Hátíðarhöld Sjómannadagsins í Neskaupstað 2018

Fimmtudagur 31.Maí

  • 18:30- Pizzahlaðborð í Hotel Capitano
  • 22:00-01 Spilakvöld í Beituskúrnum

 

Föstudagur    1.Júní

  • 10:00    Miðbærinn skreyttur og fánar dregnir að húni.
  • 20–23.00 Unglingaball í Atóm
  • 22–03.00 Einar Ágúst spilar í Beituskúrnum

           

Laugardagur  2.Júní

  • kl.10:00                Myndlistasýning í Nesbæ kaffihúsi
  • kl.10:00-12:00       Hópsigling Norðfirska flotans – allir velkomnir - talsamband á rás 12

                              Smábátaeigendur eru hvattir til þátttöku á bátum sínum. Börn skulu vera í fylgd fullorðinna.

  • 11:30-13:30 „Bröns“ í Hotel Capitano
  • 12:00–14.00 Grillað lambalæri og meðlæti í hádeginu í Beituskúrnum
  • 13:00–14.00 Sjóvá Kvennahlaup ÍSÍ   hlaupið hefst við Nesbæ kaffihús
  • 13:00-15:00 Hoppikastalar á bryggju neðan við kirkjuna , sjá nánar á http://www.hopp.is  
  • 13:00 Opnun nýrrar sýningar á málverkum Tryggva Ólafssonar í Safnahúsinu
  • 13:00-14:00 Leikfélagið Djúpið með andlitsmálingu fyrir börnin
  • 13:30-14:00 Laddi með upphitun fyrir kappróður
  • 14:00   Kappróður
  • 22:00–03.00 Einar Ágúst spilar í Beituskúrnum
  • 23.00-03:00 Opið ball í boði Síldarvinnslunnar með hljómsveitinni Von ásamt Bryndísi Ásmundsdóttur og Orra Sveins. Aldurstakmark 18 ára.

           

Sunnudagur   3.júní

  • 09:00    Sjómannadagsmót GN og Gjögurs á Norðfjarðarvelli
  • 09:30     Skip og bátar draga íslenska fánann að húni –bæjarbúar flaggi sem víðast.
  • 11:00           Dorgveiðikeppni 12 ára og yngri – skráning við Jósafatssafn

    Allir þátttakendur skulu vera í björgunarvestum og mæta vel fyrir tímann.

  • 12:00           Grillveisla að hætti Jóns Gunnars í boði SVN
  • 12:00–14.00 Grillað lambalæri og meðlæti í hádeginu  í Beituskúrnum
  • 14:00     Hátíðarmessa í Norðfjarðarkirkju.

Séra Sigurður Rúnar Ragnarsson. Kór Norðfjarðarkirkju syngur. Að messu lokinni verður lagður blómsveigur við minnisvarðann um óþekkta sjómanninn í kirkjugarðinum

  • 14:30 -18:00 Kaffisala Gerpis að Nesi Allur ágóði rennur til björgunarstarfa sveitarinnar.
  • 15:30     Hátíðardagskrá við sundlaugina: 
  •     Heiðrun.
  •        Reiptog, koddaslagur og fleira, skráning hjá Halla Egils. 6611790.
  •     Verðlaunaafhendingar.

                    

                        Hvetjum alla sem hlotið hafa heiðursmerki Sjómannadagsins til þess að bera það.

 

Sjómannadagsráð Neskaupstaðar og samstarfsaðilar:

Bjsv Gerpir, Haki, Sún, SVN, G. Skúlason og Hafnarsjóður Fjarðabyggðar.                      

Allar fyrirspurnir vinsamlegast sendar á  This email address is being protected from spambots. You need JavaScript enabled to view it.

Kaupið merki dagsins!

Kolmunnaveiði hafin í Rósagarðinum

Börkur NK. Ljósm. Hákon ErnusonBörkur NK. Ljósm. Hákon ErnusonHákon EA kom til Neskaupstaðar í gær og landaði 340 tonnum af kolmunna. Aflinn fékkst í Rósagarðinum og í gær voru fleiri skip komin þangað til veiða. Þarna voru Börkur NK, Beitir NK, Hoffell SU og Venus NS. Beitir fékk þarna 340 tonn í einu holi og er á leið til Seyðisfjarðar með liðlega 2.000 tonn en megnið af aflanum fékkst í færeyskri lögsögu. Börkur fékk 270 tonn í Rósagarðinum í gær og er á leið til Neskaupstaðar með 1.740 tonn. Hálfdan Hálfdanarson skipstjóri á Berki segir að mjög mikilvægt sé að kolmunni veiðist í íslenskum sjó. „Það er mjög jákvætt að kolmunni veiðist í Rósagarðinum því við þurfum að veiða 25%  af kvótanum utan færeyskrar lögsögu. Þarna fékkst ágætur fiskur en við tókum bara eitt hol og drógum í 17 tíma. Þetta gefur vonir um að þarna megi fá þokkalegan afla og ég reikna með að stefnan verði tekin á Rósagarðinn strax eftir sjómannadag,“ segir Hálfdan.

Vönduð umræða er mikilvæg

Kolmunnaveiðar í færeyskri lögsögu. Ljósm. Helgi Freyr ÓlasonKolmunnaveiðar í færeyskri lögsögu.
Ljósm. Helgi Freyr Ólason
Nú þegar rætt er um breytingar á veiðigjöldum er mikilvægt að umræðan sé vönduð og yfirveguð. Sumir stjórnmálamenn virðast fjalla um málið án þess að kynna sér það til hlítar og fjölmiðlum hættir til að nota hálfgerðan æsifréttastíl í sinni umfjöllun.
 
Í gær var sérstaklega fjallað um veiðigjald á kolmunna og einkenndist sú umfjöllun af samanburði á fyrirhuguðu veiðigjaldi á Íslandi og því verði sem fékkst fyrir veiðiheimildir í kolmunna sem boðnar voru upp í Færeyjum. Niðurstaða þessa samanburðar var sláandi og var upplýst að íslenska ríkið fengi einungis 1 kr fyrir hvert kíló af kolmunna á meðan hið færeyska fengi 6 og væri munurinn því hvorki meiri né minni en 83%. Umfjöllun á borð við þessa er engum sæmandi og skal hér bent á nokkra þætti sem nauðsynlegt er að hafa í huga ef samanburðurinn á að vera raunhæfur:
 
  • Einungis 14% veiðiheimilda í kolmunna var boðinn upp í Færeyjum og fór 70% uppboðsheimildanna til tveggja útgerðarfyrirtækja.
  • Í Færeyjum er greitt veiðigjald af þremur fisktegundum en á Íslandi af fimmtíu.
  • Færeyingar eiga kost á því að nýta hluta kolmunnakvóta síns til manneldisframleiðslu á markað í Rússlandi og fyrir þær afurðir fæst mun hærra verð en fyrir mjöl og lýsi. Þetta geta íslensk fyrirtæki ekki gert meðal annars vegna hins margumrædda Rússabanns.
  • Ef á að bera saman tekjur hins opinbera á Íslandi og í Færeyjum af útgerð er nauðsynlegt að taka tillit til allra þátta. Hér skal til dæmis bent á að færeyskar útgerðir greiða hvorki aflagjald né  kolefnisgjald eins og íslenskar útgerðir gera.
  • Launatengd gjöld á Íslandi eru mun hærri en í Færeyjum og munar þar mestu um tryggingagjald og lífeyrisgreiðslur. Þessar staðreyndir hafa áhrif á allan samanburð.
  • Kolmunnaveiðar Íslendinga fara að mestu fram í færeyskri lögsögu og 90% veiðanna á fjarlægum miðum. Tilkostnaður íslenskra útgerða við veiðarnar er mun meiri en hjá færeyskum ekki síst vegna þess að þær hafa lengra að sækja.
 
Ef á að bera saman útgerð á Íslandi og í Færeyjum og tekjur hins opinbera af henni þarf að taka tillit til fjölmargra þátta og ef það er ekki gert verður samanburðurinn villandi og leiðir til galinnar umræðu. Upplýst umræða um þessi málefni sem er laus við sleggjudóma er okkur nauðsynleg. 
 

Kolmunnaskipin að leita

Beitir NK á kolmunnamiðunum. Ljósm. Helgi Freyr ÓlasonBeitir NK á kolmunnamiðunum.
Ljósm. Helgi Freyr Ólason
Kolmunnaskipin sem eru að veiðum í færeysku lögsögunni hafa lítið fengið síðustu dagana. Beitir NK og Börkur NK eru að leita norðan við Færeyjar og hefur lítið komið út úr því ennþá. Beitir er kominn með 1.700 tonn og Börkur um 1.500. Tómas Kárason skipstjóri á Beiti segir að veiðin hafi verið fín í upphafi veiðiferðarinnar en síðan hafi hún algerlega dottið niður. „Við stefnum núna í Rósagarðinn og ef ekkert finnst verður án efa fljótlega haldið heim á leið þar sem menn munu taka þátt í sjómannadagshátíðarhöldum í blíðunni. Auðvitað er sjálfsagt að nota tímann til að leita, en veiðin hefur nánast engin verið síðustu tvo dagana,“ segir Tómas.
 
Margrét EA kom í morgun til Seyðisfjarðar og mun landa þar um 1.700 tonnum og Bjarni Ólafsson AK kom til Neskaupstaðar í gærkvöldi þar sem hann landaði 1.800 tonnum. Gísli Runólfsson skipstjóri á Bjarna Ólafssyni segir að veiðiferðin hafi gengið vel hjá þeim. „Við vorum rúmlega tvo sólarhringa að fá í bátinn og aflinn fékkst í einungis fjórum holum. Þegar við héldum í land breyttist þetta og nú er bara ekkert að hafa og skipin sem eru á miðunum eru að leita. Nú erum við að þrífa skipið og gera það fínt fyrir sjómannadagshelgi. Hjá okkur er allt komið í ró,“ segir Gísli.
 
 
 

Blængsmenn koma fljúgandi

Blængur NK. Ljósm. Hákon ErnusonBlængur NK. Ljósm. Hákon ErnusonFrystitogarinn Blængur NK hefur verið að veiðum í Barentshafi í um mánaðartíma. Í kvöld mun skipið koma til hafnar í Kirkenes í Norður-Noregi og í fyrramálið mun áhöfnin fljúga frá Kirkenes til Osló og þaðan rakleiðis til Íslands. Væntanlega mun Blængsmenn koma til Neskaupstaðar annað kvöld og þá er framundan sjómannadagshelgi. Heimasíðan ræddi við Theodór Haraldsson skipstjóra og spurði hvernig veiðiferðin hefði gengið. „Það má segja að hún hafi gengið vel en reyndar vonuðumst við eftir heldur meiri og jafnari veiði þó svo að fiskiríið hjá okkur hafi verið betra en hjá mörgum öðrum togurum á svæðinu. Við erum búnir að fá rúmlega 1.000 tonn upp úr sjó. Þar af er þorskur tæplega 900 tonn en síðan er þetta helst ýsa og ufsi. Veðrið hefur verið frábært nánast allan túrinn. Það kom bræla í einungis einn sólarhring en annars er þetta eins og að vera inni á firði. Gert er ráð fyrir að áhöfn skipsins fljúgi út á miðvikudag í næstu viku en eftir er að veiða um 440 tonn af þorskkvótanum og um 50 tonn af ýsukvótanum. Síðan mun skipið væntanlega koma heim og landa í Neskaupstað en enginn afli mun fara á land í Kirkenes. Sjómannadagshelgin er framundan og við erum spenntir að koma heim og njóta hennar, það er hörkustemmning í hópnum,“ segir Theodór.
 
Til gamans skal þess getið að Kirkenes er 3.500 manna bær skammt frá rússnesku landamærunum. Saga Kirkenes er áhugaverð en nefna má að í síðari heimsstyrjöldinni voru yfir 300 loftárásir gerðar á bæinn en hann var mikilvæg bækistöð þýska hernámsliðsins. Þegar Þjóðverjarnir yfirgáfu síðan nyrsta hluta Noregs í lok stríðs brenndu þeir Kirkenes og lögðu bæinn algjörlega í rúst.

Góður apríl hjá Gullver

Gullver NS. Ljósm. Ómar BogasonGullver NS. Ljósm. Ómar BogasonVeiðar hjá ísfisktogaranum Gullver NS hafa gengið vel að undanförnu. Í aprílmánuði fór skipið í sex veiðiferðir og landaði samtals 642 tonnum á Seyðisfirði. Uppistaða aflans, eða 374 tonn, var þorskur en síðan landaði hann  79 tonnum af ufsa, 77 tonnum af karfa, 64 tonnum af ýsu og minna af öðrum tegundum. Rúnar L. Gunnarsson skipstjóri er mjög ánægður með aprílmánuð. „Þetta var súpermánuður hjá okkur, með þeim betri. Veiðiferðarnar voru stuttar eða um fjórir sólarhringar höfn í höfn og aflinn yfirleitt rúmlega 100 tonn í hverri ferð. Við fiskuðum allan mánuðinn á okkar hefðbundnu miðum. Við vorum í Hvalbakshallinu, á Hvalbaksgrunni og í Lónsbugtinni. Við erum afar sáttir við það hvernig veiðarnar hafa gengið, það er ekki hægt annað,“ segir Rúnar.

 

 

Góð kolmunnaveiði – 89.000 tonn til Síldarvinnslunnar

Beitir NK að landa í Neskaupstað í gær. Ljósm. Helgi Freyr ÓlasonBeitir NK að landa í Neskaupstað í gær.
Ljósm. Helgi Freyr Ólason
Síðustu tvo dagana hefur kolmunnaveiðin í færeysku lögsögunni verið góð þó síðasta nótt hafi ekki verið gjöful. Bjarni Ólafsson AK er á landleið með 1.810 tonn sem hann fékk í fjórum holum og er hann væntanlegur til Neskaupstaðar í fyrramálið. Vilhelm Þorsteinsson EA er að landa 2.100 tonnum á Seyðisfirði. Gunnar Sverrisson verksmiðjustjóri á Seyðisfirði segir að lögð hafi verið áhersla á að halda verksmiðjunum á Seyðisfirði og í Neskaupstað gangandi að undanförnu þegar kolmunnaveiðin var heldur treg. Til dæmis landaði Börkur NK síðasta farmi sínum bæði í Neskaupstað og á Seyðisfirði sl. mánudag og þriðjudag svo unnt væri að halda verksmiðjunum gangandi. Hann landaði 1.200 tonnum í Neskaupstað og 1.000 tonnum á Seyðisfirði. Upplýsir Gunnar að verksmiðjan á Seyðisfirði sé búin að taka á móti 41.000 tonnum af kolmunna frá því í marsmánuði. 
 
Hafþór Eiríksson verksmiðjustjóri í Neskaupstað segir að Beitir NK hafi landað þar 2.400 tonnum í gær og þá sé búið að taka á móti 48.000 tonnum af kolmunna á árinu þannig að verksmiðjur Síldarvinnslunnar á Seyðisfirði og í Neskaupstað hafa samtals tekið á móti 89.000 tonnum. 

Enn einn metmánuðurinn hjá Eyjunum

Bergey VE. Ljósm. Guðmundur AlfreðssonBergey VE. Ljósm. Guðmundur AlfreðssonAldrei hafa skip útgerðarfélagsins Bergur-Huginn í Vestmannaeyjum borið jafn mikinn afla að landi í einum mánuði og í aprílmánuði sl. Alls lönduðu Vestmannaey VE og Bergey VE 1.538 tonnum af fiski í mánuðinum en hvort skip var aðeins 17 daga á sjó. Fyrra aflamet skipa félagsins í einum mánuði var í mars 2009 en þá voru skipin reyndar þrjú að tölu. Aflaverðmæti skipanna hefur heldur aldrei verið meira en í aprílmánuði sl. en það reyndist vera 338 milljónir króna. Fyrra met aflaverðmætis eins mánaðar er frá maímánuði 2010.
 
Þegar rýnt er í tölur frá útgerðarfélaginu kemur í ljós að skip þess hafa veitt mest allra skipa af ýsu það sem af er kvótaárinu. Ýsuafli þeirra er 2.134 tonn og nemur það 13% af ýsuveiði landsmanna. Þá kemur einnig í ljós að aflaverðmæti Vestmannaeyjar VE frá upphafi mun sennilega ná 10 milljarða markinu í júnímánuði nk. en Vestmannaey kom ný til landsins árið 2007.
 
Heildarafli skipanna tveggja frá áramótum er 4.409 tonn og er þetta mesti afli sem skip félagsins hafa borið á land á tímabilinu janúar-apríl. Aflaverðmæti frá áramótum nálgast einn milljarð króna.
 
Arnar Richardsson rekstrarstjóri segir að útgerðin hafi gengið einstaklega vel að undanförnu og starfsmenn félagsins séu afar ánægðir með árangurinn. „Það er alveg ljóst að við getum ekki kvartað,“ segir Arnar.
 
Jón Valgeirsson skipstjóri á Bergey segir að vertíðin hafi verið einstaklega góð. „Þetta hefur verið glimrandi vertíð og metafli. Aprílmánuður var einstaklega góður, blússandi veiði allan mánuðinn. Veðrið lék líka við okkur og það hefur alltaf sitt að segja,“ segir Jón.
 
Þegar þetta er skrifað er Vestmannaey að fara í slipp í Vestmannaeyjum þar sem hefðbundnu viðhaldi verður sinnt. Bergey er hins vegar að veiðum á Breiðdalsgrunni.

„Kolmunnaveiði hefur alltaf verið köflótt“

Landað úr Bjarna Ólafssyni AK í dag. Ljósm. Smári GeirssonLandað úr Bjarna Ólafssyni AK í dag. Ljósm. Smári GeirssonBjarni Ólafsson AK kom til Neskaupstaðar sl. nótt með tæplega 1.800 tonn af kolmunna. Það tók fjóra sólarhringa að fá í skipið en um síðustu mánaðamót, þegar veiðin var hvað mest, tók það um einn og hálfan sólarhring. Runólfur Runólfsson skipstjóri segir að þetta þurfi ekki að koma á óvart. „Kolmunnaveiði hefur alltaf verið köflótt og það hefur dregið mjög úr veiðinni síðustu dagana. Í þessum túr fengum við aflann í sex holum, stysta holið var sjö tímar en það lengsta átján tímar. Reynslan af kolmunnaveiðunum segir manni að veiðarnar geti glæðst á ný fyrirvaralítið. Við vorum núna að veiða austan við Færeyjabanka í svonefndu Ræsi, en í morgun sá ég að skipin voru farin að veiða við Múkkagrunn. Fyrstu tvo dagana í túrnum var leiðindaveður en síðan batnaði það. Vandamálið var hins vegar ofboðslegur straumur sem er á þessum slóðum og hann gerði okkur mjög erfitt fyrir. Ég er viss um að kolmunninn á eftir að ganga inn í íslenska lögsögu með minnkandi straumi og þar á eftir að verða veiði. Það skiptir miklu máli að veitt sé í okkar lögsögu,“ sagði Runólfur.

Runólfur Runólfsson skipstjóri. Ljósm. Smári GeirssonRunólfur Runólfsson skipstjóri. Ljósm. Smári Geirsson

Blíða í Barentshafinu

Blængur NK.Blængur NK.Frystitogarinn Blængur NK hóf veiðar í Barentshafinu 28. apríl sl. Veiðin fór tiltölulega hægt af stað og segir Theodór Haraldsson skipstjóri að fyrstu dagana hafi fengist um það bil tonn á tímann. Að undanförnu hefur veiðin farið vaxandi en fiskurinn heldur sig á litlum blettum og þegar hann finnst hópast einir 20 togarar að og þá dregur fljótt úr veiðinni. Auk Blængs er Kleifaberg þarna að veiðum ásamt þremur færeyskum skipum en önnur skip eru rússnesk. Það var góð veiði á sunnudag og mánudag og á mánudaginn fengust 70-80 tonn þannig að í fyrrinótt var skipið á reki á meðan aflinn var unninn. Vinnslan hefur gengið mjög vel og fóru 65 tonn af blönduðum afla í gegnum hana á mánudag. Í gær datt veiðin niður á ný og nú eru skipin að leita. Theodór segir að nú séu um 600 tonn komin um borð í skipið og uppistaða aflans sé þorskur. „Það er staðreynd að við vonuðumst eftir heldur meiri afla en hitt er svo annað mál að þetta þætti góður afli á Íslandsmiðum. Það hefur venjulega verið meiri afli í Barentshafinu um þetta leyti árs en af einhverjum ástæðum er fiskgengd ekki jafn mikil núna. Hér hefur verið blíðuveður þennan hálfa mánuð sem við höfum verið að veiðum. Skipið hreyfist nánast ekki, það er eins og legið sé við bryggju,“ segir Theodór.
 
Blængur mun koma í heimahöfn úr veiðiferðinni í Barentshafið fyrir sjómannadag sem er 3. júní.

Dagamunur í kolmunnaveiðinni

Beitir NK í rjómablíðu á kolmunnamiðunum. Ljósm. Helgi Freyr ÓlasonBeitir NK í rjómablíðu á kolmunnamiðunum.
Ljósm. Helgi Freyr Ólason
Á kolmunnamiðunum í færeysku lögsögunni er blíðuveður þessa dagana en aflinn er hins vegar misjafn. Sturla Þórðarson skipstjóri á Beiti NK segir að ágætur afli hafi fengist í gær en í dag sé lítið að hafa. „Við fengum um 450 tonn í gær eftir að hafa togað í eina 17 tíma og vorum þá komnir með 900 tonn í skipið. Við erum að hífa núna og ég held að það sé bara einhver skaufi – þetta virðist vera afar lélegt. Ég heyri að skipin láta almennt illa af sér núna og það er ekki veðrið sem truflar því hér er renniblíða,“ segir Sturla.
 
Fiskimjölsverksmiðjan á Seyðisfirði lauk við að vinna kolmunnann sem þangað hefur borist í gærkvöldi þannig að þar er vinnsluhlé. Vinnsluhlé var einnig í verksmiðjunni í Neskaupstað en þar hófst vinnsla á ný í gærkvöldi þegar Vilhelm Þorsteinsson EA kom með 1.700 tonn. 

Bræla á kolmunnamiðunum

Börkur NK að veiðum á kolmunnamiðunum. Ljósm. Helgi Freyr ÓlasonBörkur NK að veiðum á kolmunnamiðunum.
Ljósm. Helgi Freyr Ólason
Nú er bræla á kolmunnamiðunum í færeysku lögsögunni og veður hefur reyndar verið óhagstætt til veiða síðustu dagana. Veiðin var mjög góð um mánaðamótin en úr henni hefur dregið að undanförnu. Í þessari viku hafa kolmunnaskip landað góðum afla bæði á Seyðisfirði og í Neskaupstað. Vilhelm Þorsteinsson EA landaði á Seyðisfirði á mánudag 2.100 tonnum, Beitir NK landaði þar á miðvikudag 3.000 tonnum og Margrét EA var að ljúka löndun á 1.700 tonnum í morgun. Í Neskaupstað landaði Börkur NK 2.200 tonnum á mánudag, Hákon EA landaði tæplega 1.600 tonnum á miðvikudag og Bjarni Ólafsson EA lauk löndun á tæplega 1.600 tonnum í gærkvöldi.
 
Að sögn Hafþórs Eiríkssonar verksmiðjustjóra í Neskaupstað gengur mjög vel að vinna kolmunnann. Hann segir að yfirleitt sé hráefnið gott enda reyni skipin að kæla aflann eins og mögulegt er.

Fyrsta skóflustunga tekin að nýrri netagerð Fjarðanets í Neskaupstað

Hin nýja netagerð Fjarðanets í NeskaupstaðHin nýja netagerð Fjarðanets í NeskaupstaðSl. mánudag var fyrsta skóflustunga tekin að nýrri netagerð Fjarðanets hf. í Neskaupstað. Netagerðin mun rísa á landfyllingu sem gerð hefur verið austan við fiskimjölsverksmiðju Síldarvinnslunnar. Nýja netagerðarhúsið mun verða 85 metra langt og 26 metra breitt eða um 2.200 fermetrar að stærð. Það mun hýsa netaverkstæði, gúmmíbátaþjónustu og veiðarfærageymslu. Húsinu verður skipt í tvennt eftir endilöngu; öðru megin í því verður netaverkstæðið og hinum megin geymsla fyrir veiðarfæri, nætur og troll. Í öðrum enda hússins verður síðan rými fyrir víraverkstæði, gúmmíbátaþjónustuna og skrifstofur auk starfsmannaaðstöðu.
 

Fyrsta skóflustunga að nýju netagerðinni var tekin sl. mánudag. Jón Einar Marteinsson framkvæmdastjóri fyrir miðju. Til hægri er Jón Bjarnason netagerðarmeistari og Steindór Björnsson netagerðarmeistari er til hægri. Ljósm. Hákon ErnusonFyrsta skóflustunga að nýju netagerðinni var tekin
sl. mánudag. Jón Einar Marteinsson framkvæmdastjóri
fyrir miðju. Til vinstri er Jón Bjarnason
netagerðarmeistari og Steindór Björnsson 
netagerðarmeistari er til hægri. Ljósm. Hákon Ernuson

Framkvæmdir við byggingu hússins munu hefjast á næstu dögum en ráðgert er að þeim ljúki 1. mars á næsta ári. Verktaki er byggingafyrirtækið Nestak ehf. í Neskaupstað.
 
Öll starfsemi Fjarðanets í Neskaupstað mun flytjast úr gamla netagerðarhúsinu í þetta nýja hús. Gamla húsið var byggt af miklum stórhug á árunum 1964-1965 en er orðið barn síns tíma. Skip og veiðarfæri hafa stækkað gríðarlega frá því að gamla netagerðin var reist og þörf er á allt annarri aðstöðu en þá var krafist. Sem dæmi má nefna að í Neskaupstað hefur vinna við flottroll að mestu farið fram utan dyra hingað til en með tilkomu nýja hússins verður þeirri vinnu sinnt innan dyra við kjöraðstæður. Reyndar má segja að öll starfsaðstaða í hinu nýja húsi verði eins og best gerist, framleiðslugeta mun aukast og gert er ráð fyrir að starfsemi Fjarðanets á staðnum muni vaxa að umfangi. Þá mun veiðarfærageymslan í nýja húsinu valda byltingarkenndri breytingu en nætur hafa verið geymdar utan dyra til þessa í Neskaupstað.
 
Jón Einar Marteinsson, framkvæmdastjóri Fjarðanets, segir að þörfin fyrir nýja netagerð í Neskaupstað sé gríðarleg. „Aðstaða okkar á staðnum hefur verið fjarri því að vera fullnægjandi en með tilkomu nýju netagerðarinnar verður hún til fyrirmyndar.  Við ætlum okkur að bjóða upp á góða þjónustu í framtíðinni og í reyndinni er tilkoma þessa nýja húss forsendan fyrir því að það sé hægt. Starfsemin í Neskaupstað er mikilvægur þáttur í starfsemi Fjarðanets en fyrirtækið hefur einnig starfsstöðvar á Akureyri og Ísafirði,“ segir Jón Einar.
 
 
 
 
 

Gullver með góðan afla

:  Verið að landa úr Gullver NS í gær. Í baksýn er Vilhelm Þorsteinsson EA að koma til löndunar með fullfermi af kolmunna. Ljósm. Ómar BogasonVerið að landa úr Gullver NS í gær. Í baksýn er Vilhelm
Þorsteinsson EA að koma til löndunar með fullfermi
af kolmunna. Ljósm. Ómar Bogason
Gullver NS kom til Seyðisfjarðar sl. sunnudag með 104 tonn af blönduðum afla. Um  helmingur aflans var þorskur en hinn helmingurinn ýsa, ufsi og karfi. Skipstjóri á Gullver í þessari veiðiferð var Rúnar Gunnarsson og segir hann að vel hafi gengið að veiða. „Við vorum í Lónsbugt og Berufjarðarál og veiðin gekk ágætlega. Þetta eru okkar hefðbundnu mið. Við fórum hins vegar fjóra túra á Selvogsbanka fyrir hrygningarstopp og einn túr eftir stoppið og þar fékkst ágætur afli,“ segir Rúnar.
 
Drjúgur hluti af afla Gullvers fer til vinnslu í fiskvinnslustöð Síldarvinnslunnar á Seyðisfirði. Þar eru framleiddir hnakkar og flök sem flutt eru út fersk til Frakklands og Þýskalands og síðan er þar fiskur unninn og frystur á Bandaríkjamarkað. Karfinn í afla Gullvers fór til vinnslu í fiskiðjuveri Síldarvinnslunnar í Neskaupstað.

Töluverð lýsuveiði hjá Eyjunum

Vestmannaey VE og Bergey VE. Ljósm. Guðmundur AlfreðssonVestmannaey VE og Bergey VE. Ljósm. Guðmundur AlfreðssonVestmannaey VE og Bergey VE komu til löndunar í Vestmannaeyjum í gær. Bæði skipin voru með fullfermi og afli þeirra blandaður en hvort skip var m.a. með um 20 tonn af lýsu. Bergur-Huginn, dótturfyrirtæki Síldarvinnslunnar, gerir út Eyjarnar og hefur lengi verið lögð nokkur áhersla á lýsuveiðar hjá skipunum. Lýsan er utan kvóta og fyrir hana fæst viðsættanlegt verð en hún er seld til Frakklands. Markaðurinn fyrir lýsuna er hins vegar ekki stór og því skiptir máli að veiðin sé ekki alltof mikil. Heimasíðan ræddi við Birgi Þór Sverrisson skipstjóra á Vestmannaey um lýsuveiðar. Birgir segir að lýsuveiðar séu heldur meiri nú en síðustu 2-3 árin en hins vegar hafi enn meiri áhersla verið lögð á lýsuveiðar áður fyrr þegar kvóti skipanna var minni. „Það var ágætt lýsuskot nú í aprílmánuði og veiðin hefur haldið áfram það sem af er maí. Yfirleitt hverfur lýsan af miðunum í lok maí og sést nánast ekkert á ný fyrr en á haustin. Lýsan er fínasti matfiskur. Yfirleitt er fiskurinn sem við fáum á bilinu 500-700 grömm en stærsti fiskurinn er 1-1,2 kg.,“ segir Birgir.

Vinnsla á grálúðu og karfa í fiskiðjuverinu gengur vel

Vinnsla á grálúðu og karfa í fiskiðjuverinu gengur velHinn 11. apríl sl. hófst vinnsla á grálúðu í fiskiðjuveri Síldarvinnslunnar í Neskaupstað. Grálúðan er veidd í net fyrir norðan land og er það Anna EA sem leggur stund á veiðarnar. Nýlega var einnig farið að vinna karfa í fiskiðjuverinu og kemur hann frá ísfisktogurum Síldarvinnslunnar. Jón Gunnar Sigurjónsson yfirverkstjóri í fiskiðjuverinu segir að þessi vinnsla gangi vel. „Grálúðan er hausskorin hjá okkur, hreinsuð og fryst. Höfum við verið að vinna allt upp í 15 tonn á dag. Karfinn er hins vegar heilfrystur. Bæði lúðan og karfinn fara síðan á Japansmarkað. Það starfa 18 manns við þessa vinnslu eins og er en mjög margir starfsmanna okkar taka sér frí þegar hlé er á vinnslu uppsjávartegunda,“ segir Jón Gunnar.

 

 

 

Kolmunnamok

Beitir NK með 600 tonna hol á síðunni. Ljósm. Helgi Freyr ÓlasonBeitir NK með 600 tonna hol á síðunni.
Ljósm. Helgi Freyr Ólason
Fyrir og um nýliðna helgi var mokveiði hjá kolmunnaskipunum í færeysku lögsögunni. Skipin voru gjarnan að fylla sig á einum sólarhring eða svo og þurfti að hægja á veiðunum vegna þess að kolmunninn er viðkvæmt hráefni. Fiskurinn er kældur um borð í skipunum en hann geymist ekki vel eftir löndun. Burðargeta þeirra skipa sem landa hjá Síldarvinnslunni er um 12.800 tonn en samanlögð afkastageta verksmiðjanna í Neskaupstað og á Seyðisfirði er 2.500 tonn á sólarhring. Kolmunninn er þess eðlis að afar mikilvægt er að stilla saman veiðar og vinnslu á honum.
 
Bæði Gunnar Sverrisson verksmiðjustjóri á Seyðisfirði og Hafþór Eiríksson verksmiðjustjóri í Neskaupstað segja að vinnslan á kolmunnanum gangi mjög vel, en mikilvægt sé að hráefnið sé unnið sem fyrst eftir löndun. Á Seyðisfirði landaði Beitir NK 3.000 tonnum á mánudaginn en á undan honum lönduðu Margrét EA 2.100 tonnum og Vilhelm Þorsteinsson EA 2.100 tonnum. Í Neskaupstað er Vilhelm Þorsteinsson EA að landa 2.100 tonnum en á undan honum lönduðu Börkur NK 2.330 tonnum og Bjarni Ólafsson AK 1.830 tonnum.

Starfslokanámskeið

StarfslokanámskeiðNæstkomandi miðvikudag, 2. maí, verður haldið starfslokanámskeið á vegum Síldarvinnslunnar. Það er ætlað starfsmönnum í Neskaupstað sem eru orðnir 62 ára eða eldri. Námskeiðið verður haldið í Kreml og stendur frá kl. 13.00 – 16.00. Starfsmenn geta skráð námsskeiðssetuna sem vinnutíma.
 
Námskeiðið fjallar fyrst og fremst um fjárhagslega hlið starfsloka, en flókið getur verið að átta sig á þeim málum og ekki ráð nema í tíma sé tekið. Námskeiðið er haldið á vegum Félagsmálaskóla alþýðu og leiðbeinandi er Guðmundur Hilmarsson sem hefur mikla reynslu af slíku námskeiðahaldi. Námskeiðið er hluti af fræðsluáætlun Síldarvinnslunnar og sér Austurbrú um skipulag og framkvæmd þess. Efnistökin eru þessi:
 
Farið er yfir greiðslu ellilífeyris frá almannatryggingum og hvernig skattskyldar tekjur geta haft áhrif á ellilífeyri. Eftrtöldum spurningum verður svarað:
 
•  Hvernig er lífeyrir frá almennum lífeyrissjóðum uppbyggður, hver er upphæð lífeyris ?
•  Hvenær er hægt að hefja töku lífeyris frá almannatryggingum og lífeyrissjóðum ?
•  Hefur ellilífeyrir frá lífeyrissjóði áhrif á lífeyri frá almannatryggingum ?
•  Ef greitt hefur verið í séreignasjóð, hvenær er best að taka þann lífeyri ?
 
Áhugasamir geta skráð sig á námskeiðið með því að senda tölvupóst á This email address is being protected from spambots. You need JavaScript enabled to view it. eða með því að skrá sig á skráningarblöð sem liggja frammi á skrifstofu, í fiskiðjuveri og í fiskimjölsverksmiðju í Neskaupstað.
 
Sambærileg námskeið verða í boði fyrir starfsmenn Síldarvinnslunnar á Seyðisfirði og í Helguvík en þau verða auglýst síðar.
 
Sjómenn á skipum Síldarvinnslunnar sem ekki eiga möguleika á að sækja umrædd námskeið en hefðu áhuga á því eru beðnir um að hafa samband við Hákon Ernuson starfsmannastjóra.

Prentuð útgáfa starfsmannastefnunnar

Starfsmannastefna 2018Nú hefur starfsmannastefna Síldavinnslunnar verið gefin út á prentuðu formi. Frá því að hún tók gildi árið 2016 hefur hún eingöngu verið aðgengileg á heimasíðu fyrirtækisins. Starfsmannastefnan útskýrir hvernig fyrirtækið hyggst vinna að því að tryggja og auka starfsánægju og velferð starfsmanna. Meginatriði stefnunnar eru eftirfarandi:
Síldarvinnslan er hátæknivætt sjávarútvegsfyrirtæki í fremstu röð. Slíkur rekstur stendur og fellur með þekkingu og frammistöðu starfsfólks. Það skiptir Síldarvinnsluna því miklu máli að hafa á að skipa góðu og ánægðu starfsfólki. Í því skyni er stefnt að því að bjóða upp á vinnuumhverfi sem einkennist af hvatningu, öryggi og góðum samskiptum. Fyrirtækið vill bjóða fólki upp á:
 
  • vinnuumhverfi þar sem stjórnendur og starfsfólk vinnur að því í sameiningu að auka sífellt öryggi, velferð og árangur
  • trygga vinnu og góða afkomu
  • vinnu þar sem starfsfólk er hvatt til að gera sitt besta og efla stöðugt þekkingu sína og færni
  • sveigjanleika og jafnvægi milli vinnu og einkalífs eins og frekast er unnt
  • samskipti sem einkennast af samráði og virðingu
  • jafnrétti til launa og tækifæra
 
Starfsmannastefnan er prentuð á íslensku, ensku og pólsku og verður hún aðgengileg öllum á starfsstöðvum fyrirtækisins innan skamms.

25.000 tonn af kolmunna frá miðjum apríl

Fiskimjölsverksmiðja Síldarvinnslunnar á Seyðisfirði. Ljósm. Hákon ErnusonFiskimjölsverksmiðja Síldarvinnslunnar á Seyðisfirði.
Ljósm. Hákon Ernuson
Íslensk skip hófu veiðar á kolmunna í færeyskri lögsögu snemma í þessum mánuði. Fyrsta kolmunnanum eftir að veiðarnar hófust var landað í fiskimjölsverksmiðju Síldarvinnslunnar á Seyðisfirði 12. apríl og í verksmiðjuna í Neskaupstað daginn eftir. Nú hefur verksmiðjan á Seyðisfirði tekið á móti 11.800 tonnum en Margrét EA landaði þar tæpum 1.900 tonnum sl. laugardag og Beitir NK tæplega 3.100 tonnum sl. nótt. Verksmiðjan í Neskaupstað hefur tekið á móti 13.350 tonnum en Börkur NK er að landa þar 2.300 tonnum. Samtals hafa verksmiðjurnar því tekið á móti 25.150 tonnum frá því að veiðarnar í færeysku lögsögunni hófust en fyrr á árinu höfðu þær tekið á móti kolmunna sem veiddur var vestur af Írlandi.
 
Hafþór Eiríksson verksmiðjustjóri í Neskaupstað segir að kolmunninn sé gott hráefni til vinnslu og undir það tekur Gunnar Sverrisson verksmiðjustjóri á Seyðisfirði. „Það gengur mjög vel að vinna kolmunnann og vinnslan hefur verið samfelld að undanförnu. Við höfum stundum þurft að hægja dálítið á til að hafa vinnsluna samfellda. Þegar um kolmunna er að ræða skiptir kæling á aflanum um borð í skipunum öllu máli. Kolmunninn er viðkvæmt hráefni og það er ekki gott að geyma hann lengi eftir löndun, hann skemmist mjög hratt.  Það skiptir því miklu að fá hráefnið vel kælt úr skipunum og vinna það strax,“ segir Gunnar.

Undirflokkar