Afurðirnar streyma úr landi

Útskipun á mjöli.  Ljósm. Ágúst BlöndalÍ maímánuði og það sem af er júní hefur mikið verið um útskipanir á afurðum úr birgðageymslum Síldarvinnslunnar. Alls eru útskipanirnar 26 á þessu tímabili og er um frystar afurðir að ræða ásamt mjöli og lýsi. Frystu afurðirnar eru loðna, loðnuhrogn og síldarflök auk þess afla sem frystitogarinn Barði hefur borið að landi. Á tímabilinu hafa verið 5 útskipanir á mjöli og hafa verið flutt út á vegum Síldarvinnslunnar rúmlega 8.600 tonn. Mjölið kemur frá verksmiðjum fyrirtækisins í Neskaupstað og á Seyðisfirði en einnig frá verksmiðju Skinneyjar-Þinganess á Hornafirði en Síldarvinnslan annast sölu á afurðum hennar. Útskipanirnar á lýsi eru 4 talsins, samtals rúmlega 5.600 tonn. Langmest af mjölinu og lýsinu fer til framleiðslu á fóðri fyrir norskan eldisfisk en nú fer í hönd sá tími sem fóðurþörfin er hvað mest.


Grálúðan veidd Utanfótar

Landað úr Barða NK.  Ljósm. Þorgeir BaldurssonFrystitogarinn Barði NK hélt í grálúðu- og ufsatúr eftir sjómannadag. Allan túrinn hefur hann verið við grálúðuveiðar og aflað vel. Til stóð að skipið héldi til ufsaveiða vestur á Hala um tíma en sú veiði reyndist einungis vera þriggja daga skot og því var hætt við að fara þangað. Theodór Elvar Haraldsson skipstjóri lætur vel af túrnum og segir að skipið sé að fyllast og því sé ráðgert að millilanda næstkomandi föstudag. „ Við munum væntanlega koma inn á föstudagsmorgun og halda aftur til veiða á föstudagskvöld að löndun lokinni“, segir Theodór. „Við vorum einmitt núna að taka gott hol, en aflinn hefur gjarnan verið um 500 kg. á togtíma að undanförnu og það þykir gott. Við erum að veiðum Utanfótar eins og sagt er, en þar er góð grálúðuslóð. Utanfótar er utan við Fótinn sem er norðaustur af Breiðdalsgrunni. Ég geri ráð fyrir að haldið verði áfram í grálúðunni að aflokinni millilöndun eða þá að við förum í ufsa ef hann gefur sig einhvers staðar“, segir skipstjórinn á Barða að lokum.


Aðalfundur Síldarvinnslunnar hf.

Aðalfundur Síldarvinnslunnar hf.Aðalfundur Síldarvinnslunnar hf. verður haldinn miðvikudaginn 26. júní  2013 á hótel Eddu Neskaupstað kl. 13:00.

Dagskrá:

   1.  Skýrsla stjórnar
   2.  Endurskoðaðir reikningar lagðir fram til staðfestingar
   3.  Tekin ákvörðun um greiðslu arðs
   4.  Ákveðin þóknun til stjórnar félagsins
   5.  Breytingar á samþykktum félagsins
          a.  Tillaga um að fjölga stjórnarmönnum úr þremur í fimm
   6.  Kosin stjórn félagsins
   7.  Kosnir endurskoðendur
   8.  Önnur mál, löglega fram borin

Stjórn Síldarvinnslunnar hf.


Allt að verða klárt fyrir síldar- og makrílvertíð í Neskaupstað

Makrílvinnsla í fiskiðjuveri Síldarvinnslunnar.Í morgun kom sumarstarfsfólk til starfa í fiskiðjuveri Síldarvinnslunnar í Neskaupstað. Í þeim hópi eru um 20 starfsmenn sem ekki hafa áður gegnt störfum við síldar- og makrílvinnslu og munu þeir njóta nýliðafræðslu á næstu dögum. Að þeirri fræðslu lokinni munu nýliðarnir bætast í hóp þeirra sem unnið hafa að undirbúningi vertíðar. Í fiskimjölsverksmiðju Síldarvinnslunnar hefur einnig verið unnið að undirbúningi vertíðarinnar og má segja að þar sé allt orðið klárt fyrir móttöku hráefnis.

Tvö skipa Síldarvinnslunnar munu leggja stund á síld- og makrílveiðar, Börkur NK og Beitir NK. Börkur kom til Neskaupstaðar fyrir helgina en hann hefur að undanförnu verið á Akureyri þar sem unnið var að viðhaldi skipsins. Beitir er enn á Akureyri en þar hefur hann verið í slipp og verður ekki tilbúinn til veiða fyrr en undir lok mánaðarins. Gera má ráð fyrir að Börkur haldi til veiða í næstu viku og vertíðin hefjist af fullum krafti upp úr því.  


Lóðaframkvæmdir við fiskiðjuverið

Framkvæmdir hafnar á lóð fiskiðjuvers Síldarvinnslunnar.Allumfangsmiklar framkvæmdir eru hafnar á lóð fiskiðjuvers Síldarvinnslunnar í Neskaupstað. Lóðin vestan við fiskiðjuverið verður mótuð og þar verða gróðursett tré og runnar, hellur verða lagðar og mikill timburpallur smíðaður. Umrætt svæði er áberandi og gestir fiskiðjuversins fara um það þannig að mikilvægt er að þarna sé umhverfi til fyrirmyndar og í samræmi við þá fyrirmyndarfiskvinnslu sem á sér stað í iðjuverinu.

Lóðin var hönnuð af Landmótun en verktaki við lóðaframkvæmdirnar er Tandraberg ehf.

Umhverfishópur Síldarvinnslunnar skilar góðu verki

Umhverfishópurinn ásamt flokkstjórum, verkstjóra og yfirumsjónarmanni.Umhverfishópur Síldarvinnslunnar hóf störf í byrjun júnímánaðar. Í hópnum eru 13 ungmenni að flokksstjórum meðtöldum.  Verkstjóri er Ingi Steinn Freysteinsson en Sigfús Sigfússon stýrir umhverfisverkefnunum.

Að sögn Sigfúsar eru verkefni hópsins mikil og margvísleg. Hann sinnir tiltekt af öllu tagi á athafnasvæði Síldarvinnslunnar og að auki fæst hann við hreinsun og málningarvinnu. Sigfús lætur vel af hópnum og segir að hann sé áhugasamur og kraftmikill og góður vinnuandi ríki innan hans. Þá fullyrðir hann að árangur af starfinu verði augljós og reyndar sé slíkur árangur þegar kominn fram. Síldarvinnslan ætli sér að leggja aukna áherslu á umhverfismál og ráðning umhverfishópsins sé liður í því. Að mati Sigfúsar mun hópurinn skila góðu og þörfu verki sem allir ættu að verða ánægðir með.

Bullandi þorskur á Brjálaða horni

Gott þorskhol hjá Bjarti NK. Ljósm. Þorgeir BaldurssonÍsfisktogarinn Bjartur NK kom til löndunar í Neskaupstað aðfaranótt mánudags með góðan afla eða um 120 tonn. Um 70 tonn af aflanum var þorskur en hluti hans var ufsi, ýsa, karfi og fleiri tegundir. Skipið var á veiðum í um það bil tvo og hálfan sólarhring þannig að það aflaðist jafnt og vel í túrnum. Túrinn hófst með ýsuveiðum innan við Undirbyrðarhrygg á Papagrunni og síðan var veiddur ufsi á suðvesturhorni Papagrunns. Þá var haldið í þorskinn og var hann tekinn frá Kransinum yfir á Brjálaða horn, á Örvæntingarhorni og í Kverkinni austan við Örvæntingarhorn. Á þessu svæði var bullandi þorskur og er um góðan fisk að ræða.

Steinþór Hálfdanarson skipstjóri á Bjarti segir að menn séu ánægðir með aflabrögðin en ráðgert er að Bjartur haldi í næsta túr á föstudagsmorgun og er löndun áætluð þriðjudaginn 18. júní. Áformað er að aflasamsetning verði svipuð í næsta túr og var í þeim síðasta að karfa undanskildum en Bjarti er ekki ætlað að veiða hann að sinni. „Hér um borð eru allir sallaánægðir“, segir Steinþór,“góður afli, gott veður, gott að borða – er hægt að biðja um eitthvað meira ?“

Á grálúðuveiðum í bongóblíðu

Barði NK-120. Ljósm. Guðlaugur BirgissonStrax að afloknum sjómannadegi hélt frystitogarinn Barði NK í grálúðu- og ufsatúr. Haldið var í Seyðisfjarðardýpið og þar hefur skipið síðan verið á grálúðuveiðum. Að sögn Theodórs  Elvars Haraldssonar skipstjóra hefur veiðiferðin gengið vel í alla staði. Veiðin hefur verið á bilinu 350-500 kg. á togtíma og það þykir ágæt grálúðuveiði. Allt frá því að skipið lét úr höfn hefur verið bongóblíða á miðunum og segir Theodór að það séu forréttindi að fá tækifæri til að vera á sjó í slíkri veðráttu.
 
Theodór segir að nú sé farið að hyggja að því að halda vestur og hefja ufsaveiðar þar og jafnvel verði siglt þangað á morgun. „ Það er brostin á mokufsaveiði á Halanum núna og við látum hana ekki fara framhjá okkur,“ sagði Theodór.

Vel heppnuð kynning á iðn- og verknámi

Nemendur að störfum í hárdeild VA. Ljósm. Viðar GuðmundssonHinn 7. júní lauk viku kynningu á iðn- og verknámi í Verkmenntaskóla Austurlands. Kynningin var sótt af 54 nemendum Vinnuskóla Fjarðabyggðar sem allir luku námi í 9. bekk grunnskólans sl. vor. Auk Verkmenntaskólans og sveitarfélagsins Fjarðabyggðar  stóðu sjö fyrirtæki að kynningarvikunni og var Síldarvinnslan eitt þeirra.

Þetta kynningarátak þótti heppnast afar vel, nemendur voru áhugasamir og kennarar ánægðir. Nemendurnir störfuðu í fjóra daga á verkstæðum skólans og unnu þar að ýmsum verkefnum í málmdeild, trédeild, rafdeild og hárdeild skólans. Jafnfram kynntu áfangastjóri og námsráðgjafi Verkmenntaskólans námsleiðir á sviði iðn- og tæknináms. Á lokadegi kynningarvikunnar var efnt til uppskeruhátíðar en þá gátu foreldrar og forráðamenn nemendanna komið og skoðað ýmsa smíðisgripi sem orðið höfðu til í kynningarvikunni og eins gátu þeir virt fyrir sér afrakstur vinnu nemendanna í hárdeildinni. Þá heimsóttu einnig fulltrúar þeirra fyrirtækja sem styrkt höfðu kynningarverkefnið skólann og fræddust um árangurinn.

Aðstandendur kynningarverkefnisins eru  sammála um að hér sé fundið gott fyrirkomulag til að fræða nemendur á grunnskólastigi um eðli og innihald iðn- og tæknináms en almennt eru menn þeirrar skoðunar að nauðsynlegt sé að efla slíkt nám og hefja það til vegs og virðingar í samfélaginu.

Síldarvinnslan fyrir 40 árum

Börkur nýkominn til heimahafnar í Neskaupstað í fyrsta sinn, 10. feb. 1973. Ljósm. Guðmundur SveinssonÍ þessum sögulega þætti verður í stuttu máli gerð grein fyrir starfsemi fyrirtækisins á árinu 1973. Hafa verður í huga að á síldarárunum svonefndu lauk á árunum 1967-1968 og við það breyttust mjög öll starfsskilyrði Síldarvinnslunnar. Á næstu árum var farið að huga að breytingum á starfseminni og eins reyndist nauðsynlegt að endurnýja skipastól fyrirtækisins því skipin sem höfðu verið í eigu þess frá upphafi hentuðu fyrst og fremst til síldveiða. Fyrstu fjögur skipin sem Síldarvinnslan eignaðist voru öll seld á árunum 1970-1972 en þess í stað hóf fyrirtækið skuttogaraútgerð með kaupunum á Barða NK árið 1970. Árið 1973 ber þess mjög merki að þessar breytingar eru enn að ganga yfir.

Lesa meira...

Sjávarútvegsskóli Síldarvinnslunnar - Sumarskóli fyrir grunnskólanemendur þar sem námslaun verða greidd

Sjávarútvegsskóli Síldarvinnslunnar - Sumarskóli fyrir grunnskólanemendur þar sem námslaun verða greidd

Gert er ráð fyrir að Sjávarútvegsskóli Síldarvinnslunnar taki til starfa í sumar en skólinn er tilraunaverkefni þar sem grunnskólanemendum verður gefinn kostur á að fræðast um fiskveiðar og fiskvinnslu. Skólinn verður settur í vikunni fyrir verslunarmannahelgi og mun kennslan fara fram dagana sitt hvoru megin við þá helgi. Kennsluefnið verður miðað við efstu bekki grunnskóla en að þessu sinni munu 8. bekkingar í Nesskóla (nemendur fæddir 1999) hafa forgang þegar nemendaskráning hefst.

Skólinn mun starfa í um tvær vikur (átta kennsludagar) og verður daglegur starfstími 3-4 klukkustundir. Undir lok sumra kennsludaga er ætlast til að nemendur sinni tilfallandi verkefnum undir stjórn verkstjóra. Námslaun verða greidd og verða þau sambærileg þeim launum sem greidd eru í Vinnuskóla Fjarðabyggðar.

Námsefnið verður fjölbreytt og kennarar verða margir. Í upphafi námsins verður sögu sjávarútvegs gerð skil og fjallað um veiðiskip, veiðarfæri og verkunaraðferðir á hverjum tíma. Lögð verður áhersla á tækniþróun og þau samfélagslegu áhrif sem sjávarútvegurinn hefur haft. Skólinn mun fá heimsóknir og meðal annars munu fyrrum sjómenn og starfsmenn í fiskvinnslu koma og segja frá reynslu sinni og þeim breytingum sem þeir hafa upplifað. Eins verður fjallað um Síldarvinnsluna, sögu hennar og starfsemi, og gerð grein fyrir einkennum nútíma sjávarútvegsfyrirtækja og mikilvægi  þeirra fyrir íslenskt samfélag.

Lesa meira...

Síldarvinnslan styrkir Knattspyrnufélag Fjarðabyggðar

Gunnþór Ingvason og Bjarni Ólafur Birkisson undirrita samninginn. Ljósm. Margrét ÞórðardóttirMánudaginn 3. júní var undirritaður nýr styrktar- og auglýsingasamningur á milli KFF (Knattspyrnufélags Fjarðabyggðar) og Síldarvinnslunnar en Síldarvinnslan hefur lengi verið í hópi þeirra félaga og fyrirtækja sem helst hafa stutt við bakið á öflugu starfi KFF.

Það voru þeir Gunnþór Ingvason framkvæmdastjóri Síldarvinnslunnar og Bjarni Ólafur Birkisson formaður KFF sem undirrituðu samninginn. Bjarni Ólafur segir að samningurinn við Síldarvinnsluna skipti KFF afar miklu máli. Helstu útgjöld félagsins séu ferðakostnaður og flugfargjöld hafi hækkað mikið að undanförnu, til dæmis um þriðjung nú á milli ára. Þessi kostnaður geri KFF sífellt erfiðara að starfa þó ítrustu hagsýni sé gætt en við slíkar aðstæður sé einmitt afar mikilvægt að njóta dýrmæts stuðnings og velvildar félaga og fyrirtækja eins og Síldarvinnslunnar.

„Það er ávallt ánægjulegt að undirrita samning eins og þennan“, sagði Bjarni Ólafur,“því þá sést svart á hvítu að störf okkar hjá KFF eru mikils metin í samfélaginu“.

Kynning á iðnnámi hafin í Verkmenntaskóla Austurlands

Nemendur að störfum í málmdeild VA. Ljósm. Viðar GuðmundssonÍ þessari viku, eða dagana 3.-7. júní, stendur yfir kynning á iðnnámi í Verkmenntaskóla Austurlands. Allir sem luku námi í 9. bekk í vor og eru skráðir í Vinnuskóla Fjarðabyggðar hefja sumarstarfið með því að sækja umrædda kynningu. Nemendurnir starfa í hópum í skólanum undir traustri leiðsögn kennara og kynnast námi og námsaðstöðu í fjórum deildum; málmdeild, trédeild, rafdeild og hárdeild. Ýmsum verkefnum verður sinnt fyrstu fjóra daga vikunnar en lokadagurinn verður eins konar uppskerudagur þar sem foreldrum og velunnurum verður boðið að koma og sjá afrakstur nemendanna.

Þetta kynningarstarf er samvinnuverkefni Verkmenntaskóla Austurlands, sveitarfélagsins Fjarðabyggðar og sjö fyrirtækja sem starfa í Fjarðabyggð, þar á meðal Síldarvinnslunnar.

Lesa meira...

Útgerð línubáta frá Neskaupstað

Línubátar að landa í Neskaupstað.  Ljósm. Guðlaugur BirgissonSumarið 2011 komu tveir yfirbyggðir línubátar til Neskaupstaðar og hófu að gera út þaðan. Þessir aðkomubátar öfluðu vel og aflinn var stór og góður þorskur og meðafli lítill. Árangur þessara báta spurðist út og í fyrrasumar komu einir 15 bátar af þessari gerð til Neskaupstaðar og reru þaðan, þar af 8-10 sem gerðu þaðan út  um lengri tíma. Þessir bátar komu frá Sandgerði, Garði, Siglufirði, Grindavík, Eskifirði og Húsavík. Mikil ánægja ríkti með aflabrögðin enn á ný en bátarnir fiskuðu mest í svonefndri Gullkistu sem er í norðanverðu Seyðisfjarðardýpi og fóru þeir gjarnan út á 30-40 mílur.

Í fyrra fiskaði Vonin frá Sandgerði mest þessara báta en hún hóf veiðar í maí-júní og reri í Kistuna alveg fram í desember. Afli Vonarinnar á þessum tíma var 494 tonn. Næstaflahæsti báturinn var síðan Hafdís frá Eskifirði með 440 tonn. Í heildina lönduðu yfirbyggðu línubátarnir 2400 tonnum af góðum þorski í Neskaupstað á síðasta ári. 

Núna í maímánuði byrjuðu línubátarnir að tínast austur.  Alls eru komnir 6 bátar og koma þeir frá Sandgerði, Garði, Siglufirði og Eskifirði. Hafa bátarnir verið að afla vel og sem dæmi lönduðu þeir samtals 50 tonnum sl. miðvikudag. 
 

Lesa meira...

Sjómannadagshelgin framundan

Síldarvinnslan sendir sjómönnum og fjölskyldum þeirra innilegar heillaóskir í tilefni sjómannadagsins.  Dagskrá sjómannadagshelgarinnar í Neskaupstað má nálgast hér:

Dagskrá sjómannadagshátíðarhaldanna í Neskaupstað

Norður á nýja Berki en heim á þeim gamla

Sl. miðvikudag sigldi Börkur NK norður til Akureyrar þar sem skipið verður snurfusað fyrir væntanlega síldar- og makrílvertíð. Skipstjóri á Berki á norðursiglingunni var Sigurbergur Hauksson. Þegar norður var komið flutti áhöfnin sig um borð í gamla Börk (Birting NK) sem þá var nýkominn úr slipp og sigldi honum heim til Neskaupstaðar. Meðfylgjandi mynd er tekin þegar þeir feðgar, gamli og nýi Börkur, lágu saman við slippkantinn á Akureyri. Það var Þorgeir Baldursson sem tók myndina.


Grunnskólanemendur á Seyðisfirði heimsækja fiskimjölsverksmiðjuna

Gunnar Sverrisson verksmiðjustjóri segir gestunum frá verksmiðjustarfseminniFiskimjölsverksmiðja Síldarvinnslunnar á Seyðisfirði fékk ánægjulega heimsókn í gær, miðvikudag. Þá heimsóttu 16 nemendur í 6., 7. og 8. bekk Seyðisfjarðarskóla  verksmiðjuna ásamt kennurum sínum. Á móti hópnum tóku Gunnar Sverrisson verksmiðjustjóri, Snorri Jónsson verkstjóri og Jón Hilmar Jónsson rafvirki. Gestunum var sýnd öll verksmiðjan og framleiðsluferillinn útskýrður allt frá því að afla er landað og þar til afurðir skila sér í afurðageymslur. Undir lok heimsóknarinnar var farið upp á mjölturna og síðan var rannsóknastofan heimsótt. Á rannsóknastofunni tók Stefán Eysteinsson á móti hópnum, greindi frá störfum sínum og sýndi krökkunum ýmsar efnafræðibrellur að auki. 

Ekkert barnanna hafði áður komið í verksmiðju sem þessa og reyndar var verksmiðjuumhverfið einnig nýtt fyrir kennarana. Kom það hópnum verulega á óvart hve verksmiðjan var tæknivædd og nútímaleg en sýnt var hvernig er unnt að stjórna og fylgjast með allri starfseminni frá einni stjórnstöð.

Lesa meira...

Útvegsblaðið : Norðfirðingar og loðnan

Grein í Útvegsblaðinu, maí 2013Smelltu hér til að skoða grein sem birtist í Útvegsblaðinu, maí 2013

 

 

Unnið að undirbúningi síldar- og makrílvertíðar hjá Síldarvinnslunni

Birtingur NK í slipp á Akureyri.  Ljósm. Þorgeir BaldurssonUm þessar mundir er unnið að því að undirbúa fiskiðjuverið og fiskimjölsverksmiðjuna  í Neskaupstað fyrir væntanlega síldar- og makrílvertíð.Þá er einnig verið að dytta að uppsjávarskipunum fyrir vertíðina.  Að sögn Jóns Gunnars Sigurjónssonar yfirverkstjóra í fiskiðjuverinu er þar unnið að ýmsum umbótum um þessar mundir. Til dæmis eru flokkarar endurnýjaðir og starfsmannaaðstaðan bætt þannig að þægilegra verður að hafa fataskipti og hreinlæti verður aukið. Þar fyrir utan er verið að hreinsa, skrapa og mála ásamt því að almennu viðhaldi er sinnt.

Jón Gunnar segir að margt fast starfsfólk fiskiðjuversins sé í fríi um þessar mundir en það mun koma aftur til starfa hresst og endurnært þegar síld- og makrílveiðin hefst síðla júnímánaðar. Lokið er við að ráða sumarstarfsfólk í fiskiðjuverið og gengu þær ráðningar afar vel.

Starfsmennirnir í fiskiðjuverinu á síldar- og makrílvertíðinni verða 96 talsins og munu þeir starfa á þrískiptum vöktum. Á hverri vakt starfa 26 beint við framleiðsluna en að auki starfa iðnaðarmenn í verinu sem fylgjast með öllum tækja- og vélbúnaði og sjá til þess að hann sé ávallt í fullkomnu lagi.

Lesa meira...

Ágætur afli á Örvæntingarhorni

Trollið tekið á Bjarti NK.  Ljósm. Þorgeir BaldurssonÍsfisktogarinn Bjartur NK landaði tæplega 103 tonnum af þorski í Neskaupstað í gær eftir tveggja og hálfs sólarhrings veiðiferð. Að sögn Steinþórs Hálfdanarsonar skipstjóra var um fínasta fisk að ræða sem hentar vel til vinnslu. Aflinn fékkst á Grunnfæti og á Herðablaðinu.

Bjartur hélt til veiða strax að lokinni löndun og hóf veiðar á ný á Örvæntingarhorninu. Í fyrsta holi fengust tæp 7 tonn af þorski eftir 35 mínútur, síðan um 5 tonn eftir klukkutíma hol og í þriðja holi fengust 6 tonn eftir 3 tíma. Segir Steinþór að ráðgert sé að Bjartur komi til löndunar með um 100 tonna afla á fimmtudagsmorgun.


Undirflokkar