Síldarvinnslan framúrskarandi enn og aftur

Framurskarandi 1 2020Creditinfo hefur nú tilkynnt hvaða fyrirtæki á Íslandi töldust framúrskarandi á rekstrarárinu 2019 samkvæmt þeim viðmiðum sem stuðst er við, en Creditinfo hefur unnið lista um framúrskarandi fyrirtæki frá árinu 2010. Fyrir árið 2019 komust einungis um 2% fyrirtækja á umræddan lista.

Á listanum yfir framúrskarandi fyrirtæki er þeim skipt í þrjá stærðarflokka; lítil fyrirtæki, meðalstór og stór. Síldarvinnslan er í flokki stórra fyrirtækja og er þar í sjötta sæti. Fram kemur á listanum að eignir Síldarvinnslunnar séu 64.3 milljarðar króna og eigið fé 43.7 milljarðar króna eða 67,9%. 

Síldarvinnslan hefur verið á lista yfir framúrskarandi fyrirtæki samfellt frá árinu 2012 og hefur verið að færast upp listann á síðustu árum.

Þegar fyrirtæki á listanum eru skoðuð eftir landshlutum kemur fram að 32 fyrirtæki á Austurlandi eru framúrskarandi og þar er Síldarvinnslan í fyrsta sæti.

Framurskarandi 2 2020

Afar fallegur fiskur

Gullver NS kemur til  hafnar. Ljósm. Ómar BogasonGullver NS kemur til hafnar. Ljósm. Ómar BogasonÍsfisktogarinn Gullver NS kom til Seyðisfjarðar í gærmorgun með góðan afla. Heimasíðan ræddi við Þórhall Jónsson skipstjóra og spurði fyrst um samsetningu aflans og hvar hefði verið veitt. „Aflinn var 109 tonn, mest þorskur. Við byrjuðum veiðar norður á Héraðsflóa en vorum lengst af á Gerpisflakinu. Undir lokin leituðum við síðan að ýsu á Skrúðsgrunni. Fiskurinn sem fékkst er afar fallegur og ekki undan neinu að kvarta. Eins og kunnugt er hefur verið mikil traffík á miðunum hérna fyrir austan að undanförnu og megnið af togaraflotanum verið hér að veiðum. Þó sýnist mér að frystitogararnir séu flestir farnir núna. Þessi traffík hérna fyrir austan er óvenjuleg en skýringin er góður afli og gott veður. Veðrið hefur í sannleika sagt leikið við okkur. Og hér fyrir austan hefur verið mikið æti fyrir fiskinn, bæði síld og kolmunni. Núna stefnir í að það verði eitthvað lát á blíðunni, það eru haustlægðir framundan,“ segir Þórhallur.
 
Gullver hélt á ný til veiða síðdegis í gær. 

Blængur í Barentshafið

Blængur NK heldur í Barentshafið á morgun. Ljósm. Hafþór Hreiðarsson (skipamyndir.com)Blængur NK heldur í Barentshafið á morgun.
Ljósm. Hafþór Hreiðarsson (skipamyndir.com)
Frystitogarinn Blængur NK mun halda til veiða í Barentshafi á morgun. Það mun taka skipið um þrjá og hálfan sólarhring að sigla þangað. Heimasíðan ræddi við Theodór Haraldsson skipstjóra og spurði hvort gert væri ráð fyrir löngum túr. „Það er gert ráð fyrir 34 daga túr og það þýðir að við verðum komnir heim um 25. nóvember. Ráðgert er að veiða  um 600 tonn og við eigum eftir að sjá hvernig það gengur. Síðustu fréttir herma að ekki sé mikið fiskirí á þessum slóðum akkúrat núna en það getur breyst á skömmum tíma. Auðvitað vona allir að það gangi sem best að veiða og við náum aflanum á skemmri tíma en gert er ráð fyrir. Veður hefur mikil áhrif á veiðarnar en það er allra veðra von á þessum slóðum á þessum árstíma. Annars eru menn bara bjartsýnir og vonandi á þetta eftir að ganga vel,“ segir Theodór.

 

 

Síld og kolmunni

Beitir NK kom með 700 tonn af kolmunna og 800 tonn af síld í gær. Ljósm. Hákon ErnusonBeitir NK kom með 700 tonn af kolmunna og 800 tonn af síld í gær. Ljósm. Hákon ErnusonUppsjávarskipin Beitir NK og Bjarni Ólafsson AK komu til Neskaupstaðar í gær og í morgun með síldar- og kolmunnaafla. Börkur NK er síðan væntanlegur í dag.

Beitir NK kom með 700 tonn af kolmunna og 800 tonn af síld í gær. Vinnsla á síldinni hófst strax en nú er unnið í fiskiðjuverinu á tveimur vöktum í stað þriggja eins og þegar síldarvertíðin stóð sem hæst, enda ekki um samfellda vinnslu að ræða. Bjarni Ólafsson AK kom í morgun með um 870 tonn af kolmunna og segir Runólfur Runólfsson skipstjóri að heldur hafi dregið úr kolmunnaveiðinni og síld hafi flætt yfir kolmunnaslóðina.

Börkur NK er væntanlegur til Neskaupstaðar í dag og er hann með um 940 tonn af síld og 430 tonn af kolmunna. Síldin fékkst í þremur holum norðantil í Norðfjarðardýpi og var töluvert að sjá þar.