að veðrið geti farið að lagast og þá verður þetta fínt,“ sagði Þórhallur.
 
Fyrir þessa veiðiferð landaði Gullver á Seyðisfirði sl. mánudag. Þá lönduðu Vestmannaeyjaskipin Bergey og Vestmannaey á Seyðisfirði sl. miðvikudag og þegar þetta er ritað er Bergey að landa á Eskifirði og Vestmannaey á Seyðisfirði.
 
Frystitogarinn Blængur NK millilandaði í Hafnarfirði sl. þriðjudag. Aflinn var 230 tonn upp úr sjó.

Halldór Hinriksson jarðsunginn

Halldór HinrikssonHalldór HinrikssonÍ dag verður Halldór Hinriksson jarðsunginn frá Norðfjarðarkirkju en hann lést 10. janúar sl. Halldór starfaði í áratugi hjá Síldarvinnslunni. Um 1960 hóf hann að gegna starfi verkstjóra í síldarverksmiðjunni en hóf síðan störf fyrir útgerð fyrirtækisins um 1970. Störfin fyrir útgerðina voru fjölbreytt og sinnti Halldór þeim af kostgæfni. Halldór hætti störfum vegna aldurs árið 1999 en þá var hann 72 ára. Halldór var alla tíð mikill Síldarvinnslumaður, bar hag fyrirtækisins fyrir brjósti og gladdist innilega við hvert framfaraskref sem það tók.
 
Síldarvinnslan vottar öllum aðstandendum Halldórs innilega samúð vegna fráfalls hans.
 
 
 
 
 
 
 
 
 

Undirflokkar